@muhammadfahdmousa - Tumblr Blog

Posts

الأغنية جميلة طبعا و الكل حافظها، لكن الأجمل و اللي الكثير مننا مبياخدش باله منها و بيقفل الأغنية بدري قبل ما تخلص معرفش ليه، هي ال outro، تنتهي الكلمات و يسكت منير عن الغناء و تبدأ فرقة يحيي خليل تلعب صولو رائع فاصل موسيقي رايق بعد الدقيقة 5:30. منير و فرقة يحيي خليل كانوا عاملين زي بوب مارلي و فرقة The Wailers أو يعني اعتقد هم متأثرين بالتجربة. بحب الفاصل ده أوي، تحسها موسيقى حياتك، ممكن تعمل فيديو تحط فيه صورك أو فيديوز صورتها ع موبايلك وثقت بيها لحظات و تعمل تجميعة كده، و يكون هذا الفاصل الرائع هو الميوزك باكجراوند. بحب نسخة الكليب ده عشان تشبه كتير أوي كليبات قعدات بوب مارلي مع فرقته.

ممكن تشرح أكتر خلافك مع تريكة في علم الرينبووز 🙊

عشان بينتقد حملات دعم المثلية اللي بتتعمل ف الدوري الانجليزي و بيصفهم إنهم ضد الإنسانية و الدين كده، فيعني محبتش منه يدخل ف القصة دي، مش ناقصين كراهية و لا عيال تتشجع و تلقط منه هذا النبذ فممكن يحرضوا ضد زمايلهم المثليين ف المدرسة أو المشكوك فيهم يعني، و ده بيحصل كتير يعني و شوفناه، مش بأفور ف التقدمية يعني. هي ميول فطرية ف الأول ف و الآخر، لا هي مرض ولا في ورقة بحثية علمية طبية واحدة أثبتت إنها مرض أو كيف يعني من الزهق، و حتى و لو، طالما محدش جه جنبك، ملكش دعوة بيه، و دي قناعتي الشخصية يعني الغير ملزمة، معروف عنه التسامح و طيبة القلب، فيعني محبتش منه الاتجاه ده.

أغلب اللي بينتقدوه مش بيقارنوه بحد لا بيقارنوه بعمرو القديم وأنا بحب عمرو جدا لكن اللي بيحصل الفترة الاخيرة منه دا مش لايق ع تاريخه، شىء يحسب اه بيجاري الزمن وبيقدم المرغوب لكن حقيقي مش فن يعيش زي امجاده القديمة.

ولو مش واخد بالك كل ألبوم جديد الناس بترجع تحن وتشتاق وتسمع البوماته القديمة فهو حرفيا عايش ع اسطورته القديمة

عمرو بقاله 40 سنة بيغني، منهم 37 ألبوم، يعني افريج ألبوم كل سنة، افرج الألبوم 10 أغاني، غير الأغاني السنجل، غير الأغاني اللي حاططها ف الدولاب و طلب متطلعش للنور غير بعد وفاته. ف عنده عدد ضخم جدا، فطبيعي تحس إن ف تكرار أو تشابه أو تقارن عمرو القديم بالجديد. مهو لو عايز يعملي تملي معاك و حبيبي يا نور العيون، مهو هيعملهم زيهم عادي دلوقتي، سهلة، هو خلاص تشبع من الجنرا دي، و عايز يغير و يجرب و يكسب فئات عمرية جديدة بتسمع هاوس و غربي، و أغنيتين مقسوم يراضي بيهم الاجيال القديمة.

و مين قالك إنه مش هيعيش، مهو ألبوم اكتر واحد بيحبك كان بيتشتم عليه، و دلوقتي الناس بتقوله عليه التوب، اغنية "و غلاوتك" اللي وقتها متصلة ع البرنامج قالتله مين يقول ان الاغنية دي هتعيش، و اهي عدت 30 سنة و عاشت اهو، عيال ف اللفة بتغنيها، ف مين قالك إن الالبومات الجديدة مش هتعيش؟

ايه سبب حبك لابو تريكة لدرجة انك حاطط صورته cover للبروفايل من سنين؟ خصوصا ان ناس كتير مختلفة معاه من حيث مواقفه السياسيه واتيتيوده الفتره الاخيرة كمحلل رياضي.. يعني حتى اللي كان بيحبه زمان كلاعب ما بقاش متقبله دلوقت زي الأول

الكلام عنه ميكفيش للأسف، لكن اختصارا هو ملمس معايا مع اكتر لحظات كنت فيها محبط و مخنوق و خايف من الحياة عامة، هو بدلها فجأة بطاقة أمل كبيرة ف الجون اللي جابه ف آخر دقيقة ف ماتش الصفاقسي فاينال افريقيا 2006، فضله الجماهير تشتمه و عملوه تيفو و هو راكع ذليل، و ده كان مموتني من الغيظ إنهم بيهنوا تريكة، فجأة جاب الجون فيهم و سكتهم و خدنا البطولة، غير لحظات الكروية مع المنتخب و الأهلي، نبقى دايما خلاص خسرانين و بنضيع، يجي هو ف اللحظة دي يحسم و يقلب النكد لفرحة عارمة، كل مرة يعمل كده. فتيفو صورته لقطة جون الفاينال دي نقطة تحول ف شخصيتي و نظرتي تجاه الحياة.

