Sa mga milabay nga tuig, basta panahon na gali sa Semana Santa manguli jud ang pamilya sa Dalaguete o sa Surigao aron didto ipahigayon ang masub-anon ug malipayong semana. Apan karong tuiga, naa ra kami sa syudad sa Cebu kay miabot man ang akong iyaan gikan sa gawas nga unom na katuig wala nakabalik diri ug akong ig-agaw nga nag trabaho sa barko. Nakadesisyon ang pamilya nga ihatag ning higayon para makalingaw ug maka catch-up mi sa usag usa.
Ato pang miaging semana naabot akong ig-agaw, apan akong iyaan adtong Martes sa kadlawn ra naabot maong ang panagtigom sa tibuok banay (kauban ang apohan, iyaan ug uyoan, mga ig-agaw, ug uban pang kaparentihan) nahitabo pagkagabee niana. Gipahigayon namo ang "Welcome back party" sa Seafood Island sa Ayala. Astang pagkalingawa makakita ug makapaghinabi nila human sa pila ka buwan namong wala magkatapok. Puro bahakhak ug mga storya kabahin sa mga nahitabo sa kinabuhi ang among gistoryaan. Nalingaw sab ko nakighinabi sa akong mga ig-agaw kabahin sa ilang trabaho ug among pag skwela, sa among mga maoy ug mga lovelife, ug sa mga nahitabo sa amo sa mga adlaw nga wa kami nagkita. Malipayon kaayo ko atong tungora kay panagsa ra ni mahitabo sa usa ka tuig. Nahisgot ko na ba nga hapit 40 nami tanan sa tibuok pamilya gikan sa akong apohan padong namo? Hinuon, 13 man sab ka managsuon silang mama maong nin ani sad kadako among pamilya.
Sa mga misunod nga adlaw among gigahin among oras para maka pag Visita Iglesia, Station of the Cross, ug makakumpisal kaming tanan. Wala nawala ang pagtapok sa tibuok banay kada panihapon ana.
Pag abot sa adlawng Sabado, among gisaulog ang ika 76 nga adlawng natawhan sa among apohan adto sa RedBox Ayala. Wala hibaw-e milabay napod ang usa katuig sa kinabuhi ni lola nga siya himsog pa. Adunay gamayng programa ang gipahigayon nga gipangulohan sa akong iyaan. Lingaw kaayo tong adlawa, ang akong inahan ug mga iyaan nalingaw ug videoke. Akong papa kauban akong mga uyoan nalingaw ug duwa sa billiards kay adunay may billiaran sulod sa room nga giabangan. Ang mga bata kay nalingaw ug himo ug pag disenyo sa ilang mga crafts. Samtang kami nga mga batan-on ug mga ig-agaw nalingaw ug istorya. Nahimuot jud ako nga sa sge namog kuyog sa miaging adlaw wala gyud mi nahutdan ug storya. Lami pod ang mga pagkaon nga gihanda ug lipay kaayo ko kay naa akong paborito nga sisig ug fries. Og dili jud mawagtang ang ilimnon basta magtapok ang pamilya. Oo, mga palainom jud mi. Matod pa gali sa akong apohan, "nganong di man mo moinom? hala panginom mo kay mao nay nakapataas sa akong kinabuhi." Mo di pa ba mi nga mao man sad ni among ampay. Puro katawa ug mga malipayon ug tam-is nga pahiyom akong nadungog ug nakita atong tungora.
Pagka Dominggo niana, among gisaulog ang Adlaw sa Pagkabanhaw pinaagi sa pagtapok sa Co Jordan sa Consolacion para mamingwit ug magdungan kaming tanan ug paniudto. Masigarbohan kaayo akong pamati ato nga grabi ka family oriented sa akong pamilya.
Nakapamalandong ko, siaw, kiat, ug mga palainom man sguro ang tan-aw sa uban namo pero ang gugma nga among gikuptan para sa usa'g-usa di matugkad. Mapasalamaton kaayo kos Ginoo sa niining hilabihan nga grasya. Dili man tuod mi dato sa kwarta, pero dato mi sa gugma sa pamilya.
