#c9diary

[c9diary]

不愛輸的孩子

同仔女玩係父母責任，玩遊戲學嘅其中一樣嘢，

就係點面對輸贏。

身為遊戲治療師嘅媽媽話，阿仔同爸爸捉棋、玩紙牌呢啲鬥智對奕遊戲，

一輸就「發脾四」。

但係又發現，如果同自己玩，阿仔輸都唔會咁大反應。

問返爸爸，原來佢同個仔玩遊戲嗰陣，完全冇讓賽……

偏偏，男仔喺3－7歲時正經歷「戀母情結」，會對爸爸作出挑戰。

咁但係爸爸智力體力都一定勝過兒子，

如果爸爸真係認真玩，阿仔根本冇得贏，

就會加深佢嘅負面情緒。

所以媽媽同佢玩，係會讓賽。因為遊戲嘅過程，比勝負更加重要。

呢個道理，父母都要明白。

亦都證明，做阿媽嘅……其實係湊緊兩個細路！！

（謎之音︰再次證明爸爸湊仔能力有待改善……）

原POST

[c9diary]

史匹堡畢業演講 叫青年相信直覺

畢業季節，外國唔少名人都會獲邀參加大學畢業禮，

上台講兩句。

之前FB 教主Mark Zuckerberg嘅致詞廣為瘋傳，

今日我地聽吓另一個有腦之人史提芬史匹堡嘅金石良言。

呢位大導對住呢班畢業生講，年青時佢都唔知自己係咩人，

因為人生頭25年都係聽人地講嘢，

老師、家長甚至老闆都係話俾你知個世界係點。

你接收好多，但未必全部認同。

有時，你內在有把聲音反對，但係為咗順從，你唔出聲。

史匹堡話呢把內在聲音好微弱，但係當佢專注去搵，就發現到自己嘅直覺。

「理智」(consciousness)同「直覺」（intuition)嘅分別係︰

前者大大聲話你知「你要做啲乜」，而後者就係輕輕提你「你可以做啲乜」。

史匹堡最後提在座學生，相信你嘅直覺，

佢先係真正塑造你自己嘅關鍵。

為人父母，尤其是仔女開始大、有自己想法嘅時候，

點先可以保持「適當距離」，唔好令你嘅經驗，

影響小朋友尋找自我嘅特性？

將心比己啦，自己都唔鍾意俾人灌輸「人生道理」嘅話，

就唔好長氣又「侵」氣喇。

幾時都要記住，唔好成為童年時你所討厭嘅成年人。

https://www.facebook.com/goalcast/videos/1406356279441558/

[c9diary]

10歲仔識寫app 蘋果CEO都要見佢！

蘋果早排嘅發布會上，有個人連CEO Tim Cook都要見一見佢。

Yuma就係呢個VIP，佢係一個app developer，來自澳洲，今年10歲。

澳洲當地學童入學後會獲發一部ipad，

其他小朋友可能用佢打機、睇片，Yuma就用嚟研究啲app。

玩吓玩吓，佢開始想寫app，就「挨」爸爸俾部電腦佢用。

然後，Yuma仲自學寫app，8歲嗰年同爸爸合作，

寫出第一個app，係幫人搵餐廳嘅。

呢個時候，佢申請停學2個月，原因係要寫app。

結果之後一年，佢創造咗5隻app出嚟，而家仲開始教大人寫app。

好多家長日谷夜谷，都想仔女贏在起跑線。

假如佢地真係有天份，不過跑道喺你唔熟悉／唔似有「錢」途嘅方面，又或者想擺低學業全力發展，

作為家長，你會點去處理呢啲「甜蜜的負擔」？

原post

[c9diary]