الجانب التاني بشخصيته النضيفة و اتساقه مع نفسه، اي لقاء لاعيبة صغيرة كبيرة زاملواه، كلهم بيحكوا اساطير عنه و عن كرمه و عطاءه، فلوسه دايما للخير و للاعيبة الصغيرة، و يدي عربية هدية للاعب شاب و يجوز ناس غير مقتدرين، عنده درجة من الإيثار و الزهد ف الحياة ملمسة معايا، إن طيبته و كرمه مش عبط أو سذاجة، ده اختيار واعي منه و قوة كبيرة و استغناء، رغم ضغوط الشهرة و الفلوس و كل الاغراءات، هو ملتزم و جدع و متغيرش. نجيب ساويرس يدله مليون جنيه هدية، يقوم واخد الفلوس و يوزعها ع مستشفى السرطان و يقسم الباقي ع زمايله و هكذا، محطش فجيبه مليم منها.

الجانب التالت، مواقفه السياسية دي شيء تخصه، المهم إنه مش مأجور ولا مزقوق، هي بتعبر عن فكره و قناعته، رجل متدين و زي باقي الناس كان مفكر الاخوان هم الاختيار الافضل للبلد، و دي وجهة نظره لا تعيبه. اعتراض الناس و هجوم الإعلام هو عشان قال ان مقتل 1000 شخص دي يعني مذبحة و قالها و مهموش و دفع تمنها، فيعني لو حد معترض إن دي مذبحة، يبقى مش إنسان اساسا و هجوم المش إنسان عليه ساعتها يبقى وسام على صدره.

العكس تماما، هو كمحلل شاطر جدا و كل مصر كانت بتسقفله و تحييه ع انتماءه. مع انه اتهاجم و ممنوع من السفر و مخلهوش يحضر جنازة أبوه لما مات، رغم كده هو لسا منتمي للبلد و يشجعها و يغنيلها ف الاستديو، حد غيره كان خلاص و الله انتهى أمره مع مصر، لكنه لسا عاشق ولهان راجل جدع الكل يحترمه و بيخدم مصر و مخصص بادجيت لأهالي الشهداء 74 شهريا توصلهم لبيتهم.

لو فيها نقد يعني، فهيبقى رأيه ف علم الرينبو، أنا مش متفق معاه فيه و دي نقطة خلافي معاه.

دا مش هينكر اداء عمرو وحش يا محمد وكلها أعمال تجارية مستهلكة ونفس التكرار ولو محظوظ بيكون ف اغنية ف الالبوم كله تعلق فترة مع الناس وتكون تريند عشان اللحن علق معاهم مش اكتر

و الله هي آراء و أذواق، و مش متعصب خالص تجاه اللي بيكره عمرو، طالما أنا بحبه، كرهك له مش هيثير تأففي اطلاقا. كرهك له لوحده كفاية و ڤاليد، إنما تبدأ بقى تبرر كرهك ده او نقدك و تمنطقه و تقول آراء معلبة جاهزة، هنا بحب أرد و أنكش. أنا بيبقى هاممني الناس أو أصحابي كلهم يشاركوني للإستمتاع باغانيه و مش عايزهم يفوتهم هذه الاوقات ف عمر اسطورة حية. قولي مثلا و الله حماقي عامل شغل مختلف، المزيكا الفلانية ف المغرب دلوقتي سابقة عننا و دخلوا آلات معينة و كلمات مختلفة و و و، اي حاجة بس تقول إنك شفت النقيد و عقدت مقارنة و قولت ان فلان بيبسط اكتر، هقول الله يوفقك، اي حاجة تبسطك هفرحلك. أنا بتكلم بس ع الناس بتنسى نفسها و تنقد ف عمرو، إنما ف المقابل هم مبيحبوش حد بديل و لا متابعين الجديد ف المزيكا، و مش بعيد علاقتهم بالاغاني سطحية و هامشية ف يومهم، و يوم ما يسمعوا بيبقى ع الراديو اللي مشغلينه و هم سايقين ع الطريق، مش هم اللي بيروحولها.

النقطة التانية، إن لما راجل كبارة يكسر ال 60 سنة، عنده استمرارية فوق ال 40 سنة، صوته ف الحفلات غاية ف الروعة و الجمال، مظبط لايف ستايل بتاعه عشان يبقى قادر يحافظ على صوته و يكون واصل لأعمار مختلفة و لأطفال أد أحفاده، ده شيء يدعو للدراسة. و يدعو كمان للحسرة لأن ده عيبة ف حق المطربين الأصغر منه و ف حق المطربين الشباب، اللي بيعملوا أغنية يفرقعوا بيها و يعملوا على حسها لقاءات و يالا اياد الموجي و عبعاطي و يستهلكوا نفسهم ف حتتة غلط كأنهم وصلوا خلاص، و ينسوا إن الغناء هو شغلتهم، لدرجة إن راجل كبارة يحط عليكوا كل سنة. طب طالما هي سهلة يا جدعان كده و الراجل بيستسهل؟ طب ما تعملوا زيه، ميعرفوش و الله.

و متفهم شعورهم ناحية راجل عجوز لابس سلسلة و عامل تاتوه و شكله فرحان زيادة عن اللزوم، فده شيء قد يستفز بعض الصغار اللي زهقانين من الحياة. هو كاسر نمطية الراجل الكبارة اللي مفروض يعتزل بقى و يطلع يتكلم عن امجاده ف صاحبة السعادة، الراجل عطشان و طموح لدرجة عجيبة، طب ما نتعلم منه يا جماعة و نستفاد و نفتخر إن الراجل ده مصري.

