“أوَلَمْ يَرَوْا أَنَّ اللَّهَ يَبْسُطُ الرِّزْقَ لِمَن يَشَاءُ وَيَقْدِرُ ۚ إِنَّ فِي ذَٰلِكَ لَآيَاتٍ لِّقَوْمٍ يُؤْمِنُونَ”
الآية دي عبقرية جدا، وكان ممكن تنتهي بكذا صيغة زي ان ربنا يقول ان في ذلك لآيات لقوم (يعقلون، يبصرون، يسمعون، يتفكرون) زي ما في آيات كتير، لكن في مسألة الرزق بالذات ربنا قال (يؤمنون) لأنها فعلا مينفعش فيها انك توقف عند كل واحد وتقول هو ربنا بيرزق ده ليه ويمنع ده ليه، ويحرم الست الغلبانة دي ليه في حين انه موسع على الراجل المفتري ده.
ساعات كتير بنشوف مواقف في حياتنا ونقول والله الراجل ده طيب بس ربنا حارمه من الحتة المعينة دي، او العكس لما نشوف حد ظالم ومفتري ومع ذلك ربنا مديله وفاتحها عليه على الآخر .. والصراحة الاسئلة اللي زي دي ميسدش معاها غير اجابة واحدة مفيش غيرها من وجهة نظري، وهي أن الله لا يُسئل عما يفعل وهم يُسئلون.
يرزق حد انت شايفه ميستاهلش، يمنع حد انت مشوفتش منه غير كل خير .. كل ده مش شغلك، كفاية انك مؤمن وعندك يقين تام ان ربنا مش بيظلم حد وانه اسمه العدل.
وبرده في آية مذهلة في الانجيل بتقول “شمس الله تشرق على الابرار والأشرار“، واختها العبقرية في القرآن بتقول ”كلا نمد هؤلاء (المؤمنين) وهؤلاء (الكفار) من عطاء ربك، وما كان عطاء ربك محظورا“
يعني من الآخر ملكش دعوة بحوار الرزق ده، دي حاجة بين ربنا وعباده واهو ملكه يؤتيه من يشاء كل اللي علينا اننا نبطل نحكم على حد بالظاهر وكذلك كل واحد فينا حاطط في بطنه بطيخة صيفي وعارف ومتأكد ان ربنا مش بيظلم حد .. وان مهما كان اللي بيحصل ف كل واحد هيحاسب علي فاتورته قبل ما يمشي وبعد ما يمشي من غير زيادة او نقصان، ولا يظلم ربك أحدا.
dailybridgerton
turnnoffyourmind
origamiaround
prguitarman
jacobvanloon
kianamaiart
janainaart
jbbartram-illu
andulkaphoto
tangentwithtanner
