Hinaing
Lyrics by: Ma. Fe V. Buban & Chin Chin C. Dumaycos
Music by: Chin Chin C. Dumaycos and Angela T. Pasigon
Intro:
Hanggang kailan ang hinaing,
Hanggang kailan…
Verse 1:
Ako’y isang dukha, sa buhay ay salat,
Araw-araw kumakayod sa gabutil na pagkain.
Gabi-gabi’y iisa’ng dalangin,
Hanggang kailan ganito?
Nasa’n ka… o hustisya?
Verse 2:
Kami’y batang paslit, alipin ng kahirapan,
Sa bawat hagupit, kami’y tumatangis.
Sa halip laruan aming ligaya,
Sa mapanlupig kami’y biyaya.
Nasa’n na… ang hustisya?
CHORUS:
Hustisya, ikaw ba’y ginto?
‘Di makamit, ‘di makuha.
Kahit saan mata’y ibaling,
Hustisya’y kay ilap.
Hanggang kailan ang hinaing?
Hanggang kailan…
Verse 3:
Walang malapitan kundi ang Panginoon,
Pusong nagmamakaawa, matang lumuluha.
Dinggin O bayan, aming hinaing,
Marubdob na pagtangis
Ng iyong… inang bayan. (REPEAT CHORUS 2x)
Ending:
Hanggang kailan. (2x)
