某人

[lolsomebody]

中年失業

26th Nov 2023

從來都冇諗過 , 近呢十幾年都係工作嚟搵我,我好耐冇搵個工... 點知, 晴天霹靂, 將近50歲嘅時候, 我... 失業! 改朝換代，好平常啫。。。

究竟我仲有冇機會搵到份工？ 定係我會窮倒一生？ 願上天保佑🙏🙏

今年，2023, 工又無，男人又無，寄望2024, 一切會更好！

[lolsomebody]

生日

25th Oct 2023

又一個生日，又一個人過生日。。。

生日流流其實唔應該灰，但係，今年連朋友都無，我。。。其實。。。選擇過新加坡係咪一個錯誤嘅決定？ 當初過來為乜？ 而家好似兩頭唔到岸咁，好徬徨。。。

今年陪我過生日嘅又係我好朋友兼男朋友。。。電視機！

希望我今日去拜神所希望嘅嘢，會快D達成啦🙏🙏

[lolsomebody]

7th Jul 2023, 23:07

累

話咁快，今年又過咗一半喇。。。 有乜得，有乜失？ 得，得到好多嘅脂肪同埋龐大嘅工作量； 失。。。應該係我永遠得唔到嘅愛情。。。

好快又一年，師傅，我可以點？

[lolsomebody]

20th May 2023; 0102

Death

To be honest, I am not scare of death... 如果一覺瞓著，唔再醒就最好不過啦； 又或者一瞬間無痛苦地死去。。。 最怕嘅，應該係受到長期病痛嘅折磨而又死唔去嘅人。。。 希望呢一世都唔關我事🙏🙏

但係，可惜，我每日仲係要不停無聊地生活。。。

[lolsomebody]

17th May 2023, 22:45

重啟人生

啱啱睇完一套日劇，個內容係講述劇中嘅女主角 死咗之後， 發覺下世投胎竟然唔係人，而係一隻食蟻獸， 然後經談判後 ，獲得裁判處畀佢一個機會可以重新開始佢嘅人生，由零開始，等佢可以積多啲陰德，然後希望下世可以投胎做人。。。 故事講述女主角由開始到最後，係經歷咗六次人生， 每次人生都係有一個唔同嘅經歷，由第一次投唔到胎做人到捨棄可以投胎做人嘅機會，而重啟人生嘅目的，由搏取機會投胎做人，慢慢轉變為去到最後係希望救活朋友而重生，為友情而再活過。。。

我一路睇一路問自己，如果我係劇中主角，我會唔會想一次又一次咁去重啟生活， 希望每一次都做好啲，而到死有一個好結果，下世繼續投胎做人。。。 但自問我過去嗰48年，除咗工作還可以，感情生活可以話係一塌糊塗。。。 我冇信心重啟生活可以令我嘅感情生活過得比較順心順意。。。 可能只會一次又一次咁痛， 直至麻木不仁。。。 所以我睇嘅時候覺得，投胎做一隻食蟻獸， 一條沙巴魚或者一個海膽。。。唔係會好D咩？ 起碼應該冇乜思想負擔，心情冇咁煩重，個人冇咁攰咩？

實在好唔明白，收到你message嗰個星期，我比較冷靜，亦都冇去諗發生咩事，冇去諗你 。。。但係點解過咗兩個星期後，我反而情緒咁低落，成日諗我哋過去嘅種種？！ 可唔可以畀我忘記🙏🙏

[lolsomebody]

13th May 2023, 00:43

睇戲

猶記得，上一次同你睇戲，好開心嘅第一次，因為係平日，你話過平日唔想見我，係因為平日工作好勞氣，唔想心情唔好嘅時候見我，怕會影響到我哋相處時嘅感情氣氛，所以當我約你平日睇戲而你答應嗰時，我真係好開心，點知。。。嗰次係我哋第一次睇，亦係最後一次睇戲，同埋係，最後一次見面。。。

開場前，行過Guidance of the Galaxy張poster, 我話下一套我哋睇呢套吖，你話好。。。

誰不知，今日係我自己一個人去睇，因為。。。你已經決定從我生命中消失。。。其實，係咪我真係俾咗D無形壓力俾你？!

