扮工男女

[heawork]

爛Gag唔怕搞　但唔好搞爛

扮工友有幽默感，可以化解到唔少人事上嘅煩惱。好似之前有外國招聘公司做嘅一項調查，發現接近80%受訪行政人員都話，員工有幽默感好重要，因為有助提升部門士氣，仲有促進同事之間嘅溝通。

另外有項社交心理學嘅研究亦都話，員工識講笑，就算係爛Gag，都可以畀到人一種有自信同能力較高嘅形象，老細都會欣賞你多啲。

做人幽默一下，好處多多，不過小心唔好過火，否則，得罪咗人都唔知咩事⋯

各位打工仔請留意以下扮幽默嘅注意事項啦：

1. 私下講

講笑前，請先確定同事份人玩唔玩得；其次最好揀私底下人少少時講，仲有盡量唔好係Email或Whatapps講笑，因為對方睇唔到你嘅表情，好容易產生誤會。

2. 唔好人身攻擊

講笑只為開心笑吓，當說話傷害到人，就係一個非常無禮嘅行為，隨時釀成扮工室欺凌。

3. 睇場合

係茶水間或Lunch Time跟同事不談公事，講笑輕鬆吓就最啱feel；但係一啲正式場合，例如開緊會，除非能夠確定你老細係非常open mind嘅人，否則唔好失驚無神亂搞Gag，事關無人夠膽笑，亦無心情笑。

4. 適可宜止

凡事貴精不貴多，講笑都係一樣。一見到人就亂搞Gag，呢啲唔係幽默感，係聲音騷擾。

來源：business news daily

===================

全民監察老細，日行一善

如果想舉報老細同事19惡行，立即click入去講畀我哋知啦：

http://goo.gl/forms/4pFp6ABrMm

[heawork]

【19傳真】市場部阿姐Ben Sir上身

有啲人，真係入錯行，例如明明靚仔到好似漆黑中螢火蟲咁，都唔去做明星；又例如謝霆鋒煮嘢食煮得咁有heart，反而走去做戲，都唔正式入廚做學徒，簡直暴殄天物。

而以下呢位讀者口中嘅阿姐，似乎一樣入錯行喎⋯

讀者爆料／申冤來稿：

「在家做運動就諗起既公司，個市場部呀姐真係入錯行，應該去做老師，雖然家下行行都玩緊e marketing, 有臉書就真係一個好重要同客人溝通既平台，之不過作為一個負責覆客野既人，日日係度作文咁作完俾個呀姐改文咁先出得街，話你用"經已"唔岩應該要"已經", 既同嘅係有分別，好似Ben Sir上身咁，不如你做晒佢啦，要人地講野既tone同你一模一樣？你前日同今日講野既tone都唔同啦，要求人地？算把啦，你都係返屋企去做運動啦！」

小編細細聲講，今次呢篇文無校對㗎﹗

===================

全民監察老細，日行一善

如果想舉報老細同事19惡行，立即click入去講畀我哋知啦：

http://goo.gl/forms/4pFp6ABrMm

[heawork]

【熱話】城巴靚女車長 乘客爭住影相

男人當道的行業，只要女性肯踩隻腳入來，往往都可以成為「萬綠叢中一點紅」。

近日網上便瘋傳城巴一位近期入職的靚女車長，負責小西灣往返跑馬地的8X及19號路線，網民都爭相討論，有人甚至行過站都要拎起相機影佢相，都咪話唔誇張。

不過城巴新巴發言人就話因爲私隱理由，不便多加透露，只強調城巴新巴現時有3700多名全職車長，當中女車長佔2%，即係74人左右，所以乘客想一睹美女司機，都要碰碰運氣了。

你返工時，又有無撞見過女車長呢？

來源：綜合網上資料及柏斯敦巴士台

===================

全民監察老細，日行一善

如果想舉報老細同事19惡行，立即click入去講畀我哋知啦：

http://goo.gl/forms/4pFp6ABrMm

[heawork]

