Simpulan kenangan

buaian dan bualan rindu

[derifirman]

Meureun keur batur mah ngadungakeun sangkan diala pati téh hiji lampah anu katideresa. Tapi kapan mending ngadungakeun pati batan kudu ngemu katugenah salawasna.

[derifirman]

Najan kuring sok salawasna sayaga jadi tatalang keur kasedih deungeun, tapi poé ieu mah béda. Asa loba teuing nampa kasedih, amarah, tur kabingung. Hayang bedah cimata.

[derifirman]

32 tahun lalu menjelang pagi hari dengan segala kesulitan aku akhirnya lahir ke dunia. Nénék bilang ketika aku lahir ke dunia mama mendapat penderitaan yang panjang karena aku lahir sungsang, terjebak pada lubang vagina mama karena waktu itu katanya pantatku dulu yang keluar. Ketika aku lahir katanya wajahku membiru kekurangan oksigen, kakiku tidak lurus karena ditarik paksa, leherku juga tidak lurus sempurna belum lagi kepala yang tidak membulat sempurna. Tapi nénék dengan telatennya membendongku selama tiga bulan, memijit kakiku dengan perantara daun cau mangala, dan mengurut leherku dengan ciduh bari. Setelah usiaku menginjak setahun biji titit ku hilang satu, aku kena hernia. Di usia sekecil itu akhirnya aku dioperasi untuk menyempurnakan tititku yang akhirnya lengkap dengan dua skrotum. Kemudian dua tahun kemudian di tahun 1996 aku disunat. Kehidupanku lumayan baik-baik saja sampai tahun 2004 mama dan papa jadi tidak baik-baik. Setelah pertimbangan yang cukup panjang mereka bercerai di tahun 2005 dan kehidupan aku, mama dan adikku jadi semakin tidak baik-baik saja. Beruntung nénék, kakek, dan bibikku menolongku agar aku tetap hidup. Papa terkadang hadir mengisi hidupku, meski seringnya tidak. Semula aku marah dengan semua keadaan ini yang sulit dan menyedihkan. Tapi aku sadar aku harus tetap hidup, bukan buat orang lain melainkan diriku sendiri. Perjalanan 32 tahun ini tidak selalu mudah, lebih banyak sulitnya. Ternyata memang hidup gak harus selalu indah. Aku bersyukur tetap hidup, dan mencoba menghidupi aku dan orang terkasihku. Di tahun ini selain aku beranjak 32 tahun, aku juga merayakan 20 tahun perceraian mama papa yang menandakan 20 tahun aku berdiri di kaki ini dengan kekuatanku sendiri.

[derifirman]

25+7 Bagja mugia lana

Jangkep yuswa 25+7 jumlahna mah étang baé sorangan. Dina umur anu geus sawawa munggaran rék ngucap syukur ka Hyang Niskala Jati anu geus maparin asih ka kuring, nuhun kana sakumna bagja, lara, cimata anu tumiba ka kuring. Taun kamari mah bagja nambahan, bingah teu kurang-kurang, kasedih cukup, kapeurih meueusan. Deudeuh ka diri awaking geus sakitu kuatna nyiar kipayah keur maraban diri sorangan, keur kabungah sorangan. Asa egois. Mémang enya. Tapi keur saha deui? Kapan geus paheut rék nyorangan. Mugia ieu berkat téh manjang dugi ka lana. Saban taun kuring ngadunga sing janglar lahir batin, jadi mangpaat keur balaréa ngan anu jadi harepan mah nun gusti ulah dipaparin teuing panjang yuswa, cekap baé bilih teu kiat nandang tunggara.

[derifirman]

Kinanti Asih Ngahiji

Mugi masih kénéh émut,

Basa tepang sasih juni,

Majar aya katugenah,

Nu nyungkelit kana ati,

Hanjakalna henteu kedal,

Matak panasaran diri.

Harita sasih agustus,

Urang téh patepang deui,

Masih kénéh henteu kedal,

Cenah waktu can mustari,

Ngahaja méh panasaran,

Kaemutan beurang peuting.

Agustus geusan kalarung,

Panasaran diri abdi,

Ngahaja arék ditanya,

Moal panasaran deui,

Ngan keukeuh henteu ngajawab,

Sugan sasih di januari.

Dagdigdug rasaning kalbu,

Ngantosan sasih januari,

Muga-muga geura kedal,

Ulah dipindingan deui,

Seug mah geura balaka,

Balaka ka diri abdi.

Geus cunduk da kana waktu,

Januari nu dianti,

Tungtungna salira kedal,

Hayang masinikeun ati,

Namplokeun rebu kanyaah,

Kanyaah ka diri abdi.

