ÇKA SHOH? Shqipërinë e mosvarun' (sipas deklaratës së pavarësisë) e shoh të vendosur në litar që sillet si peshku pa ujë, në kërkim të jetës. Shoh të vrarë, por të gjallë. Shqiptarë që së pari të tregojnë flamurin apo hymnin dhe shumë vonë Shqipërinë për ngah shpirti, se ta duash Shqipërinë, do të thotë ta mbash aty; përkundrejt çdo lloj tragjedie, ta mbash aty, të qëndrojë! Po tjetër, çka shoh? Besim të cunguar prej të mjerësh që pranojnë të shtypen. Ekspozita antivlerash me audiencë marramendëse. Presion psikologjik i ushtruar tek një popull me çehre të lodhur, të rraskapitur, të pafjalë, të pazotë. Patriotizëm virtual prej llapanjozësh e sharlatanësh. Puzzle i pazgjidhshëm. Zhgënjim masiv nga më i riu tek më i vjetri. Has broçkulla identitetesh brenda një kombi. Reforma tallëse që kërkon t'i zhysë të vetët në batak; në sojin më qesharak, të tmerrshëm, çnjerëzor të mundshëm. Shoh njerëz të çorientuar, pa ideal e perspektivë, të mbytur në llumin e interesave të kllikave politike. Kërkojnë ndihmë, por ndihma vonon ose s'vjen hiç, siç bëjnë dhe shërbimet publike. Shoh fëmijë që ia njohin erën drogës dhe me të i japin vlerë rrogës. "Të rrosh apo mos të rrosh?!" - dilema shqiptariane moderne...apo thjesht të mbijetosh? Kumtime të shtangura, pa pyetje. Busulla të zvarritura së koti në rrugë në kërkim të përdoruesve të hutuar. Snoba të pandreqshëm që sendin e bëjnë frymor dhe me të nisin e jetojnë. Helme gazetash të tipit "vritet, vetëvritet, dhunohet, përdhunohet, plaçkitet, arrestohet, ndotet, masakrohet...". Shoh më shumë beton sesa lule. Smog llahtar që mbulon qytetin përnatë. Valë të nxehti, përmbytje, tërmet. Sikur dhe moti ka filluar të ngjasojë me njerëzit. Makiavelizëm bashkëkohor - epidemi e përhapur së fundmi në mbarë popullin tonë që përmban në thelb: dredhinë, gënjeshtrën, mashtrimin, tradhëtinë, thyerjen e premtimeve, cënimin e shprehisë së tjetrit; vetëm e vetëm për të arritur qëllimet personale qofshin ato pozitive apo negative duke zbehur kështu principet kyçe të etikës. Shoh, teksa jetohet në një shoqëri pa ditur të jenë 'shoq' të mirë të njëri tjetrit dhe pa ditur të jenë socialë, komunikues apo kontribues. Tollovi biznesesh, grumbuj pallatesh, shtëpi' ngjitur, fqinj që nuk përshëndeten, fëmijë që nuk luajnë, kafene të mbushura 24/7, trotuar këmbësorësh që s'dallojnë nga rruga e makinave; zhurmë, kaos, zhurmë, kaos, zhurmë, kaos; kaos, zhurmë. Por ndër të gjithash çka shoh, unë kam vendosur /mos ta humb vizionin /. [ MIMOZA TOÇILLA 💡]
romaincrisis
titsay
pixelskylines
amandla
izzy806
areudirty
