#globalisasyon

[chespenera]

GLOBALISASYON

PANIMULA

Ang Blog na ito tungkol sa Globalisasyon na aking gustong ibahagi sa ating nararanasang suliranin tungkol dito. Nais ko ring ibahagi ang aking opinyon tungkol dito. Isang hamon sa ating ekonomiya ang globalisasyon dahil na rin ito sa pagbabagong dulot ng teknolohiya, mga kultura at pangkahalatang pamamaraan ng pamumuhay. Ang Globalisasyon ba ay may mabuting madudulot sa atin o ito’y sagabal lamang sa ating pagunlad?  

 SULIRANING PANG-EKONOMIYA

Ang Globalisasyon ay isang proseso ng interksyon at paguugnay ng mga pamahalaan, negosyo, kompanya, at mga tao sa magkakaibang bansa. Dahil sa paglaganap ng mabagong teknolohiya mas napapadali ang paguugnayan ng bawat panig ng iba’t ibang bansa. Ang salik at dahilan ng pagusbong nito ay tungkol sa ekonomiya, politikal, at kultural. Ang ekonomikang globalisasyon ay ang pagusbong ng pangkalakalan o pangkabuhayan ng isang bansa.Sa paglipas ng panahon, nagsilabasan ang malalaking korporasyon na hindi lamang sa pinanggalingang lugar may operasyon, kundi, tumatakbo rin ang kanilang mga negosyo sa labas ng kanilang bansa. Dahil dito, mas lalong lumago o mas lalong nakilala ang mga lokal na produksiyon. Ngunit maaaring maging epekto nito ay maging dahilan ng kahirapan dulot ng paglaki ng agwat ng mayayaman sa mahihirap, paglala ng problema sa ekonomiya ng mga bansang nakakaranas nito. Ang globalisayong politikal ay ang mabilis na ugnayan sa pagitan ng magka-ibang bansa. Ito rin ay nangangahulugang pagbubuo ng isang pandaigdigang samahan kung saan nagkakaroon ng sistematikong ugnayan ang mga bansa. Ngunit maaring maging epekto nito ay ang panghihimasok ng ibang bansa sa mga isyu at desisyon ng pamahalan at ang paglaganap ng terorismo sa ating bansa. Ang globalisasyong kultural ay tumutukoy sa mabilisang pagpapalaganap ng impormasyon, kultura, kaugalian, at iba na may kinalaman sa interaksyon ng mga tao. Naapektuhan nito ang gawi at nakasanayan ng mga tao sa isang partikular na lugar sapagkat naiimpluwensyahan tayo ng ibang kultura nito.

PAGLALAHAD AT PAGSUSURI NG DATOS

Ayon sa United Nations Commission on Transnational Corporations and Investment, Ang Transnational Companies ay tumutukoy sa mga kompanya o negosyong nagtatatag ng pasilidad sa ibang bansa. Ang kanilang serbisyong ipinagbibili ay batay sa pangangailangang lokal. Binibigyang kalayaan na magdesisyon, magsaliksik, at magbenta ang mga yunit na ito ayon na rin sa hinihingi ng kanilang pamilihang lokal. Marami sa kanila ay kompanyang petrolyo, pharmaceutical, at mga kauri nito. Halimbawa nito ang kompanyang Shell, Accenture, TELUS International Phils., at Glaxo-Smith Klein (halimbawang produkto ay sensodyne at panadol). 

Ang Multinational Companies ay ang pangkalahatang katawagan  na tumutukoy sa mga namumuhunang kompanya sa ibang bansa ngunit ang mga produkto o serbisyong ipinagbibili ay hindi nakabatay sa pangangailangang lokal ng pamilihan. Ilang halimbawa nito ay ang Unilever, Mc Donald’s, Coca-Cola, Google, UBER, Starbucks, Seven-Eleven, Toyota Motor, Shell, at iba pa. Dinala ng mga korporasyong nabanggit ang mga produkto at serbisyong naging bahagi na ng pang-araw-araw na pamumuhay ng mga Pilipino. 