مشكلتي المضحكة مع أغلب الصحاب البنات، لما تحكي لواحدة عن موقف حصلك بليل مثلا و إن ظابط فاسد وقفني ف كمين و و، و أنت ف نص المعاناة بتلاقي: ايه ده ما شاء الله عليكوا ع الولاد بتخرجوا تتفسحوا بره البيت عادي بعد نص الليل. احكي عن مشاعري تجاه الوحدة، و إنه بيتجلى ف رمضان وقت الفطار و و .. تلاقي: يا بختك و الله قاعد لوحدك ف الشقة محدش بيكلمك. و الله عيني بتدمع ع اي رييل فيه القاهرة، تلاقي: كويس إنك خرجت من الخرارة، دي الطماطم بقيت ب 70ج، الدراما مش هتنفعك. مشاكل مع الرجالة بتتريجر عندهم حاجات بتطفح ف وشك و أنت بتتكلم عادي ف النص، تخليك تندم إنك بتفتح قلبك يعني. مرة جيت بقول لواحدة: ما شاء الله روحتي مصيف مع أهلك؟ يا بختك و الله، دا أنا محروم من الموضوع ده، بنكشها يعني بنفس الطريقة، تلاقي: الله أكبر ف وشك، يا عم و الله بنروح و بنتخانق هناك ووو.. بقيت حسود دلوقتي و عيني وحشة، و تقعد تشرحلها ف الإفيه ساعة بقى.

قصدي إن ف مواضيع كتير البنت مبتقدرش تتعاطف فيها معاك، و مبتاخدش منها عقاد نافع كأنك بتحكي مشاكل عالم أول بالنسبالهم، يا هتديهملك ف وشك و تقول كلام زي الدبش، ياما لو واحدة بتحبك/ بتعزك/ عندها ذكاء عاطفي هتسمع منك و تتدعي التعاطف بتمشي حالها لكن دييب انسايد، هي مش بتبقى معاك أوي ع نفس الموجة.

عشان كده الذكورية أو التسلط الأبوي بيخلق عند البنت غيرة مفهومة، و ف بعض الأحيان نزعة انتقامية خفية تجاه الرجالة، أو بيخلي البنت معندهاش تخيل عن اللي أنت بتحكيه أصلا لأنها مجربتوش، فيعني هي مش فاهمة اصلا، ف بأي إمارة تتوقع منها إنها تتعاطف معاك أو تديك حل أو رأي أو حتى تتونس بحكايتك؟!

إن انعدام المساواة ف الحقوق، بيخلق فجوة كبيرة جدا بين الجنسين، و إنه بيطول الرجل نفسه و بيدفع ضريبته، مش بس الستات، أنت بتفقد فرصة ونيس ف بيتك، فخلاص هتضطر تنزل القهوة مع اصحابك تفضفض بقى.

" ما شاء الله حتى و هي مزنقة قادر تنزل القهوة عادي؟!"

الموضوع أوقات و الله مش ف ما يقدمه عمرو نفسه، ساعات الشخص مبيبقاش قادر يتذوق أي منتج موسيقى جديد، اي حاجة جديدة عامة، أغنية أو فيلم، ف مصر أو بره مصر، النفسية السيئة اللي للأسف بتخلينا نشوف الواقع بطريقة مشوهة، حتى الشيء الحلو الواضح اللي معلهوش خلاف ف فرحة المنتخب، الشخص نفسه ممكن ميبانش عليه اي فرحة ولا خد من حدث ضخم و استثنائي زي ده أي طاقة أو جرعة تفاؤل تزقله يومه أو مفهوم جديد إيجابي يستخدمه ف صالحه أو يرجعله الإنتماء. فالموضوع كله بسبب رؤيتنا للواقع اللي احنا عايشين فيه، مش منتميين له خالص و لا حاسين باي عامل مشترك يجمعنا مع الناس، مشاعر اتبلدت و اتخدرت اصلا. و لو جيت سألت الشخص أنت آخر مرة دورت بنفسك على مزيكا كان امتى؟ طب آخر مرة حاجة عجبتك فيها ف المطلق - بره عمرو يعني- كان سنة كام؟ حاجة يعني بتستشهد بيها من جمالها و نضافتها؟ مش هيعرف يجاوب عليك. هيلجأ للمقدسات بقى و يقولك أم كلثوم و العندليب، نجاة الصغيرة مثلا بالنسباله دي آخر حاجة ممكن تكون عجبته، مرتبط بالزمن اللي بيقوله عليه جميل، أو عشان هم ناس توفت، ف بنضيف لهم قداسة من عندنا ناحيتهم، بإنهم دايما بيرفيكت و توب التوب و مبيخيشوش. زعلان أوي إن لينا أصحاب الزمن توقف عندهم عند سنة 2010، أي حاجة قبل السنة دي هي أحسن فيلم و أحسن أغنية و أحسن منتخب، ما بعد هذه السنة بقى هو عبارة عن قريفة و زربنة و إن العالم خلاص بينتهي و مفيش حاجة بقى ليها معنى، اللي ذاكر ذاكر و اللي غنى غنى، عمرو بقى أو غير عمرو، بس يمكن عمرو هو اللي ف الصورة فهو اللي بياخد الطريحة كاملة، و عشان كده عدم تقبلهم لعمرو هو إنعكاس بديهي لرؤيتهم للواقع الحالي و عدم تقبلهم، بما فيه من الانفصال عن الناس اللي عايشين وسطهم و عن اهتمامتهم و عن ذوقهم ف الأغاني بكله بكله. نفس اتتيود العواجيز اللي بيزعقوا ف الشارع على اي حاجة و يشككوا ف أهلية أي حد أصغر منهم بسنة. يمكن الموضوع مش كده و حبك لعمرو خلاك تتفلسف يا محمه، لكن ادينا بنتكلم و نبحث و نفكر و نحلل و نغلط و نصيب.

