ᴜʀ ғᴜᴛᴜʀᴇ ᴅᴇɴᴛɪsᴛ

صلِّ على الحبيب قلبك يطيب 💙 دكتور اسنان وبيحب يكتب وعنده كام موهبه IG and 👻 :@osama_wael11

[osamawael]

أكثِروا من الصلاة على النبي ﷺ

فيها تُغفَر السيئات ، و تُصرف الهموم و تُقضى الحاجات ، و تنال الشفاعة ، و ترتقي فى أعالي الجنات.

«اللَّهُمَّ صَلِّ وَسَلِّمْ عَلَى نَبِيِّنَا مُحَمَّدٍ» 💙✨

[osamawael]

حابب أقول إن الإنسان بطبعه لما يلاقي شخص يستاهل أو فرصة حقيقية تستحق التمسك، بيقدر يبذل أضعاف مجهوده وهو راضي ومبسوط، وبيحاول مرة واتنين وعشرة من غير ما يحس إن اللي بيعمله حمل أو خسارة، لأن الحاجات القيمة بيهون علشانها التعب.

وعلشان كده عدم تكرار المحاولة مش دايمًا معناه تقصير أو استسلام أو ضعف، بالعكس أوقات بيكون أكبر دليل على النضج. لأن النضج بيخلّي الإنسان يفرّق بين حاجة تستحق إنه يحاول علشانها، وحاجة مهما بذل فيها مش هتتغير ومش هتقدّر اللي بيقدمه.

فيه ناس وفرص بتستحق إنك تتمسك بيها لآخر نفس، وفيه ناس مهما حاولت معاهم هتفضل بتجري لوحدك، ومهما إديتهم من وقت ومشاعر ومجهود مش هيشوفوا قيمة دا. وساعتها التراجع مش هزيمة، وسحب نفسك مش ضعف، وعدم تكرار المحاولة مش تقصير، لكنه وعي إن طاقتك وعمرك ومشاعرك أغلى من إنهم يتصرفوا في المكان الغلط

[osamawael]

ضعف شخصيتك اللي بتخليك تقول حاضر وانت مش قادر

وتدّي وانت محتاج

وتعطف على اللي بيمصّك وبيستغلك

دي مش طيبة أو تدين.. دي بالظبط اللي ربنا سماها {كُلَّ الْبَسْطِ} ونهاك عنها في القرآن.

كلنا عارفين إن ربنا بيحذّر من البخل

﴿وَلَا تَجْعَلْ يَدَكَ مَغْلُولَةً إِلَىٰ عُنُقِكَ﴾

بس عمرك خدت بالك إن نفس الآية

في نفس السطر

بتحذّرك من العكس تماماً؟

﴿وَلَا تَبْسُطْهَا كُلَّ الْبَسْطِ﴾ — يعني متفتحش إيدك على الآخر كمان!

وعارف ليه؟ ربنا قال النتيجة بالحرف:

﴿فَتَقْعُدَ مَلُومًا مَّحْسُورًا﴾

يعني اللي بيدّي كل اللي عنده عشان الناس تحبه وتقدّره.. بيخسر مرتين:

يقعد مفلس ومتبهدل (محسور).. وفوق ده كله الناس تلومه وتزهق منه (ملوم).

أهم حاجة التوازن

ربنا اللي أمرك بالكرم هو نفسه اللي رسملك حدوده عشان يحميك.

[osamawael]

مع الوقت الإنسان بيكتشف إن أقرب العلاقات لقلبه… مش أكتر العلاقات المثالية، لكن أكترها أمانًا.

العِشرة الطويلة، والترابط الحقيقي،

مش معناه إن مفيش خلافات،

ولا إن الناس دي دايمًا متفاهمين ومبسوطين.

بالعكس… أقوى العلاقات العائلية والإنسانية بيعدّي عليها فترات ضغط، سوء فهم، اختلافات، وأوقات كل شخص فيهم بيكون شايل همومه بطريقته.

لكن الفرق الحقيقي،

إنهم رغم كل ده… بيفضل في مساحة رجوع، ومحاولة، وحرص إن الود ما يضيعش بسهولة.

