🤢

Bydd hwn ddim o ddiddordeb

[oedoli]

Sylweddoli

Mae’r ymwybyddiaeth bo ti ddim yn arwr yn brifo.

Nad ti yw’r person cryf a medrus yna fydd yn sefyll fyny am be sy’n iawn. Ti fydd y llwfrgi pragmatic yn y ffilm rhyfel.

Bo ti’n gyfrinachol gudd yn hollol hapus mewn nyth domestig. Bo ti wedi tyfu i ofni cyfrifoldebau’r byd go iawn.

Diog.

[oedoli]

Ofn Caru Pethau Bach

Wyt ti erioed Wedi bod ofn gymaint ti'n caru rhywbeth? Wirioneddol, bob hyn a hyn dwi'n gorfod eistedd mewn gwewyr ar ôl sylwi mod i'n caru mhlant gymaint. Ei fod y peth mwyaf brawychus yn fy mywyd.

Mae'r eiliad na lle mae dy ddychymyg yn rhedeg yn gyflymach na dy feddwl deallus yn meddu ar y fath fraw. Yr eiliad lle ti'n gweld eu pennau'n torri. Yr eiliad lle ti'n gweld y corff bach yna'n gelain - a ti'n credu be ti'n gweld yn dy feddwl.

Mae dy gorff yn ymateb yn reddfol, yn hyrddio sŵn anifeilaidd o fan tyfnaf cyntefig dy berfedd. Sdim anadl ar ôl yn dy gorff. Ti'n gweld dy ddyfodol yn rhwygo'n ddarnau mân. Ti'n teimlo’r erchylltra fel pydredd trwy dy gnawd.

Yna, o fewn eiliad arall mae dy reswm yn taenu cwrlid tew i fygu'r braw, a gadael i ti gario mlaen i blygu crysau-t bach ar y gwely.

Ond mae drain bach wedi gweithio eu ffordd o dan dy groen, yn pigo dy gydwybod y gall y lluniau ddod yn wir.

[oedoli]

Crio wrth Yoga

Wnes i grio yn ystod dosbarth Yoga Heno. A gwthio mhengliniau a nghorff i wneud gormod. Camddeall a dewis anwybyddu holl ystyr yoga. Y llifo, tawelu a gwella pob yn fymryn.

Crio achos blinder a chyffyrddiad aden anobaith, chwa o orbryder. Noson o wres a chosi. Allen i fyth fod yn fam newydd ddi-gwsg eto.

Ond crio yn ystod asanas gorwedd, gan fod fy meddwl yn neidio a chrwydro - meddwl mwnci

Na, ddewises i wthio, cynhyrfu a chlebran meddwl. Isie llwyddiant yn syth. Bydd rhaid peidio ymarfer rwan, arbed y cymalau fel hen fenyw.