anning ;

bakit pa ba kailangan ipamulat ang mga mata sa katotohanan, kung marami rin naman ang may gustong magbulagbulagan?

[ligawnaliwanag]

Saan ba nararapat?

Hindi na alam ang dapat,

Saan ba nakatapat?

Nawawalan ng gana sa lahat.

Paulit ulit nang iniisip,

Kung anu-ano tumatakbo sa isip,

Isipa'y kumikitid,

Sa lakbay ako'y napatid.

Pagod na't nalilito,

Bakit ba ako'y napadpad rito?

Mga salitang sa aking binabato,

Puso ko'y kasing tigas na ng bato.

Ako'y tila batang naliligaw,

Mahigpit kung kumapit ngunit madaling bumitaw,

Liwanag ko'y nakakasilaw,

Sumisigaw ang pusong sa sining ito'y nauuhaw.

Nabibilang // 1:09am 05.10.19

[ligawnaliwanag]

L I P U N A N

noun | li•pu•nan

Definition: isang pangkat ng mga mamamayan na binibigyan ng katangian o paglalarawan sa mga huwaran ng mga pagkakaugnay ng bawat indibidwal na binabahagi ang naiiba-ibang kultura at mga institusyon.

Pinaniniwalaan ko na ang tunay na pagbabago ay tuluyang makakamit kapag ito’y nagmula sa sarili nating, tayong masa. Dapat natin hubugin ang sistema sa lipunan na maaari nating maimpluwensya ang bawat isa.

Hindi dapat natin hahayaan na maging pabaya ang kahit na sinuman sa atin dahil kapag may isang butas ang barko, hindi ito magiging balanse at lulubog ito. Sayang lang ang nabuong barko kung hahayaan natin itong lumubog sa kalagitnaan ng pagbubuo ng sinasakyan nating barko na kung saa’y itong sumasalamin bilang lipunan natin.

Asahan natin na hindi mawawala ang problema sa ating lipunan, ngunit dapat natin isaisip na sa tagal ng panahon na dumadaa’y maraming pagbabago pa ang makakamit ng lipunan natin kaya’t sa ngayo’y dapat natin paunlarin ang kung nasaan man tayo ngayon dahil tayo’y gumagawa ng kasaysayan.

[Inilatha noong ika-14 ng Oktubre, 2018]

[ligawnaliwanag]

T R A N S F O R M E R

noun | trans•for•mer

Definition: a person or thing that transforms something.

[Inilatha noong ika-14 ng Oktubre, 2018]

Ang edukasyo’y isang importanteng instrument na kung saa’y nagiging kasangkapan ito upang magkaroon ng pagbabago o matututo ang isang indibidwal na kung saa’y bawat isa sa ati’y kailangan magkaroon ng mga elemento na bumubuo sa klase ng edukasyon na makakapagbigay makabagong kaunlaran sa ating sarili’t sa lipunan.

Isa na rito ang pag-iisip ng kritikal, lalo na’t sa mga bagay na kailangan na maraming perspektibo na nangangailangang maangkop ito sa sitwasyon na ating kinalalagyan.

Bilang Iska ng Sintang Paaralan, dapat isa ako sa makakagawa ng paraan upang maparami ang mga estudyanteng mamulat sa sitwasyon ng ating komunidad at bansa. Hindi ba’t maaari naman natin makamit ang klaseng edukasyon na makakapagiba ng anyo ng sistema ng edukasyon na makakapagpabago sa ating petty b na pag-iisip at sa bawat segundong natakbo’y aking nasasaisip na ang ganitong klaseng edukasyon ay makakapagbigay ng responsibilidad sa bawat sa atin na maaari nating maipasa sa mga susunod na henerasyon at maging epektibo ang ating layunin sa mabuti at matiwasay na lipunan.

[ligawnaliwanag]

P A N I T I K A N

noun | pa•ni•ti•kan

Definition: Ang panitikan ay pagsulat na itinuturing na isang anyo ng sining, o anumang isang sulat na itinuturing na may artistikong o intelektuwal na halaga, kadalasang dahil sa pag-deploy ng wika sa mga paraan na naiiba sa karaniwang paggamit.

Hindi lang basta ang paglalatha ng mga panitika’t literaturang katulad nitong blog na ito. Ngunit gaano ba talaga kalakas ang sapak ng isang nilathang literatura sa pangingimpluwensya ng masa?

