#tkotv

[kiss-of-the-vampire]

Wakas

Ako nga pala si Yobi (o Leo, kung ano man ang mas trip niyong tawag sa akin).

Nais kong mas makita niyo akong bilang isang lalaki. Higit pa riyan, gusto kong mas malaman niyo na hindi ako pangkaraniwan na lalaki.

Nais kong makita niyo ako bilang isang tao. Hindi lalaki, hindi babae. Tao.

[kiss-of-the-vampire]

Kim Yuna: The Kiss of the Vampire

69.97.

'yan ang nangungunang score sa 2013 World Figure Skating Championships Ladies' Short Program, at kay Kim Yuna ang nabanggit na score. Kaniyang ginamit ang iba’t ibang komposisyong mahahanap sa pelikula ng The Kiss of the Vampire para sa kaniyang short program.

Maraming nagsasabing hindi kakayanin ng noo’y reigning Vancouver 2010 Winter Olympic Champion na bumalik sa competitive atmosphere, bawiin ang kaniyang perpektong anyo (na nakita noong Vancouver 2010) bilang isang figure skater mula sa pagiging ordinaryong Koreana, at manalo muli ng sandamakmak na gintong medalya simula noong taong 2013 matapos ang kaniyang humigit-kumulang dalawang taong pagliban mula sa competitive figure skating.

Matapos ang una sa dalawang yugto ng kaniyang kampanyang pagbalik bilang ang unprecedented royalty ng ice, puro papuri ang naririnig sa kaniyang pag-skate sa The Kiss of the Vampire.

“Untouchable.”

“Perfection.”

“Excellence.”

“Such a force in [the] sport.”

Sa kabila ng lahat ng papuri, mas tumatak sa aking isip ang isang linyang sinabi ng isa sa mga commentator noong araw na iyon: “[The Kiss of the Vampire] is the kind of piece of music that could carry, carry her through the nerves and through the emotions that she’s feeling of this comeback.”

Maihahalintulad ang The Kiss of the Vampire ni Kim Yuna sa pagsusuri ng masculinity gamit ang The Kiss of the Vampire (at mga kaakibat na personal na karanasan): sa simula, marami ang nagsasabi na walang mapapala si Yuna sa kaniyang pagbalik sa competitive figure skating 'pagkat dalawang taon mahigit siyang wala sa competitive atmosphere. Maihahalintulad ito sa socially-constructed beliefs ng masculinity na ang 'di hegemonic na masculinity ang mapababagsak sa isang lalaki. Ngunit, sa bawat jumping pass, spin, at galaw niya sa yelo, mga galaw na tunay na kaniya, tunay na Yuna, tila makikitang siya lang mismo ang makapagdidikta ng kalalabasan ng kaniyang pagsali sa kompetisyon.

Ang kinalabasan: ang kaniyang ikalawang gintong medalya sa World Figure Skating Championships.

—

Tila isang kapit sa patalim — sa pangil — ang bawat galaw ng isang taong dinidikta ang kaniyang pagkatao at halaga. Ngunit magiging kasintamis ng halik ang pagkapit na ito kung kaniya lamang isabuhay ang kaniyang sarili para sa kaniyang sarili.

[kiss-of-the-vampire]

Gender Identity: The Objective Reality

Makikita sa mga nakaraang blog post na aking binabanggit ang mga salitang “…karaniwang tingin ng lipunan sa mga lalaki…” o “…ayon sa [o] kay” o 'di kaya “…pansariling karanasan…” sa bawat banggit o pagtalakay sa masculinity. Ginagawa ko ito 'pagkat gaya ng nabanggit, bagaman malaki ang naipahihiwatig ng bawat pahayag o konsepto ukol sa konsepto ng masculinity, tila walang tiyak na kasarian ang bawat konsepto; lahat ng ito’y gawa-gawa lamang ng lipunan. Hindi natin lubusang mauunawaan ang reality ng masculinity, at sa kabuuan, ang gender identity, 'pagkat nakikita lamang natin ang mga konseptong ito sa parameter ng perception na siyang umaasa sa kung paano natin nakikita ang mundo, at sa proseso ng pagtingin sa mundo, mayroong bias na nabubuo: sapagkat taglay ng mga lalaki ang mga mas kanais-nais na mga katangian ng mundo, nagkakaroon ng binary opposition sa mga lalaki at babae na may pagkiling sa mga lalaki sa diskusyon ng kung sino ang nangingibabaw. Samakatuwid, hindi tunay ang “reality” na nakatataas ang mga lalaki sa lipunan 'pagkat may bias ang paniniwalang ito. Sa kabilang dako, mayroon ding mga pahayag na may pagkiling sa mga kababaihan, na mas lamang ang mga babae sa mga lalaki.

