كراكيب @omar-mahrous - Tumblr Blog

Posts

الموت كائن مخيف جداً بيترصدلك وبيراقبك وبياخد الناس القريبة منك -وانت متقدرش تقومه- وكل مدى بيقرب منك وكل ما يقرب كل ما تتسائل عن جدوي كل حاجة فى الحياة، خايف؟ طبعاً بس مش عارف المفروض اعمل ايه ؟ اعمل ايه فالمطلق فالوقت اللي فاضل فالساعة الرملية اللي عمال يقل واللي انا مش عارف هو اد ايه !

الفراق صعب جداً ومهما عدي من وقت مبتتعودش خاصة مع بابا كان بيحبني جداً ومش عارف حتي افتكرله اي حاجة وحشة عملهالي كل حاجة كان بيعملها عشاني كل حاجة انا فيها بسببه وفاكر وانا صغير خالص ممكن مكملتش ٦ ٧ سنين وابتديت ابين اني بحب القراية كان ياخدني محطة رمل لدار المعارف ومكتبة المعارف اللي كانت فى وش ماك ويخليني اختار واخد كل القصص اللي انا عايزها ويشجعني على القراية او وانا صغير بردو لما اتخانقت مع عيل فى الشارع وجا اشتكاني لبابا اول ماعرف قولتله هو اللي ابتدي وشتمني قالي انا مصدقك وشاطر انك اخدت حقك منه كان عنده ثقة فيا من وانا صغير فرحته بكل نجاح صغير في حياتي عمل كل حاجة ليا ولاخواتي لحد اخر يوم فعمره وحتي مجتلناش الفرصة اننا نردله كل دا مات مرة واحدة من غير تعب او اي حاجة وهيفضل عايش دايماً جوانا احساس الفقد ان حاجة ناقصة…

انهاردة كان المفروض يكون عيد ميلاد بابا ال٧١ بس المرة دي مش هيكون موجود عشان اجبله ازازة البرفيوم اللي بيحبها وبيستناها مني فعيد ميلاده وبدل ما نحتفل بعيد ميلاده هيكون عدي ٤٠ على وفاته اللي لحد دلوقتي هي اكيد من اصعب الحاجات اللي عدت عليا في حياتي ان لم تكن الاصعب الفراق صعب والموت صعب بس لما يكون مفاجئ بيكون اصعب بكتير انا ماخدتش فرصة اني اودعه ماخدتش فرصة افكر حتي انا اتفاجئت دا حصل امتي وازاي اكيد عارف ان اليوم دا كان هيجي وياما فكرت فيه بس على الاقل كنت متخيل أن هيبقي فيه مقدمات او الدنيا خدعتني انه كان هيعيش اكتر من كده جدي عاش اكتر من ٩٠ سنة جدتي ماتت ٧٨ وكان بنقول ماتت صغيرة فلسا قدامه شوية ومفيش اي مؤشرات عشان مرة واحدة ناخد الصدمة اللي صعب اتجاوزها طول حياتي ومنقدرش نقول غير ان لله وان اليه راجعون وربنا يرحمه يارب يكون دلوقتي فمكان احسن

omar-mahrous

من أجمل المشاهد اللي شوفتها….

اني حبيت نادرة يا أصداف عشان مش بأيدي ربنا هو صاحب الأمر ع القلوب مش اني! ربنا أمر قلبي بمحبتها ومأمرش قلبها غير بيوسف .. اني لو كان الأمر بأيدي يا أصداف كنت حبيتك، لكن من امتي القلوب بتعمل الصح ! القلوب بتعمل اللي مكتوب بس ياصدف . غصب عني ماليش في القلب أمر .ماتزعليش مني سامحيني ..- مسمحاك ياعلي ، مافيش في الحب غصب مع ان الحب غصب

omar-mahrous

منشن بلوجات بتحبها :)

