#sininghaga

[jakepullsthetrigger]

Nagsimula nang humuni ang mga kuliglig. Tila isang koro ng karagatang umaalpas sa aplaya, lumulukso sa baybayin at humahagikgik kasabay ang mga puno dito sa kabundukan. May lamig at lumbay ang pag-iisa. May pagkandiling bitbit ang paglubog ng araw ngunit naglalaho rin ang init.

Naglalaho rin ang init. 

May espasyo pa rin sa sulok ng isipan na naghihintay na mapunan. Umuugong ang katahimikan na kumakalas sa harana ng gabi. Nangungulila pa rin ako sa hindi matukoy, sa hindi mawari. Tila hangin na umaalpas mula sa mga daliri ang ulirat at ngayon, sinusubukan kong tiisin ang kati ng pagkabalisang kumukutkot sa anit.

Mahirap bigyang kahulugan ang ganitong pakiramdam. Tila hindi maipinta o maitala sa kuwaderno. Kulang ang mga titik at talata upang tukuyin, at sukatin, ang estrangherong espasyong ito na sinusubukan kong kilalanin. 

Tila ba may sikretong pagbayle ang mga anino sa sulok ng isipan, alinsunod sa hindi mawaring pag-indak ng kamalayan. May awit na hindi matiyak. May pagkislot na hindi masulyapan. 

Mailap ngang tunay ang mga nagliliparang mga dalangin. Nalulusaw ang oras kasabay ng pag-aninag sa kalangitan. Wala nang patumpik-tumpik, magsisimula na ang paghudyat sa pagwawakas.

At sa gabing iyon, tumigil ang gilingan ng laman. kumalma ang mga umaalulong na ulol, may banayad na pamamaalam sa paghalik ng hangin.

- Kung saan ang mga kuliglig ay malaya 6.24.2020

[jakepullsthetrigger]

Unang bugso ng ulan sa buwan ng Hunyo, nangangati ang balat ko sa mga yakap mo, tila naghahanap ng kumot sa limlim ng iyong init, pipika-pikang bumbilya, saksi sa lumalamig na kama, lukot-lukot pa rin ang kamiseta, katulad ng gulo-gulong buhok amoy ng lotion at murang pabango pawis, at laway, at tag-init na dahandahang naglalaho, tulad ng mga salita, letra, na nilalamon ng gabi, ng pag-iisa habang nakikinig sa musikang hatid ng bawat halik, bawat tilamsik, sabik na sabik na muling mahagkan ng bubong ang langit. -Unang Ulan ng Hunyo; Zakk Habitan

[jakepullsthetrigger]

Siyang hindi madalas ay siyang marikit

Tulad ng alitaptap na nagniningas sa dilim ng gabi, pasulyap sulyap na alab, nagtatago sa naghahanap;

Siyang hindi madalas,

Kislot sa himpapawid na bumubulong, dagitab sa espasyong binibigyan ng ngalan, kulog, kidlat, sa katahimika'y bumabasag, halik ng hangin, hikbi ng langit sa tigang na lupa na nananalangin;

Ay siyang pinakamarikit,

Dampi ng alon na siyang yumayakap sa dalampasigan, tawagin mong baybayin, tawagin mong aplaya, ngunit ni kailanma'y hindi magagapos ang unos, tila mga musmos, na nagpapaagos sa karagatang sumasalamin sa tinatawag na langit.

Siyang hindi madalas Ay siyang pinakamarikit

Rumaragasang ilog ng mga estrangherong ligalig sa lungsod, harurot ng mga sasakyang pumapalit sa bituin, alingawngaw ng busina, halakhak at pangungusap, sa pagguhit sa kalawakan, binubulong ang hiling

Sana'y makauwi na magpayakap sa'yong karagatan, pahupain ang unos, balangkasin kung paano nagsasalo ang alab at kislot, sapagkat sa kahubdan ng mundo, ako'y sumusuko sa nakaambang delubyo.

Sapagkag siyang hindi madalas ay siyang pinakamarikit.

[jakepullsthetrigger]

X: Ang tagal na rin pala, no?

Y: Oo, 10 years.

X: Bakit tayo tumagal ng ganoon katagal?

Y: Hindi ko alam.

X: Sa 10 years na iyon, ilang years tayong hindi nagkita?

Y: 9 years.

X: Na-miss mo naman ba?

Y: Ang alin?

X: Ako.

Y: Hindi.

X: Ows.

Y: Hindi nga.

X: E ang ano ko.

Y: Fuck buddy lang ba talaga ang tingin mo sa akin?

X: Hindi.

Y: E bakit bigla ka nalang umalis noong sawa ka na?

X: Hindi naman ako nagsawa.