Para sa akin ito’y malaking ambag sa lipunan sapagkat nagiging mulat ang kahit na sinuman makabasa ng kahit anong uri ng panitikan. Halimbawa na lamang nitong aking ginagawa, nakakabigay ginhawa ang makalikha ng mga ganitong klase ng bagay dahil sa henerasyon ngayo’y punung-puno nang basura’t walang kuwentang mga bagay ang nilalaman kahit saan ka man lumingon sa iyong kapaligiran. Sana’y ating intindihin na hindi lahat ng sinusulat ay panay kababawan, dahil ang mga nilalathang tulad na ganito’y puno ng malalamang aralin.

“Ang pagbabasa’t pagsusulat ay ang pangunahing dapat pinagaaralan ng isang bata.” Turo sa akin ng guro ko noong ako’y Junior High School. Hindi pwedeng hindi ka makatapos nang ‘di ka natututo nitong dalawang importanteng instrumento na maaaring makapagpabago sa buhay mo kapag ika’y natutong maglikha ng mga sulatin na maaaring makapagbigay ng pagbabagong hindi mo akalaing kaya mong gawin at maipamulat sa kabataang ngayon.

“Kabataan ang pag-asa ng bayan” ika nga ng ating pambansang bayani na si Jose Rizal, kaya’t sa pamamaraan ng paglalatha at paggamit ng panitikan, ating muling hubugin ang magiging kinabukasan ng kabataan sa susunod na henerasyon.

[Inilatha noong ika-14 ng Oktubre, 2018]

[ligawnaliwanag]

K A B A B A I H A N

noun | ka•ba•ba•i•han

Definition: ang grupo ng mga babae.

Mula sa kasaysayan, ang mga kababaihan noong sinaunang panaho'y kagalang-galang. Walang bahid ng pangbabastos sa kahit anong pamamaraan. Ngunit nang dumating ang mga banyagang Kastila, karumaldumal na pinagsamantalahan at binabastos ang mga Pilipina, magmula sa walang awat na pananakit hanggang sa sapilitang panggagahasa sa kanila ng mga ito. Nawa'y mabigyan ng karapat dapat na hustisya sa mga kababaihang naulila sa sarili nilang pagkatao't pagpapahalaga sa sarili.

Masasabing isang patriyarkal na bansa ang Pilipinas dahil nakatatak na sa ating isipan na ang mga lalaki ang namumuno palagi, na naging parte na rin ito ng ating kultura. At dahil dito'y dinidikta ng ating patriyarkal na kultura na kailangan ng lahat ng relasyon ay dapat may sangkot na kalalakihan upang maging matagumpay ang isang pagsasama.

Bilang kasapi ng kababaihan, mahirap kumilos sa isang komunidad na pinapaligiran ka ng maraming kabastusan. Lalo na't kung kabastos-bastos ka, kahit wala kang ginagawa, walang pinipiling oras o tao ang kabastusan sapagkat kahit sanggol nagagawang bastusin ng isang tao.

Hindi ba dapat karespe-respeto ang mga kababaihan? Dahil kung walang kababaihan, magiging balanse pa ba ang mundo? Kung lahat ng kababaiha'y hindi na lumaban, ano pang silbe ng iyong pagiging lalaki? Maraming uri ng pangbabastos ang nangyayari sa isang buhay ng babae, hindi maiwasan - kaliwa, kanan, harap at likod - nakapaligid sa kanya ang mga kasakiman ng mundo. Halos lahat ng kabastusan na ito'y nakasalalay ang buhay ng kababaihan, namumuong takot at kaba para sa araw-araw na pamumuhay 'di nababawasan ngunit mas lalo lang nadadagdagan. Hahayaan na lang ba na maging ganito ang sosyal na istraktura sa mga kababaihan? Ganito na lang ba ang limitasyon natin bilang babae?

Matutong lumaban para sa sariling karapatan! Maging malakas at ipakita na hindi tayo mahina! Kababaihan, abante!

ABANTE, BABAE!

PALABAN, MILITANTE!

[Inilatha noong ika-14 ng Oktubre, 2018]

[ligawnaliwanag]

F I L M

noun | fil•m

Definition: a motion picture; a movie.

At ang nanalo para sa titulong pinakakritikal na pelikula ay...

Oh ano? Akala mo sasabihin ko 'yong nanalo? Asa.

Pero saglit, hindi ba maraming iniidolo na artista ngayong kapanahunan? Lalo na't usong-uso na ang mga pelikulang banyaga, maski ang mga nagmula sa Hollywood.