الأغنية بتتكلم عن مغنواتي بيشرحلنا فيها إن لما حبيبته بتكلمه قبل الحفلة و تقوله غني من قلبك و من قلبي، خليك على طبيعتك وغني بإحساسك اللي بتحس بيه من قصة حبنا. و إن كلماتها دي بتطمنه جدا كل مرة قبل ما يطلع، لدرجة إنه مبقاش مصدق نفسه إنه قدر يقف طول اليوم يغني عادي رغم رهبة المسرح و أنواره، و إنه بيسمعها ف كل غنوة و يلمحها ف كل فكرة، مستشعر وجودها كأنها واقفة معاه على خشبة المسرح بالرغم إنها مجتش و ف مكان تاني أساسا، و طيفها و صورتها اللي بتيجي ف خياله ساعتها بيخليه يبتسم و ينسى التوتر و يخش و يندمج ف جو الغناء ف الحفلة.

المعروف عن الهضبة إنه بيتوتر جدا و بشكل مبالغ فيه قبل ما يطلع المسرح و يحيي الحفلات، و ف فيديو و هو لسا صغير ف الباكستيج و هو يتصبب عرقا و يلف حوالين نفسه ف حفلة العجمي. معرفش هل ممكن يكون ف رابط بين الأغنية و حياة عمرو فعلا و إنه مثلا خلى الشاعر يكتبله كلمات تليق على حالته مع حبيبته، هل حدث بالفعل أو ربما صدفة و تصادف و أنا اللي ربطت الموضوعين من عندي طبقا للمعطيات، عموما فكرة الأغنية كيوت و صورة cover عمرو أكيت، لمعة عيون و براءة البدايات.

هو ليه يعني لو حد حمى خصوصية ماضيه العاطفي معاك تعتبر دا مش شفافية وصدق؟

خاصة لو بداية العلاقة كمان منعرفش اللي قدامنا اوي فبنحمي نفسنا ونقول نصيب وكلام كلشيه وخلاص لان من تجارب الآخرين الواحد بيكتشف ناس بتشوف نقط الضعف يستغلها ولا السيناريو السىء مع الاكس ويكرره

أنا مطلبتش ولا يهمني أعرف انتي اتمسك ايدك كام مرة و من كام واحد و لا عايز اقرأ اسكرين شوتس لشات سابق ولا صور إلخ، ده شيء خاص بيكي محدش له عندك حاجة انك تقوليها. لكن أنا اللي بطلبه هو القصة و الحدوتة و الدروس المستفادة من التجربة و انعكاسات شخصيتك جواها، سواء ف الجانب العاطفي أو حتى المهني و الأسري، الحاجات اللي تحسسني إنك شخص ناضج و عندك قدر لا بأس من الوعي بنفسك و تايم لاين حياتك، بما فيها من خططك المستقبلية و طريقة تفكيرك عن الولد اللي عايزاه يكون ف حياتك. الشيء اللي يخليني مبسوط إنك فعلا عايزاني و مميزاني عن باقي الرجالة، و شايفاني زي منا شايف نفسي، و إنك فعلا مشيتي ورا متطلباتك و عارفة معايرك، و لما شوفتيني و اتعرفنا بقى لقيتي اني ب fit المتطلبات دي.

فلنتفرض مثلا إن البنت دخلت ف كذا علاقة و كذا ستويشنشيب لحد ما قلبها اتهرا و كرهت صنف الرجالة و مبقتش مؤمنة بحوار الحب ده أوي، و خلاص قررت إنها هتختار بعقلها بعد كده و هتجوز حد يكون محترم و يتقي ربنا فيها، و ده لا يعيبها ف شيء، على عيني و على راسي، لكن أنا من حقي أعرف ده، لأني يا ستي أنا راجل رومانسي نيك و عايزة واحدة تحبني عشان أنا عادي عسول و دمي خفيف و أمور+ محترم و بيتقي ربنا ف الخلق إلخ.. ف أنتي كده بتخبي أو تتجملي و تفكري و تعملي تاكتيك، و أنا كيس جوافة مش ف المعادلة تماما.

الجزء التاني خاص بيكي انتي: إن مثلا حكيتي إنك حبيتي ولد بس طلع خاين و عقدك و الحمدلله اتعالجتي و الأمور ف تحسن. مهو لما تحكيلي، أنا هعمل حسابي و هحاول ابذل مجهود إني أعرفك تحركاتي و أكلمك أطمنك و مسبكيش لدماغك إلخ إلخ.. إن مينفعش تكوني مهمشة نفسك و مش شايفة شيء مهم ف يومك يستحق الذكر و الإهتمام ومتنازلة عن حقوقك و خايفة تطلبي شيء مني ادعمك فيه لمجرد إنه شيء ف الماضي و مليش يد فيه.

الجزء التالت: إن قدرتك على حكي المواقف و العلاقات و الماضي للولد اللي معاكي ده بيعكس مدى ارتياحك و تصالحك مع نفسك و ماضيكي، إنك فعلا قوية و عرفتي تتجاوزي للدرجة إنك قادرة تحكيلي عادي، و إن دي علامة ثقة فيا إني شخص مريح و متفهم و بتحكيلي بلا خوف او فلاتر، فكوني انك تقولي" ظروف او محصلش نصيب"، ده معناه إني لسا مش جدير بالثقة و لسا مرتاحتليش و ده يعيبك الحقيقة لأنك ليه ساكتة لحد دلوقتي، و ليه مكملة طالما موصلتش للدرجة الثقة دي، و إنك مخوناني، لأن كونك مقلقة تحكيلي لأحسن أكون زيهم و اكرر اللي اتعمل فيكي، يبقى أنا يا حبيبتي و الله مدخلتش دماغك كفاية، أو لست أنا هذا الولد المناسب اللي يليق بيكي و إني اختيار خاطيء بالنسبالك، فيعني بتعكي و محتاجين نراجع وراكي.

muhammadfahdmousa

ده تعليق شوفته على أغنية" أول كل حاجة" و استوقفني.