Hayang kauntun tipung,

Mugia ulah ditampik,

Hayang geura laksana,

Dua ati jadi hiji,

Babarengan nyulam nyaah,

Meungkeut deudeuh jadi asih.

Waler kuring mah saéstu,

Éstuning moal ditampik,

Lantaran puguh da nyaah,

Moal diudarkeun deui,

Puguh badé dipageuhan

Dina tali jatukrami.

Jalan mulang Bandung - Padalarang 22 November 2024

[derifirman]

Asmarandana hujan

Ku tega ari girimis,

Datang kalah mawa melang,

Matak lewang kanu ngantos,

Ngantos anu tacan mulang,

Duh salira dimana,

Haté mah mungguh tagiwur,

Nu dianti teu ngiberan.

Girimis bet mingkin ngepris,

Hujan téh bet ngaageungan,

Salira can mulih baé,

Jandéla sok dilongokan,

Ngintip tina rérégan,

Sugan baé geura lungsur,

Mulang ka pangbalikan.

Hujan téh teuing ku lami,

Kamelang anggur nambahan,

Gulinggasah sesah mondok,

Bisi anjeun kahujanan,

Kantenan katirisan,

Taya pisan nu ngarangkul,

Nyimbutan reujeung ngeukeupan.

[derifirman]

Ari duriat, sok datang ngadadak. Matak reuwas, henteu matak jadi kelar. Kalah gulinggasahan, hésé rék tibra.

[derifirman]

Hanjakalna urang teu bisa nampik kanyaah ti batur. Ari nampi mah kapan kumaha urangna. Asih, nyaah, ijid jeung ngéwa mah teu bisa diatur, sabab lain banda urang. Perkara nampi jeung nampik éta urusan urang mah. Kanyaah mah sing rambatan, najan teu ditampi gé muga salawasna nyeboran nu ngahgar, nginuman nu hanaang, maturan nu nyorangan.

[derifirman]

25+6

Horéng ditepungkeun deui jeung umur anyar jangkep duapuluh lima punjulna genep. Tepi ogé. Geus jinek dina angka nu meujeuhna dipikamelang keur sawatara jalma mah. Kantenan, melang masih nyorangan. Melang masih can bisa nyugemakeun sorangan, melang kudu ngamimitian deui mah, kantenan melang ditinggalkeun jeung ninggalkeun. Ngan cék kuring mah kamelang, ringrang jeung hariwang téh hiji tanda tina kahirupan. Minangkana dinamika téa. Bagja masih kénéh bisa melang, ciri yén urang téh mikir urang téh guligah.

Geuning nambah umur jeung ngurangan jatah lalampahan téh ogé jadi ciri jalma nu disabudeureun urang téh ngarolotan. Kapan buuk teu deui hideung, leumpang teu deui ajeg, huntu murudul, pakulitan ical sarina. Hakékatna mah kapanan urang téh keur patunggu-tunggu lunta kana kaabadiaan.

Ah, kuring mah moal bebekalan. Rék saprungna baé. Nu jelas sagala kahayang geus kahontal, ekspektasi gé kapan geus teu deui nembongan. Geus dikubur pangtukangna. Anu nyampak ayeuna mah ukur pikiran jeung harepan. Sangkan salawasna hirup dina sukur, bagja sakujur awak, kasedih jadi papaés ati, jeung amarah minangka pangbeberahna. Kumplit kabéh emosi kapibanda. Hahahaha.

Harepan mah angger muga salawasna dideukeutkeun jeung jalma nu nyaah. Mugia ulah dipanjangkeun teuing umur, sabab nyorangan téh beurat. Bisi kuring teu bisa nandanganana.

Nuhun, gusti. Asih téh teuing ku amis.

[derifirman]

Ari lambaran-lambaran kamelang bet rambatan, pating pucunghul tina buku biru pangrungrum kalbu. Tulisanana apik, rapih jeung écés eusina ngeunaan asih nu henteu katepi, kanyaah anu tacan kahontal. Horéng rambatna téh minangka panggupay, kateuing ngajakan sindang atawa pileuleuyan

[derifirman]

Kembang-kembang kamelang, lalaunan maluguran. Baganti jeung sirung-sirung harepan nu makalangan. Lantaran cimata teu kendat nyeboran, tangkal asih anu dipelak kiwari ngajadi pangrungrum kalbu.

[derifirman]

Sagelas old-fashion henteu ngubaran, ukur jadi sulur keur kakangen nu teu ka ukur. Bourbonna ngalalakon, majar kuring anu umambon.

Bitter najan peuheur tapi jadi kakangen, dina ilat karasa ukur saulas henteu papanjangan.

Ngan mamanisna gula hanjakalna teu jadi ubar hanaang, kantenan kuring kapiuhan.

