“عارف؟ زمان قبل ما أتجوز، كنت أكتر حاجة بخاف منها إني أرتبط بحد ويطلع سبب في همّي، لأن أصلًا كنت عايشة في نكد كفاية. كنت بقول قرف أعرفه أرحم من قرف معرفوش، وكنت شايفة إن الجواز فكرة ملهاش لازمة.
بس لما شوفتك، حسيت بحاجة مختلفة. مش هقول حبيتك من أول لحظة، لكن حسيت إنك إنسان طيب وحنين، وقلت يمكن تقدر تعوضني عن حاجات كتير وجعاني.
اتخطبنا، وشفت منك بُعد، بس قلت يمكن بعد الجواز كل حاجة هتتغير.
اتجوزنا.. ومحصلش أي تغيير. البُعد فضل زي ما هو، الكلام الحلو شبه منعدم، وجودك نادر، واهتمامك في حتة تانية خالص.
قلت يمكن لما أحمل ده يفرق معاك..
حملت.. وولدت.. ومحصلش أي فرق.
كنت خايفة تفضل موجود علشان ابنك مش علشاني، لكن للأسف.. لا علشاني ولا عشانه.
خلقت لنفسك دنيا تانية بعيد عننا، وكأن وجودك وسطنا بيخنقك.
بقيت بتضايق من أقل حاجة، بقيت بتطول لسانك و واحدة واحدة ايدك بقت تطول كمان..
اللي كنت شايفاه أمان، بقي مصدر خوف ليا.
أنت بقيت بعيد أوي عني.. وعن ابنك.
حتى فرحتك بالحاجات بقت لحظية، تفرح شوية وبعدها ترجع تهرب، كأنك بتمل بسرعة وبتدور على أي حاجة تشغلك عننا.
أنت بخيل.. البخل مش بس ف الفلوس، لأ.. بخيل في وجودك، في حنيتك، في وقتك، في دورك كزوج وكأب.
للأسف، أنا دلوقتي بشوف إنك فشلت تكون الأب اللي ابني محتاجه، وفشلت تكون جوزي اللي كنت بحلم بيه.
وعارفة إن ده طبع فيك، وصعب يتغير، وأنا مش هستنى التغيير.
أنا قررت أكون أم وأب لابني، أربيه يبقى راجل مسؤول، يعرف يعني إيه التزام، ويعرف يعني إيه احتواء وحب.
مش هقوله باباك سيبنا، لكن هخليه يشوف إن في أم قدرت تبقى السند.
أنا مش هقولك ربنا هيحاسبك علينا، لأني مش شايفة إنك أصلاً حاطط ربنا في حسابك.
لكن هقولك الحقيقة اللي يمكن توجعك:
أنت ما تستاهلش تكون زوج ولا أب ، ولا تستاهل يكون عندك عيلة.
jbbartram-illu
blakekathryn
ellievsbear
janainaart
jacobvanloon
gummygunk
yousharknotpass