الناس اللي فاهمة العلاقات بعمق

عارفة إن المشاعر وحدها مش كفاية للاستمرار.

الاستمرار محتاج:

صبر،

وعي،

احتواء،

وقدرة إن كل طرف يشوف اللي وراء التصرفات، مش التصرفات بس.

أحيانًا شخص يكون عصبي لأنه مرهق،

ساكت لأنه مضغوط،

أو بعيد شوية لأنه بيحارب حاجة جواه محدش شايفها.

وعشان كده… العلاقات اللي فيها نُضج، مش بتقف عند كل موقف، ولا بتحوّل كل زعل لنهاية.

فيه ناس أول خلاف بسيط يهزّهم،

وفيه ناس فاهمة إن البشر بيتغيروا مع الظروف،

وإن الاحتواء وقت التعب أهم بكتير من الحضور وقت الراحة.

أجمل شعور في العلاقات القريبة،

إن الإنسان يحس إنه مش مضطر يكون كامل طول الوقت عشان يفضل محبوب.

وإن اللي بينه وبين أهله أو ناسه القريبين،

أكبر من لحظة غضب،

وأعمق من موقف عابر.

العلاقات اللي فيها وعي حقيقي… بتكبر بالاحتواء والفهم ، مش بالمثاليه والخداع المظهري الظاهري .

[osamawael]

أكثِروا من الصلاة على النبي ﷺ

فيها تُغفَر السيئات ، و تُصرف الهموم و تُقضى الحاجات ، و تنال الشفاعة ، و ترتقي فى أعالي الجنات.

«اللَّهُمَّ صَلِّ وَسَلِّمْ عَلَى نَبِيِّنَا مُحَمَّدٍ» 💙✨

[osamawael]

عيد مبارك وان شاء الله العيد الجاي احلى عريس

مبارك عيدكم وعساكم من عواده يارب 🌷، اللهم امين يارب، الله يرزقك ويرزقنا كل خير يارب 🤲🏻

[osamawael]

‏{ذَٰلِكَ وَمَن يُعَظِّمْ شَعَائِرَ اللَّهِ}

احتفلو بالعيد وافرحو واعملو جو جميل لنفسكم ‏إظهار الفرحة بالعيد شعيرة من شعائر الله 💙💙

كل سنة وانتوا طيبين وبخير عيد مبارك عليكم كلكم 💙✨

[osamawael]

كل سنه وانتم طيبين عيدكم مبارك 💙✨

[osamawael]

دول كلهم حُجاج، أنت متخيل؟ دي كلها ناس مؤمنة بالله، موحدة لا إله إلا الله، كلهم عندهم دعوات كتير كتير.

عارف إن كل دي ناس ربنا بيستجيب دعواتهم دون أن ينقص من ملكهِ شيء، الحمدلله على نعمة الإسلام.

لبيك اللهم لبيك، لبيك لا شريك لك لبيك.

[osamawael]

الزوجة الصالحة الطيبة فضل ونعمة من الله

من أجمل الدعاء أن تدعى لحد بتحبه إن الله يرزقه زوجة صالحة طيبة أو أن واحده الله يرزقها زوج صالح طيب

اللى بيتزوج و ميلاقيش سعادته مع زوجتة وفي بيته يبقى مش هيلاقيها في مكان تانى

قال أحدهم لزوجته :

لو كنتِ معى ما ضرنى أن أهل البلاد كلهم ضدى

ولو كنتِ ضدى ما نفعنى ان اهل البلاد كلهم معى

كل الكلام الفارغ اللى بتشوفوه في السوشيال ميديا من خناقات و مشاكل وارف ده سببه اختيار على أسس غير سليمه واستعجال ومظاهر كتير وبتبقى المشاكل دى نتيجة حتمية

الله يعينكم على حسن الاختيار ويوفقكم فيه .

د.سامح غازي

[osamawael]

ومن علامات النضج؛ العزلة..

غالبا ما يبتعد الأنقياء عن الصخب والضجيج ..

