𝕶𝖍𝖎𝖗𝖆𝖑𝖑𝖆𝖍

To die for the sake of dying – I prefer to die of passion than to die of boredom!

[khiralla96]

مرثية للعمر المثالي .. و محاولة لإحياء الرماد

[khiralla96]

قاعد على سطح البيت

بسيجارة

من مدة كبيرة...

و مالفش كعبة في اي زقاق

ولا حارة

و لا صلاش في بيوت الشعر

لرب البيت

ولا زار مقامات الصورة

ترّب

و كأنه ازازة ف ركن بعيد

مكسورة

و كأنه ماسورة ف سور غرقان

الشتا بيبل تيشيرته الإسود

بقا يشبه...

ريش الغربان

لو كان...

في ليالي الأيام الفايتة

كسر البرواز ع الحيطة و قام

نفخ الأوهام م الاوضة

جهز لبسه الشيك

نزل السلم و المفتاح ف إيديه

ضرب الخرطوشة ف رجله على الاسفلت

طير طيف النوم من عين العالم

كان ممكن يدخل جوا نسيج الدنيا كخيط

مش بقعة

ف سطح

البيت

[khiralla96]

بيطبطب

على كتف الأيام

و يقول للعمر اللي بيزحف

نِنّا هوه… نِنّا نام

و لحد ما ييجي الصبح يقوم

على صوت الشارع و الأوهام

و يلاقي النونه النايم جنبه بيكبر

و يلاقي الخيط في جبينه بيكتر

ويلاقي الروح السابعة بتظهر

فبيقرر انه يبطل

يفرد ايده الرابعة يطبطب

ع الأيام

#احمد_خيرالله

[khiralla96]

لو قولت لكفي ارسمني

راح يكتب فوق الورقة

خطيئة

لو قولت لعيني اقريها

هتشوفها

بريئة

لو قولت لقلبي يحس

هيدق 7 دقات و يموت

في دقيقة

تشتغل الغنوة اياها ف ودني

اخر غنوة سمعت صداها

و ماعرفتش

أوطيها

و دا وصف دقيق

للفكرة اللي مخلياني

أطوف حواليها

لو عندك كلمة .. قوليها

انا مش من عادتي صبور

و بمل

يمكن .. لو حركتي شفايفك بس

أستنتج

م السينما الصامتة ف نظراتنا لبعض

مفهوم الضل

و ابطل مثلا اني اقول للكف ارسمني

و اقوله ارسمها

فيكتب فوق الورقة

الحل

و اقول لعنيا اقريها

و أقول للقب يحس

تشتغل الغنوة اياها ف ودني

و أبطل احاول أوطي الصوت

علشان الصوت المرة دي

صوتك انتي

[khiralla96]

زي لما صحيت ف مرة الصبح

سهران من امبارح

ايديا اقصر من كمام البيجامة

معرفش ليه انسان يكش

في ليلة واحدة

مش سنين ياما

مع ان عيني المنطقية

شافت ملامحي في المراية

بنفس أبعادها العادية

و دي مش قضية

القضية…

اني كنت اغمق كتير

من بشرتي الطبيعية

شبه القماش

لو يوم تبله

كنت انا مبلول حقيقي

بس خوف م المسؤولية

[khiralla96]

ماقفلش بابه وراه

ساب فرصة لخروج محتمل

يمكن يكون قاصد جريمة

و زوزو تستاهل صراحه القتل

مع انها -بنت اللئيمة-

تغري حتى الموت

يدخل معاها السيما

يطلع معاها الشقة في التالت

ياخد كاسين الضيافة

و بوسة

و يمشي متخدر شفايفه

يمسح الروج من لياقته

هو اللي حس ببرد

لما رد الباب

و اتعلق الترباس

في قماشة البالطو

ساعتها بان السر

بنطلونه اللي اتنسى في حبل الغسيل

كان هو خيط فك القضية

و الدليل

على ان زوزو بنت موت

مش بنت ليل

#احمد_خيرالله

[khiralla96]

ممكن أكون واهم

زي دون كيشوت

ممكن أكون واقعي

بس شارب شوت

ممكن أكون إنسان هنا

و ف مكان آخر .. مجرد قط

و بتوه في أفكاري الغبية

و دي .. ضريبة الجوزائية

#احمد_خيرالله

[khiralla96]

ضاق النفس

و اتخدّر الوعي الخيالي

بقا خالي م النظرات و خالي

من ملامح وشه في العمر المثالي

غضبت عليه الصورة في العشرين

-و ماتصورش تاني-

عمال بيزحف فوق عتب تلاتين

أدوات بُنا ..