Nagbubunga ito sa kalaunan ng higit na pagyaman at paglakas ng mga nasabing MNCs and TNCs nagdudulot naman ng paglaki ng agwat sa pagitan ng mayaman at mahirap. Maliwanag itong natukoy sa pag-aaral ng Oxfam International sa taong 2017. Ayon sa kanilang pananaliksik, ang kinita ng sampung pinakamalalaking korporasyon sa buong mundo sa taong 2015-2016 ay higit pa sa kita ng 180 bansa. Tinukoy din sa nasabing ulat na ang yaman ng nangungunang walong bilyonaryo ay katumbas ng pinagsamasamang yaman ng 3.6 bilyong tao sa daigdig.

KONKLUSYON

Ang impluwensiya ng Globalisasyon sa buhay ng tao ay nagdala ng mga pagbabagong nagpapabuit sa ilang aspeto ng ating buhay ngunit ito ay may kalakip na suliraning dapat nating tugunan bilang tao. Pagbabagong dala dulot ng Globalisayon ay mayroong masamang epekto at mabuting epekto ang globalisasyon sa ating bansa. Ang magandang epekto nito ay nagkakaroon tayo ng mura at mabilis na komunikasyon at transportasyon, at nabibigyan tayo ng serbisyo ng mga dayuhan sa kanilang kompanya. Ang masamang epekto naman nito ay unti-unti tayong binabago nito, ang ating kasanayan at kultura at napapaligiran na tayo ng mga siyudad o lungsod at mga pabrika.

SOLUSYON

Sa mabilis na paglawak at pagbabago ng teknolohiya, masasabing ang mundo ay unti unti nang nagiging isang malaking nayon.Upang masulusyunan ito ay ating muling mahalin ang ating kultura, bawat bansa ay may iba’t ibang paniniwala at kultura kung kaya’t ating mahalin ito dahil tayo na lamang ang mabibigay halaga sa ating mga ninuno at siyang magbubuklod at gumagabay sa ating mga pilipino. Ito rin ay nagpapakita na mayroon tayong pinagmulan sa bagay at nakagawing gawain. Tangkilingin ang ating sariling produkto, dahil makatulong ito sa paglago ng ekonomiya ng bansa at sa para maipapakita ang pagmamahal natin sa ating bansa. at pangangalagan ang ating kalikasan dahil bilang isang mamayanan gusto kong pangalagaan ang ating kalikasan sapagkat dito rin nanggagaling ang ating mga pangangailangan. Ang pagkakaroon ng lungsod at pabrika ay maaaring magdulot ng pagkasira ng ating kalikasan kung kaya’t kahit sa simpleng pagtatanim ay makakatulong upang hindi masira ang ating kapaligiran.  

“MAHALIN NATIN ANG ATING SARILING ATIN.”

[margaruth]

What makes us a Filipino?

𝐃𝐢𝐬𝐜𝐥𝐚𝐢𝐦𝐞𝐫:  𝐓𝐡𝐢𝐬 𝐛𝐥𝐨𝐠 𝐢𝐬 𝐦𝐞𝐚𝐧𝐭 𝐩𝐮𝐫𝐞𝐥𝐲 𝐟𝐨𝐫 𝐞𝐝𝐮𝐜𝐚𝐭𝐢𝐨𝐧𝐚𝐥 𝐩𝐮𝐫𝐩𝐨𝐬𝐞𝐬. 𝐀𝐧𝐲 𝐯𝐢𝐞𝐰𝐬 𝐨𝐫 𝐨𝐩𝐢𝐧𝐢𝐨𝐧𝐬 𝐞𝐱𝐩𝐫𝐞𝐬𝐬𝐞𝐝 𝐢𝐧 𝐭𝐡𝐢𝐬 𝐛𝐥𝐨𝐠 𝐚𝐫𝐞 𝐩𝐞𝐫𝐬𝐨𝐧𝐚𝐥 𝐚𝐧𝐝 𝐝𝐨𝐞𝐬 𝐧𝐨𝐭 𝐧𝐞𝐜𝐞𝐬𝐬𝐚𝐫𝐢𝐥𝐲 𝐫𝐞𝐟𝐥𝐞𝐜𝐭 𝐭𝐡𝐞 𝐯𝐢𝐞𝐰𝐬 𝐚𝐧𝐝 𝐨𝐩𝐢𝐧𝐢𝐨𝐧𝐬 𝐨𝐟 𝐚𝐥𝐥 𝐯𝐢𝐞𝐰𝐞𝐫𝐬 𝐚𝐧𝐝 𝐫𝐞𝐚𝐝𝐞𝐫𝐬.