لا يجلسون في الصفوف الأولى ولا يسعون لإبهار أحد ولا يصيحون في الوديان حتى يسمعهم الناس..

عزلة محمودة.. تقترب من الناس حد المحبة والود ، فإذا شممت رائحة الصخب عدت إلى مأمنك .. تحتسي قهوتك صامتا.. لا أذى، لا عتاب، لا رجوع~

خطوات هادئة، فما من الله به خير وما منعه فهو بلا شك خير ..

من نازعك في شيء تركته له بسلام ..

لا تكثر الشكوى ولا ترى إلا الجميل من خلق الله..

فاللهم يا رب .. قلبا سليما نحيا به ونلقاك عليه يا رب

[osamawael]

في زمن الألعاب النفسية والـ (Mixed Signals) والتقل الكداب، بقى الشخص اللي بيلعب على المكشوف دايماً بيدفع التمن غالي.

لما تكون واضح، بتقول اللي بيضايقك بـ صراحة، وبتعبر عن حبك واهتمامك من غير حسابات وخوف.. فجأة تلاقي وضوحك ده بيترجم على إنه "ضعف" أو "نكد وزن".

الطرف التاني بيستسهل وجودك ويضمن مكانك، ويبدأ يتعامل بـ برود لإنك مبقتش "تحدي" بالنسبة له.

الحقيقة إن الوضوح محتاج شجاعة مبيفهمهاش غير الناس الناضجة بجد. الشخص اللي بيحب الألعاب والغموض هو شخص لسه بيلعب في مرحلة المراهقة النفسية، ومبيعرفش يشيل مسؤولية قلب حقيقي وحجم الصدق اللي بتقدمهوله.

الزتونة:

"متعتذرش أبداً عن صدق مشاعرك ولا عن وضوحك.. اللي يخليك تحس إن طبيعتك وسلاسة تعاملك 'حمل تقيل' عليه، هو ببساطة شخص مبيعرفش يقدر العملة الصعبة اللي في إيده.. قيمتك مابتنقصش بـ إهمال غيرك ليها."

[osamawael]

مينفعش بشكل دائِم تشارك كل أفكارك ورؤيتك وأهدافك مع المحيطين بيك..

اتدرَّب على الصمت، على الهدوء، على الكتمان، زي ما بنقول كده: داري على شمعتك

لا، مش علشان الحسد والجو ده؛ علشان مُعظمنا محاط بأشخاص سلبيين، دماغهم ضيقة، أفكارهم غريبه.. فبتقابل سخرية أو تكسير أو آراء كافية إنها تقلل عزيمتك وتشوش على ذهنك.

لو محتاج نصيحة في أهدافك مهم إنك تختار شخص مناسب واثق من رؤيته وأفكاره، وبعد ما تتلقى كلامه لازم تفلتره جوَّا عقلك، برضوا مينفعش كل حاجة تسمعها منه تقول وراها آمين.

اوعى تشارك رؤيتك وأفكارك مع الشخص الخطأ، حتى ولو كان الشخص ده فرد من أفراد عيلتك.

[osamawael]

إيه هي أقرب طرق الطلاق.....؟

" الجوازة الفاشلة "

1) إنك تحس إن الوقت بيجري منك وعمرك بيكبر ، فتتجوز عشان تلحق

2) إنك تهرب من ضغط أهلك أو مشاكل بيتك، فتتجوز.... وهنا انت بتطلع من نار ل نار اقوى مش هتستحملها.

3) إنك تكون لسه بتعمل موڤ أون من علاقة قديمة أو شخص ومتعافيتش ، والجواز هنا ياصديقي مسكن مفعوله هيروح بعد فترة .

4) إنك تتجوز شخص إنت مش حابه ولا مقتنع بيه، لمجرد إنه "مفيش غيره" فلما تفوق هتندم.

5) إنك تتجوز عشان تثبت حاجة لحد لأهلك او للناس او لنفسك أو لشخص سابك.

6) إنك تدخل الجواز وإنت متخيل إن الطرف التاني هو اللي هيعالج كسرك ويملأ فراغك.

