Alexandrian Rebel

[sweetbeanscomix-deactivated2020]

[alexandrianrebel]

عن علاقتي بالنسوية (الفيمينزم)

علاقتي بالنسوية علاقة الى حد ما معقدة , أحيانا بحس أني منبوذه خارج أطار النسوية (بأعتباري امرأة ترانسجندر) وأحيانا بحس أني حتى لو منبوذة فأن النسوية هي السبيل الوحيد اللي ممكن يحفظلي مساواتي مع باقي الناس .

النسويات بيتكلمو عن ال “male privileges” أو الأمتيازات الذكورية اللي حصل عليها النساء الترانسجندر بأعتبار أنهم اتولدو ذكور ,

وأنا مش هنكر أني أستفدت من بعض الأمتيازات الذكورية دي زي أن خروجي للعمل بعيد عن بيت أهلي والسفر خارج بلدي كان أسهل من ما لو كنت اتولدت أنثى بيولوجيه من نفس الطبقة الأجتماعية . لكن لو شفنا الصورة الأعم , هل أنا طول حياتي أستفدت من الأمتيازات دي ؟ الأجابه لأ , الامتيازات دي كانت لفترة محدده أنتهت ببداية التصحيح , تاني حاجة هل كل الأمتيازات الذكورية متاحه لكل الناس من كل الطبقات الأجتماعية والخلفيات ؟ الأجابة لأ , الامتيازات بتختلف . هل أنا حاليا بأعتباري امرأة ترانسجندر غير بيضاء عايشة في دولة غربيه بستفاد من أي أمتيازات ؟ الأجابة قطعا لأ , والحقيقة أنا عملية في أخر السلم الأجتماعي . عشان كده النسوية بالنسبة لي مهمة , حتى لو أعتبرني بعض النسويات مش ست أو أعتبروني دخيلة , النسوية مهمه لأنها طريق للمساواة , طريق لحفظ أقل الحقوق ليا وللي زيي , أنا ترانسجندر وأنا امرأة وأنا فيمينست ودي كلها مش أختيارات :)

[alexandrianrebel]

فيلم فرنسي أسمه “جيوم والأولاد للمائده “ , الفيلم عن السيره الذاتيه للمؤلف والمخرج والممثل اللي مثل الدور الرئيسي في الفيلم : جيوم جاليين . وعنونان الفيلم ده كان الطريقه اللي امه كانت بتدعو بيها أولادها أنهم يتجمعو على المائده للعداء أو العشاء , هي كان عندها 3 اولاد , 2 منهم يمثلو الصوره النمطيه للذكور : رياضيين , عنيفين , بيحبو الخروج , ..الخ وبيشاركو الأنشطه دي مع الأب والأصغر “جيوم” حساس وبيحب التمثيل والخيال , أمه بتعامله على أنه مختلف وعشان كده مش بتقول “الاولاد الى المائده” بتقول :”الولاد وجيوم الى المائده” و وللأسباب دي العيله بتتعامل معاه على أفتراض أنه مثلي الجنس أكيد أو يمكن ترانسجندر , لكن هو في الحقيقه شايف نفسه هيتروسيكشوال وبينتهي الفيلم (زي في الحياة) أنه يقابل حب حياته ويتجوزها , والعيله الى حد ما بتتفاجيء (وخصوصا الأم) لدرجة أنها بتجادله أنه ازاي متأكد أنه هيتروسيكشوال !!

