Borgríki 2 – Blóð hraustra manna, nýjasta kvikmynd Ólafs de Fleur Jóhannessonar, hefur verið valin til þátttöku á alþjóðlegu kvikmyndahátíðinni í Rotterdam í Hollandi. Um er að ræða alþjóðlega frumsýningu myndarinnar þar sem þetta verður fyrsta hátíðin sem myndin mun taka þátt í eftir að hafa verið frumsýnd hinn 17. október sl. í Háskólabíói.
Hátíðin mun fara fram frá 21. janúar til 1. febrúar. Í tilkynningu segir að valið á Rotterdamhátíðina sé mikill heiður, enda er hátíðin ein fárra svokallaðra A-kvikmyndahátíða í heiminum.
Borgríki 2 – Blóð hraustra manna mun taka þátt í „Spectrum“-hluta Rotterdamhátíðarinnar. Spectrum leggur áherslu á að sýna nýjar kvikmyndir í fullri lengd eftir kvikmyndagerðarmenn sem aðstandendur hátíðarinnar telja að hafi átt mikilsverð framlög til alþjóðlegrar kvikmyndamenningar. Ein af fyrri myndum Ólafs, Stóra planið, var valin til þátttöku á hátíðinni árið 2009.
Myndin er sjálfstætt framhald spennumyndarinnar Borgríkis sem kom út árið 2011 og segir frá Hannesi, metnaðarfullum yfirmanni innra eftirlits lögreglunnar, sem ákveður að rannsaka Margeir, spilltan yfirmann í fíkniefnadeild lögreglunnar með það fyrir augum að ráða einnig niðurlögum stórra glæpasamtaka.
Borgríki 2 – Blóði hraustra manna er leikstýrt af Ólafi de Fleur Jóhannessyni en hann skrifar einnig handritið að myndinni ásamt Hrafnkeli Stefánssyni. Myndin er framleidd af Kristínu Andreu Þórðardóttur, Ólafi de Fleur Jóhannessyni og Ragnari Santos fyrir Poppoli kvikmyndir. Í aðalhlutverkum eru Darri Ingólfsson, Ágústa Eva Erlendsdóttir, Ingvar E. Sigurðsson, Sigurður Sigurjónsson, Zlatko Krickic og Hilmir Snær Guðnason.
Sölufyrirtækið Celluloid Dreams í Frakklandi tryggði sér alheimsrétt á myndinni árið 2012 í kjölfar velgengni fyrri myndarinnar. Celluloid Dreams annast alla sölu á erlendum vettvangi í samstarfi við kanadískt sölufyrirtæki sem heitir Mongrel International. Nú þegar hefur myndin verið seld til Synergy Cinema í Frakklandi og Mónakó og Alcine Terran í Japan. Fyrri myndin, Borgríki, hefur verið seld til 42 landa og er í endurgerðarferli í Bandaríkjunum.
Poppoli kvikmyndafélag býður nú áhugasömum að kaupa sér aðgang að kvikmyndinni Borgríki (2011) á veraldarvefnum til áhorfs. Borgríki kom út seinni hluta árs 2011 og hlaut mjög góða dóma og aðsókn hér á landi. Hún hefur nú selst til fjölmargra landa sem og til endurgerðar í Bandaríkjunum.
Ráðist var í gerð framhalds árið 2013 og mun sú mynd líta dagsins ljós í október þessa árs. Sem fyrr er handritið skrifað af Hrafnkeli Stefánssyni og Olaf de Fleur, sem jafnframt leikstýrir. Áhorfendur geta átt von á mjög spennandi og kraftmikilli mynd og ekki er verra að vera búinn að sjá fyrri myndina, þó að um sjálfstætt framhald sé að ræða.
Til að horfa á fyrri myndina í gegnum Poppoli fylgið upplýsingum hér fyrir neðan.
Góða skemmtun.
Leiguverð er 399 kr og gildir í 48 klukkustundir.
buy
Svona fer greiðslan fram:
- Greitt er í gegnum Paypal eða beint með kreditkorti.
- Eftir greiðslu ertu áframsend/ur á Sellfy síðuna okkar þar sem þú halar niður skrá með leiðbeiningum til að horfa á myndina.
- Til öryggis færðu einnig sendan tölvupóst með hlekk á þessa skrá.