Bakit kaya mas suportado ng mga kababayan natin ang mga banyagang pelikula? Wala namang ibang pinapakita ang mga 'yan maliban sa malapantasyang daloy ng kuwento.

Ay 'di ba 'yon ang hangad ng pangkaramihan? Pagtatakas sa realidad, ang pelikula'y malakas na instrumentong maaaring gamitin sa pagimpluwensiya sa nakararami na mga manonood nito. Kaya kung anuman ang maipakita sa isang pelikula'y maaaring tumatak ito sa kaisipan ng bawat isa.

Hindi ba pwede rin itong gamitin nating mga Pilipino bilang kasangkapan na makakatulong sa pagmumulat sa masa nang madali't walang komplikasyon sa paghuhulma sa kaisipan ng mga mamamayan na makikita nila kung ano ang kaya nilang gawin at paano sila magpapahiwatig ng implikasyon sa maraming bagay.

"Ang gwapo ni ganito. Ang galing ni gan'yan. Gusto ko maging katulad ni ganire. Sana paglaki ko maging ako si ganito."

Idolong-idolo mo ba 'yong bida sa pelikula? Nais mo ba maging kapareho ng pamumuhay 'yong isang aktor sa pelikula? Bakit nga naman hindi, 'di ba? Pero 'yon ba talaga ang kailangan mo?

Siyempre, isasagot mo oo dahil hindi mo gusto ang 'di makasunod sa uso. Kainutilan!

SUPORTAHAN ANG LOKAL.

Hindi ba dapat ito ang pamamaraan na ating ginagamit upang mas maengganyuhan ang mga kabataang katulad ko? Dahil sa totoo lang, karamiha'y may katamaran na magbasa at mag gugustuhin na lang ang manood. Kaya bakit pa sasayangin ang oportunidad na ito at gagawa ng walang kabuluhan na pelikula puno ng pagpapantasya kung maaari naman gumawa ng mapagpamulat na pelikula?

[Inilatha noong ika-14 ng Oktubre, 2018]

[ligawnaliwanag]

ELITISTA

adjective | e•li•tis•ta

Definition: Systems, practices and ideas favour the most powerful, rich or talented people within a group, place or society.

Ano ba ang pumapasok sa isip mo kapag naririnig mo ang salitang pera?

Pangbili ng bagong mga kagamitan? Sapatos? Damit? Pangbayad sa utang sa tindahan? Sa bumbay na inuutangan mo na Five-Six? Panghanda o blowout sa inyong barangay dahil sa nagkapera ka lang?

Siyempre, 'di porket may pera ka na, ubos biyaya ka na? Dahil may pinagkukuhaan ka ng tsa-tsing, magmamataas ka na? Siyempre, 'di ba? Basta may pera, maraming kayang gawin 'di ba nga?

Tulad na lamang sa edukasyon, kahit anong unibersidad, basta may pera, kaya mo nang pasukan. Bakit ka pa mag-iisip kung saan, mas pipiliin mo 'yong pinakamamahalin sa lahat 'di ba? Dahil sa paniniwalang mas mahal, mas maganda o angat? Mga pang-elitista.

"Kapag may isinuksok, may madudukot."

Totoo nga naman ang kasabihan na ito hindi ba? Katulad na lamang ng galawang elitista na kapag may kakilala ka sa isang kompanya, may malaking posibilidad na makakakuha ka ng mataas na trabaho at may mataas itong sahod. Wala ng kapaguran at 'di pa nasasayang oras mo? Ngunit kailan pa ba naging tama ang ganitong pamamaraan ng pamumuhay bilang tao? Teka, may pagkakatao pa ba doon sa pagiging nakahihigit sa mga taong tunay na nakakaranas ng paghihirap at nagtitiis sa bulok na sistema ng lipunan, makausad lang mula sa pagkakabulok na ito't maglingkod para sa kani-kanilang pamilya't makaahon sa pagdurusa sa araw-araw nilang pamumuhay? Wala!

Sana maintindihan natin na hindi sa lahat ng pagkakataon na ang mga kagustuhan natin'y makukuha natin. Sapagkat, karamihan sa ati'y kabataan ang hindi nakakamit ang pangarap na makapagtapos ng pag-aaral, marami pa nga ang hindi pa nagagawang masimulan ang kanilang pagpasok sa kahit anumang paaralan sa kadahilanang habang patagal nang patagal ang panaho'y mas umaangat ang paniningil sa karapatan nating pangtao.

