Should I stay or should I go?
الحياة غريبة أوي معايا، ومظنش كنت بالتوهة دي في حياتي زي ما أنا دلوقتي. مش عارفة أفضل لوحدي في القاهرة وفلوسي كلها رايحة ع الايجار والمعيشة اليومية اللي هي أكل وشرب، واللي مش باكل غير جبنة واندومي معظم الأيام، ولا أرجع لبيتنا وأفضل من غير أي مليم وبخناقات ع طول؟ أفضل معتمدة ع نفسي وبحاول وبجرب، ومحدش يسألني صليتي ولا لأ ولا هترجعي لربنا امتى ولا لو معملتيش كذا مش هسمحلك تعملي كذا، أو آخرك ترجعي الساعة كذا، ولا أفضل في البيت متحكمين في كل صغيرة وكبيرة ونكد كل يوم وخناق؟ أفضل لوحدي بس مبنطقش مع حد وكل يومي شغل ونوم ويادوب ألحق آكل ويوحشني الأكل مع الناس ويوحشني كلام الناس، ولا أرجع البيت وأفضل بردو لوحدي بس باكل مع حد في يومي وممكن يسألني عاملة ايه النهارده؟
أنا خايفة فشخ من الدنيا، ومش عارفة أبطل تفكير إنه كده نار وكده نار، وهنا مش مرتاحة ولا هرتاح وهناك مش مرتاحة ولا هرتاح، وإنه ليه حتى أتعب نفسي وأحاول لما ممكن من المرتب الجاي ده أعمل اللي عايزاه ومبقاش هنا خالص؟ ليه أفضل بحاول أعدي اليوم بيومه ويادوب أنام ويادوب آكل ويادوب أعيش، لما ممكن أنهي كل ده؟ وليه الحياة كده؟ ليه بجد الحياة كده؟ أنا مش عارفة أنا لو غلطت فايه هي غلطتي؟ وليه ناس غلطت أكتر وأبشع مني بكتير والحياة مسامحاهم؟ "اشمعنى سابوا الناس بقلوب خَضار وعمار، وفي قلبي نزلوا سَلب؟" وليه الحياة عمالة تخبطني في كل حتة وأنا أقول ماشي، اشطة، يمكن هو ده النضج، يمكن هي دي المسؤولية، وميكونش ده غير أذى مطلق؟ ليه بفضل طول حياتي أبرر أنا كده ليه، وليه متوترة وليه بفكر كتير وليه بكره نفسي وليه النكت بتاعتي سوداوية ودارك، حتى وأنا كويسة ومفرفشة لوحدي! من كام يوم بنت بتقول لبنت "ما أنتِ خلاص نسيتيني وصاحبتي ----" قالتلها "يا بنتي مصاحبتش حد والله" وأنا رديت وقلت "محدش بيصاحب ----" وضحِكت بعدها كده وبعدين تنحت من الجملة إني قلتها بصوت عالي قدام الناس وبسهولة كده! مش عارفة كان المفروض أفضل في البيت بتحكمات وزعيق وانتقاد ع طول وبشتغل فريلانس تحت ضغط الشغل وضغط البيت، ولا أفضل كده لوحدي في القاهرة تحت ضغط الشغل والناس؟ يعني أروح لمين ولا أروح فين؟ أوقات بيبقى نفسي أروح لأي حد أكبر مني وميعرفنيش أوي وألجأله وأقوله "قولي أعمل ايه! أنا معنديش حتى إله ألجأله! قولي أروح لمين؟ طب أنا صح ولا غلط؟ أبطل كل ده؟ أمشي بعيد؟"
الحياة غريبة أوي، الحياة غريبة فشخ، وأنا مش عارفة أعمل ايه...
Sometimes solutions aren't so simple, sometimes goodbye's the only way.