Hallyu in the Philippines

Bilang isang Pilipino, naging madali sa akin ang pagtanggap ng kultura mula sa ibang mga bansa, partikular na sa bansang Korea. Ang impluwensiya ng Korean dramas at Kpop ay nakaugat na sa lipunan ng ating bansa ngayon. Malaki ang naging impluwensiya nito sa industriya ng pagkain, fashion, cosmetics, music, entertainment, ganoon din sa mga pananaw at interes ng mga tao ngayon.

Hindi ko masasabing pinagsisihan kong kilanin ang kultura ng Korea, ngunit sana’y hindi ko na lamang ito natutunan pa. Habang tinatalakay ng aming guro sa Araling Panlipunan ang tungkol sa masasamang dulot ng globalisasyon, hindi ko maiwasang ma - guilty, sapagkat hindi ko maitatanggi na isa din ako sa mga taong higit na tumatangkilik sa mga produkto ng Korea lalo na sa aspetong libangan (entertainment).

(FAVORITE SHOW KO TOH!!! AAAAAAAAAAAAASDJHBSDHKS)

Araw - araw, unti - unti kong napagtatanto na parati na lamang akong nakasubaybay sa Kdrama, naghihintay ng bagong episode tuwing linggo. Sa mga Variety shows, sa halip na Showtime ang pinapanood ko, Running Man ang tinatawanan ko tuwing Lunes. Hindi ko din maiwasan na makisabay sa uso, lalo na sa paraan ng pananamit na ayon sa kanila, aesthetic daw ang datingan. 

Ang parati ko pang palusot, “Hindi mo naman masusukat ang pagiging Pilipino mo sa panonood lang ng Kdrama/ K-variety shows at pagsuporta sa mga Kpop groups, eh. Pilipino pa rin naman ako kahit ganon.”

Nye, nye, nye, whatever. Naisantabi ko pa rin yung mga panahon na dapat gawang Pilipino ang mga tinatangkilik ko. At, oo, maaaring iyon ang maging sukatan ng pagiging Pilipino ko. Ni hindi ko nga kayang magsalita nang  diretsong Tagalog nang walang Google Translate e. Sa wika palang, bagsak na, tapos mas inuuna ko pang kilanin ang kulturang banyaga, eh sa totoo lang napakaraming tradisyon at mga natatagong kultura ng mga tribo natin ang hindi ko alam. 

Sa akin lang, nakakahiya lamang sabihin na ako pa mismo ang nagsasantabi ng sarili kong lahi, para lamang tangkilikin ang kultura sa labas ng ating bansa.

What makes us unique?

Kung ating ilalarawan ang kultura ng Pilipinas, ito ay pinaghalong tradisyonal na Pilipino at tradisyong Katoliko mula sa mga Espanyol, na may mga impluwensya mula sa Amerika at iba pang bahagi ng Asya. With that being said, hindi talaga nagkaroon ng “original” na kulturang Pinoy ang mga Pilipino. Ang tinatamasa nating kultura ngayon ay parang pinagsama - samang kultura ng mga bansang nanakop sa atin.

Ngunit kahit na ganoon, mayroon pa rin tayong mga kaugalian na masasabi kong kakaiba. Isa na dito ang pagpapakita ng paggalang sa pamamagitan ng pagmamano at paggamit ng mga honorifics na hanggang ngayon ay sinasanay at pinahahalagahan ng mga Pilipino.

Sa amin, automatic na dapat ang paggawa ng mga ito sapagkat tinuruan kami na gumamit ng tamang mga salita at magpakita ng tamang paraan ng paggalang sa lahat ng pagkakataon hindi lamang sa harap ng mga matatanda.

What if the Philippines was never influenced by any country?

Hindi naman sa lahat ng pagkakataon ay masama na tayo’y maimpluwensiyahan. Ang mga impluwensiya na nakukuha natin mula sa Amerika, halimbawa, ay napakalaking tulong sa atin. Mayroon silang ipinakikilalang makabagong teknolohiya na magpapadali ng trabaho ng maraming kumpanya sa bansa.

