I'll see you in my sleep @so-many-sleepless-nights - Tumblr Blog

როცა ადამიანი შენი ცხოვრებიდან მიდის, თავისი თავის გარდა კიდევ ბევრ რამეს გართმევს. მიაქვს სიმღერები, რომლებსაც ვეღარასდროს მოუსმენ. მიაქვს წიგნები, რომლებსაც ვეღარასდროს გადაშლი. მიაქვს სურნელები, რომლებსაც ვეღარასდროს შეიგრძნობ ადრინდელივით. გართმევს ადგილებს, რომლებიც აღარასდროს იქნება მარტო შენი, თუმცაღა ახლა უკვე მართლა მარტო შენია, მაგრამ ჩვენადყოფილი. ყველა მოგონებას სევდის თალხი გადაეკვრება და ვეღარასდროს იქნები იგივე ადამიანი. მიაქვს შენი ვნებიანი თვალებიც და დადიხარ ასე, ნახევარქალი და შეღებილი თვალებით ცდილობ გაიმრთელო საკუთარი ქალობა. არადა, კარგად იცი, რომ სიყვარულზე კარგი მაკიაჟი არ არსებობს. ადამიანებს მის ცხოვრებაში მოსული ადამიანები კიარა- მისი ცხოვრებიდან წასული ადამიანები ცვლიან. დგახარ, უყურებ ზურგს და ხედავ, როგორ მიაგორებს ზურგსუკან გამოწვდილი ხელი საერთო მოგონებებით, საერთო სურნელებით, ერთად წაკითხული წიგნებით, დაბადების დღეებით, ცრემლებით, სიცილებით, საერთო გათენებული ღამეებითა და დაღამებული დღეებით სავსე ურიკას. და შენ ვეღარასდროს მოუსმენ თქვენი სიყვარულის და ურთიერთობის საუნდტრეკებს ლაღი ემოციებით. დილით გაკეთებულ ყავას აღარ ექნება ისეთი მძაფრი სურნელი….. და შემდეგ, გავა დრო და დაუბრუნდება შენს თვალებს ვნება… და შემდეგ, გავა დრო და ისევ გაუმძაფრდება ყავას გემოც, სურნელიც და სიტკბოც. და შემდეგ, იმ ადგილებთან ჩაივლი გულისფანცქალის გარეშე. და შემდეგ ჩაირთავ „იმ“ მუსიკას და დატკბები. და შენ მიხვდები, რომ წაღებულ ურიკასთან ერთად მან შენი ტკივილის ნაწილიც წაიღო. შებოჭილობის და არასრულფასოვანი სიყვარულის ტკივილის. ბედნიერებასთან ერთად ისტერიკებიც წაიღო, ეჭვიანობაც, კომპლექსებიც, ტირილიც… და სიყვარულის ადგილას სიძულვილი კიარა-სიცარიელე დაგრჩება. და შენ დაიწყებ სიცარიელეების შევსებას. ახალი წასართმევი მუსიკებით. ახალი წასართმევი წიგნებით. ახალი ჩასაქრობი ვნებებით. ახალი წასართმევი ადგილებით. და შენ დაიწყებ ახალ ცხოვრებას. ახალ წ ა ს ა რ თ მ ე ვ ცხოვრებას