Y: E bakit ka umalis.

X: Nakahanap ako ng iba.

Y: Iba, na akala mo mamahalin ka?

X: Na hindi lang hanggang fuck buddy kami.

Y: So, sa tingin mo, hanggang fuck buddy lang tayo?

X: Kung iisipin mo, oo.

Y: Sabagay.

X: Hindi naman tayo ganito dati.

Y: Na ano? Na tinatanong natin sa isa't isa kung saan tayo lulugar?

X: Kasi alam natin noon.

Y: Kasi, mas masakit malaman noon.

X: Hindi ka kasi nagtanong.

Y: Hindi ka rin nagtanong. Para saan pa ang sagot.

X: Minahal kita.

Y: Alam ko. Pero nawala ka.

X: Ang huling usap natin, umiiyak ka. Aalis ka na rin pala.

Y: I could have stayed.

X: Huli na ang lahat.

Y: Hindi mo lang naririnig. Hindi mo lang nararamdaman.

X: Na ano, you are willing to stay for me?

Y: Na you have chosen someone na akala mo ay mamahalin ka ng totoo despite the fact that I have always been there. More than a fuck buddy. More than fucks. More than our midnight escapades.

X: Tama ka. We could have been more than bed weight.

Y: 10 years. Ang tagal.

X: May chance pa ba?

Y: Ayaw ko na.

X: We could make it right this time.

Y: Listen, nagbabago ang lahat.

X: Kahit ang nararamdaman?

Y: Hindi. Pero kung paano pinatutunguan ang nararamdaman, oo.

X: Ang tanga ko rin kasi noon.

Y: Dito tayo unang nagkakilala no?

X: Hindi ko alam na pwede palang ipaglaban ang tayo.

Y: For 10 years, parati ko pa ring tinitingnan ang Facebook mo. Nagtatanong tanong sa mga friends natin. Gusto ko pa rin kasing maging parte ng buhay mo.

X: Iniisip din kita all throughout those years.

Y: Ang lamig. Sobrang lamig mag-isa. Tuwing gabi, naaalala ko pa rin ang mga yakap mo.

X: Sorry.

Y: Malamang hindi mo naisip iyon. Marami kang naging kayakap, alam ko. At naging isa lang akong parte ng koleksyon mo ng mga katawang pinaglipasan ng gabi.

X: Kung maibabalik lang sana.

Y: We are still friends, right?

X: Hindi ko alam kung kaya ko pa.

Y: Bakit?

X: I want us to be more than friends.

Y: Nandito na tayo sa dulo.

X: Lumampas na tayo sa dulo.

[jakepullsthetrigger]

Bakit nga ba hindi tayo nakasabay?

Inagos na ng alon ng panahon ang mga halik ng kahapon, nilamon ng katahimikan sa pagitan nating dalawa ang mga bulong na minsang humele sa mga gabing inaanod tayo ng kawalan.

Siguro’y hindi na natin kabisado ang bawat kurba ng katawan, ang init ng mga paghapo, ang paglalaro ng mga daliri, ang mga halik na minsang tinawag nating pagsalba.

Marahil ay napagod nga tayo’ng lumangoy, nagbago, sumuko, tumigil, sa isang karagatang hindi nating matawag na atin, sa isang karagatang minsa’y inakala nating atin.

-Dagat; Zakk Habitan

[pagdalumat]

Sa Pagkawalay

"For an Absence" ni Wendell Berry Salin sa Filipino ni J. Daryl Alcantara

Sa pagkawalay ko sa piling mo, ipadadala ko ang puso ko (kung anuman ang pinahihintulan sa mga mortal) upang bantayan ka sa dilim— munting de-pakpak na banaag na ‘di dinadapuan ng antok, gaanoman kahaba ang magdamag. Marahil hindi nito kayang magtanggol o tumulong, ‘di ko rin alam, ngunit tiyak itong magtatanod sa tuwina, nang makatulog ka sa loob ng silid ng puso ko sa loob ng pinagsisilirang dilim. At kung sakaling ika’y maalimpungatan sa wangis ng kwarto mong pinaliliwanag ng iyong pagmamasid, ipagpapalagay mo, “Maaga pa,” at magpapatihulog muli sa kulambo ng iyong pananaginip.

[pagdalumat]

kung paano tumula kung close reading; kung paano mag-close read kung tula

ni J. Daryl Alcantara

mayroon munang pagtatanggi bago ang pagtatangi.

kumbaga, paglingon muna bago ang pagtutok. sa isang bahagi,

pagtitig, sa kabila, pagtatatwang magbansag.

kumbaga ay tangka lamang ang lahat ng ito upang sumahin

ang bawat danas ng buhay o ang buhay sa bawat danas,

na sa sandali ng pagsulat ay ikinukulong na sa daigdig

ng tulang hiwalay sa ligid at panahon ng mismong daigdig na pinaghanguan nito.

ang totoo ay wala sa laylayan ng kwadro ang bigat ng katotohanan.

katumbas lang ng kung ano ang ipinaroon sa loob ang ipinalalabas dito.

