Ahmed khalil

« Folie, bonheur et tristesse. Trois mots contraire, mais que l’on retrouve dans un même acte: Aimer. »

[ahmedworldstuff]

فى فرق كبير بين التقييم والمتعة ومش ضرورى يكون ده عرض لمرض نفسى يعنى حضرتك ممكن جدا تنتقد أغنية ما كلماتها مش عجباك وزى الزفت وتقييمها عندك زيرو % بس فى نفس الوقت لما تشتغل ترقص عليها علشان الايقاع عاجبك أو انك فى جو عام بتجاريه ..لكن لو الانتقاد عندك سلوك ومتكرر و بتنتقد الشىء وتفعله يعنى فرق بين أقوالك وافعالك ف ده برضو مبيقعش تحت تايتل نفسى لكن بيتحدد ك سمة شخصية لك .. بيتكلم فيه أهل الدين على إنه نفاق أو عامة الناس والمقربين منك بينفروا من سلوكك اللى محتاج تعديل من وجهة نظرهم.. وفى دراسات مختلفة فى نطاق نفسى بتتكلم عن ان الشخص المتناقض يحمل شىء من السمات العبقرية لكن طبعا مفيش اثبات يتمسك على الكلام ده وهو مجرد تجاذب علمى بين اطراف بحثية كل واحد بيحاول يثبت نظريته لأنك باختصار ممكن تكون انت شخصيا مش عارف عايز ايه ولا محدد وجهة نظر للأمور ولذلك مع الوقت رأيك بيتغير و تقييمك بيتغير وحتى أسلوب المتعة عندك بيتغير وعلشان تقعد مع نفسك و تسأل السؤال الوجودى يا ترى أنا عاوز ايه ؟! وتلاقى نفسك توهت ومش عارف فعليا انت عاوز ايه ف مجرد فقط سؤالك لنفسك بيحطك على طريق احتمالية انك فى وقت ما هتتحدد نظرتك للأمور .. المهم انك تقف مع نفسك كل وقت متاح لك بدون ضغوط من الاخرين او رغبة فى استرضاءهم.. انت فقط تسأل نفسك وان شاء الله هتوصل فى وقت ما للإجابة وبر الأمان .

[ahmedworldstuff]

انا بسمع عمرو دياب من التمانينات و شايف ان الرجل ده بحلقه و غوايشه و تاتوهاته و هلاهيله اللى لابسها وكلمات الأغانى بتاعة مصطفى حدوتة و البرنس اللى تحس انهم ناقلينها من على chat Gpt ..طبيعى كل ده ميناسبش اذواق تمانينات ولا تسعينات لأنها مش فى حساباته غالبا و لو فيها اهو غنالك واحدة للمفركشين و واحدة للمتطلقين و خاطب جمهوره العريض من الاندرايدج وغناله و هو ناجح جدا فى ده .. ف لو حابب تسمعه بألوانه وفراولته و غريباته و شربتاته اسمعه وفرقش كده احنا فى رحلة ولو مش حابب لف ورا و ارجع لشوقنا وراجعين وقمرين.. ولو طهقان من سكسوكته ومدرسة جونى ديب اللى غرقان فيها و ال ٣ ساعات بتوع العيد اقفل عليه خالص و اسمع اى حد تانى والسوق مليان بس متقولش الرجل انحدر وخاب و كبر وخرف لأنه ذكى جدا وعارف بيعمل ايه .. ولو معملش غير لولا البنات ف برافو يا عمورة علشان غالبا المزيكا عاجبة آماليا بنتى و بتسقف عليها 😆

[ahmedworldstuff]

رحيل الموسيقار هانى شنودة .. كان رجل جميل و طيب ؛ حضرتله زمان ٣ حفلات فى اوبرا الإسكندرية( مسرح سيد درويش ) ..كان متواضع جدا وبيحب كل الناس وبيشجع أى حد موهوب بلا مقابل .. نموذج جميل لمصرى وفنان أصيل صاحب موسيقى لها روح و مميزة صعب يتكرر ..

[ahmedworldstuff]

(حَتَّى إِذَا بَلَغَ أَشُدَّهُ وَبَلَغَ أَرْبَعِينَ سَنَةً قَالَ رَبِّ أَوْزِعْنِي أَنْ أَشْكُرَ نِعْمَتَكَ الَّتِي أَنْعَمْتَ عَلَيَّ وَعَلَى وَالِدَيَّ وَأَنْ أَعْمَلَ صَالِحًا تَرْضَاهُ وَأَصْلِحْ لِي فِي ذُرِّيَّتِي إِنِّي تُبْتُ إِلَيْكَ وَإِنِّي مِنَ الْمُسْلِمِينَ)

[ahmedworldstuff]

احتفالات بالمنتخب بلا هدف والله ؛ اتظلمتوا آه كان فى ظلم بس دلوقتى فى أفورة و العملية بهوقت اوى .. حد يكبر فى ودنهم.