أنا شايفه الفيلم ده مهم لأسباب :

أول سبب أن مش شرط أن في ولد مش بيتصرف بالطريقه النمطيه (stereotype) للأولاد أنه لازم هيطلع مثلي أو ترانسجندر , وبالتالي الأبوين ممكن يدورو من سن مبكر على طريقه “لعلاجه” وأجباره أنه يتبع القالب النمطي وده اللي حصل في الفيلم لما الأب بعت حيوم الصغير لمدرسه داخليه كلها أولاد عشان يبقا زي الولاد التانيين ز ممكن عادي جدا ولد يكون حساس وبيحب الفن والموسيقى والقرايه ,... الخ ويكون هيتروسيكشوال عادي جدا , الحاجاتين المفروض ملهمش علاقه ببعضز

تاني سبب الناس اللي بتقول أنه ممكن يكون الترانسجندر موجودين بسبب النشأه أو بسبب أنهم اتدلعو وهم صغيرين ,, الخ الى اخر الأسباب غير العلميه دي , هنا في الفيلم الولد ده كان مرتبط بامه جدا وكان بيقلد كلامها وحركاتها وهي كانت بتعامله كأنه البنت اللي في العيله , لكن ده محلاهوش “يصاب بالفيروس” ويبقا مثلي أو ترانسجندر .

عموما الفيلم كوميدي وجميل ولو اتفرجتو عليه هتستمتعو :)

#ترانسجندر

#فيلم_فرنسي

[alexandrianrebel]

لماذا فيلم “بنات العم” لم يكن مضحكا بالنسبه لي ؟

قصة فيلم بنات العم بأختصار أن 3 بنات يملكو قصر ملعون , كل من يحاول بيعه تصيبه لعنه , هم مش بيصدقو في الخرافات دي ويقررو بيع القصر ويبيعوه فعلا ويصحو الصبح يلاقو نفسهم بقو 3 اولاد .

بالنسبه لأغلب الناس ده فيلم ظريف وخفيف ولكن أنا كنت في السبنما لما أتفرجت عليه وكان في لحظه كنت عايزه أسيب السينما وامشي لولا أن كان في ناس معايا .

ليه ؟

اللقطه “المؤلمه” بالنسبه لي وهي نفس اللقطه اللي الناس كانت بتضحك فيها في قاعة السينما , لما ال3 بنات (اللي دلوقتي شكلهم الخارجي ولاد) دخلو محل ملابس وبيشترو ملابس بناتي لأتهم بالنسبه لنفسهم بنات طبعا وده تصرف طبيعي , لكن بالنسبه للعالم الخارجي اللي شايفهم أولاد , شايف أن دي حاجه غريبه وعيب وردود الأفعال تتراوح بين السخريه والشتيمه والأتهامات بالمثليه (رغم أنها المفروض متكونش تهمه).

https://www.youtube.com/watch?v=hN7Y5Hl5MBA

اللي عايز يعرف أيه اللي بيحصل للترانسجندر في مصر وفي أغلب الدول العربيه يشوف المشاهد دي من الفيلم . بس المره دي يشوفها ويحط نفسه مكان البنات دول أو يحط نفسه مكان الترانسجندر , وحجم السخريه اللي بنشوفها بسبب شكلنا أو لبسنا أو طريقة كلامنا أو أو ألخ , مع أن مش ذنبنا , أحنا زي البنات اللي في الفيلم , صحينا (أو اتولدنا) لقينا أن شكلنا الخارجي ولاد , لكن أحنا بنات والشكل الخارجي نش هيغير حاجه من الحقيقه .

[alexandrianrebel]

مصطلحات شائعه(1)

في مصطلحات كتير شائعه بنستعملها كرترانسجندر وأحنا عارفين معناها لكن ناس كتير ميعرفوش معاني المصطلحات دي , ف أنا هنا هحاول أشرح بعض المصطلحات :

Coming out وده مصطلح في عالم المثليين /المثليات/المتحولين/ المتحولات ومعناه أن الشخص يصرح بميوله أو بهويته الجندريه للناس اللي قريبين منه لأول مره .

Passing معناها أن الشخص الترانسجندر بيعيش/بتعيش حياتها من غير ما حد يقدر يشك أو يلاحظ أنه/أنها ترانسجندر . بمعنى أن بنت ترانسجندر محدش يقدر يعرف أنها ترانس .عايزه أضيف أن في الحاله المثاليه الترانسجندر معندوش/معندهاش مشكله مع نفسها أنها ترانسجندر , لكن للأسف ناس كتير مؤذيين بيخلو الترانس يحاول/تحاول كل جهدها أنها تستخبى .