7) إنك متكلمتش قبل الجواز عن مبادئك ، وحدودك، وقوانينكم ، والخِلفة.

8) إنك فاكر إن الجواز حب ، وقضيت الخطوبة حب ومفهمتش انه محتاج نضج، ومسؤولية، وشغل يومي.

9) إنك تتجوز وإنت مش عارف إنت محتاج إيه أصلاً ولا عارف إنت مين.

10) إنك تختار شريك حياة بعقلك بس، أو بقلبك بس.

[osamawael]

هقولك على صدمة قرآنية هتنسف مفهومك القديم عن الصبر

القرآن سمى البقاء في مكان بيستنزفك وبيسلبك قيمتك (ظلم للنفس)

الملايكة لما بتيجي تقبض أرواح الناس اللي استسلمت للإهانة مابتقولهمش برافو انكم صبرتوا واستحملتوا

الملايكة بتوبخهم بشدة وتقولهم ﴿أَلَمْ تَكُنْ أَرْضُ اللَّهِ وَاسِعَةً فَتُهَاجِرُوا فِيهَا﴾ !

سيدنا النبي ﷺ كان بيعشق مكة.. دي بلده وحتة من روحه

بس لما مكة رفضت تديله قدره وضيقت عليه

سابها وهاجر لمكان تاني شاله فوق الراس واداله مكانته الحقيقية.

الهجرة مش بس سفر من بلد لبلد

الهجرة كمان انك تهاجر من اي وظيفة بتستعبدك وتهاجر من اي علاقة بتستنزفك وتهاجر من اي شلة مش شايفاك كبير

اوعى ترضى بالفتات باسم الصبر

إلا لو عاجز بقى دي حاجة تانية وربنا يعينك

المؤمن عزيز والمكان اللي مايسيعكش وانت رافع راسك ومتقدر.. سيبه وامشي.. أرض الله واسعة.

[osamawael]

حَدّ هيفكَّرك إنّك تقدَر، فتقدَر

وحَدّ هيفكَّرك إنّ قلبَك طيّب، فتِغفَر وتسامح

وحَدّ هيفكَّرك إنّك مش وحِش زيّ ما انت شايف نفسَك، فتِتحسّن!

وبعدين حَدّ هيفكَّرك إن ليك هالة من نور بتنوّر قلوب ناس كتير بشغلَك، فتِزيد وتِستزيد!

ما شُفتش جمال ولا طِيبَة ولا حُسن ولا نَفع ولا إحسان ولا بِرّ، إلا ولقيت معنى قول ربنا سبحانه وتعالى: ﴿وَقُولُوا لِلنَّاسِ حُسْنًا﴾ ؛ فبيتحسّنوا.

[osamawael]

واستَقْبَلَتْ قَمَرَ السّماءِ بوَجْهِها • فأرَتْنيَ القَمَرَينِ في وقْتٍ مَعَا!

فَتَحيَّرَتْ عَيْنِي أَيُبْصِرُ بَدْرَهَا، أَمْ بَدْرَ سَمَاءٍ في العُلا قد سَطَعَا؟

فإذا الجمالُ إذا تَجَلّى مرّةً، جَمَعَ الضِّياءَينِ وأبْهَرَ ما رَأَى

[osamawael]

أكتر شخصية بتخطف العين وتجبرك تحترمها.. هي شخصية الإنسان "الحُر" اللي مابيمشيش ورا القطيع!

ده الشخص اللي مابيستناش نظرة رضا وموافقة من حد على كلمة هو مؤمن بيها، ولسانه مابيتلجلجش وهو بيدافع عن مظلوم، حتى لو هيقف لوحده قصاد طوفان وأغلبية صعب تعاديها.. ومابيفرقش معاه خالص لو الناس قاطعوه أو بعدوا عنه.

الخلاصة.. تمن "كلمة الحق" غالي وتقيل جداً، ومابيقدرش يشيله ويدفعه إلا إنسان مبادئه ثابتة وجذوره راسخة ماتتهزش!