[ahmedworldstuff]

مقطع اليوم من روائع كامل يوسف البهتيمى - سورة النمل - تجويد خارجى (حجاز ،نهاوند)

Listen to مقطع اليوم من روائع كامل يوسف البهتيمى - سورة النمل - تجويد خارجى (حجاز ،نهاوند) by Haitham Belal El Hanboly #np on #SoundCloud

[ahmedworldstuff]

[ahmedworldstuff]

أخر حاجة كنت اتوقعها ان يكون فى خلاف كمان على تفة حسام حسن بين مؤيد ومعارض .. ما ده يا فراغ يا هبل ؛ مش فاهم اللى زعلان انه تف هو تف على ابن خالتك .. دى التفة دى اصدق شىء حصل والله واقل واجب .

[ahmedworldstuff]

منقدرش نقول تبرير لخسارة لكن نقدر نقول حكم معرص ناتج عن افراز منظومة عالمية موجهة ضد كل ما هو عربى وافريقى و إعطاء التميز لخولات جرى تصنيفهم على انهم أبطال.. العافية بتحكم النظام العالمى بكل شكل و وصف ؛ منحنى مجنون ناتج عن كلمتين حق قالهم حسام فى حق شعب اتجنى عليه بكل شكل ولون .. تعريص الحكم موجه والخسارة محكومة للفريق المصرى مسبقا و الرسالة المخفية " النصر لنا " حتى لو الظلم واضح قدام عينك .. الحكاية قديمة اوى مش ماتش كورة لا ده توجه عالمى من اللى مدورين الساقية بس لعله خير اهو اتعتقنا من سحنة عرص زى احمد موسى زمانه كان بيتلوى زى التعابين و بيعرص هو كمان على آخره.. هاردلك للرجالة اللى تعبوا واتهضم حقهم و ربنا يفرح الشعب الغلبان المصرى فرحة حقيقية لأنهم فعلا محتاجين فرحة بعد السنين العجاف دى .

[ahmedworldstuff]

وأنا بتجاذب مع جميلة بنتى أطراف الحديث وهى بتبصلى بصمت وضحكة صغننة سكر كده .. بقولها تصدقى بالله يا جميلة أنا أيام اهو باقية وداخل على ال ٤٠ سنة .. آه أبوكى هيبقى عنده ٤٠ سنة و لسه فاكر من شويه ومش عارف ايه فكرنى انى زعلت اوى وأنا فى أولى اعدادى اننا هننقل من كامب شيزار ل زيزينيا وفضلت بتاع سنة بعدها زعلان بعمق علشان هسيب اصحابى ولسه مفروض يكون عندى صحاب جداد .. وصحابى هنا اقصد صحاب الشارع لأنى كنت طفل مبرطع و عامل مشاكل وبصاحب طوب الارض .. كان فكرة التنقل صعبة اوى على احساسى ومشاعرى و كمان فكرة فراق اشخاص بحبهم صعبة للغاية و فاكر اوى تفاصيل النقل واغنية الاستاذ عبدالوهاب اللى كانت نازلة جديدة أيامها " من غير ليه " .. لكن مع مرور السنين والتجارب وتقلب الأحوال.. نقلت حياتى من مكان لمكان و اتنقلت فى شغل من دولة لدولة وسيبت مصر نفسها خالص و صاحبت كتير وفارقت و حبيت وفارقت و لسه عايش .. معرفش تحمل الانسان للتغيير والفراق والانتقال ده نوع من النضج ولا نوع من محاولة الاستيعاب والتحمل والتتنيح للحياة .. بس أدركت ويمكن بعد لسعات التجارب ان اخلى مسافة امان كده بينى وبين أى شىء او حد ممكن اتعلق بيه حفاظا على نفسى من ازمة الانهيار والزعل العميق بعد التغيير او الفراق .. لكن يا بنتى الحياة اصعب من تفكيرنا المحدود او يمكن اعمق من تفكيرنا السطحى أصل ازاى مش هحبك بعمق وبتعلق و اكلم نفسى لو عطستى بس .. ازاى هخلى مسافة امان بين مشاعرى ك أب وبينك " بنته حبيبته " .. معادلة صعبة ؛ مرة واحدة صاحبى قالى " احنا بنخلف نقط ضعفنا " .. ودى حقيقة ؛ الواحد ممكن يعيش عمره بيحارب نقط ضعفه وهو فى نفس الوقت بيلاقيها قدام عينه وفى حضنه فى شكل ابن او ابنة او زوجة او شخص ما هو وحياتك سواء .. احيانا بحس ان كل كلام الطب النفسى اللى درسته واخد نص عمرى واكتر مجرد كلام و تحفيز و تهدئة و تصبيرة كده علشان نكمل بقلب عامل واعى وعقل عامل بيفكر .. الحقيقة المطلقة الوحيدة اللى متأكد منها ان ربنا عزوجل هو اللى ساند قلوبنا و هو اللى بيصبرنا وهو اللى راسم لنا المشوار اللى بنمشى فيه حتى لو وقفنا مش فاهمين ليه ده حصل .. وبعد وقت بنفهم وندرك ونقول الحمد لله والشكر لله .. مسافة الامان والقوة تملى قريبة لنا جدا وطريقها معروف بس الانسان كفور ..