*Aðeins er mögulegt að leigja myndina á Íslandi / The movie is only available for rental in iceland.
Kvikmyndaleikstjórinn Ólafur de Fleur situr sveittur við að klippa mynd sína Borgríki 2: Blóð hraustra manna. Myndin er framhald glæpamyndarinnar Borgríkis sem hann gerði mikla lukku með fyrir tveimur árum. Og skáldsagan Hraustra manna blóð, eftir Óttar Martin Norðfjörð, er nýkomin út en hana byggir Óttar á grunnhugmynd framhaldsmyndarinnar. Ólafur fékk þá hugmynd á sínum tíma að gaman væri að fylgja Borgríki eftir með bók og hann fékk Óttar til verksins. Þeir náðu vel saman og hræra nú í ýmsum pottum hvor hjá öðrum. Þeir ræða hér um samstarfsverkefnið, sókn á erlenda markaði og yfirheyrslur á geimverum.
Rithöfundurinn Óttar Martin Norðfjörð og kvikmyndaleikstjórinn Ólafur de Fleur sitja á Vegamótum yfir drekkhlöðnum diskum af einhverju sem úr hæfilegri fjarlægð virðist vera sannkallað hollustufæði. Með þeim er kærustuparið Ágústa Eva Erlendsdóttir og Jón Viðar Arnþórsson. Öll tengjast þau kvikmyndinni Borgríki á einn eða annan hátt. Ólafur leikstýrði myndinni á sínum tíma, Óttar hefur nú sent frá sér framhald myndarinnar, Blóð hraustra manna, á bók og Ólafur er þessa dagana að klippa framhaldsmyndina sem kallast á við bók Óttars. Ágústa Eva leikur eitt aðalhlutverkanna í báðum myndum og Mjölnismaðurinn Jón Viðar útfærði slagsmálin í bíómyndinni.
Jón Viðar sér svo einnig um að píska Ólaf út í Mjölni en leikstjórinn er byrjaður að æfa á fullu og sveifla ketilbjöllum með þeim árangri að hann er að breytast í ákaflega sannfærandi massaköggul.
„Það er svo góður hópur þarna og það geta þetta allir,“ segir Ólafur. „Þetta eru engin geimvísindi.“ Óttar segir líkamsræktardelluna í leikstjóranum þó stundum truflandi, ekki síst þegar hann heimsæki hann á hugmyndafundi og verði að láta sig hafa það að bíða á meðan hann klári að sveifla bjöllunum.
Ágústa Eva truflar líkamsræktartalið þegar hún biður Óttar um að árita fyrir sig bókina Blóð hraustra manna. Rithöfundurinn fer hálfpartinn hjá sér, segir þetta ekki algengt en alltaf jafn óþægilegt. Ágústa stingur þá upp á að á prenti verði hermt að hópur ungra kvenna í stuttum pilsum hafi gert aðsúg að Óttari í ákafa sínum að fá nýju bókina áritaða.
Óttar hefur hingað til vakið athygli með spennubókum á borð við Hníf Abrahams og Sólkross sem þykja nokkuð í ætt við skáldskap Dans Brown. En nú er hann mættur með ekta reyfara.
„Þetta er að einhverju leyti stefnubreyting vegna þess að þetta er miklu nátengdara Íslandi, nútímanum, undirheimunum og öllu því,“ segir Óttar. „Eitthvað sem ég hef í raun ekkert fengist við áður. Ég hef verið meira í ráðgátum og þannig löguðu.“
Blint stefnumót
Óttar tók ekki upp á því upp úr þurru að skrifa framhald kvikmyndarinnar heldur kom frumkvæðið frá Ólafi. „Ég fiskaði Óttar á blint stefnumót á Facebook,“ segir Óli en þeir tveir þekktust ekki áður. „Ég fékk þessa hugmynd, að þetta væri skemmtileg tilraun,“ segir Óli um að gera framhald að bíómynd með bók. „Maður fær oft svona hugmyndir og þá þarf maður að finna einhvern sem elskar mann til að giftast. Og ég bauð Óttari á stefnumót. Hann horfði á fyrstu Borgríki, fílaði hana og svo byrjuðum við bara að kasta þessu á milli okkar og leika okkur.“
Óli og Hrafnkell Stefánsson skrifuðu handrit Borgríkis og voru þegar farnir að huga að framhaldinu þegar Óli setti sig í samband við Óttar. Hann sendi Óttari útlínurnar á framhaldinu og Óttar sá strax mikla möguleika. „Ég sá fyrir mér heilu kaflana á meðan ég las þetta yfir, og brýr á milli þannig að ég sló til,“ segir Óttar.