Sa talaban ng dalawang ideya, nagkakaroon ng overarching na ideya na hindi masculine o feminine ang mga pag-aakalang mayroong tiyak na kasarian ang iba’t ibang katangian, pag-uugali, at mga tungkulin; hindi static ang sex at gender identity, hindi homogeneous o hindi parehas ang mga pananaw ukol sa masculinity (pati na rin sa femininity, at sa gender identity sa kabuuan). Napakaraming papalit-palit at magkakaibang mga kaisipan, konsepto, at pananaw ukol sa sex at gender ang laganap sa kalipunan ngayon.

Masasabi pa ngang performative o performance ang gender, o hindi ang pagiging biological na lalaki o babae sa pagkapanganak ang nagtutukoy sa mga kilos ng isang tao. Sa halip, kinukuha ng isang tao ang mga katangiang pinakamaganda sa parehas na lalaki (bilang halimbawa, ang karaniwang pagiging mas malakas kaysa sa mga babae) at babae (ang karaniwang pagiging mas matiyaga kaysa sa mga lalaki) upang maging isang mabisang miyembro ng lipunan; kaniyang pine-perform ang mga katangiang nangunguna, kapansin-pansin, at kanais-nais sa parehas na lalaki at babae sa kaniyang pang-araw-araw na buhay upang mas maging maayos ang takbo nito.

Sa theatrical release poster ng The Kiss of the Vampire, dalawang babae ang makikita rito, isang bampira, at isang tao. Bagaman biologically, sila’y parehas na babae, hindi tinutukoy ng kanilang pagiging babae ang kanilang magiging aksyon; kanilang isinasantabi ang mga estereotipo ng mga katangian, pag-uugali, at tungkulin sa mga lalaki at babae. Makikita ito sa kanilang mga gesture codes: isang damsel in distress ang babaeng tao (na siyang ginagampanan hindi dahil babae siya, ngunit dahil nasa panganib hindi lamang ang kaniyang buhay kung hindi pati na rin ang buhay ng kaniyang asawa) samantalang agresibo (isang katangiang malimit na nakakabit sa pagiging lalaki) naman ang babaeng bampira.

Sa kabilang dako naman, patunay ang aking mga karanasan sa mga nabanggit na ideya ng gender identity: hindi dahil sa aking pagkalalaki nagmamahal ako ng babae; hindi dahil lalaki ako kaya mahilig ako sa mga larong gumagamit ng baril; hindi dahil hindi ako straight (o sa terminong Pilipino, may pagka-babae) kaya ako mahinhin; hindi dahil hindi ako straight kaya ako maarte sa aking gamit. Layunin ko sa paggawa ng mga aksyong ito ang pag-perform ng aking tunay na sarili, at ang pag-perform ng iba’t ibang katangiang sa tingin kong makatutulong sa pang-araw-araw.

Samakatuwid, masasabi nating hindi ang pagbibigay binary opposition na siyang magtatakda sa pagkalalaki ng isang lalaki ang papel ng konsepto ng masculinity, kung 'di ang pagbunyag o paglantad ng biases sa pagtingin ng lipunan sa pagiging babae at sa pagiging lalaki, at sa pagbunyag na ito, makikitang walang natatanging kasarian ang mga iba’t ibang katangian, pag-uugali, at mga tungkulin.

[kiss-of-the-vampire]

Masculinity: Social Construction

Una sa lahat, ano nga ba ang konsepto ng masculinity?

Ayon sa iba’t ibang mga mapagkukunan, tila isang pangkat ng mga katangian (pisikal o panloob), pag-uugali, at mga tungkulin sa buhay na siyang naikakabit sa mga lalaki, bata man o matanda. Sa mga nabanggit na halimbawa sa ikalawang blog post, maaaring isang pagiging lalaki ang pagkakaroon ng hilig sa mga babae, o 'di kaya ang pagkahilig sa baril-barilan o video games.

Pero paano na ang mga iba pang halimbawa, lalong-lalo na ang mga halimbawang pambabae na makikita sa mga lalaki (na tinatawag na lalaki pa rin)? Paano na ang mga katangiang makikita sa parehong sex? “Panlalaki pa rin ang mga 'yan” ang maaaring tugon sa mga katanungang ito. Pero bakit nagkakaroon ng ganitong mga katanungan?

Dahil socially constructed ang masculinity.