我真係好無語，其實我究竟做錯D咩，點解每一次個結局都係咁嘅。。。

[lolsomebody]

8th May 2023, 22:12

理想生活

其實，我諗咗好耐，好耐， 乜嘢先係我最想要，最理想嘅生活呢？

答案係我根本唔需要一啲好奢華嘅生活， 唔需要日日食好嘢，唔需要用名牌。。。 我只係想過一啲平平淡淡嘅生活。。。兩個相愛嘅人一齊住，無論有冇結婚都好，最緊要係相愛，仲要無第三者。。。 每日返工放工，放工一齊準備晚餐， 傾下計， 飯後一齊洗碗分擔家務， 做完家務之後，可以一齊睇下電視; 週末可以行吓街，睇吓戲咁啫。。。呢啲就係我想要嘅平凡生活。 其實咁樣，係咪已經算係好貪心？ 如果唔係，點解我到而家都過唔到呢種生活。。。

吖，仲有仲有，如果我真係搵到一個以上描述嘅人陪我，我希望我可以早死過佢😊

*********************************************

今朝發夢竟然夢到你，夢醒嗰一刻，我好有衝動message你。。。“ 既然你已經決定喺我生命中離開，可唔可以請你離開埋我嘅夢境。。。”

[lolsomebody]

6th May 2023 00:13am

前“男友”

我無諗過，原來我嘅直覺真係咁準。。。定係我真係一個天煞孤星？！

喺你最近send俾我嘅message, 我先知道原來我哋真係, 已經係去到男女朋友嘅關係，只不過呢個角色扮演又好快咁完咗啫。。。喺我仲未搞清我係扮演緊咩角色嘅時候，我就已經“被分手了”, 原因竟然係，你未ready?! 同埋我人太好?! Are you fxxking kidding me?!

其實，如果，你未ready嘅話，點解又要點起個火頭？！ 你知唔知, 唔係人人都可以咁易接受一個人，又可以咁易放低一個人㗎。。。

問心，我已經好努力咁喺錯誤中學習，喺每一次失敗之後都叫自己放慢D，唔好急，唔好太認真，學習唔好逼對方，盡量順其自然。。。我今次已經無逼你，甚至叫自己唔好諗咁多。。。原來。。。都係唔work㗎😢😢

我。。。仲可以點做呀？

P.S. 原來上次又好醉呀，寫完又唔記得😓

[lolsomebody]

18th Match 2023

新“男友”？

我。。。真係唔肯定我哋係咩關係，上過床，但係，上過床又算係男女朋友喇咩？！ 自從有過數段不愉快嘅經歷，我真係好懷疑。。。但係，我唔知係咪真係因為自己dry咗好耐。。。你俾到我嘅感覺，真係，好溫暖。。。雖然，你無親口講或承認我哋嘅關係，但係。。。我覺得你對我好好，好照顧我，同埋我嘅感受，就算之前拍拖都無感受過。。。令我感覺，我，真係喺你個心有一席位嘅。。。(我覺得啫。。。)

但係，我好驚，真係好驚。。。我係咪又自作多情？！ 係咪所有嘢都係自己嘅妄想，好驚我又一次萬劫不復。。。其實我對感情，真係，真係，怯！

我不求一段驚世駭俗嘅感情，只求一段真心真意的平凡感情。。。求神保佑！

[lolsomebody]

29th Jan 2023

仲有19分鐘就到你生日。。。 我應該祝你生日快樂吖，定係。。。

我唔知點解，我明知你呃我，明知我同你冇可能。。。 但我都仲係好掛住你。。。 我解釋唔到。。。

The message just sent you, 有啲鬥氣嘅成份，又有啲出氣嘅成分。。。 如果你覆我好明顯係而家冇閪屌， 又想返嚟呃閪屌咁啫， 但係我唔會再奉陪囉😏😏

[lolsomebody]

1st Jan 2023

New Year

又一年過去，又一年開始！

原來平安夜醉到寫咗blog都唔記得。。。 原來一路話唔在乎嘅嘢，其實都仲係好在乎嘅。。。唉。。。

下一年除夕🙏🙏🙏

[lolsomebody]

24th Dec 2022

平安夜

平安夜，真係好撚平安囉。。。 點解？! 因為係自己一個喺屋企過囉, 所以好安全囉。。。

其實我要嘅男人好簡單啫，佢愛我，又可以負起最基本嘅生活使費，我就ok啦。。。 因為我都有做嘢㗎嘛， 我有糧出㗎嘛。。。 我唔係一個駛男人錢嘅女人😊😊

[lolsomebody]