مش عارف، تخيلتها كانت منهكة من رحلة سفر طويلة و عايزة تستغل وقت الترانزيت و تخطف فسحة سريعة في القاهرة بس مترددة. في النهاية حسمت قرارها و نفذت المخطط و انبسطت بالخروجة. ركبت التاكسي عشان تلحق معاد الطيارة بليل، فالطريق كان رايق، بتبص على معالم البلد من ورا الإزاز، الأغنية شغالة في الخلفية، الإنترو بدأت، اتوهمت من المزيكا، بصت للسواق، و لأنه مش فاهم اللغة، حنكشت معاه بالكلام و الإشارات عشان يعيد الأغنية، خرجت موبايلها عملت Shazam عشان تعرف الإسم، بتسمع الأغنية تاني بتركيز، بصت على الشباك تاني بصة وداع أخيرة. رجعت بلدها، عملت سيرش على إسم الأغنية على اليوتيوب، سمعتها تالت مرة، افتكرت ذكرى الزيارة الجميلة، مقدرتش تتمالك نفسها و شاركت بالكومنت ده.

ده تخيل أوفر طبعًا وارد ميكونش منطقي، لكن فيه إسقاط مني على تجربة مريت بيها.

أول مرة أزور القاهرة، كان فرح بن خالتي في أحد الفنادق سنة 2001، رايح مع عدد كبير من عيلتنا محشورين في ميني باص و حاجة نيلة. وصلنا، قابلنا قرايبنا هناك في الزفة، و المفروض هياخدونا معاهم للقاعة. العدد كبير، فاتقسمنا على عربيات ملاكي تابعة لأصحاب العريس، و على حظي مكانش في مكان ليا، بحث و تنسيق يمين و شمال، لاقولي حد و ركبت معاه في عربية مختلفة عن اللي بابا و ماما و اخواتي راكبين فيها. كانوا ملخومين فملحقتش أعبرلهم عن خوفي و إعتراضي على إنفصالي عنهم، في ثواني قليلة لقيت نفسي مرمي في عربية و باب بيتقفل عليا و السواق بيتحرك.

صغر سن عيل في تانية إبتدائي قاعد في الكنبة اللي ورا مرعوب، كل اللي في مخيلته إنه هيتخطف و مش هيعرف يرجع لأهله أبدًا.

حظي برضه إن الشاب اللي سايق تاه في وسط الطريق و كل شوية يقف يسأل العربيات جنبنا على مكان الفندق، فمدة السكة زادت و لسا موصلناش، كل ده و أنا متوتر و خلاص هعملها على روحي و قاعد مؤدب مبنطقش بحرف.

الواد لاحظ سكاتي و خضتي فبدأ يدوب الجليد بينا وسألني عن إسمي و سني الدراسي و درجة القرابة للعروسين.

الكاسيت شغل أغنية جديدة على وداني، من ألبوم عمرو اللي كان لسا نازل و معنديش معلومة. اتوهمت، كل مخاوفي اختفت، هدوء و تأمل في الناس و المباني من الشباك و سرحان في جمال الأغنية و نسيت حوار الخطف ده تمامًا. سألته عليها، و قالي: "بعدّ الليالي".

غريب مفعول السحر بتاع الأغنية دي، شقلبت كياني و نستني رعبي و طمنت قلبي، ونس جميل غطى على شعور الخوف و الغربة اللي كان مسيطر عليا يومها و أنا لوحدي في مكان مجهول مع شخص معرفوش. حبيت القاهرة!

شوفت حد بيحكي عن رد فعل صاحبته الأجنبية لما قالولها الطيارة شكلها بتقع، فالركاب بتصرخ جنبها، و هي بتغني بصوت عالي أغنية Baby It's You بتاع The Beatles، و ده لأن لما مامتها كانت بتغنيهالها و هي صغيرة، كانت بتسكت و توقف عياط و تنام، فالأغنية مرتبطة معاها بالهدوء وقت المخاطر و الخوف، و ده ساعدها في تقليل توترها لحد ما وضع الطيارة استقر.

فالفكرة دي منطبقة عليا بالظبط مع" بعدّ الليالي" اللي لحد دلوقتي لما بسمعها في الظروف الصعبة بتقلب بهدوء و سكينة، و مرتبطة عندي بجانب حلو بحسه دايمًا في أي خروجة ليلية لطيفة في القاهرة. إحساسي بيها لسا متغيرش في كل مرة بسمعها، نفس إنبهار العيل الصغير مستمر عندي.

أول ما وصلنا القاعة، سبت الواد و لا كأنه كان موجب معايا في التوصيلة و جريت على أختي احضنها فرحًا بوصولي بسلام أولًا، و عشان اقولها خبر نزول ألبوم مطربنا المفضل، بعدها بكام يوم الشريط كان عندنا في البيت و بنسمعه.

#cairo

ف قصة عجيبة تخص بنت غزاوية كانت بتقرأ عن أبطال المقاومة و متابعة ملفات الأسرى ف سجون الإحتلال، فعجبها شخصية و مواقف و بطولة واحد أسير، عمرها ما شافته ولا كلمته ولا قابلته، مجرد بس قرأت عنه، لحد ما بطريقة ما عرفت تبعتله جواب تعبرله عن حبها و إنها عايزة تبقى شريكة معاه ف الرحلة دي بما فيها من ألم و إحباط، و حكتله إنها هتستناه لما يخرج، ع الحال ده فوق ال 15 سنة، يردلها الجوابات و يتبادلوا الأحاديث و حبها فعلا. و كل مرة يحصل صفقة تبادل، تقعد تستنى تشوف إسمه محطوط ولا لأ. و للأسف فقدت الجوابات دي لما اتقصف بيتها، اتقهرت لأنها كانت الحاجة الوحيدة اللي من ريحته و بتربطهم سوا. و ف تفسيري الشخصي، إن الجوابات بتمثل الدليل الملموس لواقعية القصة، إنها مبقتش مجرد حلم أو تمني و لا شيء من وحي خيالها، لأ، دي اتحولت لقصة حية بتعيش فيها بالفعل مع حبيبها، فلما الجوابات تضيع، أنت كأنك بتفقد آخر خيط للأمل و آخر رابط مادي للقصة، لأنها مقابلتوش ولا بتعرف تشوفه ولا ف اي تلاقي فيزيكال ولا شهود عيان.