Kung hindi tayo magiging bukas sa pagkatuto ng makabagong mga konsepto o sistema na epektibo naman, maaaring hindi tayo makasabay sa pag - unlad ng mga karatig - bansa at maging mahina ang ating pagganap bilang isang bansa.

Kung sa usaping kultural naman, sa aking palagay, mas mapagyayaman pa natin ang ating kultura at tradisyon, sapagkat hindi tayo tatangkilik ng ibang mga produkto maliban sa produktong Pilipino.

Matutulungan nito na maipamalas at mabigyan ng hype ang mga produkto at serbisyong na mula sa atin, lalo na’t ang mga Pilipino ang may pinakamalakas na hiyaw at suporta na ipinapakita sa mga produkto at serbisyong kanilang kinaiinteresan.

Dagdag pa dito, maaaring magkaroon ng iba’t ibang relihiyon at paniniwala ang mga Pilipino. Posibleng hanggang ngayon ay sinasamba pa din ng mga ito ang mga diyos at diyosa dahil wala namang ibang magpapakilala sa atin ng Kristiyanismo kundi ang mga taga - Europa lamang, sapagkat doon naman nagsimula iyon at sila ang nangunguna sa pananakop at pagpapalaganap ng kanilang pinaniniwalaang relihiyon.

Sa kabuuan, maaaring huli na ang lahat upang tayo’y makabuo pa ng kulturang orihinal na talagang nagmula sa atin, ngunit hindi kailanman tayo mawawalan ng pagkakataon na mas mahalin at pagyamanin pa ang kulturang natitira sa atin ngayon.

Hindi masamang matuto ng ibang mga kultura mula sa ibang mga bansa. Basta lamang ay huwag nating isasantabi at huwag nating hahayaang mas manaig pa ang lahi ng iba kaysa sa lahi ng ating pinagmulan. - MIRANDA :))

*Credits to the rightful owners of all pictures/videos/media used in this blog.

[jeykeeiii]

Blog 4 - 100%

Masasabi pa ba natin na ang ating mga kultura at tradisyon ay purong atin?

Ang ating kultura sa Pilipinas ay matatawag na cultural hybrid dahil sa ating pag tanggap at pagkonsumo sa kultura ng iba't ibang mga bansa dahil sa globalisasyon.

Ang globalisasyon sa madaling salita ay ang integrasyon ng mga nation/bansa kung saan nagpapalitan sila ng kanilang mga pananaw, produkto, ideya at iba pa.

Ang ang ating bansang Pilipinas ay nacolonize noong 1521 at sila ay nag tagal ng mahigit 300 years, dahil sa maagang pag colonize sa atin hindi tayo nagkaroon ng pagkakataon na i-explore, alamin at palaganapin ang sarili nating mga kultura. Kaya mula 1521 ay hindi na purong Pinoy culture ang meron tayo.

Ngayon ba? Sa ating mga pang araw araw na gawain at mga pag konsumo na ginagawa alin ang ating maituturing na "atin".

Ngayong lockdown ay napapadalas ang ating pag papadeliver mula sa mga fast food restaurants ngunit ang konsepto ng 'fast food' ay hindi mula sa atin.

Nahilig ka na din ba sa panonood ng kdrama? Cdrama? o kaya naman ay mga series mula sa ibang bansa. Yan ay maituturing na parte ng globalisasyon.

Pati ang pagpili natin ng damit ay naiiba din ayon sa nakikita natin mula sa mga paborito nating celebrities na kanila din namang nakuha mula sa iba.

Hindi ko madedeny na katulad niyo ay naapektuhan din ng globalisasyon ang aking mga personal choices sa buhay tulad ng mga kanta na pinapakinggan ko pati na rin ang mga pagkain na gusto kong kainin in the future.

Pero meron pa din naman tayong mga katangian na hindi maaalis satin bilang mga Pilipino at ito ay ang ating pagiging magalang sa mga nakatatanda. Tayo ay nag sasabi ng 'po' at 'opo' at nagmamano.

Isa din na aking napansin sa mga Pilipino ay wala satin ang konsepto ng 'moving out' di tulad ng ibang bansa na umaalis na ng bahay pag nag 18 yrs old na, tayo ay nananatili sa bahay ng ating mga magulang hanggang sa tayo ay magkaroon ng trabaho. Kahit na magbago ang ating mga personal choices dahil sa globalisasyon mayroon pa din talaga na hinding hindi magbabago at ito ay ang pagiging Pilipino natin.