En hvað kom til að þú leitaðir til Óttars. Varstu búinn að lesa eitthvað af bókunum hans?
„Hann les ekki bækur,“ segir Óttar og brosir.
„Ég les bara leikstjórabækur og Búdda-bækur. Það er það eina sem ég les,“ segir Óli. „Ég man að ég sá mynd af Óttari í blaði og las viðtal við hann, fékk ágætis tilfinningu og heyrði bara í honum. Svo finnur maður þetta bara einhvern veginn í hjartanu hvort það sé tenging eða ekki og það vill bara svo til að á milli okkar var tenging. Slíkt er allt ekki sjálfgefið.“
Sami grunnurinn
„Þannig að Óttar fékk í raun grunninn af handritinu frá okkur og svo er þetta einfaldlega bara hans verk og hann tók sína stefnu. Hann hefur ekki séð handritið,“ heldur Óli áfram.
„Nei, ég gerði í því að lesa ekki handritið. Ég vildi ekki mengast af alveg nákvæmum útfærslum á senum. Það var mjög gott að hafa bara grunnbyggingu sögunnar,“ segir Óttar.
„Það er líka skemmtilegt að þetta hefur bara aldrei verið gert áður, í það minnsta ekki á Íslandi. Að það sé fyrst gerð bíómynd og svo komi framhaldið af henni í bók. Það er skemmtilegt hvernig þessi ólíku listform kallast á,“ segir Óli.
Og þótt grunnur bókarinnar og bíómyndarinnar sé sá sami þá er í raun um tvö ólík verk að ræða. „Þetta er bara eins og þegar maður fer í bíó og sér mynd sem er gerð eftir skáldsögu þá sér maður alltaf eitthvað sem er allt öðruvísi. Miðlarnir eru svo ólíkir að það er hreinlega ekki hægt að hafa algjört copy/paste.“
„Svo er þetta líka þannig að þú last ekki handritið og ég les ekki bókina þína og er að klippa þannig að við fáum báðir okkar svæði.“
Óttar og Óli náðu strax mjög vel saman eftir „stefnumótið“ og þeir tveir og Hrafnkell lesa mikið yfir hvor hjá öðrum, gefa góð ráð og harða gagnrýni ef svo ber undir.
„Ég vinn mikið með Hrafnkeli og þessi samvinna okkar þriggja er mjög spennandi. Það ríkir fullkomið traust á milli okkar og menn geta verið mjög aggressívir í gagnrýni en því er aldrei tekið illa. Mér finnst þetta eiginlega það skemmtilegasta við þessa vinnu, að finna svona leikskólahópa til að fá með út að leika.“
Geimverur í yfirheyrslu
Til stendur að endurgera Borgríki í Bandaríkjunum og sögusviðið færist þá frá Reykjavík til Chicago. „Það er verið að gera handrit að henni á ensku sem gerist í Chicago og er með sömu persónum en þarf að setja þetta yfir á bandarísku,“ segir Óli og bætir við að James Mangold stefni enn að því að leikstýra myndinni. „Þetta bíður í rauninni eftir að handritshöfundurinn sé búinn með uppkast sem þarf að samþykkja áður en það fer lengra.“
Hvað hann sjálfan varðar segir Óli Borgríki hafa komið sér í samband við fjölda fólks í Bandaríkjunum sem séu þegar farin að skila árangri. En hann hefur meðal annars selt framleiðslufyrirtækinu Lionsgate geimvísindasöguna, Revoc, sem Óttar aðstoðaði hann með.
