Shanktarjei prakshalana @shanktarjei - Tumblr Blog

Shank IV: Dag 7

I dag tidleg merka eg faktisk litt av det der med å vera lettare i kroppen. Det er til vanleg ikkje svært tungt å stå opp for min del, men merka at eg var litt meir utkvilt og fit for fight i dag tidleg enn eg pleier. Ikkje verst.

Vi et nokonlunde normalt sjølv om vi heldt oss veganarar. Litt salt og krydder i maten har vi og, så maten er god. Vekta ligg stabilt mellom 72 og 73 kilo. Konemor er mykje mindre stiv i kroppen og søv litt bedre.

Bønnetaco på fredag, curry med grønsaker på laurdag, rester på sundag. Det var og morsdag på sundag og då laga eg vegan sjokoladefudge etter oppskrifta her: http://jonsiandalex.com/recipes . Den falt godt i smak, bortsett frå hjå Aurora på 5 år. Vi lurar på å gå vegan ut perioden, det er jo noko nytt å prøve.

Shank IV: Dag 6

Dagane går som vanleg. Havregraut til frukost, havregraut eller middagsrestar til lunch. Vi har brukt lauk, kvitlauk og litt chili i maten frå dag 1, noko som gjer at maten er tilnærma normal, men utan salt og andre krydder. I går var det taco, eg hadde litt salt og spisskummen i bønnestuinga. Dei grove taco-lefsene hadde litt druesukker i seg, men det var ellers rein vegan utan ost og rømme. Merkar ikkje noko forskjell i kroppen, bortsett frå at eg søv litt betre. Konemor sleit med hovudpine eit par dagar, men ho kjenner svært godt at ho er mindre stiv i kroppen, som ho pleier. Vi reknar med at det er meieriprodukt som fører til at ho vert stiv. Men kan koffein verke inn og? Vi testar. Ellers er vekta 72.7. Vi lurar litt på kva slags kaker vi kan lage til morsdag i morgon.

Shank IV: Fauxshank

Årets variant er svært lite hardcore. Starta i går, utan tarmskyllingsritualet. Denne gongen går vi veganar, iallefall ei veke, og kuttar koffein, alkohol og sukker. Vi ventar til etter første veke med rå frukt og grønsaker, sjølv om poenget med å halde seg vekke frå det strengt tatt er å skåne den nyrensa tarmen.

Men, det er uansett mat som er lett fordøyeleg. For min kone sin del er det å kutte ut melk som er målet, iallefall denne månaden, ettersom ho merkar at ho vert stiv i ledda av meieriprodukt. For min eigen del håpar eg på ein liten rens, samt at vi finn fram til fleire gode vegetar-rettar. Ei utfordring med å legge om kosthaldet er å finne nye matvanar, og det bryt litt opp med den vanlege "pølse og potet" og "kjøttdeig og tomat" rutinen i kvardagen. Det likar eg.

Eg hadde skallebank i går ettermiddag, etter sist shank har eg vorte ein stordrikkar av te, mon tru om det faktisk var koffein-mangel som gjorde det? Eg åt berre to små skåler havregryn før middag, det kan jo ha noko med det å gjere. Kona mi drikk litt kaffi til vanleg, så ho merka godt hovudpinen i går kveld/natt. Trur det gjer seg etter eit par dagar.

Eg veg meg jo som ein slags indikator på effekt av shanken, i mangel av noko bedre. Før eg starta vog eg 74.4 kg, i dag tidleg var det 73.7. Det kan godt vera tilfeldig variasjon.

Etter planen er det tilbake til kjøtt og alkohol 1. mars.

Shank III, dag 9

Dei første ti dagane, med kokte grønsaker, ingen krydder, ikkje frukt - det er jo litt triste greier. Det er ikkje så lett å vera entusiastisk for kostholdet. Bortsett frå havregrauten, som er ein god start på dagen.

Det er viktig å variere, og det er jo ei større utfordring når råvarene og tilbredingsmetodane er begrensa. Uansett, det vi har fått til å smake litt, og som representerer matglede oppi det heile, er ovnsbakte grønsaker med mykje olje. Typisk potet, søtpotet, blomkål, ingefær, hermetiske og soltørka tomater, og urter. Av urter er persille, koriander, basilikum og ulike typer blad gjengangarar. Og net! Cashew og Makadamia, rå, det fins iallefall på innvandrarbutikkar og har ein del smak. Som sagt tidlegare; det er mogeleg at dette ikkje er "hardcore", men det er iallefall ukrydra og utan salt.