Outing أن حد يعرف أني ترانس ويروح يقول لناس تانيين من غير أذني , وده غلط كبير جدا , لأنه في بعض الحالات ممكن يوصل أنه يعرض حياة الشخص الترانس للخطر . فياريت محدش يعمل كده .

Stealth أن الشخص الترانس يختار/تختار بعد التصحيح أنها تعيش في سريه ومسح كل أثار الماضي عشان محدش يعرف أنها ترانس , مش كل الترانس بيختارو الاختيار ده لأن ليه صعوبات كتير وشيء معتمد على شكل الترانس بعد التصحيح وعلى اذا كان/كانت لسه عايشه في نفس المكان أو بتشتغل نفس الشغل اللي كانت بتشتغله قبل التصحيح .

HRT الهرمون ثيرابي

MTF مصححه من ذكر لأنثى , معناها أنها اتولدت بجسم ولد وعملت التصحيح وبقت أنثى

FTM مصحح من أنثى لذكر

pre operative مصحح/مصححه قبل مرحلة العملية (مش كل المصححين والمصححات يحبو يعملو العمليه دي لأسباب مختلفه ترجع لكل شخص وده مش يخليهم مش ترانسجندر أو أقل من الترانس اللي عملو العمليات)

Post operative ترانسجندر بعد العمليه

في مصطلحات تانيه هحاول أجمعها في بوست تاني

[alexandrianrebel]

عن بولنت أرسوي Bulent Ersoy

بولنت أرسوي من الشخصيات اللي أثرت فيا وأدتني أمل . اللي ميعرفش مين هي , هي مغنيه تركيه مشهوره وبتغني الغناء الكلاسيكي زي أم كلثوم . قبل التصحيح كانت مغني وممثل مشهور بنفس الأسم .

في أوائل التمانينات سافرت لندن وعملت عملية التصحيح, الفتره دي كان أنقلاب عسكري في تركيا والجنرالات العسكريين الحاكمين كانو ضيقين الأفق ومحافظين وشنو حمله على المثليين والترانسجندر, والقانون مسمحلهاش بتغيير أوراقها الى أنثى .

أعتراضا على الوضع سافرت لألمانيا (اللي فيها جاليه تركيه كبيره) واستمرت هناك في الغناء وأقامة الحفلات , ومحاولتش تغير أسمها (بولنت) اللي هو أسم ذكوري , ولكنها أحتفظت بيه , الناس كلنو بيتقبلوها لأنهم بيحبوها وبيحبو موهبتها .

  , بعد سنين القانون أتغير وسمح للترانس اللي عملو العمليه أنهم يغيرو أوراقهم . وبولنت مستمره في الغناء لحد دلوقتي .

[alexandrianrebel]

About stereotype عن الصوره النمطيه

من المفارقات اللي حصلت معايا , أن في صفات معينه كانت الناس شايفاها مش كويسه فيا في مرحلة قبل التصحيح ,بقا مزايا برضه من وجهة نظر الناس بعد التصحيح .

وده لأن في تصور نمطي عن شخصية الولد وشخصية البنت , أزاي يتكلمو وازاي يتصرفو , الفجوه دي ما بين الصوره النمطيه للولد والصوره النمطيه للبنت موجوده في كل العالم . بتزيد جدا في مجتمعات ذكوريه زي المجتمعات العربيه , بتقل جدا في مجتمعات حققت قدر من المساواه زي دول شمال أوروبا , لكنها موجوده.

على سبيل المثال :

قبل التصحبح كان ناس كتير شايفين شخصيتي ضعيفه زياده عن اللزوم (وده قباسا على الصوره النمطيه للولد) , بعد التصحيح , ناس كتير شايفين شخصيتي قويه زياده عن اللزوم (قياسا على الصوره النمطيه للبنت) .