بص يا أنون الفكرة انا بأتابع بلوجات كتير جداً فهأكتب اللي تسعفني بيه ذاكرتي :3@ahmedbeedo @mohamedyoussef1 @hassan-7 @manal2015samir @aseel962 @zawzana @nassima78955 @space-enough @alyaaharfoush @iamanyworld @rubazu @blog-moneam-mekho @nehadgamal @alilotfy0 @blurry-char @khadeja-7 @mona-mahdy

omar-mahrous

@m7mdshehab فعلاً هي الناس دي راحت فين 🤔

بتحس بأيه و أنت في 2022 بتقرأ بوست ليك من 2017 يعنى ايه شعورك حياله https://omar-mahrous.tumblr.com/post/169122655670/30-12-2017-1045

هو مش البوست دا بس هو لما برجع اقرا البوستات القديمة بسرح كدا فى ذكريات كتير و بحس بخليط مشاعر غريب بين البساطة والسذاجة وايه العبط اللي كنت كاتبه دا بس ممكن اكتر حاجة بحس بيها خاصة وسط ارهاق الايام دي الحنين وممكن مع شوية ندم

شكراً يا انون انك افتكرتني وشكراً ع السؤال الجميل دا وكل سنة وانت طيب 😄

03-01-2022

سنة جديدة.. بداية جديدة.. طموحات جديدة .. اخفاقات جديدة.. امال جديدة.. فكرة النقطة الزمنية اللي تقف عندها وتكون بداية او نهاية او اياً كان هي حاجة غريبة جداً يعني ايه الفرق بين 31-12 و 01-01 اعتقد ولا حاجة بس فى المقابل بتكون فرصة عظيمة لمراجعة نفسنا فرصة نشوف ازاي احنا اتغيرنا وحياتنا اتغيرت فى 365 يوم بشكل غريب وغير متوقع ازاي الحياة اخدتنا لطرق عمرنا ماكنا نتوقعها وازاي نقرب من ناس كانت بعيدة وناس كانت قريبة اوي اوي تبقي غريبة, ايام حلوة.. ايام صعبة.. والحياة استمرت بالنسبة ل2021 وانا بفتكر دلوقتي اكيد ايامها الحلوة كانت اكتر, سنة ابتدت وانا بدور على الاستقرار فى حياتي وانتهت وانا بدور على الاستقرار على الاقل فحياتي العملية ابتدت بعد سنة ريحتها ريحة المستشفيات وابتدت ببداية ليا فى مجال عمل جديد بعد ما خلصت منحة الITI عشان ابدأ من تاني للمرة اللي مش عارف كام رحلة البحث عن عمل ورمي السيفهات الخ وفنفس الوقت كنت اخدت خطوة جريئة ومهمة فى حياتي بعد ما قررت الشخص اللي اتمني اني اكمل ماعاه حياتي ودا كان دافع اكبر للبحث عن الوظيفة المنشودة فنفس الوقت الوقت اللي لسا شغال فيه فوظفيتي القديمة اللى بكرهها وتعدي ايام مملة وبايخة كل يوم اصحي مش طايق شغلى وبالتالي مش طايق حياتي باحاول باي طريقة اشوف اي شغل فى مجالي الجديد بقدم فكل حته بعمل انترفيو ولا اتنين واترفض ويعدي شهر و2 و3 على نفس النظام لحد ما فبداية شهر 3 جاتلي فرصة شغل فرى لانس وشغل بارت تايم فاخدت القرار المنتظر من زمان واسيب الشغل بس طبعاً كان لسا فيه شهرالمفروض اكمل فيه الشغل قبل ماامشي وخلاله جالي انترفيواخير مع شركة فالقاهرة انا معرفهاش ولا قدمت فيها وبرغم اني ضد فكرة العمل فالقاهرة بس قولت مش مشكلة اخد خبرة الانترفيو وسبحان الله يكون اول انترفيو اتقبل فيه فمجالي الجديد وبعد تفكير طويل ومرهق اقرر اروح على امل اني بعد وقت قصير اشتغل ريموتلي من اسكندرية وفنفس الوقت دا وقبل بداية رحلتي المرهقة للقاهرة تحصل انتكاسة صحية واقعد كام يوم بين المستشفيات بسبب ميكروبات فى المعدة كالعادة عشان اروح القاهرة يوم 12-04 وانا تعبان وكاره المدينة كالعادة.. الايام الاولى فى القاهرة كانت صعبة جداً السكن المؤقت والتدوير على سكن اي حد مغترب فالقاهرة عارف ازاي بتكون فترة