På laurdag hadde vi pizza, ein tomatsaus med mykje olivenolje og urter som grunnlag, og ferske og soltørka tomater, oliven og mais oppå der igjen før vi steikte pizzaen i ovnen. Ganske godt faktisk! Pizzabunn var heimelaga, svært tynn og laga med lyst mel.

Vi fekk tips om ei tørka urte/krydder som har mange navn, mellom anna hing og Devil's Dung (!). Det er tilgjengeleg i innvandrar-butikkar, og har ein litt salt/løkaktig smak. Det kan visstnok gå inn i dietten dei 10 første dagane. Vi brukte ikkje mykje, men eg trur vi kjenner smaken. Denne kjøpte vi på innvandrarbutikken ved vektertorget.

Men no gler vi oss til ost, frukt, salt og lauk! På onsdag ber det avgårde til thai-restaurant.

(Under: Hing)

Shank III: dag 3

Dei andre gongane har eg hatt "dagen derpå" med skallebank og uggen form. Det slapp eg heldigvis denne gongen. Var på kino, åt popkorn utan salt laga med olivenolje. Er i fin form. Havregrauten smakar heilt ok. I denne matbloggens ånd kjem her middag for dag 2 og 3. Dag 2: 1 selleristang 3 gulrøter 1 søt paprika 1/2 squash Dampast Bland selleri, gulrøter og paprika med 2 boksar tomat Kok saman, og bland med stavmiksar Ta squash oppi, server med pastaskruer Dag 3: 1 selleristang (mykje salt i den!) 4 gulrøter Litt ingefær 1 stor potet 1 søtpotet Vatn/kraft Persille Koriander Kok grønsakene. Når dei er kokt, køyr på med stavmiksar. Tynn ut til passelig konsistens. Smak til med persille og koriander, server med grov makaroni.

Shank III

Årets shank er i gong! Heimeshank denne gongen. Advarsel: shank aldri heime utan at du veit kva du driv på med. Eg er trygg på kva som skal skje, og har nokon å ringe til dersom noko skulle gå galt. Når det er sagt, det var avslappande å ta det heime i eige tempo. Sjølve spylinga gjekk fint, har sett av resten av dagen til avslapping. Vi er innstilte på å ta dette årlig, problemet er å finne ein månad som er rimeleg roleg mht fest og moro. Shanken vert for min del 30 dagar denne gongen, skal til Texas om ein månad, og det er så mykje god taco og barbecue! Oppdaterer sporadisk.

Endelig. Bacon. (Taken with instagram)

Dag 31: Effektane visar seg, og vi nærmar oss slutten.

Dagane går no med veggismat, eg manglar egentlig ingenting. I går hadde vi taco, og vi tok utgangspunkt i denne oppskrifta for salsa, og denne oppskrifta for refried beans. Med alt snakket om pink slime i kjøttprodukter i det siste ville vi egentlig foretrekke bønner i tacoen framfor kjøttdeig. Og heimelaga salsa er mykje friskare og bedre enn salsa på glas.

Min kone merkar godt kuren. Ho er mindre stiv i kroppen, og vi trur det kan ha noko med at ho ikkje toler så godt meieriprodukter, ho søv bedre om natta, har mindre vondt i hovudet, og har fått reinare, mjukare hud. Ikkje verst! Det ser ut som om vi kan ta ein shank så ofte som ein gong i året framover.

Etter eit par dagar med veggismat gjekk og vekta mi ned igjen, i går målte eg all-time-low med 69.2 kg. Det einaste eg trener er yoga eit par gonger i veka og dei 5 tibetanske ritene kvar dag.

Ellers kom eg over ei kokebok som vokalisten i Sigur Ros har laga saman med kjæresten. Det er kun "raw food" (rå veganarmat faktisk), eit par at tinga såg gode ut, så dei har vi tenkt å teste. Frå denne boka skal vi lage denne jordbærpaien til eit besøk i morgon, i tillegg til desse små gulrotkakene som eg og laga under forrige shank.

Siste dag vert 16 mai, og på sjølvaste 17 startar vi med retox!

#findag! (Taken with Instagram at Galmannsgaten)

#findag

Dag 18: Litt oppsummering

Livet går sin vante gang. Er jo framleis litt lettare i kroppen, men det vert ein vane. Eg merkar ikkje nokon andre effektar. Men, konemor har funne ut at ho muligens ikkje skal bruke så mykje meieriprodukter, så det er noko positivt som har kome ut av shanken denne gongen.

Vekta er kome opp i over 72 kg igjen, så då var det ikkje noko gøy å vege seg lenger.