مواصفات جسمانيه زي الطول مثلا , قبل التصحيح كنت في الطول المتوسط , بعد التصحيح أنا بنت طويله جدا :)

طريقة الكلام , قبل التصحيح ناس كانو شايفينها طريقه لينه ورقيقه زياده , بعد التصحيح ناس شايفينها عنيفه شويه ومش رقيقه كفايه .

أمثله تانيه كتير زي كده . أنا بلاقي الموضوع مضحك شويه , أن ازاي نفس الصفه تعتبر ميزه عند جنس معين وعيب عند جنس تاني في نفس الوقت .

[alexandrianrebel]

معلومات مفيده

أتفقنا أن الدكاتره النفسيين هم اللي معاهم المفتاح , للأسف مش كل الدكاتره النفسيين في الدول العربيه فاهمين أو “متقبلين” للترانسجندر لأسباب دينيه أو غيرها .

في مصر من الدكاتره القليلين المتاحين :

1- دكتور أحمد عكاشه

2- دكتور طارق عكاشه

3-دكتوره رضوى سعيد عبد العظيم

في الأردن:

دكتور كامل العجلوني- مركز الغدد الصماء شارع الجامعة عمان

الدكاتره دول عندهم عيداتهم الخاصه وبيشتغلو في مستشفيات عامه . ممكن توصلو لتليفوناتهم عن طريق الدليل أو البحث في جووجل

تاني خطوه هي الهرمون ثيرابي :

أنا عارفه أنه صعب جدا جدا الوصول للهرمون في الدول العربيه , بسبب عدم توافر دكاتره متخصصين . أنا هكتب هنا أسماء هرمونات للمصححات فقط وممكن يشتروهم من الصيدليه بدون وصفه طبيه. لو هتشتروها يبقا على مسئوليتكم الخاصه , في الحاله المثاليه المفروض الهرمونات تكون تحت أشراف طبيب بسبب خطورتها على الكبد وتأثيرها على الجسم عموما .

موانع التيستيرون:

أندروكيور 100مجم

ألداكتون : 25مجم -50مجم-100مجم

الأستروجين:

دايان

سيكلو بريجينوفا

بكرر تاني أنا بكتب الأسماء دي بس ومش مسئوله عن أي مضاعفات , أنا بس كتبتها من باب أني بحاول أساعد.

  .

[alexandrianrebel]

نبدأ منين ؟

أنك تكون ترانس ده معناه أن حياتك هتكون زي المتاهه , ليها بدايه أكيد لكن مفيش طريق ليه معالم واضحه ز كتير ترانس في أول الطريق وخصوصا اللي عايشين في الدول العربيه بيسالو نبدأ منين؟.

أول حاجه مفيش جهاز بتدخل فيه بيقولك أنك ترانس أو لأ , الوحيد/ه اللي ممكن يجاوب على السؤال ده هو أنت .

أول خطوه للتصحيح هو الدكتور النفسي , للأسف لازم لأجراء العمليه أو لبدء الهرمونات , ووظيفته أنه يتأكد أنك مش عندك أمراض نفسيه زي الشيزوفرينيا مثلا , ولو دكتور كويس ممكن يساعد أنه يأهلك نفسيا للتصحيح أو يتكلم مع أفراد من عيلتك . للأسف المتفهمين في الدول العربيه قلائل ويتعدو على الصوابع .

تاني خطوه هي الهرمونات ودي بيوصفها دكتور غدد (أو ممكن دكتور عام متفهم) بناء على ترشيح الدكتور النفسي

بعد كده زي ما قلت أنها متاهه :) , بتختلف من واحد للتاني , في ناس عندهم أستعداد يعملو العمليه , في ناس لأ , لازم أحذركم أنه مشوار طويل وصعب وهتكون/ي فيه لوحدك تماما , هتفقد عملك , عيلتك, أصدقائك , الداعمين هيكونو قليلين جدا وهيكون دعم معنوي . طريق صعب وطويل بيستمر مدى الحياه للأسف .

أنا مش بقول كده عشان تكتئبو , أنا بس بقول : خليكم مستعدين

And Good luck :).

