mahal, alam mo bang habang ako’y nakikinig ng musika
ay lalong nagdurugo ang mga salita sa sinusulat na tula?
mahal, alam mo bang habang dumarami ang naiinom na alak
ay lalong bumibigat ang mga luhang pumapatak?
mahal, alam mo bang sa tuwing ako’y pumipikit
ay lalong kumikirot ang sakit?
mahal, alam mo bang sa tuwing paglalim ng gabi
ay lalong naaalala ang mga pangakong iyong isinantabi?
mahal, ang sakit marinig na handa mo akong i-isantabi
para lang magawa ang mga bisyo mo para sa isang gabi
mahal, ang sakit isiping ang bisyo mo’y hindi mo kayang bitawan
pero ako mahal, ako, kaya mo akong iwanan
pero mahal, ako, hindi kita isusuko
pipiliting intindihin kahit minsan nakakabobo
pipiliting kumapit kahit minsan nagiging malabo
pipiliting manatili kahit minsan nakakapanlumo
kasi mahal, ako, mahal na mahal kita
kahit minsan ang sakit sakit na.
