Kýrauga

Þessi síða er myndablogg Birgis Þórs Harðarsonar. Kýrauga varð til þegar honum vantaði hvatningu til að ferðast um helgar sumarið 2015. Þá varð til regla um að frá hverri helgi þyrfti að birtast mynd hér á vefnum. Kýrauga heldur áfram árið 2016.

[ofurbiggi]

Kolefnishlutleysi hlýtur að vera lokatakmark

Íslensk stjórnvöld óska eftir tillögum til aðgerða í loftslagsmálum. Birgir Þór Harðarson hefur sínar hugmyndir.

Í sumar óskuðu íslensk stjórnvöld eftir tillögum til aðgerða í loftslagsmálum á Íslandi. Unnið er að nýrri aðgerðaáætlun. Ég hef verið að velta fyrir mér hvernig ætti að bregðast við. Hér eru sex pælingar og tillögur sem ég sendi til aðgerðahóps stjórnvalda.

[ofurbiggi]

Á bát í Reykjavík

Stutt myndband síðan ég fór á bát með Oddi og Herði frænda hans. 

[ofurbiggi]

Hafnarfjall 4. júní 2016

Gekk á Hafnarfjall laugardaginn 4. júní og útsýnið var geggjað. Ætluðum bara að labba á einn tind en enduðum á að fara á sex og vera þremur tímum lengur en áætlað var. Örmagna komum við niður til að bruna í Borgarnes og borða tvíréttaða sjoppumáltíð.

[ofurbiggi]

Úr flugferð 17. maí.

[ofurbiggi]

Flugferð með bróður

Emil Örn, bróðir minn, er að læra að verða flugmaður. Partur af því er að bjóða bróður sínum í flugferð yfir Borgarfjörðinn í góðu veðri á virkum dögum. Fyrsta ferðin var farin 17. maí 2016.

[ofurbiggi]

Bátsferð frá Reykjavíkurhöfn 14. maí

Fékk boð um að fara út á bát einn laugardag í maí. Við sigldum um sundin úti fyrir Reykjavík, fórum í land í Viðey og drukkum þar kaffi áður en annar sjófari bauð mér að hoppa í sinn bát. Hann hafði séð að ég væri að taka myndir og fannst sjálfsagt að hjálpa til. Hér eru Oddur vinur minn og Hörður frændi hans að tjékka hvort það sé einhver fiskur í sjónum við Viðey.

[ofurbiggi]

Kerlingafjöll í fjarska 25. mars

Á leið okkar úr Landmannalaugum var bongóblíða, heiðskýrt og stillt veður en þó nokkuð kalt. Það gerði útsýnið hins vegar alveg mergjað. Sólin skein á hvítar breiður og tinda og lýsti Kerlingarfjöll í norðri.

[ofurbiggi]

Landmannalaugar um vetur

Við brunuðum inn í Landmannalaugar á tveggja metra djúpum snjó dagana fyrir páska og gistum í skálanum. Ferðin gekk vel þó skaflarnir hafi verið nokkuð erfiðir yfirferðar. Það frysti um nóttina og því var mun auðveldara og fljótlegra á leiðinni til baka. Ekki spillti fyrir að þá hafði ræst úr veðrinu svo það sást í fjallstoppana til allra átta og heiðblár himinn tók við af snjóhvítum sjóndeildarhringnum.

[ofurbiggi]

Úr jöklaferð 19. mars

Samantekt úr jöklaferð á Langjökul og inn í hann laugardaginn 19. mars. Það er magnaðara en ég þorði að vona að fara ofan í jökulinn, sjá jökulsprungur og jökulinn hreyfa sig.

[ofurbiggi]

Úr jöklaferð 19. mars 2016

Við lögðum af stað að morgni og settum stefnuna á Langjökul. Markmiðið var að prófa nýjar græjur og lenda í ævintýrum á hálendinu. Okkur tókst að lenda í ævintýrum því á endanum urðum við að labba heim, redda okkur fari og komast þannig í bæinn.

Þess vegna átti ég skrítnasta símtal lífs míns við föður minn:

Kl. 17:00 „Hæ pabbi? Ég á að vera mættur á árshátíð eftir tvo tíma en er strandaglópur við sporð Langjökuls. Getur þú komið og sótt mig?“ Tveimur tímum síðar var ég búinn að vaða ísi lagðar ár, ganga um það bil 5 kílómetra og hlaupa aðra tvo eftir slóðanum fyrir innan skiltið sem sagði að leiðin væri ófær og komst um borð í bílinn hans pabba.

[ofurbiggi]

Fæ að vera ljósmyndari á Sónar Reykjavík um helgina. Hér er bandaríski dj-inn The Black Madonna að gera allt vitlaust í bílastæðakjallaranum í Hörpu í gærkvöldi.

[ofurbiggi]

Úr Hallgrímskirkjuturni

Það var kalt en fallegt veður í gær þegar ég var sendur að taka myndir úr Hallgrímskirkjuturni fyrir Kjarnann. Fjöllin á Reykjanesi finnast mér eiginlega flottust á veturnar þegar sólin sest í suðri og fjöllin teikna skuggamyndir á sjónarröndina.

[ofurbiggi]

Baula bakvið Hraunsnefsöxl

Það var rok á Hreðavatni um helgina en ætli Baula hafi ekki haft það verra. Hún gægðist þarna fyrir aftan Hraunsnefsöxl. Það fór þess vegna enginn á bátinn.

[ofurbiggi]

Skógurinn

Það sem er kannski helst breytt á sumarbústaðalandinu okkar er að skógurinn er orðinn svona tuttugu sinnum þéttari en hann var þegar við Emil fórum með ömmu og afa. Allt saman vel hirt samt og fínt.

[ofurbiggi]

Sumarbústaður í lok sumars

Kýrauga fór í sumarbústað um helgina með fjölskyldu. Það var svona kósý. Við Emil Örn fórum aðeins yfir hlutina og könnuðum staðina sem við lékum okkur á þegar við vorum krakkar, settum dæluna í gang, huggum eldivið og pössuðum upp á að eldurinn í kamínunni dræpist ekki. Allt eins og það á að vera.

[ofurbiggi]

Menningarnótt: Flugeldar

Venjulega hef ég ekkert sérstaklega gaman af flugeldum. Þeir eru dýrir, skammlífir og hverfa yfirleitt reykjarmökk. En af flugeldasýningu að vera var sýningin á hafnarbakkanum á miðnætti á menningarnótt nokkuð flott. Það var skotið upp frá mörgum skotpöllum og allskonar nýju sem ég hef ekki séð áður.

Afi hafði það á orði við mig daginn eftir að þarna hafi hann í fyrsta sinn áttað sig á að það skiptir máli hvaðan flugeldarnir eru sendir á loft og hversu mikill tími líður á milli hverjar bombu.

[ofurbiggi]

Menningarnótt: Hamraðu járnið á meðan það er heitt

Fór ekkert út úr bænum um helgina en gekk heldur um miðbæinn með myndavél þó það væri ausandi rigning. Við enda Vesturgötu fann ég þetta. Það voru kallar að hita járn og hamra það til að steðjum, klæddir í víkingaföt. Mér sýndist þeir vera að búa til skartgripi. 

Allskonar fólk safnaðist saman í kring og fylgdist með þessu og ímyndaði sér hvort svona hefði það verið fyrir kannski 600 árum. Hvorki Jón né Óskar voru allavega fæddir þá.