[alexandrianrebel]

 كان مره زمان كان في دوده نفسها تبقى فراشه وكانت دايما تلعب مع الفراشات بس كان في فراشات بيضحكو عليها ويقولولها أنتي دوده متلعبيش معانا ، روحي العبي مع الدود اللي زيك هي كانت دايما حاسه أن المفروض يكون عندها جناحات ملونه بس كانت بتسمع الكبار دايما بيقولو : عييب الدود مينفعش يبقى عنده جناحات ملونه عشان كده عمرها ما قالت للكبار وقالت لنفسها خلاص يا خساااره ، أنا دوده ومش فراشه ولما كبرت شويه شافت دوده بقت فراشه قالت هيييييه ، أهو ينفع أهو ، ممكن الدوده تبقى فراشه بس برضه الفراشه دي كان الكبار بيضحكو عليها ويقولولها ياللي كنتي دوده ، أنتي بتمثلي ، أنتي مش فراشه حقيقيه أنتي دوده الدوده زعلت كتير ، وقالت أنا مش هستحمل الكبار يضحكو عليا كده أنا خلاص هعيش دوده هعمل زي الدود بس هي عشان عندها روح فراشه مكنتش عارفه تعمل زي الدود أصحابها ، وكانت طول الوقت ساكته وبتفكر وبعدين كبرت شويه وبقت زي الكبار قالت خلاص أنا كبيره ، ولازم بقى أبقى فراشه الدود صحابها قالولها يا عبيطه هيضحكو عليكي ، خليكي دوده زينا هي قالتلهم لأ ، أنا هبقى فراشه ويبقى عندي جناحات ملونه وفي يوم صحيت من النوم لقت نفسها فراشه وعندها جناحات ، بس مش ملونين وكانت كل ما تطير مع الفراشات الملونه يقولولها أنتي مش زينا ، جناحاتك مش ملونه قالتلهم بس أنا مش دوده ، أنا فراشه زيكم وبطير وقعدت تعيط وبعدين مره في الربيع صحيت لقيت جناحاتها عليها لون ، فرحت أوي ، هو صحيح لون واحد مش ألوان كتير زي الفراشات التانيه بس برضه فرحت وكل ربيع كانت بتصحى تلاقي لون تاني ولون تالت

.

.

.

[alexandrianrebel]

عن النوستالجيا

ومن المميزات (أو العيوب على حسب أنت شايف النوستالجيا حاجه كويسه ولا وحشه) أن الأنسان يكون/تكون ترانسجندر هي أني مش بحس بأي نوع من النوستالجيا (الحنين الى الماضي) , لأن الماضي بالنسبه لي كان مرحلة ما قبل التصحيح , وماهو الا ذكريات سيئه , كل مرحلة الطفوله والمراهقه والشباب المبكر اللي ناس بيتمنو يرجعولها , أنا مش بتمنى أرجعلها بأي حال من الأحوال . وكمان على عكس كتير من الناس , عمري ما تمنيت أعيش في الماضي , مثلا  سنة 1900 , لأن في الماضي مكنش معروف حالة الترانسجندر , وكنت هعاني أكتر , وأحتمال كبير كانو يحبسوني في مصحه للأمراض العقليه على أساس أني عندي وساوس . أنا مبسوطه أني عايشه دلوقتي :) 

[alexandrianrebel]

عن ديفيد بوي

موت المغني الشهير ديفيد بوي مش بس موت لفنان عظيم بيغني من الستينات , ولكنه موت لواحد أنا واللي زيي ندين له بالفضل بشكل غير مباشر في أنه يكسر تابوهات المجتمع عن ما هو “ذكوري” وما هو “أنثوي” . فنان كان بيطول شعره ويحط ماكياج تقيل وأحيانا ممكن يلبس ملابس أقرب للفساتين , ولأنه كان بيقدم فن مختلف وجميل , الناس كانت بتحبه , وموسيقاه وأغانيه دخلت وجدان الناس , زي ما الأستايل بتاعه كمان أثر في الناس وفي الثقافه العامه .