【高層必學】將廢柴變人才

叫人辦事，點解仲攰過自己做？因為下屬鬧又鬧唔聽，叫又叫唔郁，低聲下氣更加無用？不妨參考以下做法，隨時可以令廢柴下屬立即變有用人才，令一卷廁紙，變成豪宅牆紙。

1. 溝通力量大，變成下屬的「老友」，再攰都好，同事一定幫手 

2. 避免勾心鬥角的小圈子，賞罰一定要透明

3. 唔係畀得愈多，回報愈大，教育下屬要慢慢來，效果最好

4. 部下的失敗，唔係一種恥辱，而係主管嘅榮耀，因為下屬肯嘗試做好件事

5. 唔好一味讚，但是鼓勵一定要多於責備

6. 交代屬下事情要講幾次才會聽？答案係最少七次

7. 剩係得管理技巧唔夠，要識得蒐集資訊，知人善任

8. 人本身就是懶惰的生物，唔好期待員工會自動自覺

當員工不再受制一個命令，一個動作，主管先至係「真．主管」。

來源：快樂工作人

===================

全民監察老細，日行一善

如果想舉報老細同事19惡行，立即click入去講畀我哋知啦：

http://goo.gl/forms/4pFp6ABrMm

[heawork]

【錢加樂】有技巧問腦細加人工

雖然就快放假，但唔好唔記得加人工。如果無人工，其實放假都係要留港，無錢，就等於白放。

但腦細唔提加人工，又驚講錢傷感情？外國有個研究就指出，只要記住以下3個原則，開口可能會易啲⋯

1.  充分原因

同腦細講加人工梗係要令佢心服口服啦！最好平時儲多啲clients讚你嘅emails，又畀腦細睇下你近排跟嘅projects跟得幾好。當然timing都好重要啦！當腦細畀更多責任你負責嘅時候，呢個就係好timing啦！但咩原因都好，千其唔好話因為你有財政困難呀……

2.  開價要適當

2/5嘅管理層話，如果開價開多過5%就太多啦！全球最大嘅HR 諮詢公司話美國公司今年嘅平均加薪都只係2.9%咋！HR講嘅嘢，你唔係唔信呀？

3.  唔好成日問

話晒講錢傷感情，梗係唔好問的咁密啦！如果你加咗人工冇幾耐，呢半年就最好唔好問啦！有3/5管理層話一年問多過一次就太多，有1/4仲話兩年問多過一次都太多添！

點樣講數易啲？最緊要磨好自己把刀，但唔好好似謝霆鋒嗰隻磨崩刀呀！

來源: BI

熱search！加薪幅度2017

===================

全民監察老細，日行一善

如果想舉報老細同事19惡行，立即click入去講畀我哋知啦：

http://goo.gl/forms/4pFp6ABrMm

[heawork]

【熱話】hea爆秘書工  你會唔會做？

打份工，求財定求時間，永遠都係一個問題。

近日有位30歲出頭秘書仔，話佢全公司返工遲到放工勁準時，工作節奏慢，仲要可以狂做自己嘢，老細都唔理會，甚至有同事3點就離開公司，搞到小編都想問下係邊間，實行搵工跳槽⋯

之但係佢又話，而家份工18K，由於老細孤寒兼成日話市道唔好，所以做咗幾年都無人工加，據了解有其他人，已經10年無加過人工啦⋯

秘書問︰咁嘅工，仲做唔做好？

始終人過30，唔跳嘅話，再老就難加，不是嗎？之但係，打工無非想要優質生活，其實準時放工，6點走出公司門嘅優質生活，你不是已經擁有嗎？

係你，又會點做？

來源：香討／網上圖片

即search！最hea工作

===================

全民監察老細，日行一善

如果想舉報老細同事19惡行，立即click入去講畀我哋知啦：

http://goo.gl/forms/4pFp6ABrMm

[heawork]

【法官大人】98蚊碟炒白菜仔食唔食

近日打工仔飲食熱話，一定係香港四大小炒皇之一容哥，之前將「容記」頂手後，喺太子重開嘅容記小菜王。熱議嘅除咗佢重開，仲有當中新菜式⋯

（圖中為已頂手的容記。）

今次樣樣菜式，都可謂震驚打工仔，尤其係98蚊一碟嘅「阿媽炒白菜」，雖然喺街都食到阿媽嘅風味實屬難得，但我哋計過，月入三萬，食碟菜都感覺奢侈⋯

如果係你，你會食嗎？

不如自己炒啦！即學炒白菜仔秘訣

===================

全民監察老細，日行一善

如果想舉報老細同事19惡行，立即click入去講畀我哋知啦：

http://goo.gl/forms/4pFp6ABrMm

[heawork]