و أنا بسمع الأغنية دي النهاردة و بركز ف كلماتها، على طول افتكرت القصة و حسيت الأغنية لايقة عليها، و إنها ممكن بتوصف ما بداخل الأسير البطل و ينفع تتقال ع لسانه أو يمكن كتب ما يوازيها ف جواب من جواباته لها.

لما بجري، بيكون ف تراك ملعب كورة، فباخد معايا شنطة حاطط فيها غياري، تيشيرت خروج و فوطة و بوكسر و فرشة و ديودرنت، بعلقها فوق عارضة المرمى، بحيث الرؤية تكون واضحة و أنا بلف، حتى لو كنت بعيد، مستوى نظري يكون جايبها. و دي تركاية حماية، عشان أنا من صغري و بحط الشنطة على الأرض أو على دكة الاستراحة و دايما بتغفل، بخلص جري و أجي اغير بقى، ألاقي شنطة اتسرقت كلها أو محتوياتها. و منساش هنا اللص الشريف، اللي سرق فلوس من البنطلون بس سابلي المفاتيح و 10ج عشان أعرف أروح بيها، راجل محدد هدفه و احتياجه و مش عايز يأذيني ف المجمل، فسابلي حاجة أعرف أمشي بيها نفسي.

دوام الحال من المحال، بجري الأيام دي ف ملعب نضيف جدا كل واحد ف حاله و الدنيا أمان مفيش سرقة، لكن العادة تغلب، و لسا برضه بعلق الشنطة فوق عارضة المرمى.

النهاردة لأول مرة ف شخص فضولي لقيته بيقرب من الشنطة و فتحها، خرج التيشيرت و مثبته بين دقنه و رقبته و فرده على جسمه و الأكمام على دراعاته، كأنه بيقيسه على نفسه، بعدين رفعه فوق يتأمل فيه. كل ده و أنا شايف المشهد من بعيد، بس اتأثرت، شكل التيشيرت عجبه، فأنا قولت لنفسي هعمل عبيط و مش هقوله إن دي شنطتي، و لو خد التيشيرت يبقى من نصيبه و الله مهي راجعة.

لفيت كام لفة و هو لسا بيشاور عقله، بص حواليه لما قربت منه، المكان شبه فاضي، انا و هو بس، قومت مدور وشي عشان أطمنه إنها مش شنطتي، خد حقك يا ابن والدي، رزقك و مكتوبالك. معرفش ايه الهبل ده و الله، بس دماغي اتصرفت كده، لكن ف النهاية لقيته طبق التيشيرت و دخله تاني الشنطة و علقها مكانها و مضى ف سلام.

التيشيرت حلى ف عيني أوي، حسيته ازداد أهمية و أحتل مكانة و معزة خاصة بعد مشهد إنبهار الرجل بيه.

طب يارب تكون انت برضه حكيت للبنت اللي الله يمسيها بالخير عن الاكس بتاعتك و بكده تصافيتوا😂😂

و الله اتمنى، بس هي متوقفة على ردود أفعال الناس ع تعبيرك، ممكن حد يكون شايفني سالك و مرسيه على كل حاجة، و آخر يشوفك لسا مخبي و مدكن.

انا مقصدش الماضي العاطفي نفسه، هو انا بس ضربت به كمثال بس عن فكرة الاوبن اب عن نفسك و حياتك. يعني امبارح و أنا بكلم واحد صاحبي فيديو كول، اكتشفت إني حاكيله كل الابديتس ف حياتي، و المكالمة اللي مدتها ساعتين مثلا، خلاني امسك فيها المايك ساعتين إلا 10 دقايق، و الباقي حكالي فيها حاجتين من نوعية اكلت و شربت كذا، و إن دي مش أول مرة يعملها، هو من يوم ما عرفته كدا، إن ده غالبا السبب اللي ادركت مع نفسي اني ليه بقيت أعمل تأجيل لطلبه المكالمة دي تتعمل بشكل منتظم، لأني مبقتش متحمس اوي عشان حسيت إن بقى بعيد عن القلب، فجسمي بقى بيديني اشارات عن انسحاب الثقة دي، لأني بالفعل عرفت من بره حاجات مستحدثة عنه، فهو بالفعل عنده لكنه بقى بيخبيه. فيعني أنا عارفه من زمن، و طول الفترة دي لم تنجح ف تقوية العلاقة بالشكل اللي كان مفترض تكون عليه دلوقتي، و بجد هو مش مميزني و مفيش فرق بيني و بين حد هو متعرف عليه من اسبوع، الداتا اللي بيديها لينا إحنا الاتنين واحدة.

فبفكر إن احساس الشخص الآخر إنك بتتقل عليه، أو إحساسه بالرفض عامة، ساعات مش بالضرورة هو عشان شخص سيء أو ميستاهلش الحب، هو بس يمكن حاطط مسافه بينه و بين البشر، و عليه مراجعة نفسه و تواجدها ف كيفية إحتكاكه مع الناس. أنا مش حشري و مش طالب اعرف ابوك بيلبس إيه ف صالة بيتكوا، أنا طالب منك حاجات عن نفسك، عشان الحاجات دي هتتقاطع مع حياتي و تفاعلي معاك.