[derifirman]

Lambaran asih ditulisan ku mangsi getih, kantenan tresna dipulasan ku cimata. Kagambar ukur rasa nalangsa dina saban kaca nu nembongkeun lara.

Horéng keretas nu dibukaan téh buku kapeurih, anu disampulan katugenah. Dina kaca munggaran dibuka ku panganteur, “ieu buku bacaan nu keur liwung.” Dibukaan, dititenan, diilo, henteu dibaca bedas. Sabab lamun bedas kantenan nu kakuping ukur jerit reujeung ceurik.

Dina lambar pamungkas, aya ungkara “kasedih moal pungkas, tapi bakal jadi kandaga. Di pabukon ati urang, hiji waktu bakal dibukaan deui minangka kenang-kenangan.”

[derifirman]

Pungkas, pileuleuyan

Sanajan asih masih kénéh nganteng, duriat masih hayang manjang. Horéng teu sakabéh tresna kudu nyampak, aya hadéna nyamuni dina ati. Teu kudu nembrak-nembrak acan, sabab geuningan réa bangbaluh anu nyaliara mapaésan lampah urang. Ngan rék panceg ati kiwari mah. Parantos lami ngemu kapeurih, rupina sabar henteu lubar. Peun urang cekapkeun. Hapunten teu mungkas ku salam. Pileuleuyan, pileuleuyan.

[derifirman]

Keur Agastya

Seug mah urang cekapkeun kasedih reujeung kanyeri. Najan leungeun teu pataréma tapi ati kapan ngait. Henteu bisa disingkahan gurat takdir ti Hyang Widi, ayeuna kudu papisah. Sok émut mangsa dikandung nyaah éstu tatamplokan, tresnasih tangtu dihatur sangkan gumelar sampulur. Nalika gubrag ka dunya Agastya jadi kakasih. Pangdunga sangkan wijaksana, hadé budi tur welas asih.

Horéng geuning ari takdir, teu sajalan jeung kahayang. Putra nu jadi kaasih, dipundut ku nu kagungan. Dipiwarang mulih deui, teu kungsi nepakeun darma ukur jadi pangbeberah ati. Mugi Sang Murbawisesa maparin jembar dina ati. Indung bapa teu kakantun seja diihlaskeun ati ngajajap tuang putra mulang jadi suci deui.

Najan dipapag ku citangis, disimbeuhan ku kasedih. Yap urang anteurkeun ka alam langgeng pinasti, sabab rék manggih waluya ngahiji deui jeung gusti anu sajati. Pileuleuyan anaking.

Bandung, wancina tumorèk 10 Agustus 2023.

Pikeun El jeung Zeta

[derifirman]

25+5

Jangkep yuswa tilupuluh. Duapuluh lima punjul lima. Geus pirang-pirang ka sorang, peuheur paitna, amis, gurihna, bagja reujeung apesna, lalaunan narembongan jadi mamanis kahirupan. Lantaran kungsi kedal yén angka mah moal nambahan sanggeus nincak 25, nu nambahan mah punjulna hungkul anu ngurangan jatah hirup di dunya. Horéng kahirupan téh lolobana mah gogoda nu matak gogodeg. Paselang antara harepan jeung hariwang, pataréma antara kabagjaan jeung kasusah. Reumbeuy ngan hanjakal henteu bisa diguntingan. Taya harepan jeung kahayangan nu ngalangkangan. Ukur hiji paménta ka gusti ulah teuing panjang umur, sabab nandangan ieu bagja ngarah henteu surut. Peun ditamatkeun sabab kapeurih geus ngaluputan diri, kabungah anu nyiramanana muga ulah waka tuus sirna kabawa ku mangsa.

[derifirman]

Sinom talirasa

Jauh teuing neang salira,

Mungguh nanjak mipir pasir,

Tapi kuring henteu wegah,

Bakal terus dipilari,

Kapan nu jadi margi,

Imut anjeun matak lanjung,

Sok sieun sasar lampah,

Salira henteu kasungsi,

Rek ditéang, keur nyirnakeun panasaran.

#

Pangna neangan salira,

Kuring percaya kana takdir,

Basa munggaran patepang,

Aya nu kebek na ati,

Mugi pakait asih,

Ka salira dinu jauh,

Tangtu bakal diteang,

Muga bisa tepung deui,

Najan anggang, hiji waktu bakal tepang.

#

Sanajan seueur pengkolan,

Teu matak rek runtik galih,

Tanjakan bakal disorang,

Komo deui Leuweung wingit,

Pamugi salira surti,

Nampi kuring anu liwung,

Lantaran ka salira,

Ieu ari enggeus pasti,

Kuring seja, masinikeun tali tresna.

Padalarang, 20 April 2023.