قصعة و حبل و مسْطرين

خرسانة للسقف اللي بيضلل

على الأحباب

تايه ما بين ..

سطح المدينة و قرية السرداب

ما بين الواقع الصادق

و بين مستقبله الكداب

في أرض تانية ..

حيث هذا الباب

بيودي للراحة اللي متشالة

لكشف علاوة منسية

ماهوش بيودي على برتيتة العمال

و وردية

و هد الحيل في سقالة

ايه يفرق الدم اللي في الشرايين

عن الجاز اللي في الآلة ؟

كان بقعة ثابتة في كشوف الحضور

بصمة ايديه حفظت مكان الدور

كان قط اسود ماشي فوق السور

دلوقتي متحول لحصالة

مابقاش بيلبس نضارات غالية

رغم انه في عوالم موازية

أكَّل ملامحه لأهله فانتازيا

نايم ..

و عدسة عينه في الصالة

#احمد_خيرالله

[khiralla96]

على شكل دايرة الليلة - قمر النهاردة -

على شكل عجلة ميكروباص

سواقه نحس

او دبلة عاج

متعلقة ف تابلوه لتاكس

او اي حاجة توصل الانسان لبيته

من غير ما يبقا ف دايرة تايه

زي قمر النهاردة

#احمد_خيرالله

[khiralla96]

إوعَى تبقا زيهم و تمل

حاول

هتوصل يوم لشمس و ضل

مش كل ليل مالهوش نهاية و ممل

حاول

و حل

و حل تاني و حل

طوق من رقبتك علقوه الناس

عقدة في خيط الذكري و الاحساس

المسألة الصعبة في جيب الشهر

البنكنوت مش حمل فوق الضهر

و انت اللي مكتوبلك تلف و خلاص

حاول

#احمد_خيرالله

[khiralla96]

كل ما أحس نفسي فاضي هعمل غلاف جديد للديوان

لحد ما أعمل أم الديوان

[khiralla96]

زي علبة في رف في الدكان

مالهاش زباين في المكان

غير ضلمة الليل المؤدب

و الأمان ع الرف

حتى التراب بقا ضيف خفيف

و الأخف ..

نظرة فضول تشبه للمسة كف

محتاج يشوف الشمس في شروقها البعيد

امتى الضلام بيخاف من العواميد

يرجع يقيد في كفوفه شمع الصوابع

لكل عابر جديد

و لكنه من غير ايد

و بعيد عليه الشوارع

لا يمتلك غير شوق

مركون في جنب

ماهوش في الارفف فوق

كل أما يملاه الغضب

يفضا بأمل و يروق

يلمس بصمته النسيم

و يعود لرفه القديم

يفتح بيبان الذاكرة

للضوء

#احمد_خيرالله

[khiralla96]

تسعة و عشرين سنة عدوا خلاص

تسعة و عشرين بني أدم نايم من غير راس

اجساد مرمية ف راسي

و دي ناس اعرفهم جدا

مثلوا جوايا في فيلم قديم أبيض و رصاصي

و أنا في التلاتين دلوقتي اقدر

أفرزلك منهم كام كومبارس و كام فنان

كان دورهم جوا الفيلم ف عمري أساسي

مش ناسي الأحزان صدقني و مش ناسي الناس

انا بس العمر بيحرقني في سيجارة و كاس

متورط في جريمة عقلي

تسعة و عشرين بني أدم .. أنا من غير الراس

#احمد_خيرالله

[khiralla96]

مبروك

خمس ايام من غير ما تقتل ابوك

من غير شياطين تهزمك

و ملايكة يتحدوك

مبروك عليك الساقية و الشوك و المراتب

مستقر الشغل و الراتب؟

امتى بيحاسبوك على الاحلام؟

ع العموم مبروك

خمس أيام

طلعولك كرش من قدام

قعدوك في البيت بحماله

رجعوك م الشغل ببقاله

انزل احكي لأبوك عن الحالة

قوله حاسس اني رحالة

ماشي خطوة لتحت خطوة لفوق

ع العموم .. مبروك عليك الطوق

#احمد_خيرالله

#القط_الاسود

[marehan9]

[khiralla96]

This design took me the whole fuckin' night to do it .

[shakespearean-love]

𝙼𝚞𝚝𝚞𝚊𝚕 𝚠𝚘𝚛𝚜𝚑𝚒𝚙… 𝚠𝚒𝚝𝚑 𝚢𝚘𝚞 ❦