شكرا دايفيد بوي .

https://www.youtube.com/watch?v=xleYAgMG-2k

[alexandrianrebel]

أحلام صغيره

من الحاجات اللي ممكن تحس بيها أو تفتقد الأحساس بيها لو أنت كبرت كبنت ترانسجندر في بلد شرق أوسطي وفي بيئه مش بتسمح ل”الولاد” أنهم يظهرو أي قدر من الأنوثه :

أن شعرك يبقا طويل وتعمله كحكه أو تلبس توكه :)

أنك تلبسي حلق من أي نوع أو شكل .

أنك تلبسي فستان

أن شعرك يلمس ضهرك وتحسي بيه على ضهرك

أنك تبكي قدام الناس !!!!! ( اه والله حتى دي ممنوعه)

حاجات كلها صغيره ويمكن تبان لناس كتير أنها تافهه , بس كانت ممكن تساعد كتير :) , .

ياريت نسمح ونتسامح أكتر مع المختلفين شويه عن النمط السائد , مع أي بنت ممكن تظهر هوايات أحنا بنعتبرها “ذكوريه” ومع أي ولد ممكن يظهر هوايات أو أهتمامات أحنا بنعتبرها “أنثويه”

متسخروش من حد ياريت , محدش عارف معاناة حد .

[alexandrianrebel]

Hormone Therapy

في البدايه أنا كلامي هنا هيكون للمصححات بأعتبار خبرتي الشخصيه كمصححه , ومش هتكلم عن الهرمون للمصححين.

في مصححات قبل التصحيح أو في بدايته ممكن يكون عندهم فكره أن الهرمون هو حل سحري لكل مظاهر الذكوره اللي ظهرت على الجسم خلال فترة البلوغ , وللأسف ده عير صحيح .

أيه اللي الهرمون يقدر يعمله:

في البدايه الهرمون ثيرابي هيكون عباره عن حاجتين : هرمون الأنوثه (الأستروجين) ومضادات لهرمون الذكوره . ودول تأثيرهم هيكون :

-أعادة توزيع الدهون في الجسم بطريقه أكثر أنثويه

- ممكن عضلات تكون ظهرت في الجسم تتحول لدهون-

تباطؤ نمو الشعر في الجسم

- البشره تكون أنعم .

أيه اللي الهرمون مش هيعمله ؟ :

للأسف الصوت مش هيتفير , لو الصوت عميق مفيش حل غير التدريبات الصوتيه .

التركيب العظمي للجسم مش هيتغير : الطول , عرض الأكتاف , ... ألخ

شعر الوجه مش هيختفي ولازم جلسات ليزر لأزالته (عدد الجلسات يختلف من شخص للتاني , ممكن من 6 ل12 جلسه أو ممكن اكتر )

ياريت تكون المعلومات دي مفيده .

[alexandrianrebel]

أسئله وأساطير شائعه

أنا هرد على بعض الأسئله والمعتقدات الغلط اللي في ناس كتير بيعتقدوها عن الترانسجندر , وعشان أكون منصفه حتى كتير من الغربيين بيعتقدو الأعتقادات الغلط دي أو بيسألو الأسئله الغريبه دي , أنا شخصيا اتسألت بعض هذه الأسئله .

1- طيب ده مش يعتبر تغيير لخلقة ربنا ؟

لأ لأانها حاله طبيه مش نزوه ولا عملية تجميل ( من حق اللي عايز أو عايزه تعمل عملية تجميل أنها تعملها طبعا ) , نفترض أن حد أتولد بعيب في القلب أو بأصبع زائد , طبيعي أنه يعمل عمليه لتصحيح الخطأ اللي اتولد بيه ده , نفس الشيء بالنسبه للترانسجندر , الهرمونات أو العمليات هي لتصحيح خطأ أتولد بيه الشخص الترانسجندر .