20th Aug 2022

姊妹對話

某一日，同家姐講起電視劇。。。

姐： 亞妹，突然發現，原來你真係好鍾意睇古裝劇，尤其係仙凡類故事。。。

妹： 係呀，因為喺呢D劇入面，先可以搵到我嚮往嘅愛情

姐： 吓，我同你唔同，我就比較鍾意睇一D好現實嘅愛情， 例如”麵包舆愛情”，我一定會揀麵包囉。。。

妹： (心諗)， 就係因為你個妹喺現實世界遇到太多現實嘅愛情，所以佢只可以喺電視劇裏面 搵佢嚮往嘅嗰一種， 一對一，一生一世一雙人，刻骨銘心的愛情。。。只可以講句，家姐，你太幸福喇， 唔需要經歷一啲呃人嘅感情騙局，爾虞我詐， 勾心鬥角。。。 希望你會珍惜你得到嘅。。。

<update as at 2022 Christmas Eve>

經過10月份今次返香港，我對我家姐好有改觀，從來冇諗過佢情願死都唔想繼續而家嘅生活， 我個心好痛。。。 我希望佢可以快樂🙏🙏

[lolsomebody]

27th May 2022

絶望

原來。。。心情真的是會影響味覺的。。。

一瓶常喝的酒。。。原來。。。味道是會跟隨心情而變得不一樣的。。。 開心是甜的，不開心是苦澀的。。。我猜這是正常吧！ 跟人生一樣~

無語問蒼天。。。 究竟我前世係咪真係做咗好多錯事？ 定係我呢生人係被咀咒？

其實一年前我已經知道同佢無可能一齊，但係點解當佢今日無意中俾我發現佢有新女朋友嘅時候我個心會咁痛嘅😭😭 我好唔開心😔😔

點解當日佢講到我係佢嘅真愛嘅時候， 而我哋唔可以一齊係因為我做唔出傷害佢老婆嘅事情。。。但係今日佢又可以再同第二個一齊？ 求其一個都得？ 定係你對每個人都講，佢係你嘅真愛？ 人、心、真係可以相信咩？ 我。。。開始懷疑人生。。。

我解釋唔到點解我個心咁痛，我不斷喊，我忍唔住我嘅眼淚。。。

#whereismyhappyfriday

#人心難測

​#人性可恥

​#還可相信人嗎

#我還可以算是人嗎

​

[lolsomebody]

9th May 2022

母親節

琴日係母親節，可惜我不能跟媽媽慶祝，希望媽媽身體健康！ 開開心心！希望我早日返到香港見你🙏🙏

喺一個開心嘅節日，令我感到遺憾嘅係。。。呢一世我都唔會有機會做媽媽。。。

希望全天下嘅母親快樂健康！

[lolsomebody]

1st Feb 2022

流年運程

師傅話我今年犯太歲，可能會有血光之災， 有意外。。。 聽完之後，我會記喺個心度，希望盡量避免。。。 師傅跟住又話我今年會有姻緣， 但係唔知點解我唔係好開心， 仲好耿耿於懷，可能係因為師傅話雖然我有，但係可能唔last得耐。。。然後再同我講。 其實你命宮入面有好多。點解你成日話冇？

我諗我真係應該係時候放棄。。。 如果我得到嘅只係人哋嘅老公或者男朋友， 又或者係一段好短暫嘅快樂但係換來長期嘅痛楚，我情願唔要😞😞

[lolsomebody]

1st Feb 202

虎年大年初一

Hmm hmm... 實在唔知自己可以講D咩，人人開開心心咁慶祝新年，而我。。。我又繼續戇膠膠自己一個喺屋企，望住個電視自我娛樂， 因為已經唔知可以做D乜嘢。。。

今年係虎年， 係我人生裏面嘅第四個虎年，哈，即係我已經48歲囉。 48歲，係咪已經到咗人生嘅尾段？ 點解人哋嘅48歲可以擁有咁多嘢？ 而我嘅48歲係一無所有。。。 除咗一身嘅脂肪。。。而。。。仲要我要嘅並唔係一D天馬行空嘅嘢。。。

祝各位虎年行大運! 身體健康! 心想事成!