Kamunduhan
Likas na sa tao na maakit na tumungo sa masamang daan imbis na piliin kung ano ang nararapat. Kadalasan kasi mas madali na lang magkasala imbis na gawin kung ano ang tama. Mas madaling kumopya kaysa sa gumawa ng sariling likha. Mas madaling magnakaw ng gamit kaysa sa paghirapan ang gusto mo sanang makamit. Mas madaling magsinungaling na lang sa sarili kaysa sa tanggapin ang marahas na katotohanan na isinisigaw ng iyong budhi.
Mas madali na sanang mahalin ka na lang pero alam ng puso’t isip ko na mali.
Mas madaling tuluyan na lang mahulog para sa’yo nang walang tigil dahil sobrang dali. Sobrang dali kasi ang bait mo. Ang tamis ng mga salitang binibitawan mo sa’kin na lagi akong humihingi ng isa o dalawa pang kagat para matikman ang sarap na dinudulot ng mga sinasabi mo sa’kin. Sobrang dali kasi ang ganda ng mga mata mo na hindi ko talaga maiwasang mahulog para sa kalaliman nito. Sobrang dali kasi nakakasilaw ang ngiti mo na kahit na sinong tao ay sadyang madadapa ‘pag nakita ito. Ang dali daling mahulog para sa’yo dahil ganyan ka. Ikaw ang klaseng tao na gusto ko makasama bawat araw, bawat minuto, bawat segundo. Sobrang daling mahalin ka na lang, ngunit bawal.
Bawal.
Bawal akong mahulog para sa’yo dahil labag sa kalooban ko. Kahit na pilitin kong tama ‘tong pagmamahal ko sa’yo, mali talaga. Kahit na ulit-ulitin kong “Ok lang na mahal kita” alam ng konsensiya ko na bawal. Bawal dahil ang ikaw ay ikaw at hindi ko maiiba ‘yon. Bawal akong mahulog para sa’yo dahil alam kong maraming hindi matutuwa. Lulutang ang iba’t ibang tanong na unti unting pupunit sa munti kong puso. “Bakit siya?” “Anong meron sa kanya?” “Wala ka na bang ibang mapupuntahan?” At masasaktan ako kasi tama sila. Tama sila na ganun nga, bakit nga ako? Sa dinami-rami ng tao bakit nga ba ako ang pipiliin mo? Bawal akong mahulog para sa’yo dahil hindi ako sapat at may ibang taong mas angkop para sa’yo. Ang nararapat para sa’yo ay isang taong kayang pantayan, kung hindi kayang lamangan, ang kagandahan ng buong pagkatao mo. Hindi ko kaya ‘yun, kaya bawal.
Pero, sa pagkakataon na ito, patawarin mo na ako O Diyos dahil pipiliin kong pairalin ang aking kamunduhan, ang aking mga kahinaan bilang isang taong makasalanan. Hahayaan ko ang aking pagkatao na magkasala sa pagkakataon na ito dahil walang ibang bagay na nagdudulot sa buhay ko ng ganitong klaseng saya. Siya lang. Ang tangi kong kasalanan lang ang dahilan kung bakit pinipilit kong lumaban sa buhay na ‘to. Kaya patawad, dahil pipiliin kong magsala na muna sa pagkakataong ito.
