= جاية لحضرتك يا دكتور عشان أنا مبقيتش عارفة أتعامل مع البني آدمين , مبقيتش طايقاهم ولا فاهماهم ولا قادرة أستوعبهم , بقى سهل جداً أتخنق من أي حاجة حد يعملها حتى لو بسيطة زي إنه يخبط فيا وميعتذرش مثلاً ودي بتحصل كتير على فكرة .
“ ولحد ما تميت 6 سنين
أنا كنت بحب البني آدمين
وكرهت الناس من بعديها
علشان نسوني أنا أصلاً مين “
بقيت مبحبش الزحمة ولا الأصوات العالية اللي داخلة ف بعضيها , مبحبش أتواجد في مكان فيه ناس كتير حتى لو أنا عارفة الناس دول .
جايالك عشان عايزة أتكلم مع حد
= عندي أكيد , وغالباً فيه منهم اللي هيبقى مبسوط لو اتكلمت معاه بس أنا اللي بقيت مش عايزة أتكلم مع أي حد أعرفه على أي حاجة بخصوصي , أي حاجة بتلمسني جامد بقيت مبحبش أقول لحد عليها . وغالباً عشان كده حاسة دايماً إني تقيلة من كتر الكلام , لأني مش عارفة أتعامل مع اختياري بإني مقولش حاجة
أنا مش عارفة أتعامل مع اختياراتي عامة .. مش عارفة اتعامل مع كليتي .. مش عارفة اتعامل مع اني متكلمش .. مش عارفة اتعامل مع اني لوحدي من جوة .. مش عارفة اتعامل مع المبادئ الأساسية للتعاملات مع البني آدمين لأني حاساها مختلفة ما بيني وما بينهم
دلوقتي الشيء اللي بقيت بعمله هو إني بحاول متعلقش بأي شيء أو أي حد على الإطلاق ,, وأي مشاعر ناحية أي شخص بقيت بعملها suppression على طول .. وده مش شيء سهل لأني شخص غالباً مشاعره مرهرطة ,, فأنا طول الوقت بحاول أتكتم من الكلام ومن المشاعر
وأي كلام حلو أو مبادرة حلوة ممكن تتعمل مبقاش ليا القدرة إني أفكر أعلمها من الأساس , كان فيه حد كاتب من فترة بوست عن المحبة .. أنا تنحت قدام الكلمة ومعرفتش اتخطاها ولا أتخطى عدم معرفتي لمعناها وهي موجودة عندي دلوقتي ولا مش موجودة
غير أولاد أخواتي , ونسمة الهوا الباردة , وأخواتي , وأمي مش عارفة للمحبة وجود في الوقت الحال مش قادرة أحدد مسمى للناس ولا الأشياء
بقيت بعدّي البوستات اللي فيها مشاعر عشان مش حاساها خالص ,
كان فيه حد كاتب بوست بيتكلم عن حبه لأشخاص ف حياته , البوستات دي كتير جداً , بعدي من عليا بتضايقني , عارفة إنه مش من حقي أتضايق لأنه الموضوع ميخصنيش وكل واحد حر ف حياته وحر يعمل اللي هو عايزه , بس الفكرة اللي دايماً بتسيطر على دماغي لما بشوف البوستات اللي من النوع ده هي “ هو إنتوا ازاي قادرين تحبوا كل اناس دول في نفس الوقت وبنفس القوة كده ؟ .. إزاي يبقى عندك الشخص اللي كل أسراراك معاه وف نفس الوقت فيه حد تاني بتروحله لما تكون متضايق وشخص تالت هو السند ورابع هو الأمان وخامس وسادس وسابع .. وإزاي الناس اللي مذكورة ف البوست ده قابلة إنها تكون سد خانة ف حياة شخص ؟! .. على الهامش ؟ “
عارفة إنه قدامي كتير عشان أتعلمه ,, وإنه “ ما بين الحب والكره في 100 إحساس لا هم حب ولا هم كره “
عارفة إنه أنا بقييت شخص معقد ومحبكها ف حاجات كتير .. بس عشان أنا مش عارفة .. ومش فاهمة .. ومش قادرة أسلّم بالأمر الواقع
“ معلش أنا عارف برغي كتير
وبسفّ ف وقتك وف وقتي
أنا نفسي أنام .. أنا عايز أروح دلوقتي
هنكمل إمتى علاج طيب ؟
لازم هنشوف بعض قريب”