Nagkakaroon ng konsepto ng masculinity upang maipakita ang binary opposition ng mga biological na mga lalaki at babae. Bagaman maganda ang layon ng pagkakaroon ng binary opposition (upang magkaroon ng malinaw na distinguishment sa isang lalaki at isang babae), mas nakasisira ito 'pagkat ikinakabit ang isang konseptong walang katiyakan sa kasarian, at nagkakaroon pa ng iba’t ibang kaisipan na siyang minamaliit ang kabilang sex batay sa pagkakaroon nito ng mas hindi kanais-nais o hindi pinahahalagahan na katangian (katulad na lamang ng pagkamahinhin ng isang tao sa isang palakasan); nagkakaroon ng subordination sa mga taong “hindi nagpapakalalaki” o sa mga babae (complicit at marginalized o subordinate masculinity). Sapagkat naka-ugnay sa mga kalalakihan ang karamihan ng mga mas pinahahalagahan at pinagkakabuluhang mga katangian, sinasabi ng lipunan na nangingibabaw ang mga lalaking taglay ang mga katangiang ito (hegemonic masculinity).

Makikita ito sa iba’t ibang bahagi ng pelikula: mula sa pagbayad ng mas malaking sweldo sa mga lalaking aktor, sa mas pagiging desirable ng mga lalaking bampira kaysa sa mga babaeng bampira

('pagkat taglay ng mga babaeng bampira ang kakayahan ng pagtulong sa mga tao, isang katangian na bagaman morally correct, tila isang katangian na hindi gaanong mahalaga 'pagkat nagkakahulugang mahina (o may kahinaan) ang mga babae sa paggampan ng kanilang mga tungkulin), at ang walang patid na pag-oobjectify ng mga babaeng karakter sa pelikula (sa pamamaraan ng dress code), bukod sa iba pa. Madalang na ipinakitang hindi desirable ang lalaki sa pelikula: kahit na kita sa theatrical release poster na may kahinaang ipinakikita si Gerald, hindi ito pinapansin 'pagkat sa buong pelikula, idiniriwang siya bilang hero 'pagkat hindi lamang niya nailigtas si Marianne sa kapahamakan, kaniya pang giniba ang patuloy na banta — ang mga bampira — sa Bavaria.

Sa pansariling karanasan, bagaman malaki’t matibay ang aking paniniwala na hindi dinidikta ng aking mga katangian at kilos ang aking pagkalalaki, masasabing nararamdaman kong marginalized ang aking masculinity 'pagkat hindi ito naaayon sa conventions ng lipunan sa mga lalaki: nagmamahal lamang ng babae, ang pagkakaroon ng alpha male na mga katangian (o pagiging isang alpha male) na kung saan dominant ang pananaw ng lalaki sa sarili (at kung minsan kaakibat ang pananaw walang kwenta ang hindi lalaking-lalaki na mga lalaki o mga babae o ang pag-reduce ng pagtingin sa kanila bilang katatawanan o mga sekswal na object o bagay), ang hindi pagsuot ng kolorete, at ang pagiging matipuno, bukod pa sa iba.

Ngunit ano nga ba ang reality sa sex? Totoo ba talagang nangingibabaw ang mga kalalakihan dahil sa kanilang taglay na mga katangiang mas pinahahalagahan?

[kiss-of-the-vampire]

Bago ang lahat… (The) Kiss (of the Vampire) muna!

Oo, inaamin ko, napaka-weird talaga nitong setup ng blog ko. Ginawa kong komplikado ang paggawa nito sa pamamagitan ng pagdagdag ng isa pang paksang pag-uusapan, ngunit gaya ng nabanggit, mas makatutulong ito na lubusang maintindihan ang konsepto ng masculinity.

Isang British vampire film ang The Kiss of the Vampire. Inilabas noong 1963, tungkol sa isang mag-asawang nasa honeymoon ang pelikulang ito. Sa honeymoon ni na Gerald at Marianne Harcourt, napadpad sila sa Bavaria na puno ng mga bampira, at doon dinukot si Marianne ng kulto ng mga bampira (na pinangungunahan ng magkapatid na si Carl at Sabena na anak ng lider ng kulto na si Dr. Ravna). Pagkatapos ng pagdukot, pinaniwala ng magkapatid si Gerald na mag-isa lang siyang napadpad sa Bavaria. Ngunit hindi naniwala si Gerald sa kanilang pangungumbinsi, at kasama si Professor Zimmer (na siyang nawalan ng babaeng anak nang dahil sa pagdukot nito ng mga nasabing bampira), kanilang binawi si Marianne mula sa kulto at tuluyan nang winakasan ang kasakiman ng mga bampira sa pamamagitan ng paggawa ng iba’t ibang arcane rituals na siyang nagpalaya ng mga paniki mula sa impiyerno na siyang wawasak sa mga bampira.