【世紀難題】點解一早放工你仲咁夜瞓？

好多打工仔雖然要一早起身返工，但係夜晚又唔肯瞓喎，點解呢？睇下你哋係咪以下3個原因啦！

1. 太早我瞓唔著㗎！

特別係啱啱畢業嘅扮工仔女，住hall上莊慣咗遲瞓。如果你遲瞓係為咗可以有個悠閒嘅假期，咁遲瞓都唔係壞事嚟嘅。其實大腦就好似肌肉咁，你train得佢多就會適應。如果你真係唔攰，可以瞓前睇下書或者冥想。

2. 我有好多嘢做！

其實有啲嘢唔係真係好急，留返聽日做都得。如果喺公司，個個叫你做咩但又唔急嘅，你都即刻做，咁只會開咗個先例畀大家。

3. 我瞓少啲會精神啲！

專家成日研究都話要一日瞓7-9個鐘，如果你要口同鼻拗都冇計……

除咗呢啲藉口，其實瞓係張床碌電話，都會好快不知時日過……你懂的Ching

來源：INC

===================

全民監察老細，日行一善

如果想舉報老細同事19惡行，立即click入去講畀我哋知啦：

http://goo.gl/forms/4pFp6ABrMm

[heawork]

【19傳真】咪以為建築行業好景

香港成日都有人話「麵粉價」咁貴，樓市一定升⋯以為「麵粉業」一定富貴？原來，都唔係咁好撈⋯

讀者爆料／申冤來稿：

「咪以為建築行業好境，我係間建築公司做，人手係咁squeeze，根本都唔肯請人做嘢，等你一個人做晒咁，真係痴鬼線!

成日話建築成本高，計我話就係班發展商同大判想賺多啲係咁谷高樓市，新樓盤真係有咁多打工仔有錢去買，咪又係班奸商搵人做打手谷佢，拿水魚上釣。

所以打工仔，無論打人工，定買樓住，都係係俾奸商呃。」

今次呢位讀者，講中咗好多人心聲呀﹗

===================

全民監察老細，日行一善

如果想舉報老細同事19惡行，立即click入去講畀我哋知啦：

http://goo.gl/forms/4pFp6ABrMm

[heawork]

【接龍】一人一個辦公室政治手段

辦公室猶如戰場，適者生存，每一日都見到好多明招陰招，依家就集各家之大成，睇吓大家有冇學到一招半式。

第一招：挑撥離間

正所謂成也結黨，敗也結黨，唔好以為識搞小圈子就係辦公室贏家，如果呢個小圈子的交情只係「面果浸」，一個二個仲各懷鬼胎，好容易俾其他同事「左一句壞話、右一句是非」，成功挑撥離間，借刀殺人。

第二招：隔山打牛

憎一個人最蠢嘅做法係自己出手，呢個時候最好梗係巴結上司，之後再搵機會打小報告，自己企喺旁邊食花生啦。

第三招：指鹿為馬

高層適用，只要有你睇唔過眼嘅下屬，就可使出這招，總之同事做咩都話唔啱，唔使任何理由，因為你係老細。

第四招：處變不驚

過咗Deadline唔緊要、俾人鬧唔緊要、做錯事唔緊要、遲到唔緊要，最緊要處變不驚，咩都扮唔知，就冇人敢怪罪。

第五招⋯大家仲有冇招式交流吓呀？

===================

全民監察老細，日行一善

如果想舉報老細同事19惡行，立即click入去講畀我哋知啦：

http://goo.gl/forms/4pFp6ABrMm

[heawork]

【熱話】香港打工仔原來係萬能俠

香港呢個彈丸之地，向來臥虎藏龍，少少人工，多多貢獻，打工仔可以十八般武藝，但每個月得萬零蚊人工﹗

話說最近網上都討論緊以下呢個倉務文員空缺，到底係咪要請萬能俠，抑或只係「正常」要求，大家唔好大驚小怪⋯

「空缺： 1 個         編號：21-17-0012867 CK        日期：29/03/2017        勞工處 職位：倉務文員 公司/僱主名稱：XXXXX有限公司 地區：牛頭角        行業：商用服務業 職責： 負責一般倉務文員工作,日常倉務運作及貨倉管理,收貨,出貨及驗貨,資料輸入,更新庫存記錄,點貨,執貨,上架,發貨等,搬運貨物,盤點存貨,整理貨倉,跟車 資歷： 中五程度; 1年經驗; 良好粵語; 懂讀寫中文; 懂讀寫英文; 懂Microsoft Office; 持有輕型貨車駕駛執照; 持有私家車駕駛執照; 具有基本電腦操作知識; 勤奮,細心,有責任心,能即時上班優先