„Revoc er vísindaskáldskapur sem Óttar og Hrafnkell hjálpuðu mér með. Við útfærðum þetta saman og Lionsgate keypti þetta og er að gera handrit. Ef af þessu verður þá er þetta 50 milljón dollara mynd sem verður gerð. En það eru alltaf endalausir fyrirvarar. Ég er tengdur við þetta með leikstjórn í huga en svo mega þeir alltaf reka mann.“
Óli segist ekki mega segja margt um Revoc, eiginlega bara ekkert meira en þetta: „Hún fjallar um mann sem yfirheyrir geimverur. Það er það sem má segja.“
Óli hefur verið á flakki milli Íslands og Los Angeles síðustu mánuði og þannig verður þetta eitthvað áfram. „Ég hef verið að fara svolítið fram og til baka og er tengdur tveimur til þremur öðrum verkefnum úti. En þetta er alltaf það sama og það er verið að bíða eftir fjármagni, finna réttu leikarana og svo framvegis. Þetta er ógeðslega spennandi en maður vill samt ekkert fara að gera eitthvert bull bara til að gera bull.“
Óli er á kafi í klippingu Borgríkis II en fer aftur út á næsta ári.
Hugmyndirnar koma í útlöndum
Óttar býr á Spáni en segist þó vera furðu mikið á Íslandi. „En bækistöðin mín er á Spáni. Ég á spænska kærustu og hún vinnur þar þannig að ég er mikið þar. Mér finnst rosalega gott fyrir mig sem rithöfund að vera í öðru landi. Mér finnst líka eins og ég fái alltaf hugmyndir í útlöndum. Mér finnst ég aldrei fá hugmyndir á Íslandi.
„Ég þekki þetta líka.“ Tekur Óli undir.
„Já, finnurðu fyrir þessu?“ Spyr Óttar. „Ég get unnið handavinnuna ágætlega hérna og ég get unnið úr hugmyndum annarra, hitt Óla þig en þegar kemur að frumlegum hugmyndum þá kemur ekki neitt.
„Ég er alveg sammála þér,“ segir Óli.
„Það er oft þannig að ég er bara nýlentur á Spáni, kannski bara í rútunni frá flugvellinum, þá gerist eitthvað, einhver krani opnast sem hefur stíflast eftir kannski tvo mánuði á Íslandi og hugmyndirnar flæða bara fram.“
„Þegar ég fékk þessa geimvísindasöguhugmynd, Revoc, þá var ég í þunglyndi í Los Angeles. Það er sko alveg nastí staður. Þótt það sé ógeðslega gott veður og svona þá er ekkert þyngarafl þarna og það ruglar í þér. Þá fékk ég þessa hugmynd og þetta er rosalega oft svona þegar ég ferðast, þá kemur bara allt öðruvísi tegund af dánlódi í hausinn á manni.“
Á meðan Óli þreifar fyrir sér í kvikmyndagerð í Hollywood hefur Óttari gengið ágætlega að koma sér á framfæri í Evrópu. „Bækurnar mínar hafa komið út á spænsku, frönsku, þýsku og hollensku,“ segir hann.
„Sólkross og Hnífur Abrahams eru vinsælastar og þetta eru alveg nokkur Evrópulönd sem hafa hrannast inn og áhugi frá fleiri löndum þannig að þetta er rosa fínt.“
Franskur útgefandi Óttars hefur þegar sýnt Blóði hraustra manna áhuga en þar heilla ekki síst tengslin milli skáldsögu og kvikmyndar.
„Sólkross var að koma út í Frakklandi fyrir nokkrum mánuðum þannig að ég hef verið að fara á bókmenntahátíðir og ég hitti akkúrat forlagið mitt og umboðskonuna úti í París fyrir mánuði síðan. Þau vissu af þessu með Borgríki og ég sá að þau voru mjög áhugasöm. Þannig að það fyrsta sem ég gerði þegar ég kom til Íslands var að fá eintak af bókinni minni og senda út til Frakklands.