سلوفينيا

يوليو ٢٠٢٦

[ahmedworldstuff]

إِنَّا سَمِعْنَا قُرْآنًا عَجَبًا

[ahmedworldstuff]

معندناش ثورات غير يناير ٢٠١١ يا ولاد المفكوكة .

[ahmedworldstuff]

فى فترة متقاربة أتعرض فى تركيا وبالتبعية العالم العربي مسلسلين و هم " المدينة البعيدة " و " شولى او الشعلة " .. المسلسل الاول بيفتح الباب للدراما الرومانسية و محقق نسبة مشاهدة عالية جدا للأن مع ان طبيعة المسلسل ده حرفيا بتتعامل مع العلاقات المحرمة خارج إطار الزواج إنها عادية و بتوضحها فى قالب رومانسي و قوة اعتراف الرجل ب ابنه او بنته اللى كان ناتج عن مجرد علاقة بلا قيود ؛ محدش فتح بوقه وقال المسلسل ده على بعضه بينخر فى العقيدة او بيبيح الزنا بشكل سبور و رومانسى و لا حد اصلا قرب لناحية الدين نهائى كأن كل حلقة اتعملت فى المسلسل ده اتعملت فى عصر لم يظهر فيه اى دين او ملة ؛ بياخدك فى سكة انبهار بشخصية عالية و بيعليلك الدوبامين وصداقات بتشوط فى الكل و بيدخلك فى اكتئاب حاد مع نارة وشاهين و بيكمل بيك للمجهول فى كل اتجاه؛ فى حين ظهر مسلسل شولى اللى اتهاجم بشكل قاسى جدا فى تركيا نفسها وهو ب اختصار بيتكلم عن قصة سيدة اتحجبت ودعت للحجاب وكانت كاتبة و ازاى اتهاجمت من صف العلمانيين اللى شايفين الدين رجعية وعودة للعصور الوسطى .. بس الحقيقة المسلسل فيه أداء عالى و بسيط فى نفس الوقت و الموسيقى التصويرية للتتر احترافية و اول حاجة اشوفها بتوضح الوجه التانى العلمانى اللى فيه حقد و تبلد و تشدد فكرى رهيب ضد اى حد بيتكلم فى الدين .. نوع جميل من الحكى التمثيلى المفيد اللى بينقل واقع و افيد كتير من قصة اتنين بيزنقوا بعض كل حلقة فى كورنر و المشاهد متعاطف معاهم .. شىء مؤسف والله!

[ahmedworldstuff]

الحقيقة إن الحوار بين مجدى الجلاد ولاميس الحديدى عن حبهم المكنون من سنين ده حوار يقرف الكلب الأجرب ، و أبعاده بتحمل سمة مراهقة و هطل بأثر رجعى؛ مش معقول يا لاميس هتغيظى طليقك الاقرع بمجدى الجلاد يعنى ما انيل من ستى الا سيدى ؛ وبرضو مش معقول يا مجدى تجرح ام العيال بحبك المعلن الحمضان ل لاميس .. لا ده ينفع ولا ده ينفع والحوار كله يقلب المعدة .

[ahmedworldstuff]

اعتقادا منى إن الاسكندرانية أحسن ناس بيعملوا عاشورة قررت اتحفكم ب اخر اعمالى المطبخية😋😎

[ahmedworldstuff]

دول اللى آماليا بنتى متولية أمرهم و كل شوية تقولى بابى وتديني واحد أبوسه 😒😘

[the-planet-a]

ياريت والنبي تقعدوا مع بعض وتقولوا مره واحده ناكل ايه وماناكلش ايه ،، اديتوا للاكل قيمه اجتماعية اكتر من قيمته الغذائيه ،، فتنه غذائية عظمى ،، مستحيل اكل ف مكان حد يطلع يقولي بس بقولك بلاش تاكلي كذا اصل فيه معرفش ايه ،، لالالالا لبن ؟! ازاي تشربيه هو معمول لطفل الحيوان مش لينا ،، استخدمي حليب لوز !! وانا اضمن منين اللوز ما يطلعلوش طفل يقول دا بتاعي !!!!،، بيض ؟! اتجننتي تاكلي بيض دا جنين الفرخة !!! ،، لحمه ؟! اللحمه دي اكل الحيوانات المفترسه ،، خس / نبات ؟! اومال الارانب تاكل ايه ؟! بعد اذن الارنب والاسد واللوز ،، انا عايزه اكل ،، يعني كان الاكل الحاجه الوحيده اللي بنعملها من غير عكننه ،، نكدتوا علينا منكم لله