九龍塘不等於名校

早排小一入學，有家長千辛萬苦都要搬去九龍塘，

因為呢區多名校喎。

求仁得仁，入到又點？

有家長就踢爆某九龍塘名校嘅學習氣氛，並唔係咁好……

一來，功課多。有份專題研習複雜到唔請槍搵家長做唔得！

二，成績平平嘅同學，老師會奚落佢地，例如叫家長幫學生搵補習，甚至轉校。

仲有，校長支持TSA，會操練，即係功課又多啲。

最後，即使小朋友應付到，呢位家長都決定轉校。

可能好多家長覺得「名校係咁架啦」。

咁就要睇你覺得「做人係咁架啦」有冇問題。

學校，有好多選擇。成長，有好多方法。

係咪只可以用成績換取快樂？呢啲就交俾家長判斷喇。

原post

[c9diary]

生一胎真係會蠢三年？！

//成日話「一胎蠢三年」，我信。

但又何止三年，三年又三年就真。

睇完呢份分析就知，

原來生一個小朋友，要承受身體痛楚之外，

更要承受生產後嘅體內變化。

所以話呢，唔好成日話啲阿媽無記性、講極唔明呀、

長氣又唚氣等等。

班阿媽明知一生將要承受永不磨滅嘅痛楚，

都無怨無侮咁帶大家嚟到呢個世界，

何止母親節呀，

大家應該無時無刻都愛錫佢哋多啲！//

原文：【媽媽辛苦了】生一個 蠢三年？

[c9diary]

有苦自己知

//C9仔係典型在職媽媽，

仲要係無工人姐姐個隻。

每朝趕頭趕命湊B返學再返工，

放工後再趕頭趕命買餸煮飯湊B做家頭細務，

以上日程每日無限loop,

為頭家每日爭分奪秒同時間競賽。

所以文中被投訴嘅年輕媽媽嘅心情我懂！

阿年輕媽媽重返職場唔代表佢唔洗再做人阿媽，

佢只不過希望準時放工同往日一樣煮餐晚飯俾個仔食，

再者唔OT唔代表唔會努力工作。

仲有，唔好搞到OT咁合理化好唔好?

唉！怪唔得香港會係亞洲地區OT工時最長嘅地方喇。。。。

原文： 【咁都得?】新同事為兒子不肯OT 網絡公審引起罵戰

[c9diary]

病入膏肓

//C9仔今朝晨早流流開whatspp，

俾呢條疑幻似真嘅message嚇醒。

媽媽groups入面啲阿媽無一不大叫「恐佈」，

我直情覺得心都寒埋。

無稽嘅教育制度確實令好多家長、同學抖不過氣來，

但面對一啲普通人不能輕易改變之事，

呢位家長唔同個仔企喺同一陣線之餘，

反而仲踩多一腳，

迫阿仔入牆角，

點止抖氣，就連生存嘅空間都無呀。

如果件事係真，

麻煩認識呢位家長嘅親戚朋友，

叫事主立即求醫，希望病入膏肓嘅佢盡快得到治療。

（雙手合十ing）//

[c9diary]

媽媽group診療所

//自10月懷胎開始，

C9仔我大大話話join咗無10個都有20個呢啲媽媽groups。

但係發現到一個奇怪現象，

呢d groups時不時遇到好多媽媽，

小朋友一頭暈身㷫，

第一時間並唔係去睇醫生，

反而post上媽媽groups，

希望有心人可以「望聞問切」。

C9仔敢講我喺啲媽媽groups到，

睇過groups內班BB嘅「便便」相，無10張都有8張。

解答完初生嘅「便便」困惑之後，

BB再大少少就開始po pat pat 肉照，

問下點解紅晒呀、有紅點之類，

搞搞下啲媽媽groups就變成「流動診療所」。

曾經遇過不只一次有媽媽講到個BB隻眼仔紅晒又剩、

第一時間唔係去求醫，

反而po相上groups，希望搵到個有相同經歷嘅媽媽可以解答病因。

作為新手媽嘅我，

可以喺呢啲groups到互相交流、分享喜樂、

確實可以搵好多心靈慰寂。

但所謂「病向淺中醫」，

發現BB有咩唔妥，

應該立即求醫，

以免延誤呀！//