Þau vildu fá eintak sem allra fyrst svo lesari gæti farið yfir hana. Þannig virkar þetta í bókabransanum. Það er alltaf lesari sem les fyrir forlagið og metur verkin en ég fann strax að þau voru hrifin af þessari tengingu bíómyndar og bókar. Svo sjáum við til hvað gerist.“
„Síðan verður spennandi að sjá hvernig giftingin tekst, þegar myndin kemur á næsta ári. Það verður áhugavert að sjá hvernig þær giftast og bæta kannski hvor aðra, bíómyndin og bókin. Þetta verður skemmtileg tenging.“
Óttar er á sama máli. „Það var náttúrlega þarna sem ég sá strax möguleikana. Vegna þess að plottið hjá Óla og Hrafnkeli var 100% þurfti ég engu að bæta við þar en sá möguleikana þar sem skáldsagan hefur yfirburði. Í bók er hægt að fara djúpt ofan í huga hverrar persónu. Að því leyti finnst mér bókin að bæta við söguheim Borgríkis, bæði í mynd 1 og 2 þar sem við komumst dýpra ofan í huga persónanna en býðst í 90 mínútna mynd.“
Andlegir auðmenn
En með þennan byr í seglin, bæði í Bandaríkjunum og Evrópu, hljótið þið að vera í góðum málum, Streyma ekki evrurnar og dollararnir til ykkar þannig að þið vitið ekki aura ykkar tal?
„Jú, við erum með áhættufjármagn í umferð og erum að fjármagna mikið í Skuggahverfinu og Í New York,“ segir Óli án þess að sýna nokkur svipbrigði en Óttar hlær.
„Við erum líka að opna útgáfufyrirtæki í London og Óttar er að búa til sportlínu þannig að þetta er allt að koma hjá okkur.“
„Svo er það ilmvatnið! Það er ilmvatn á leiðinni,“ segir Óttar.
„Já og ilmvatnið. Það verður samt undir mínu nafni, de Fleur. Þetta er bara puð eins og allt annað. Ég veit ekki með Óttar. Geturðu lánað mér pening?“
„Við komumst af og getum haldið áfram að skapa. Það er fyrir öllu,“ segir Óttar. „Við erum ekki í vinnu eins og bankastarfsmaður eða eitthvað. Við erum eiginlega bara að reyna að komast af. Vegna þess að við viljum gera það sem við elskum að gera. Það er alltaf gulrótin. Ég veit ekki hvort bankastarfsmaður elski það sem hann er að gera en þar held ég að peningarnir séu kannski gulrótin. En ég veit það ekki. Kannski hefur hann bara áhuga á því sem hann er að gera.“
„Við skulum ekki vera að setja okkur…,“ grípur Óli inn í.
„Nei, nei. Á neinn háan hest.“ Botnar Óttar.
„Við eigum ekkert að þykjast hafa vit á einhverju sem við vitum ekkert um. Höldum okkur bara á íslenska hestinum sem er lágvaxinn, smáhestur. Fínt að vera bara á honum,“ segir Óli.
Framleiðslufyrirtækið Summit, sem meðal annars á heiðurinn af Twilight-vampíruæðinu og Óskarsverðlaunamyndinni The Hurt Lcoker, hefur keypt hugmynd Ólafs Jóhannessonar að framtíðartrylli. Framleiðendurnir á bakvið nýjustu kvikmyndina um Prúðuleikarana ætla fjármagna hugmyndina.
Ólafi Jóhannessyni, kvikmyndaleikstjóra, hefur verið boðið að leikstýra kvikmynd í Hollywood. Ólafur hefur átt í viðræðum við mjög þekktan og umsvifamikinn framleiðanda í kvikmyndaborginni en hann hefur verið með annan fótinn í Bandaríkjunum að undanförnu.
Eddutilnefningar voru tilkynntar á dögunum og erum við hjá Poppoli kvikmyndafélagi afar stolt yfir því að hafa fengið 13 tilnefningar í hús fyrir myndir okkar Borgríki og Kurteist fólk sem báðar komu út á síðasta ári. Borgríki hlaut meðal annars tilnefningu sem besta mynd, en Olaf de Fleur hlaut einnig tilnefningu fyrir bestu leikstjórn og Sigurður Sigurjónsson tilnefningu sem leikari í aðalhlutverki. Kurteist fólk hlaut tilnefningu fyrir besta handrit og Eggert Þorleifsson tilnefningu sem leikari í aukahlutverki fyrir frammistöðu sína sem Markell sveitasjóri í Búðardal. Við erum stolt og hrærð og viljum þakka öllu okkar tökuliði og leikurum sem hafa komið að gerð mynda okkar, sem og tónlistarfólki sem ljáð hefur myndunum sína tóna og stuðningsaðillum sem hafa styrkt okkur með fé eða vörum. Kvikmyndamiðstöð Íslands og dreifingaraðilli okkar Myndform frá alveg sérstakar þakkir fyrir farsælt samstarf. Eddunni verður sjónvarpað beint frá Gamla Bíó á Stöð 2 næstkomandi laugardagskvöld. Hér fyrir neðan getur að líta fullt yfirlit yfir tilnefningar sem myndir okkar hlutu.
