طبعًا لازم نتقبل أي إنسان كpackage كاملة. عارفة ده ودايمًا بعمله مع الناس..مستحيل بأي شكل نجزء الناس وناخد منهم الحلو ونغير الوحش..يا نقبلهم زي ماهما يا نسيبهم زي ماهما. وبناءًا عليه،بحاول أتقبل نفسي كpackage بحاول أخدها زي ماهي..أنا مش شخصية صعبة أبدًا..أنا مرنة جدا و زي الماية. مش فاكرة مين بالظبط قالي زمان اني شبه الماية..بس مافيش حاجة وصفتني أدق من كدا. أنا زي الماية بكل الميزات والعيوب اللي فيها. صافية جدا لكل الناس ولنفسي..بس أقل حاجة بتعكر الصفو ده وبيبان عليا وزي الماية..للأسف أوقات بحس ان لا في طعم ولا في لون..مافيش شخصية قوية وثابتة كدا. أنا زعلانة جدًا..حاسة اني مستهلكة كدا جسديًا ونفسيًا وفكريًا وعاطفيًا..ماعنديش طاقة لأي حاجة..أي حاجة. لا قادرة أحس فرح أو زعل أو غضب أو أي إنفعال عمومًا..طيف يشاهد الحياة من بعيد كدا وبس بكره أكون تعبانة ومابعرفش أجي على نفسي في الجزء ده..صحيت من النوم لقيت جسمي تعبان ونفسيتي كمان غالبًا لأن تعب ده مرتبط بتعب ده بشكل دائم عندي فقررت إني مش هعمل أي حاجة ومش هروح الكلية بكرا أصلًا..أنا باجي أفكر ايه اللي بيهلكني كدا في حوار الكلية ده مابلاقيش اجابة..السفر؟ ولا الدراسة؟ ولا الناس؟ ماعرفش بس أنا باجي خلصانة كدا ومش قادرة حتى أفكر مالي. لما بكلم بابا وانا في الحالة دي دايمًا بابقى خلاص هعيط..هو الوحيد! دايما لما بسمع "أنتم حياتي وإن شاهدتكم حضرت،ولو حُجبتم تغيبُ الروح عن جسدي" دي منطبقة عليه..مفتقدة وجوده جدًا لأقصى درجة ممكنة..ماليش حد غيره هنا. اتصلت على شروء حكيتلها كل اللي في دماغي تقريبا وهي حكتلي..إحنا مشاعرنا تجاه نفسنا والناس ونظرتنا للأمور ماشيين مع بعض بالظبط..كنت بقولها إن مهما حصل،ماينفعش نندم أبدًا على أي لحظة اتنازلنا فيها عن حاجة معينة بدافع الحب أو الحنية يعني. وإني مابخافش علينا من حد أو حاجة.وكنت عارفة انها هاتبقى كويسة. هي معادلة بسيطة جدًا تقسى وألين وألين..والقسية تقطع عروق المحبة. بتقطعها مابتخليش منها حاجة فعلًا..القسوة تمحو وجود المحبة.غصب عننا مش بإرادتنا. كنت بفكر ان ماينفعش نلوم حد أو نحاسبه على انه مش بيبادلنا نفس القدر من الحب..وانه بيبان جدا الشخص ده بيحب الشخص ده ولا لا. المفروض نبقى احنا كفيلين بأنفسنا في النقطة دي..ونحاسب نفسنا إذا استنينا من حد حاجة مش نحاسبهم إنهم مابيعملوهاش. حاسة إن لو حد مسكني كدا ممكن اتفتت في ايده أجزاء صغيرةً جدا زي شوكولاتة فليك D: مش مشكلة نحس ضعف أحيانًا..بس المهم مانحسش هوان.واتس أوكاي تو لت ات جو. تصبحي على خير يا نور..أتمنى.
