Ang Nakaraan ay Nakalipas na
Hindi maiiwasang may mga bagay na maling nagawa. Hindi maiiwasang magkamali sa mga pananalita at kilos. Hindi maiiwasang makapanakit at masaktan. Hindi rin maiiwasang makalimutan o maaalala ang nakaraan. Tila yata lahat ng bagay na nagawa mo ay magagamit upang ipangpukol sa'yo. Yung mga bagay na nagawa mo nung matagal na panahon ay pilit ibabalik at pilit ipapamukha sa'yo kung gaano ka kasama at kung gaano ka kawalang kwenta. Masakit. Sobrang sakit. Yung tipong ginawa mo na lahat para lang mapatawad ka niya pero sa tuwing mag-aaway kayo ay ibabalik nya yung maling nagawa mo. Ibabalik niya at muling sasabihing, "pinagmukha mo akong tanga at sinaktan ng sobra." Sa tingin mo ba ginusto ko yon? Maaaring oo pero sobrang tanga ko kasi noon. Ilang paliwanag ba ang dapat sabihin? Ilang mahal kita ba ang dapat bigkasin? Ilang yakap at halik ba ang kailangan gawin para lamang mapatunayang ako'y nagsisi sa lahat ng nagawa kong nakasakit sa'yo. At kung nasabi mong niloko kita at sinaktan noon, noon yon. Kala mo ba magagawa ko pang saktan ka ngayon eh halos ibigay ko na sa'yo lahat ng nais at minimithi mo pati na rin ang sarili ko. Kung nagdudududa ka pa din hanggang ngayon, sige pagbibigyan kita hanggang sa matanggap mong wala na iyon. Darating din naman ang tamang panahon na sabay nating makakalimutan lahat ng pait na pinaranas ng panahon. Hindi kita minamadali, pero kailangan. Hindi madaling kalimutan ang nakaraan, alam ko yan. Minsan kailangan iwanan na lang ang lahat ng masasamang nangyari dahil hindi tayo makakausad at makakabuo ng panibagong ala ala kung patuloy tayong lumilingon sa masasamang nagdaan. Basta alalahanin mo laging mahal na mahal kita at kung nagawa ko mang lokohin ka dati, hindi ko na uulitin yon at ang tanga ko na lang kung gagawin ko ulit yon. Sobrang mahal na mahal kita. Sapat na para masabi kong di na ako maghahanap pa ng iba. Sapat na para masabi kong ikaw lang ang gustong makasama. Sapat na para mailarawan ang hinaharap na tayong dalawa ang magkasama. Wag ka susuko, hindi ako susuko. Wag nating hayaang kainin tayo ng pangamba. Ikaw lamang ang mamahalin. Kung magmamahal man ako ng iba, ikaw pa din.