جسور الثقة ممكن تتبني في وقت أقل لو الشخصين، سواء ف صداقة أو حب، عندهم القدر الكافي من الاريحية ف التعبير عن نفسهم. جودة الحوار و المصارحة هي اللي بتدي صلابة للعلاقة مش لمجرد مرور عدد شهور متراكمة قضيتوها سوا من يوم ما اخدتوا فيها تليفونات بعض.

افتكر بنت الله يمسيها بالخير ف بداية تعارفنا، لقيتها من نفسها جاية تحكيلي عن الاكس بتاعها، إن ازاي تم التعارف و ازاي اتعلقت بيه و ازاي بعدت عنه، و كان فترة صعبة بس ف الأول و تعترف انها كانت عايزة ترجعله، بس شدت حيلها و حسمت الأمر. ازاي تجاوزته لما فكرت ف نفسها و بصت ف توقيت ظهوره ف حياتها و ازاي سرسب نفسه من خلال ثغرات شخصيتها و عيوب نشأتها اللي أدت لاختيارها حد مش مناسب و أبعد تماما عن عقليتها و و و..

إجابتها جميلة و صادقة عن ماضيها تنم إن الشخص خاض رحلة فكرية و حاطط ايده على حاجات ف شخصيته و عنده قدر لا بأس به من الوعي و الإدراك، و شايفك شخص كويس و حبت تشاركك حاجة زي كدا من غير كسوف. إجابة قطعت شوط كبير ف معرفتنا و قربنا لبعض.

ف اجابات بقى بتبقى غريبة و غامضة و غالبا الشخص مبيقولهاش غير لما أنت تسأله، و أنا مبحبش اسأل حد عن ماضيه أو حياته غير لما هو يقولي، أو ببادر أنا الأول و احكيله عشان يطمن و يبادلني، لكن ساعات رغم ذلك الشخص برضه مبيقولش حاجة، فخلاص بتضطر بقى تزنقه عشان تعرف راسك من رجليك. ف بعدها تلاقيه يقولك ايه مثلا: حبيت مرة اه، قعدنا 4 سنين سوا، بس حصلت ظروف ومحصلش نصيب و خلاص هو اتجوز و شاف حاله.

طيب تجاوزتي ازاي و ماذا عن الرحلة؟ و إيه هي دين أم الظروف اللي حصلت؟ فتقول مثلا و الله عدى 7 شهور و خلاص نسيت و تجاوزت الحمدلله.

غموض فوق غموض، إجابة مختصرة طالعة بالقطارة، تخليك تتوغوش شوية إن الشخص افكاره مشوهه عن التجاوز و فاكر انه بيحصل من تلقاء نفسه بمرور الوقت فقط. أو الشخص بيضحك على نفسه و لم يتجاوز اصلا و هو مش داري، أو إنه الاحتمال الأخير إنه شخص كداب، و عايز يدخل ف اي علاقة و خلاص و أنت بس اللي جيت ف طريقه ساعتها و خايف صراحة إجابته تفشكل الموضوع.

حد تاني تلاقيه يقول أنا تجاوزت من زمان، دلوقتي بقى بيلعب بادل و مشترك ف ورشة كتابة و واخد كورس تطريز يدوي و بقى بيربي سلحفاة، و كل ده و هو اصلا محاسب ف شركة مياه جنوب القاهرة!! مثلا، فاللي هو مفيش اي حاجة لها علاقة ببعض، و الشخص يبدو فعلا إنه عشوائي ف حياته و غير محدد اتجاهاته ولا أهدافه، هو فقط يملأ فراغ و يهرب من ملل شديد، فعلاقته معاك وارد تكون عبارة عن تضبيشة، و امتداد لهذه العشوائية، ف أنت من الشهامة إنك تفرمل الدنيا و تضع حدا و تحمي الشخص من نفسه و متستغلش اندفاعه و تصارحه بملحوظاتك.

نوعيات آخرى، تحس إن كل أسئلتك البديهية له كأنه أول مرة يسمعها ف حياته، يتضح إن الشخص مقعدش مع نفسه 5 دقايق على بعضهم و لا راجع شريط حياته و علاقاته، ولا فكر فيها، فمهياش حاضرة ف ذهنه وقت استفسارك عنها، و ممكن حتى لو اديتله فرصة شهر يفكر و يديك إجابة، مش هيعرف برضه للأسف يقولك المفيد. و ده بيخليك تلألأ، إن الشخص ده مش عايزك عشان أنت حلو و عندك مميزات، هو فعلا بيضبش و معندوش ادراك ولا مقومات تقييم تخليه يشوفك كويس، هو معندوش أي معايير عامة ف الإختيار للناس و لا عنده هوية محددة متماسكة عشان يقدر من خلالها يسوقلك بيه نفسه، هو مش مش عايز، هو مش عارف، للأسف.

ممكن واحد بن حلال عنده ضمير و هيجي يقعد معاك قعدة و يقولك البوقين ف وشك، و يديك سبب لرحيله بكل شياكه أو وقفة للإصلاح و تعديل المسار، و ف حد معندوش خلق و هيختفي فجأة من غير ما يصارحك، و ف حد تالت متلاعب، لما يعرف إنك بتعك، هيصهين ويقعد يزق بيك الأيام لحد ما يشوفله شوفة تانية.