ANG KARAPATAN NATIN SA EDUKASYON!

We are not for sale!

FREE EDUCATION NOW!

[Inilatha noong ika-13 ng Agosto, 2018. Nirebiso noong ika-14 ng Oktubre, 2018]

[ligawnaliwanag]

B L O G S

noun|blo•gs

Definition: Isa itong websayt o sityo sa web na parang isang talaarawan.

Blogs? Ang lupet naman pakinggan niyan pre. May gano'n ka? Ano mga nilalaman? Bakit ka may gan'yan? Para saan ba 'yan? Gumagawa ka rin ba ng videoblogs? 'Yong tulad ni "so ayon po ano" at "petmlu" o kaya ng mga sikat na "ginagawamue" meme videos, 'yon ba mga nilalaman ng sinasabi mong "blog" mo?

Hindi. Bakit ako may ganito? Simple lang, dahil gusto ko malaya 'kong ipinapahiwatig kung anuman ang nasasaisip ko't naipapamulat sa kabataan ngayon ang mga karapat-dapat nilang malama't bigyan pansin.

Sa kaso ngayon, lahat na lang pinapansin ng bawat isa. Mula sa iyong pananalita hanggang sa galaw ng iyong mga mata, ngunit ito'y sa mundo ng realidad. Paano naman kaya sa kabilang mundo? Oo, may isa pang mundo. Hindi mo alam? Tara bumisita tayo sa mundong nilikha nating mga tao.

Maligayang pagdating ss aking... Teka lang, bakit nandito ako? Ha? Nagtataka ka rin bakit ka nandito? Hindi ko na rin alam pre. Tulungan mo ako hanapin ang layunin ko dito.

Bawat isa sa atin hinahanap ang layunin kung bakit ba tayo naririto sa mundong pinangingibabawan natin, pero kung kasalukuyan nating hinahanap ang halaga natin sa mundo ng realidad, bakit pa tayo pumasok sa isa pang mundo na hindi pa alam ang layunin natin sa naunang mundo? Handa ba talaga tayo sa paghihimasok sa mga panibagong bagay na maaaring maging panlilinlang sa ating mga kaisipan.

Siguro kaya nalikha ang ikalawang mundo upang maging takas ito sa unang mundo? Mundo ng pananakit, mundo ng kasakiman, mundo ng realidad na bawat isa sa ati'y paunti-unting nawawalan ng kamalayan.

Hindi na nagagawang mapagkaiba ang realidad sa pangbirtual lamang. Tila nawawala na rin ang dapat pribado at maaaring isapubliko. Bakit nga ba may mga ganito pa? Ano ba pakielam ng ibang tao sa buhay ng isang tao?

Siyempre, malaki pakielam nila. Masaya mangtsismosa, masarap sa pakiramdam nang may pinag-uusapan. Tama ba? Hindi ba't dito nakikilala ang ugali ng Pilipino sa kasalukuyng henerasyon? Mga mapanghusga. Aminado, isa ako rito ngunit akin naman nilulugar. Ngunit bakit karamihan sa ati'y hindi alam ang salitang hiya?!

Uulitin ko, masarap ang mangielam, masaya ang may pinagtsitsismisan.

Gusto ng lahat na makatakas sa mga problema sa mundong realidad, ngunit kahit kailan ay hindi ka makakawala sa mga bagay na nagbunga sa sarili mong mga desisyon. Kaya mag-iingat ka kaibigan. Binantaan na kita dahil marami pa ring naniniwala na ang mundo'y patag a.k.a. huwag maniniwala basta sa kung ano ang iyong mababasa nang walang kongkretong ebidensya.

Maging kritikal, matutong gamitin ang kaisipan. Kahit 'di magaling, basta marunong!

[Inilatha noong ika-18 ng Agosto, 2018. Nirebiso noong ika-14 ng Oktubre, 2018]

[ligawnaliwanag]

W I K A: 

noun | wi•ka

Definition:  Sa pagpapaliwanag ni Hymes (1972), nangangahulugan itong isang buhay, bukas sa sistema ang wika na nakikipagnteraksyon. Binabago at bumabago sa kapaligiran bilang bahagi ng kultura ng grupong gumagamit nito. Isa itong kasanayang panlipunan at makatao.