بايخة ومرهقة بجانب تعبي اللي استمر فترة معايا لحد مااستقريت اخيراً على اخر شهر 4 عشان يجيي عليا اسوأ شهر رمضان عدى عليا فى حياتي رمضان بلا طعم ولا اي حاجة زود على كل دا بقي زيادة عليه اني بعد شهرين شغل اكتشفت ان الشركة مرهقة مفيش نظام شغل وعشوائية وضغط وكل حاجة سلبية ممكن تلاقيها فى الشغل موجودة بس اللي خلاني صابر كل دا كان ريم كانت معايا فى كل خطوة وعاشت معايا اللحظات دي كلها اكيد مكنتش اجمل ايامنا بس كنا بنحضر لمرحلة جديدة فحياتنا كان الاتفاق تم على خطوبتنا خلاص وممكن دا كان حاجة مخلياني اكمل فى الشغل برغم كل حاجة وبرغم كرهي المستمر والثابت للقاهرة مدينة الزحمة والدوشة والتلوث والصداع والحر والجفاف فبردو كان فيها حاجات كويسة بالنسبة لى اولها المترو طبعاً وحبيت مصر الجديدة صراحة من الاماكن القليلة فى القاهرة اللي فيها روح روحت معرض الكتاب هناك وكان حاجة عظيمة وفرق شاسع بينه وبين اي معرض اتعمل فى اسكندرية يعني مكنتش الايام كلها سيئة الدنيا كانت بتمشي والايام بتجري بتجري بشكل اسرع مما كنت اتخيل وعدي شهور مش فاكر فيهم غير انى قضيت وقت كتير فيهم فالقطر مسافر من والى القاهرة لدرجة اني بقيت باعامل عربيات القطر كأنها بيتي المهم الايام عدت لحد ما وصلنا لاهم يوم فى السنة اكيد 07-10 يوم الخطوبة اعتقد هاحتاج بوست تاني اصلاً عشان احكي فيه تحضيرات الخطوبة بس عامة الفترة دي كانت اجمل فترة فالسنة وانتهت بيوم جميل هافضل دايماً فاكره إن شاء الله بس بعده اخدت بالي بقى من مدى سوء شغلى وحياتي فالوقت الحالي بالنسبة لشخص مقرر انه مستقبلاً هيستقر فى الاسكندرية أُرهقت من العشوائية والغباء فالشغل وأُرهقت من السفر الاسبوعى عشان اعمل شغل ممكن بكل بساطة يتعمل وانا قاعد فبيتي ممكن كنت مستحمل او مش مركز عشان دماغي كانت كلها فى الخطوبة وتحضيرتها ودلوقتي بعد ماانتهت بقي صعب اكمل فى الشغل دا حاولت افصل فى الناس وختمت السنة بشكل جميل وطلعت رحلة لذيذة جداُ مع عمر قضينا يومين جمال جداً فى سيوة وبردو هاحتاج بوست تاني لوحده عشان اتكلم عنها المهم مع اخر اسبوع فالسنة كنت قررت خلاص اني مش هاقدر اكمل فى المكان دا سواء كمدينة او شركة وابتديت من تاني رحلة البحث عن وظيفة جديدة ولحد مالاقيه فانا كل يوم بصحي مش طايق نفسي وبلعن شغلى كنقطة البداية بتاعت السنة بالظبط مش عارف السنة دي هتنتهي هاكون فين للاسف بس واثق انها هتكون افضل بفضل ربنا إن شاء الله وكالعادة البوست السنوي بتاع تكبلر جا عشوائي وطويل بس هو فعلاً شوية كركيب فدماغي حبيت اطلعها

#كراكيب في دماغي

like-fairy-tales

07-10-2021

In the Greek myth, they believed that at the beginning of time, when humans were first created, they were both man and woman, had four arms, four legs and a single head made of two faces. But Zeus decided to split the humans in half and punish them for their pride and hubris. So every half lived in pain and sorrow searching for the other half, the one who shared them soul before “the soulmate”, to start their new life together. Happily I found my own soulmate now and ready to start our new journey. Hope you all find yours someday.

اسوء عيد ميلاد !