Borgríki:
BÍÓMYND ÁRSINS
Leikstjóri ársins: Olaf De Fleur Johannesson
Leikari ársins í aðalhlutverki: Sigurður Sigurjónsson
Kvikmyndataka ársins: Bjarni Felix Bjarnason & Gunnar Heidar
Klipping ársins: Olaf de Fleur & Sigurður Eyþórsson
Glæpamyndin Borgríki eftir Ólaf Jóhannesson hefur lagst vel í landann og hefur að auki vakið athygli og áhuga stórlaxa í Hollywood. Greint hefur verið frá því að leikstjórinn James Mangold hyggist endurgera Borgríki Vestanhafs.
Mangold var þó síður en svo eini þungavigtarmaðurinn sem sýndi mynd Ólafs áhuga og nokkuð margir munu hafa verið um hituna. Fréttatíminn hefur þannig heimildir fyrir því að einn heitasti leikstjórinn í Bandaríkjunum um þessar mundir, sjálfur Christopher Nolan, hafi sýnt Borgríki áhuga en lögmaður hans mun hafa falast eftir því að fá að skoða myndina.
Nolan hefur undanfarin ár gert það gott með nýju myndunum um Batman og sló hressilega í gegn með Inception í fyrra.
Framleiðendur kvikmyndarinnar Borgríkis fóru óhefðbundnar leiðir til að fjármagna gerð myndarinnar. Myndin var framleidd í miðri efnahagskreppu þar sem allmikið hafði verið skorið niður í framlögum til kvikmyndagerðar.
Borgríki er nútíma glæpasaga úr reykvískum raunveruleika sem segir frá serbneskum bifvélavirkja sem missir ófætt barn sitt í árás. Í hefndaraðgerðum sínum tvinnast örlög hans saman við lögreglukonu sem ýtt er út á ystu nöf, spilltan yfirmann hennar í fíkniefnadeild lögreglunnar og glæpakóng sem er að missa tökin á veldi sínu.
Borgríki er, að ég held, önnur undirheimamynd okkar Íslendinga en Reykjavík-Rotterdam vígði stefnuna. Samanburðurinn er því óhjákvæmilegur með aðeins tvær myndir innan sömu stefnu. Rvk-Rtm er spennumynd og frábær sem slík en Borgríki er allt öðruvísi. Hún er róleg og yfirveguð en spennandi á réttum tímum. Hún meira að segja brýtur aðeins upp hefðbundið frásagnarform og gerir það vel. Ólafur de Fleur Jóhannesson leikstýrir. Áður hefur hann m.a. gert Kurteist fólk, Stóra planið og Blindsker. Hann er því, tjah, mistækur leikstjóri.
Öll tæknivinnsla er fagmannlega unnin og leikur er virkilega góður og ekki á lægra stigi en við erum vön frá Hollywood. Í helstu hlutverkum eru Ágústa Eva Erlendsdóttir, Ingvar E. Sigurðsson, Björn Hlynur Haraldsson og Zlatko Krickic. Þau eru öll fáránlega góð og þó það sé ósanngjarnt að gera upp á milli þeirra þá bar Zlatko Krickic af.
Ágústa Eva leikur löggu, Ingvar E. undirheimabarón, Björn Hlynur starfar fyrir hann og Zlatko serbneskan óþokka sem ætlar sér að taka yfir margþætta starfsemi Ingvars. Persónusköpun er góð, persónurnar eru heilsteyptar, og þó þær hafi allar sínar myrku hliðar þá vorkennum við þeim öllum og styðjum á sama tíma, þökk sé góðu handriti. Sem utanaðkomandi aðili að undirheimum Íslands þá get ég vel ímyndað mér að myndin gefi raunhæfa mynd af þeim.Það er sama hvernig þú lítur á Borgríki, þetta er frábær mynd á allan hátt.
gummygunk
janainaart
germansingergirl
annaxmalina
discoholicmusic
dailybridgerton
izzy806
jacobvanloon
kianamaiart
stormborns