Ano ba ang ibig sabihin ng salitang WIKA? Para sa isang estudyante? Guro? Magulang? Pulube? Undergraduate? Para sa’yo, ano ba ang depinisyon mo sa wika mo?

Ang wika ay isang parte nang pagkakabuo ng isang indibidwal, kung saa'y kinikilala ang kanyang pagkatao. Tipong saan siya nagmula, ano ang kanyang mga paniniwala't mga kasanayan.

Ngunit sa kasaysayan ng ating bansa'y nagkakataon na sa maraming paraa'y sapilitan isinasaksak sa ating kaisipan na ang Ingles ay pangkaraniwang lengguwahe na kung saan naging sosyal na istraktura na ang Ingles ay batayan na isa ka ng higit na mataas sa iba.

Kapag ba marunong ka mag-Ingles, matalino ka na? Magaling ka na? Siyempre, ang isasagot ng pangkaraniwang Pilipino ay oo. Manghang-mangha na marunong ka magsalita ng banyagang pananalita. Ngunit kung ika'y aking tatanungin kapatid, kilala mo pa ba ang sarili mo pagkatapos kang maimpluwensiyahan ng kolonyal na pag-iisip?

Ang masasabi ko lang para sa istrakturang 'yon na ito'y malaking kainutilan para sa ating sarili sa kadahilanan na hindi ba dapat mas inuuna natin ang sariling ati'y bago ang iba?

Para lang sa isang relasyon na kung saa'y 'di mo na magawang maging masaya dahilan na hindi mo na kayang maging sapat sa iyong kabiyak. Hindi ba dapat mas alamin mo kung ano ang dapat para sa'yo at hindi para sa tao na 'yon? Matuto kang tumanggi at hindi lang tanggap nang tanggap na "ganito na pala ngayon, susundan ko na lang." Dahil hindi lahat ng tao'y pare-pareho.

Ang pambansang wika nati'y Filipino, kahit kailanman, hindi Ingles!

-------------------------

Wikang Filipino -

Pambansang Wika ko.

Kahit kailan 'di magbabago,

Kahit nabahiran ng kolonylismo.

"Ang 'di marunong lumingon sa pinanggalingan,

'Di makakarating sa paroroonan."

Lahat ng hanap nating kasagutan,

Ay nasa Perlas ng Silanganan.

Ako'y Pilipino,

Wika ko'y mahal ko,

Naririto aking pagkatao,

Halaga ko'y maglingkod para sa mga tao.

Tangkilikin ang sariling atin,

Wala dapat na hahatiin.

Kahit kaila'y huwag pawiin,

Sa kasaysayan, tayo'y inalipin.

-------------------------

BILANG PILIPINO, MAHAL KO ANG BAYAN KO.

BILANG PILIPINO, MAGLILINGKOD AKO PARA SA MGA TAO.

BILANG PILIPINO, NAGPAPATAWAD NGUNIT 'DI NAKAKALIMOT.

[Inilatha noong ika-13 ng Agosto, narebiso noong ika-11 ng Oktubre.]

[ligawnaliwanag]

[ligawnaliwanag]

K O L O N Y A L I S M O

noun | ko•lon•ya•lis•mo

Definition: Patakaran ng isang bansa sa pagpapalawig o pagpapanatili ng kapangyarihan o awtoridad sa isa pang bansa o teritoryo.

Mga Kano, kaibigan ng lahat. 'Yon ang sabi sa kasaysayan ng Pilipinas. Ngunit, paano mo nasabi na sila'y sa katunayan, naging mabuti ang hatid sa ating bansa't mga kapwa Pilipino?

Hindi ako naniniwalang umunlad tayo noon kung aabot sa puntong tayo'y pinaglaruan at ginamit para lang sa sarili nilang kaunlaran, kaibigan? Kahit kailan hindi matuturingang kaibigan ang mga katulad nilang nanggagamit at mapangabuso.

Kahit sa kasalukuya'y nakikita ko ang epekto ng nakaraan, ang bigat ng impluwensya ng "American Dream" na tumatatak sa kaisipan ng bawat Pilipinong nagiging mangmang sa katunayang balak ng mga ito.

Mga Pilipinong inilagay sa sapilitang pagseserbisyo, na kailan man 'di naglaan ng benepisyo. Sa halip na tulong sa mga Pilipino, tanging dala'y matinding perhuwisyo.