待遇： 每月$12,000 - $15,000 (視乎工作經驗而定), 有銀行假期, 年假11天, 醫療福利及酌情性花紅, 星期一至五: 上午9時至下午6時15分, 每週工作5天

申請須知：求職者可電郵」

萬幾蚊，又跟車又搬貨又文書，你又覺得點？有打工仔話，呢啲要求好正常呀，勞工處post係咁上下，有銀行假期，你仲想點？香港人，唔係唔慣呀？

來源：香討

===================

全民監察老細，日行一善

如果想舉報老細同事19惡行，立即click入去講畀我哋知啦：

http://goo.gl/forms/4pFp6ABrMm

[heawork]

新鮮人扮工驚驚青青？

畢業季節，小薯仔啱啱開始學人扮工，通常都驚驚青青，頭一日或者頭一個月你有冇試過咁呢？

1.  第一日扮工冇人叫你一齊食飯，真係好孤立無援 2.  第一日扮工坐喺度一日冇人畀嘢你做，就算準時放工都唔易捱啦 3.  開頭冇乜嘢做，但冇人叫你走唔敢走，然後留到天荒地老 4.  開始日日帶飯，唔想連食lunch都要social，但又驚唔合群 5.  出去食飯見到腦細，紅都面晒，佢未食完唔敢早過佢離開餐廳，唔敢打招呼 6.  喺街見到同事行入大樓，於是喺出面等陣先入去，費事同一架lift 7.  喺office連聽手提電話都唔敢，結果要入廁所搞掂 8.  去個廁所都諗會唔會郁得太多，撞親隔離（廁格或尿兜）

不過又真係嘅，第一日有人主動識你，世界真係會美好好多，如果冇，咁就自求多福啦……

===================

全民監察老細，日行一善

如果想舉報老細同事19惡行，立即click入去講畀我哋知啦：

http://goo.gl/forms/4pFp6ABrMm

[heawork]

【整蠱專家】愚人節玩同事5招

聽日就係愚人節，因為撞正星期六，所以好多打工仔都冇得拎住個「免死金牌」玩老闆，不過如果你不幸要返工，都可以搵啲玩意玩，等愚人節工作日會冇咁悶。

美國求職網站 CareerBuilder.com好多年前有做過愚人節調查，六千幾位受訪者中，有兩成九都曾經喺愚人節整蠱同事或成為被整對象，最常見包括冒簽辭職信、用萬能膠將同事文具黏在枱面等，但計我話，整蠱人仲有唔少招數，要返工的打工仔不妨參考吓……

1. 發出有大老闆簽名的通告，下令員工以後去廁所，要按姓名字母輪流去（邊個想做敢死隊？）

2. 在男廁尿兜放乾冰（志明與春嬌？）

3. 將老闆的老花眼鏡換成平光鏡（入到老闆房先講！）

4. 請同事食狗糧（某辦公室的真人真事！）

（圖片：吠吠吠⋯）

5. 扮客人打電話「老點」同事出去見客（或者扮收到整蠱電話離開公司，乘機偷懶）

溫馨提示︰玩還玩，最緊要無傷大雅。

仲有冇打工仔有整蠱人經驗或者好提議？不妨講吓。

===================

全民監察老細，日行一善

如果想舉報老細同事19惡行，立即click入去講畀我哋知啦：

http://goo.gl/forms/4pFp6ABrMm

[heawork]

【19傳真】咩料呀？一個月病14日

如果同事話放病假，轉頭facebook又見佢喺迪士尼呃like相，你會點做？揭發佢？無用架，扮工最高境界，係連「球證」都係佢嘅人，場波根本無得射，就好似呢位讀者咁講⋯

讀者爆料／申冤來稿：

「我公司Sales Team Supervisor女同事一個月裏面斷斷續續請足十四日病假， 公司規矩一日病假扣二佰扣晒勤工七百就唔使扣， 返九日工就袋袋平安一萬幾蚊😤

