1天氣傷冷抑是傷燒的時，我頭殼就無咧動。開暖氣了後，精神攏來矣。兩工前，飼Pong ê早頓伊煞一喙嘛無食，khû咧遐。平常時伊看著飼料起毛婸甲會跳舞。觀察伊的草佮水，補過了後過12點鐘全無減少，夭壽我拄著飼兔仔上驚的狀況——兔仔袂食袂啉，足有可能是胃脹氣。兔仔的身體構造，若是胃無爽快，腸仔久無振動器官會敗壞，胃腸產生的有害物質若濟會thāu死家己。誠奇的是伊精神袂䆀閣不時拍兔仔拳，大力拍伊的枕頭pha-ta pha-ta叫。我敲電話共伊掛急診，欲共伊囥入去外出的籠仔，伊閣袂爽大力chàm塗跤，伊敢若毋是足嚴重的，但是伊毋願食物仔，害我蓋煩惱。頂一篇文寫伊足健康，隨就予醫生看。
到病院了後，醫生真緊就來共伊接去檢查。照X光，伊確實無漲甲遐嚴重，但是胃有脹氣猶算危險，毋知敢會通無，若無通伊就準備軁入去棺柴啊！醫生看伊驗血報告講伊有脫水，建議吊大筒，閣有予伊注射，止疼佮藥仔等等，醫生上少有共伊注四針，醫生講Pong ê面看起來足臭的，我想應該是是注射注甲會驚。醫生報告伊的病情的時，連上慘的情形同齊講講的，本底聽甲心頭驚驚，落尾講Pong ê佇病房有食青菜，聽著伊有食矣我著較安心矣。
我佇病院陪伊，等伊水補予足，若無摸伊就欲共大筒的針線拆落來。照顧Pong ê我心甘情願，若是別人我就無確定啊。伊看起來若人咧講的：「目睭金金人傷重」，本來目睭就真大蕊，破病了後親像目箍塌落去目睭閣較突，毛摸起來焦焦，佮伊好好的時蹔然無成，伊親像一暝蔫去。兔仔吊大筒是對耳仔入去。飼伊青菜佮高級的草全食了了。伊醫藥費有夠貴，按呢敢算是愛食夠本？閣照X光的時，脹氣有咧消毋過猶未完全穩定。這時我決落來愛予Pong轉去厝裡，橫直伊有啥物萬一死佇厝裡嘛較贏佇病院。我干焦想欲用內科的方法治療伊，無拍算予伊開刀通腸仔，聽講足濟兔仔開刀了後隨就轉去矣，我毋甘伊受傷濟苦。
佳哉轉來了後伊隨有放屎佮食物仔，度過上危險的時期，佛祖有保庇，我這三工食素來感恩伊有好起來。我咒誓以後初一十五嘛愛食菜，共伊祈禱。
2你若無掛意、無愛彼座城彼个古蹟，in就會沓沓仔毀滅去。袂記是佇佗一本冊讀著這段。我陪Pong吊大筒的時咧想敢是我無夠愛伊，顧甲無夠齊全，伊毋才會破病。醫生有講兔仔腸仔窒著有足濟原因，我聽了較袂掛慮。醫生顧阮兜的Pong ê嘛顧著我的心情人誠好。
3讀楊千鶴的《花開時節》台文、華文、日文佮英語的4種語言翻譯版本。查某的友誼是足女性主義的表現，必須在先做為一个獨立的人，才會有友誼。
婚姻親像是義務，袂當去質疑婚姻，就準這馬無的確愛結婚，但是大部份人認為有結婚嘛是較好。過去逐家攏愛結婚的時，tùi婚姻佮情感有獨立的思考，確實是無簡單。到今婚姻猶是女性會拄著課題。所謂的適婚年歲就是會當生囝的年歲嘛，佇這个範圍的查某人都會予人催上好緊嫁嫁咧。感情掠外婚姻生活包掛經濟，小說中寫主角的朋友欲結婚啊，伊問學校家政課教用一百箍的月給做計畫，但是翁干焦有八十箍的月給欲按怎？伊覺悟講現實果然無遐理想啊，這段予我印象足深刻。逐家共婚姻佮浪漫關係箍做伙，阮先生共我講一个足精明的看法，若欲負擔結婚的義務，對方必須有比伊濟3倍的資產，才有必要考慮結婚。若講著感情毋是婚姻的契約縛會牢，按呢婚姻就是愛來講實際的義務佮錢。
ellievsbear
gracieabrams
kianamaiart
gummygunk
turnnoffyourmind
titsay
origamiaround