Minsan ba ay naiisip niyo na kung pano kaya ang ating mga nakasanayan, kultura at mga tradisyon kung hindi tayo naaapektuhan ng globalisayon?

Nabanggit ko kanina na tayo ay maagang nasakop at hindi nag karoon ng pagkakataon na i-explore ang ating mga kultura at tradisyon. Naisip ko pano kaya kung katulad tayo ng Thailand na hindi nabago o naapektuhan ang kanilang mga tradisyon at kultura.

Panigurado ay mas madami pa tayong malalaman tungkol sa ating mga diyos at diyosa pati na rin ang mga kwento na nasunog ay ating malalaman.

Ano kaya ang magiging relihiyon natin? Actually baka nga wala tayong magiging relihiyon kung hindi tayo maeempluwensiyahan ng globalisasyon.

Siguro ay makikita natin ang mga diverse na kasuotan na maituturing natin na may purong impluwensya ng mga Pilipino. Ano kaya ang magiging itsura ng mga buildings at bahay natin?

Ang ating lenggwahe at alphabet ay paniguradong iba sa ating ginagamit ngayon. Iba rin ang ating mga tugtog o musika.

Ngayon na iniisip ko na talaga kung anong magiging itsura ng Pilipinas kung hindi tayo naimpluwensiyahan napapasabi na lang ako ng 'sayang'kasi ngayon hanggang imagine na lang.

Ikaw ba? May naiisip ka pa ba na 100% filipino sa iyong mga personal choices?

[whoisnumbernine-blog]

Hamunin ang mga tila nagpapaalipin

Globalisasyon, isa nga ba talagang karangyaan sa ating kapanahunan, o tila panibagong uri ng pananakop? Karamiha’y sasang-ayon na kabutihan ang dulot ng globalisasyon, ngunit tunay nga bang nakikita ng mga tao ang layunin ng umuusbong at lumalaganap na pangyayaring ito?

Ang globalisasyon, ayon sa diksyonaryo, ay isang pamamaraan ng pagpapalaganap ng isang produkto o serbisyo na umaabot sa lebel na internasyonal. Maaari itong mga kagamitan o mga kadamitan na sa iba’y tunay na nakapagpapaganda, o mga makabagong gadyets at teknolohiya na sa mga kabataa’y nakatutulong sa kaunlaran ng pag-iisip, pag-aaral, at pakikisalamuha. Ngunit ito nga lang ba talaga ang handog ng globalisasyon? Hindi ba ninyo naisip ang mga ginagawa nito sa mga produkto’t serbisyong lokal, na pilit ipinagmamalaki at pinananatiling buhay sa panahon nating puro dayuhang produkto ang tinatangkilik? Hindi niyo ba napapansin na unti-unting binubura ng mga makabago’t dayuhang produkto ang mga lokal na gawa ng ating mga kapwa Pilipino? Oo bayan, ika’y binubura nila! Kahit nga pag-aaral sa iyo, o bayan ko, ay tila inaalis na nila sa sistemang ‘maka-Pilipino’. Kung iyan ang tinatawag ninyong makabayan ay ikinakahiya ko kayo. Kaliwa’t kanan ang nagsasabing tangkilikin ang sariling atin, ngunit sila mismo ang mga naguunahan sa mga imported na produktong inilalahad at inilalatag sa kanilang mga harapan. Hipokrito nga kung tawagin, at tunay na ikinalulungkot ng karamihan. Sabi nga ng iba, “kung nabubuhay si Rizal ngayo’y ikinahiya niya na tayo.”

Sawa na tayo sa pananakop ng iba, ngunit pikit mata tayo sa pananakop ng sistema ng globalisasyon. Kung tunay na pinahahalagahan ang kalayaa’y simulan na ang pagmamalaki sa ating inang bayan. May kadahilanan ang mga paglaban at kamatayan ng ating mga bayani, at ito ay para sa kinabukasan ng Pilipinas. Kahit dahan dahan, simulan na natin ang pagpawi ng mga kadahilanan ng unit-unting pagkamatay ng ating inang bayan.