Action-packed ang kwentong ito, ngunit action-packed din ito sa iba’t ibang maaring malaman tungkol sa masculinity na siyang makikita sa mga susunod na posts!

[kiss-of-the-vampire]

Pagpapakilala

Uy! Hello! Welcome to my blog!

Ako nga pala si Yobi (o Leo, kung ano man ang mas trip niyong tawag sa akin). Kilala ako ng mga malapit sa akin bilang isang taong mabagal kung maglakad, taong mahilig na mahilig sa Coca-cola, at (kitang-kita naman) tagahanga ng figure skating, bukod sa iba pang mga katangian. Hindi ito mahalaga sa aking blog, though; alang-alang sa pokus ng blog na ito, nais kong mas makita niyo akong bilang isang lalaki. Higit pa riyan, gusto kong mas malaman niyo na hindi ako pangkaraniwan na lalaki.

Mahilig ako sa mga babae at sa kapwa kong mga lalaki. Matagal na proseso ang pag-acknowledge ko nito, ngunit kung titingnan, natitipuhan ko na ang mga lalaki noong bata pa lamang ako;

sarili kong pananaw na katumbas ng pagiging isang lalaki (kahit na walang pormal at napagkasunduang depinisyon ito) ang pantay na pagtingin sa mga babae, pagiging gentle, kawalan ng hiya pagdating sa pagpapakita ng emosyon, at iba pa (salungat sa karaniwang tingin ng lipunan sa mga lalaki). Naniniwala rin ako na natutunan ang mga ito at hindi ito intrinsically feminine. Siguro dahil mahal ko ang aking nanay at ate na ayaw kong maging marginalized ang kanilang “uri” kaya ako nagkaroon ng mga ganitong klaseng pananaw;

may pagka-overly malinis ako (muli, salungat sa karaniwang tingin ng lipunan sa mga lalaki). Napakahilig kong maglinis ng mga bagay (ni katiting na alikabok, hindi ko pinalalagpas). Gustong-gusto ko ring pantay ang lahat ng mga bagay: mga libro sa istante, mga tsinelas sa shoe rack, at iba pa. Namana ko 'to sa aking nanay;

noong bata ako, hindi ako mahilig sa mga karaniwang laro o laruang panlalaki; mas pinaglalaruan ko ang mga manika at mga doll house (na mayroong luto-lutoan) ng aking ate (ngunit ngayon, nahilig na rin ako sa mga baril-barilan). Nakalulungkot lamang na wala akong retrato nito 'pagkat ginawa ko ang mga ito nang patago;

marunong akong mag-make-up. Aking pinaglaanan ng oras ang pag-aaral ng tamang mga proseso sa paglagay ng kolorete sa mukha noong nagsimula akong magbinata, at;

may pagkamahinhin ang aking mga kilos; hindi rin kasintipuno ang aking katawan kung ikukumpara sa ideyal na imahe ng mga lalaki. OK lang sa akin ito; sa katotohanan nga, ginamit ko ito sa aking advantage: medyo mas matikas ang aking paggawa ng kung ano mang bagay (tulad ng pagsayaw) kung ikukumpara sa ibang lalaki.

Gusto ko ring malaman niyo na hindi madali ang maging isang non-conventional male, at aking ipaliliwanag ito sa mga susunod na post gamit ang mga nabanggit na mga katangian at pinagkaabalahan at iba pa.

[kiss-of-the-vampire]

Panimula

Maaaring naitanong mo na kung bakit aking ginamit (o bakit ko pa ginamit) ang pelikulang The Kiss of the Vampire (lalong-lalo na ang theatrical release poster nito) sa pagtatalakay ng konsepto ng masculinity at ang ugnayan at pagpapahayag nito sa aking buhay.

Maaari kong masabi na ito’y dahil sa trend ng aking paggamit sa aking mga proyekto sa paaralan (at paglapat ng mga mahahalagang konseptong makukuha mula sa mga ito) ng mga komposisyon (at ang mga kwentong kaakibat ng mga ito) na ginagamit ni Kim Yuna sa kaniyang mga programang pang-figure skating. Ginamit ko ang The Kiss of the Vampire ‘pagkat aking napagtanto na angkop at nakapanglalawak ang mga tema nito sa diskusyon ng masculinity. Idagdag na rin na nagbibigay ito ng flow sa discussion ng masculinity.

Sa pagkuwento ko ng aking buhay sa ilalim ng konteksto at konsepto ng masculinity, nawa’y makita natin ang pagiging halik at pangil nito sa ating mga buhay.