Takot
Sa palagay ko, takot ang salitang puwede kong gamitin para mailarawan ang araw ko ngayon. Iba’t ibang klase nang takot ang naranasan ko ngayon araw.
Una, natakot ako para sa kaibigan kong may pinagdadaanan. Natakot ako dahil may tiwala siya sa’kin. Natakot ako dahil alam kong kailangan niya ng kausap pero hindi ko alam kung anong sasabihin ko. Takot na takot ako na baka may masabi akong mali; na baka may masabi akong magdadala sa kanya ng mas maraming lungkot o dusa. Marahil, isa na ‘to sa pinaka-kinatatakutan ko.
Ang sunod na kinatakutan ko ngayon araw ay ang hindi pag paalam sa mga magulang ko na hindi lang isang kaibigan ko ang pupunta sa’min, kung ‘di dalawa. Natakot akong baka magalit sila sa’kin tulad ng pagkagalit at inis nila sa kuya ko tuwing ginagawa niya ito. Alam ko namang kasalanan ko naman talaga yun kung nangyari man yun pero hindi ko pa rin maiwawalang bahala ito. Mahirap siyang hindi pansinin. takot na takot ako sa galit ng mga magulang ko. Isa pa, kailangan kong maging yung mas mabait at mas masunurin sa’ming magkakapatid para sa rin sa ikabubuti namin.
Kanikanina lang ay natakot ulit ako. Ito na ata ang pinakamababaw na rason ko kung bakit takot na takot ako ngayon araw na ‘to. At hindi lang ito takot, may halong… Kilig rin ito… Hindi ko talaga maintindihan ang aking sarili minsan. Ang tanging ginawa ko lang naman noon ay nagtanong nang ilang bagay sa guro ko. Yun lang. Hindi naman dapat kinakatakutan, di ba? Pero hindi eh. Takot na takot pa rin ako. Inakala kong may masasabi akong mali. Palagi, tuwing kinakausap ko yun guro kong yun, takot na takot ako sa kung ano man ang sasabihin o iisipin niya tungkol sa’kin. Parati na lang akong takot…
Saan nga ba patungo ang post na ‘to? Ako, di ko alam. Isa lang ‘tong pangkaraniwang post na nagkukuwento tungkol sa mga pangkaraniwan kong kinatatakutan sa isang medyo pangkaraniwang araw. Hindi naman siguro masamang magbahagi lang, di ba? Pero hindi lang naman ito ang mga kinakatakutan ko; marami pa sila. Ito pa lang siguro yung unang bahagi nang mahabang listahan ng aking mga kinatatakutan pero madadagdagan pa ‘to… Sigurado ako…
-----------------------------------------------------------------------------------------
Lulay [si-lulay-na-nalilito.tumblr.com] 2013-01-28 08:31