[reginechua]

Edukasyong kolonyal: Sanhi at Bunga ng Mahabang Pagkaalipin

FILIPINO       VS.        ENGLISH

Naging malaking kontrobersiya ang paggamit ng Wika sa ating bansa. Sa katunayan, hanggang ngayon ay nagkakaroon parin ng pagtatalo mula sa ibat-ibang panig. Ano nga ba ang dapat na mas pagtuunan ng pansin, ang ating sariling wika o ang wikang ingles na itinuturing natin bilang isang kapangyarihan?

Natapos na naman ang isang panibagong talakayan sa aming klase na sa aking palagay ay mag iiwan muli ng mga katanungan sa aking isip. Napaka sarap pala talagang balikan ang nakaraan dahil naipapaalala nito ang mga naging simulain ng mga bagay sa ating paligid. Totoo ngang naging malaking tulong ang pagpapakilala ng mga Amerikano sa Edukasyon sa ating bansa. Gayunpaman, ginamit parin nila ito bilang isang istratehiya upang makuha ang tiwala lalo na ng mga namumuno. Pero bakit nga ba tila marami sa naging lider ng ating bansa ay naging taga sunod sa mga kagustuhan at utos ng mga taong mula sa ibang bansa. Mapapansin rin natin na magpahanggang ngayon ay tila ba nagiging "under" tayo ng Estados Unidos. Ano nga ba ang mabigat na dahilan kung bakit pinipili parin ng mga lider ng ating bansa na sumunod sa kanila?

Marahil ay isa lamang ito sa maraming dahilan, baka nga nais nilang umunlad ang ating bansa kaya't mas pinipili nilang sumunod sa mga yapak nito. Maaari ngang naisip nilang tama ang sumunod sa mas nakaaangat na bansa dahil sila ay nakasubok na sa mga suliranin. Malawak. Malalim. Hindi man natin tiyak ngunit maraming posibleng sagot sa tanong na ito.

Dumako naman tayo sa usaping Wika. Nabanggit sa pag uulat ng unang grupo na na isa batas na raw ang wikang Ingles bilang opisyal na pangalawang wika ng Pilipinas. Mayroon kayang epekto ang polisiyang ipinatupad na ito? Makatutulong kaya ito sa pag hupa ng isyu tungkol sa kung ano nga ba ang dapat na mas gamitin na wika ng mga Pilipino?

Ipasok natin ang globalisasyon sa usapan. Alam natin na bilang isang bansa na gustong umunlad ay dapat nating matugunan ang tinatawag nilang "standard". Isang halimbawa na lamang sa sistema ng Edukasyon, ipinatupad ang pagkakaroon ng K-12 Program sa ating bansa upang ang mga estudyanteng nagha hangad na makapag trabaho sa ibang bansa ay may kaparehong learning abilities and program na napagdaanan. Katambal nito ang kahalagahan ng wika, bukod sa ito ang magiging pagkaka kilanlan ng mga tao ito rin ang magsisilbing daan upang tayo ay magkaunawaan.

Hindi natin maitatanggi na kailangan nating matutunang magsalita ng Ingles dulot na rin ng globalisasyon. Isa ring malaking pribilehiyo kung ang isang tao ay marunong umunawa at magsalita nito, bukod sa magiging mataas ang tingin sa'yo dahil ganiyon ang halimbawa ng isang "edukado", mas marami ring oportunidad pagdating sa trabaho. Ngunit dahil sa ganitong paniniwala, malimit ng nakakalimutan ang ating sariling wika. Mula sa tahanan, maging sa unang salita ng isang bata. Ingles parin ang mas nakalalamang. Sa pagtuturo ng ibat-ibang aralin, tiyak na mas gamitin ito. Marami sa henerasyon ng kabataan ngayon ang hindi alam ang mga malalalim na salita sa wikang Fililino. Aaminin ko rin na ako ay kabilang dito. Nakakalungkot isipin na mas napag tutuunan ng pansin ang Ingles kaysa sa ating sariling wika. Ngunit, hindi rin natin maitatanggi na kailangan parin natin ang Wikang Ingles sa pakikisalamuha sa mas malaking mundo. Sa tingin ko naman ay maaari nating balansehin ang dalawang wika. Malabo mang maging madali ang pagbabalanse na sinasabi ko, ngunit alam nating kailangan manatili ng parehong wika.

| Blog2

[Bienvenido Lumbera]