بت عاملة لقاءات مع صنايعية و أصحاب الورش ف دمياط، بتسألهم عن اكتر شيء صعب ف شغلانتهم؟

توقعت هيقولوا عدد الساعات الكتير بره البيت و البعد عن الأسرة و قضاء وقت أطول معاهم، هيقولوا مثلا درجة الحرارة الشديدة أو المجهود البدني المبذول أو إصابات العمل من المكن و الآلات الحادة المستخدم إلخ إلخ... كلهم قالوا: و الله التعامل مع الناس أصعب حاجة/ بص شوفي: الزباين، أصعب حاجة ف الشغلانة/ المجتمع و الناس مبقتش زي الأول. اللقاءات كلها كانت منفردة، كل على حدة، يعني محدش سمع إجابة التاني و غشها، ضحكني إن الكل أجمع على إجابة "الناس"، بكل مشتقات الكلمة و بمختلف صيغتها، إجابة سريعة حاسمة مخدوش وقت ف التفكير فيها أو حتى إنهم يجملوها شوية قبل ما ينطقوها. ده اداني مؤشر ما عن سر الوكسة اللي الصنايعية بقوا فيها.

فين أيام زمان لما كان الزبون دايما على حق و الناس بتوسعها صدرها و تحاول تطمن الزبون و تستوعبه و تحتويه و تساعده ف اتخاذ قراره. عن نفسي بشوف المناهدة نفسها، رغم صعوبتها، هي أساس متعة البيعة و الشغلانة أصلا و الله العظيم. إجراء الحوار و معرفة إحتياج الزبون و قراية دماغه و إني اقنعه بالفكرة و إني أجبله اللي يناسبه و يرضيه و يفيده + كسب ناس يبقوا لويال ليك و لمؤسستك و تخليه يجيلك تاني. معرفة الناس كنوز، و بالنسبالي دي أكتر حاجة بحبها ف عملية التسويق و البيع.

بحب أصحاب الحرف أوي، و خصوصا اللي احتكيت بيهم ف السيدة زينب و القلعة و محيطها بحكم شغلي وقتها، أولا عشان محلاتهم و دكاكينهم قديمة فوق ال 70سنة فأكتر، و ده معناه إنهم قدام ف المنطقة و العيال ورثت المحل و كملت المسيرة، ف دول أكتر ناس كانت بتوصفلي الطرق الصح من غير فتي و لخبطة، ابقى معايا عنوان حد ف حارة او عطفة، صعب جدا ف الوصول له و مفيش اي علامة مميزة بحكم العشوائيات، فأنا الحمدلله كنت شاطر ف الحوار ده، أنزل أي منطقة معرفهاش لأول مرة، عيني تنقى و تختار الدكاكين القديمة و اسأل أصحابها ع اللي عايزه، فيوصفلي زخانيق و خبايا و اسرار الحتة كلها تفيد رحلتي الاستكشافية ف القاهرة القديمة أو حتى عشان شغلي نفسه، مرتين بالظبط بكون حفظت المنطقة كلها بخاريطتها.

بحب الصورة دي عشان كانت نتاج وصف الناس الطيبة أصحاب الورش و الحرف ف الدكاكين القديمة، كنت بسأل لحد عن حاجات تبع الأقمشة و التطريز، فقعدت امشي و يتوصفلي لحد ما وصلت هناك. قابلت رجالة و ستات زي اللي فيديو دول، عاملين مشروعات صغيرة ف محلات ضيقة، مين يا جماعة بتاع قماش هنا؟ و أنا بلاص، لا أفقه اي شيء عن صناعة الملابس، قعدوا يفهموني بقى انواع الاقمشة، و عايز ايه و لمين، و على حسب الجودة و ماتريال من الابرة للصاروخ و و و، لحد ما قابلت راجل عامل مصنع عبايات ف بيته، دور كامل كده بيصنع الحاجات و عنده كل شيء، و قالي ع البلوجرز و بتوع الاستارتابس اللي بيجوا بيشتروا منهم ببلاش و يروحوا يعرضوا ع صفحاتهم نفس الاشياء بأضعاف الأسعار الأصلية... دخلت عوالم حلوة أوي و مسلية، و كلهم بلا استثناء ساعدوني ف عناوين و طرق و أسماء حرفيين و صنايعية شاطرين، و حسن ضيافتهم و أنا أول مرة اشوفهم، عاملوني كأني محمود سعد و بحاورهم و الله، نفس الترحاب و الاستفاضة ف سرد المعلومات ليك سواء عن شغلهم أو عن نفسهم.

#cairo

هربان من كل سوشال ميديا عشان متقابلنيش حاجة عن الماتش، زودت دقايق الجري اليومية لحد ما نفسي يتقطع و الدماغ تفصل تماما، بشتت نفسي و وصلت إني بريوتش مسلسل ل يسرا من 2002 عشان اتسحل و أحلله و أخلق حالة تفكير نقدية جدلية مع نفسي تزن ف أرجاء الجمجمة بقوة تعادل كفة القهرة، دكر قصاد دكر يابا، يمكن صوتها يهزم الافكار الوحشة أو يقولها اتاخري شوية و انزاحي حبة عن مخيخ الواد و فصه الأيمن. هربت من العالم لتمبلر، لكن تمبلر حتى مكمليين ف السيرة، مفيش مفر خلاص. افتكرت حالة المسكينة دينا الشربيني، واحدة زي دي تتخطي علاقة ازاي، يعني المتعارف عليه هتمسح فويس نوت و شات صور، لكن هتعمل إيه ف واحد صوره مترشقة على الميديا الطرق و كوبري 6 أكتوبر، صوته شغال ف كل مكان، ف الشارع و العربيات و القهاوي و عند الميكانيكي و البواب، ده فويس نوت متحركة ف يومها مبتدليتش أبدا.

Trending Blogs

Recently Viewed Blogs