佢個韓人上司因為常常係佢身上抽盡水攞盡著數所以就唔出聲🙊，其他同事敢怒不敢言，我唔敢話佢炸病…不過佢請病假同日都會放相上FB陪仔去迪士尼、畫畫等節目！」

（圖片：又的確要成日假先可以去玩。）

下次不如真心膠關心下呢位Supervisor，係咪有絕症啦。

===================

全民監察老細，日行一善

如果想舉報老細同事19惡行，立即click入去講畀我哋知啦：

http://goo.gl/forms/4pFp6ABrMm

[heawork]

【打工仔哀歌】連fb Messenger都有即時位置「報到」？

打工仔最驚係乜？咪就係畀人睇通晒自己喺邊，唔通食個tea又話你知咩？尤其一班慣常以公司OT做藉口、飛起另一半自己去玩的打工仔，更加驚另一半知道自己行蹤。

但最近fb Messenger竟然出現咗呢個功能⋯

就係可以在對話中揀選「分享即時地點」，然後朋友就可以在60分鐘入面，見到自己即時位置，分享之後仲會在地圖右下方有埋分享的時間，真係想「偷雞」、「造假」都幾難！

不過好彩office太細，個功能應該未定到太近嘅位，如果唔係，去爆個石都要「即時分享」畀老細，搞到要刪app都似。

打工仔，自己執生啦。

Search!! facebook 私隱陷阱

===================

全民監察老細，日行一善

如果想舉報老細同事19惡行，立即click入去講畀我哋知啦：

http://goo.gl/forms/4pFp6ABrMm

[heawork]

唔好坐以待斃　３招搞掂新老細

扮工友好怕換老細，因為新官上任三把火，工作方式有大轉變外，最怕係嚟個「大換血」，換走自己無得留低。

所以，點樣同新老細好好相處，係好重要嘅學問。外國有職場專欄教路，3招搞掂新老細無難度。

1.  唔好黑面 慢慢適應 每個老細都有自己一套工作哲學，可能暫時會打亂你嘅扮工節奏。其實，大家只係差啲適應時間。所以一開始，人前人後都唔好表現得太抗拒，亦唔好亂黑面，只怕佢要落個下馬威整治你，一旦被盯上，就從此多事。

2.  事前搜集老細來頭 所謂知己知彼，知道換新老細後，自動醒水八吓佢嘅來頭。上網或從佢嘅前手下／生意拍檔口中，可以知道好多有用資料，唔係搵花邊八卦，而係了解佢嘅做事方式同要求，減少第時撞板機會。

3. 多啲同佢主動溝通 新老細初嚟報到，大家實有好多「唔明」同「唔夾」嘅地方。做細嘅，宜主動開口問問題，例如自己有咩幫到手，或者佢想要啲咩，佢交帶工作鍾意用Email定打電話等。多啲直接溝通，就可減少誤會發生啦。

來源：Economic Times

Search! 6種跟不過的老闆

===================

全民監察老細，日行一善

如果想舉報老細同事19惡行，立即click入去講畀我哋知啦：

http://goo.gl/forms/4pFp6ABrMm

[heawork]

【熱話】廠區返工自唔自卑

前排有文章寫中環人遲早變九龍人。其實，係變「廠區人」先啱。

近年好多人無咗中環「翠華lunch」個飯碗，而走入廠區搵食。剛好有打工仔上網好奇一問：返工廠區嘅人會唔會覺得自己好L低賤，自卑？

呢個話題，真係擊中要害，要知道香港人一向都好要面，如果要同阿爸阿媽講畢業唔係去佢地識嘅金融地標返工，又驚兩老擔心。睇返個post，仲有中環國際大企業低薪員工，即刻撲出嚟擦優越感，係咪曲線就無講明啦。

不過唔少人覺得返廠區無乜嘢，仲話其實好多廠區人，先係真有錢。食碗車仔麵平過人，又好食；中環？今晚食下翠華夜唔夜呀，不經不覺OT又三點。

計打工仔話，廠區連飯堂阿姐都特別有霸氣，點會自卑？

來源：香討

Search! 隱世美食在工廈?

===================

全民監察老細，日行一善

如果想舉報老細同事19惡行，立即click入去講畀我哋知啦：

http://goo.gl/forms/4pFp6ABrMm