[pagdalumat]

Bumabalik Sa Akin Ang Lahat Ngayon

"It's All Coming Back To Me Now" ni Jim Steinman Salin sa Filipino ni J. Daryl Alcantara

May mga gabíng sakdal lamig ang tinig ng hangin Na ako’y napapabaluktot sa kama Sa pakikinig nito sa tuwinang namimintana May mga tanghaling sakdal bagsik ang síkat ng araw Na nanunuyot ang tulala kong mga mata Sa kaalamang mamumuti sila sa kahihintay

Kagyat naman akong tumahan pagkalisan mo Hindi ko nga lang maalala kung saan o kailan o paano Binitiwan ko na rin lahat ng gunitang ikaw ang kasálo

Ngunit kung sasalingin mo ako nang ganito At hahawakan nang ganiyan, Hindi ko maikakailang bumabalik sa akin ang lahat Kung sasalingin kita nang ganito At hahawakan kita nang ganiyan Ayaw ko ring tanggapin, ngunit bumabalik sa akin ang lahat Bumabalik ang lahat ng noon sa akin ngayon

May mga sandaling ginintuan Ng mga kidlat na nagkikindatan May mga bagay akong hindi na muling gagawin Kahit na parang tama lang na ulit-ulitin May mga gabíng napagod na ang buwan Sa pagpigil sa ating gawin ang hindi natin mapigilan O mahal, mahal

Kung hagkan kita nang ganito At bulungan mo ako nang ganiyan Kay tagal nang wala, ngunit bumabalik sa akin ang lahat Kung aangkinin mo ako nang ganito At ipagdaramot mo ako nang ganiyan Kay tagal nang naging bato, ngunit kumakabog ngayon ang pusò Hindi ko mapigilang mabagabag, mapatindig ang balahibo Nakapiring na ang gunita, ngunit nangangapa ngayon ang tukso

Nagbabatuhan tayo noon ng mga halang na banta’t kabulaanan Bago mo pa man ako masaktan, agad na kitang binabawian May mga araw na bilanggo natin ang isa’t isa, hindi makatakas Sa gabi, nagbibilangan tayo ng mga salà nating pinalagpas

Binaón na kita sa limot nang iwanan mo ako At nabuo ko muli ang sarili ko kahit papaano Hindi na kita pinag-aksayahan pa ng panahon magmula noon

Pero kung sasalingin mo ako nang ganito At hahalikan mo ako nang ganiyan Kay tagal nang wala, pero bumabalik sa akin ang lahat Kung magpápasalíng ako nang ganito At kung magpapahalik ka nang ganiyan Tinangay ka na ng hangin noon at ngayo’y ibinabalik ka sa akin      (Bumabalik ang lahat ng noon sa akin ngayon)

May mga sandaling ginintuan Ng mga kidlat na nagkikindatan May mga bagay akong hindi na muling gagawin Kahit na parang tama lang na ulit-ulitin May mga gabing napagod na ang buwan Sa pagpigil sa ating gawin ang hindi natin mapigilan O mahal, mahal, mahal

Kapag sinalíng mo ako nang ganito At hinawakan mo ako nang ganiyan Tinangay na ng hangin ang noon, ngunit bumabalik ‘to sa akin ngayon Kung magtagpong muli ang ating mga mata At magbalik ang dating pagtitinginan Makikita natin ang hinahanap natin, magbabalik ang lahat ngayon Ang tawag ng laman at panagimpan, ibinabalik ako sa ating noon Hindi na lubusang maalala, ngunit bumabalik ang lahat sa akin ngayon

Kung patatawarin mo ako sa lahat ng ito, At patatawarin kita sa lahat ng nakaraan Pagbibigyan natin ang isa’t isa at pababalikin ang lahat noon Kung magtagpong muli ang ating mga mata At magbalik ang dating pagtitinginan Makikita natin ang hinahanap natin, magbabalik ang lahat ngayon Ang tawag ng laman at panagimpan, ibinabalik ako sa ating noon Hindi na lubusang maalala, ngunit bumabalik ang lahat sa akin ngayon Kung hahalikan mo ako nang ganito             (Bumabalik ang lahat ngayon)  Kung hahawakan mo ako nang ganiyan             (Nagbabalik ang lahat ng noon) Kung sasalingin kita nang ganito             (Magbabalik ang ngayon sa noon) Kung tayo ulit