Inaakala nila'y tayong mga Pilipino tuluyan nilang maloloko, aber teka lang! Hinto ka muna kaibigan at tayo'y magpanumbalik sa nakaraan at hanapin ang naging benepisyo nating mga Pilipino sa nangyaring pagtraydor sa atin ng mga kaibigan-kuno nating mga Kano.

Pare, pakubli na nga kung tayo'y pagsamantalahan ang munting yaman ng ating bayan, mas pinili pang tuluyang maging bulag sa kapaligiran na akala natin tayo'y tinutulungan.

Kapag ika'y namulat, kasalanan na ang pumikit at magmaang-maangan!

Ngunit tingin nila sa'tin ay mga hamak na dukha, ang kapal naman ng mukha nila na tila libro para isipin na tayo'y magpabayang tratuhin na parang tanga.

Aba!

Hindi tayo nabuhay para mamamatay na may titulong alipin nila.

Pilipino ako, lalaban ako!

Pilipino ako, paglilingkuran ko ang aking Inang Bayan!

[Inilathala noong ika-15 ng Hulyo, 2018. Nirebiso noong ika-14 ng Oktubre, 2018]

[ligawnaliwanag]

M I S E D U K A S Y O N

noun | mis•e•du•ka•syon

Definition: poor, wrong or harmful education.

Gaano na ba kahalaga ang edukasyon para sa isang indibidwal? Kung para sa makalumang tradisyon, karamihan sa ating mga magulang ay naniniwala na ito ang munting pamana nila para sa atin. Sapagkat ito’y karapatan ng bawat isa, ang magkaroon ng sapat na edukasyon para sa ikabubuti ng ating kinabukasan. Kahilingan ng ating mga magulang na magkaroon ng edukasyon nang mamulat tayo mula sa kasalukuyang lipunan na binabalutan ng kasakiman. Dugo't pawis ang puhunan nila at kahit ano'y gagawin upang masustentuhan ang kaisa-isa nilang tungkulin - ang mailaan ang tamang edukasyon para kinabukasang ating tatahakin. Pero tumatatak sa kaisipan ng karamihan ang katanungang, edukasyon nga ba ang ating pangunahing pangangailangan mula sa mundong ating ginagalawan?

Malaki ang ambag ng edukasyon sa ating pamumuhay sa araw-araw, ngunit sapat na ba talaga ang sistema ng edukasyon natin ngayong henerasyon upang makamit ang kahilingang mamulat tayo? Bakit madalas sa mga ito'y hindi malalaman na kaalaman na pawang kasinungalingan ang pinapairal sa atin mula sa nakaraan at sa huli'y napadpad tayo sa ating kasalukuyang kinaroroonan na nakaukit na sa kaisipan ng sambayanang Pilipino ang mga kainutilan.

Sa kasaysayan ng Pilipinas, pinaniniwalaan na ang mga Kano ang tunay na nagbigay ng edukasyon sa ating mga ninuno. Pero ano nga ba talaga ang katotohanan? Paanong nasabi na hindi edukado ang ating mga ninuno bago pa man makarating ang mga banyaga? Kailan natin balak tapusin ang kapabayaan nating mga Pilipino na impluwensyahan tayo ng mga dayuhan at mawala ang kolonyal na pag-iisip? Hanggang dito lang ba talaga limitasyon ng kakayahan natin bilang mga Pilipino at hinahayaan nating maging alipin sa mga taong sa simula'y hindi naman natin kinailangan?

Hindi lahat ng batang Pilipino’y nakakapagtapos, kadalasan na dahilan ay ang pagiging kapos. Mga pamilyang kapos kahit patuloy na naghihikahos sa kanilang mga hanapbuhay, kahit anong trabaho’y kanilang ginagapos, basta magkapera kahit na ito’y nagiging labag sa kalooban nila.

Hahayaan na lang ba natin na hanggang dito na lang ba tayong mga Pilipino? Ang halaga nati'y sinusukat sa estado natin sa lipunan at ang edukasyon nati'y nililimitasyon dahil lang sa hindi kayang pagbayarin ang karapatan na dapat ay libre.

[Inilathala noong ika-13 ng Hulyo, 2018. Nirebiso noong ika-14 ng Oktubre, 2018]

[ligawnaliwanag]

Mula sa isang ISKOLAR ng Bayan

Ako'y isang tinatawag nilang ISKOLAR NG BAYAN, magmula nang ako'y yumapak sa lupa ng Sintang Paaralan. Ngunit, paano mo ba talaga malalaman kung ano ba talaga ang patunay na ika'y isang Isko o Iska?