افشخ نفسك عشان تستريح بعد الاربعين
مره و انا صغير كنت ماسك ايد ماما و ماشيين في الشارع و قابلنا بيت جديد بيتبنى و عمال رايحه و عمال جايه, فسألت ماما "هو ليه العمال اشتغلوا عمال, دي شغلانه متعبة جداَ؟!" , ردت عليا و قالت "عشان مكانوش بيذاكروا و هم صغيرين و كانوا بيلعبوا كتير" و قامت بصالي و قالت "اللي بيتعب و هو صغير بيستريح و هو كبير و العكس". كلامها علق معايا قوي و دنتني اذاكر لحد اعدادي و كانت درجاتي في المدرسة احسن من ناس كتير اوي, لحد ما عرفت ان كلام بابا و ماما مش دايماً صح, و ان كل الناس تعبانه اياً كانت شطارتهم, و ان اللي بيذاكر كتير مش دايماً بينجح في حياته, و ان اللي مبيذاكرش مش دايماً بيكون فاشل في حياته.
Kanye west قال مره :
CHASE THE GOOD LIFE MY WHOLE LIFE LONG
LOOK BACK ON MY LIFE AND MY LIFE GONE
بمعني انه كان طول حياته بيجري ورا الشهرة و الفلوس و النجاح و الحياة الحلوة المريحة, بس لما هييجي يبص على حياته هيلاقيها كلها شغل و مذاكرة و انه مستمتعش بيها عشان يوصل لمكانته اللي هو فيها.
ناس كتير ماشيه بالمنطق ده (افشخ نفسك عشان تستريح بعد الاربعين) غير مدركين انك هتتفشخ و مش هتستريح برضو, هتضيع شبابك في المذاكرة و الشغل (و مبقولش ان دول حاجات وحشة) بس لما تيجي تفتكر ذكرياتك ايام الشباب هتلاقي انك معملتش فيه اي حاجه غير الشغل عشان راحة وهمية في المستقبل.
لكن في نفس الوقت المذاكرة و بذل المجهود شيئ لا بد منه عشان ترتقي بنفسك و تحقق احلامك اياً كانت, لكن اعرف ان الراحة مش هتلاقيها غير لما تموت.