Det er mykje bra veggismat. Vi har hatt falafel, både ute, og har laga det sjølv etter denne oppskrifta: My favourite Falafel. Vi har ikkje knekt koden for god saus enno, men resten er lett å få til. I går fekk vi ein god veggis-curry på SamrabThai: Gaeng Massaman (nr 71), og på sundag fekk vi ei god Squash-suppe med krema dill på Bastant. Begge plassar kan anbefalast både til vegetar og "normal" mat.

Ein annan postiv ting med shanken er at vi må prøve nye middagar ettersom vi ikkje et så mykje vegetar til vanleg. I dag hadde vi gulrot og koriandersuppe, som var ein stor suksess!

Frisk gulrot og koriander-suppe:

Smør og rapsolje til steiking

450 gulrot

1 potet

1 lauk

3-4 fedd kvitlauk

2-3 cm ingefær

1 selleristang

1 ts korianderpulver

1,2 liter vatn

Salt og pepper etter smak

Fersk koriander

Steik lauk og kvitlauk blankt. Tilsett poteter i terningar saman med finhakk ingefær og korianderpulver. La det surre eitt minutt. Tilset vatn og resten av grønsakene, kok til det er mørt. Bland saman med stavmiksar. Smak til med salt og pepper. Kok opp på nytt, tilsett fersk koriander.

Vegetar-bolognese

1 lauk

2-3 fedd kvitlauk

2 gulrøter

1 stangselleri

1 boks tomater

2 ferske tomater

(Fersk) oregano

(Fersk) basilikum

Raps el olivenolje til steiking

Salt og pepper

Steik lauk og kvitlauk blankt. Tilsett finhakka gulrøter og selleri. Tilsett boksetomatar og ferske tomatar i terningar. Kok til alt er mørt. Smak til med salt, pepper og krydder. Bruk stavmiksar litt forsiktig, men ikkje lag puré. Server med kokt pasta.

Digg!

Dag 12: Stort sett ein matblogg

Til middag hadde vi denne chilien: Insanely Easy Vegetarian Chili

Ellers bra.

Vekt 70.1

Dag 11: Yes!

Til frukost: to heimelaga brødskjever med bruost, og ferskpressa appelsinjuice. Det samme til lunch, og til middag: Indisk på Arti! Papadums med litt saus: knall! Samosa: knall! Nanbrød med kvitlauk: Knall! Paneer Makhini: ok, kunne vore litt meir smak (!), og litt rart med osteterningar. Uansett, deilig å gå over til vegetarianar!

Planen er å planlegge litt middagar framover, blant anna frå denne kokeboka: Gourmet Vegetarian.

Vekt: 70.4

Dag 10: Siste veganardag!

Ting er ganske normalt, vi lagde ovnsbakte grønsaker igjen for å feire. Gler oss til brød med smør og ost!

Vekt: 70.8.

Dag 9: Det "verste" er snart over.

I går handla vi på Rema 1000. Det slo meg som noko absurd at ca 80% av arealet i butikken inneholdt varer eg ikkje kunne ete. I dag prøvde vi å lage klar grønsakssuppe, men grønsakssuppe utan salt, kraft, løk eller krydder er ikkje å anbefale, sjølv kor gode råvarene er. Vi trøsta oss med usalta popcorn til kvelds.

Vekta er status quo: 71.2 kg.

Det slo meg forresten no at eg muligens vert nøydd til å dokumentere at eg vert tjukk igjen i løpet av resten av kuren. Hm, det hadde eg ikkje tenkt på.

Grønsakssuppe (Taken with instagram)

Dag 8: Bra!

Enten er vi vant med maten no, ellers er vi vant til mat utan for mykje salt og krydderier. Havregraut til frukost, pasta frå i går til lunch og knallgode bakte grønsaker til middag. Middagen smakte like godt som ein vanleg middag. Fin form på begge to, lett og fin i kroppen.

Vekt i dag: 71.2.

Ovnsbakte grønsaker:

1 stor søtpotet

3-4 poteter

1 boks tomater

2 ferske tomater

1/2 blomkål

God bit med ingefær

3 soltørka tomater

God olivenolje med basilikum

Fersk timian

Fersk bladpersille

Skjær grønsakene i terningar, finhakk soltørka tomater. Lag remser med ingefær med ein ostehøvel e.l. Ha alle ingrediensene utanom bladpersillen i ei eldfast form, la stå i ovnen i ca 20 min på 175 grader. Ta på bladpersille rett før servering. Server evt med brød.

p.s. det er svært mange ulike variantar av diett etter saltvants-skyllinga, og vi køyrer ein ganske hardcore diett. Mulig at ovnsbaking er litt utafor den dietten, men dette er iallefall veganar og utan salt og krydder!

Trending Blogs

Recently Viewed Blogs

Shanktarjei prakshalana