2- طيب مش يمكن عشان أنتي كنتي منجذبه جنسيه للرجال فعملتي تحويل ؟

السؤال ده شائع جدا وخطأ جدا :) , في فرق بين ال sexual orientation وبين ال gender identity

أنا ممكن أكون أمرأه ترانسجندر وأنجذب الى الأناث , في الحاله دي أنا مثليه وترانسجندر , أو ممكن أكون منجذبه جنسيا الى الذكور , في الحالة دي أنا هيتروسيكشوال وترانسجندر . ال2 منفصلين عن بعض تماما .

3- هل أذا رجل أنجذب جنسيا الى أمرأه ترانسجندر أو سيده أنجذبت جنسيا الى رجل ترانسجنر فأنهم يعتبرو مثليين ؟

لأ لأن الأنسان المغاير (الهيتروسيكشوال) لما بينجذب الى الجنس الأخر بينجذبو في الأساس لصفات جسمانيه خارجيه , وده يشمل حاجات كتير ممكن تكون الأبتسامه أو الصوت أو طريقة الكلام ... أنت لما بتشوف حد وتنجذب ليه مش بتشوف أعضائه التناسليه , أنت منجذب لصفات معينه في الجنس الأخر في حالة أنك هيتروسيكشوال أو منجذب لصفات معينه في نفس الجنس في حالة أنك مثلي .

4- ده مرض نفسي ولازم يتعالج

الترانسيكشواليتي مش مرض نفسي , قد يعاني الأفراد الترانسجيندر من الأكتئاب أو القلق وده بسبب الأضطهاد وضغط المجتمع مش بسبب أنهم ترانسجندر .

5- البنات الترانسجندر كلهم بيشتغلو في الدعاره أو عملو كده عشان يشتغلو في الدعاره

مفيش حد في الدنيا أختار أو بيستمتع أنه بيبيع روحه مقابل فلوس , المجتمع أضطرر أفراد أو فئات من الناس أنهم يشتغلو sex workers لأنهم معندهمش بديل غير كده , ولو أتوفرتلهم ربع فرصه أنهم يسيبو المجال ده ويشتغلو أي شغل هيوافقو .

[alexandrianrebel]

What is it like to be a minority ?

Long time ago before i started my transition , someone told me that trans people commit suicide more than other people because they suffer from not belonging to any gender , they are neither male nor female.

It might be partially true . Belonging to a ting minority like transgenders or gender queers is exhausting , it is not easy to find a role model , it is not easy to find seniors to ask for their wisdom .

And to make it worse :) i am an immigrant , trans woman from middle eastern origin . How many people are like me here ? few may be ? yes i still have cis gender , white, heterosexual friends , but i can’t talk to them about everything , there are things they would not even understand if i talked with them about.

When i was younger and still in transition i did not care much about that , my focus was on my only goal : immigrate and complete my transition . Once i reached that goal and the more i grow old i feel lonely , i feel i need like a mother or a big sister role . I am becoming a big sister now for younger generations :) But what do i know ?

[alexandrianrebel]

عن تقبل الأختلاف

يبقى أتفقنا أن الترانسجندر بالنسبه للناس السيسجندر ( الناس اللي الجندر بتاعهم حسب الولاده يتفق مع مظهرهم الخارجي) تهديد لثابت من الثوابت اللي أتربو عليها وهو :الجندر .

وزي ما الترانسجندر بيتحدو الثابت ده , في ناس بتتحدى ثوابت تانيه : المثليين بيتحدو ثابت أن الأنسان “الطبيعي” لازم يكون مغاير جنسيا . الملحدين بيتحدو ثابت وجود الأله . اللادينيين بيتحدو ثابت وجود الدين .

أيه يساعدنا أننا نتقبل ونتسامح مع الناس المختلفين عننا ؟

أننا نعرف أن دي كلها مش “ثوابت” , دي مجرد موروثات وعادات , اللي بيخلي كل أنسان ماهو عليه هو تصرفاته وأفعاله وقيمه الشخصيه . مش لونه ولا جنسه ولا عمره ولا توجهه الجنسي ولا دينه .

الأختلاف كويس , الأختلاف بيخلق مبدعين , أسمحو للأختلاف وتسامحو معاه , جربو :)