ഏ സി ക്ക് തണുപ്പ് കുറവായിരുന്നു. എനിക്കാണെങ്കില് പുതച്ച് മൂടി കിടന്നില്ലെങ്കില് ഉറക്കവും വരില്ല. കുറെ നേരം തിരിഞ്ഞും മറിഞ്ഞും കിടന്നു നോക്കി. ഉറക്കം വരുന്ന ലക്ഷണം കാണുന്നില്ല. സയീദ് ഇപ്പോഴും ഫോണില് കാണ്ടി ക്രഷ് കളിച്ചു കൊണ്ടിരിക്കയാണ്. ഇടയ്ക്കിടയ്ക്ക് എന്റെയടുത്ത് ചോദിക്കും , നീ എവിടെ വരെ എത്തിയെന്ന്. ഞാന് മറുപടി കൊടുത്താല് അപ്പോള് പറയും, “ ഓ ..നിനക്കൊന്നും ഒരു പണിയുമില്ലല്ലോ ,എപ്പോഴും ഇതും കളിച്ചിരിക്കാമല്ലോ “ അത് കേള്ക്കാന് എനിക്കത്ര സുഖം തോന്നാറില്ല. കാണ്ടിക്രഷ് ലവലിന്റെ കാര്യം പറഞ്ഞു അവളുടെ മുമ്പില് ശശിയായ കാര്യം ഞാന് അവനോട് പറഞ്ഞിരുന്നു. അവനും അത് പോലൊരു അനുഭവം അവന്റെ പെണ്ണില് നിന്നും ഉണ്ടായതും എന്നോട് പറഞ്ഞപ്പോള് ഞാന് അവനെ സമാധാനിപ്പിച്ചു, നമുക്കവരെ വല്ല എന് എഫ് എസ് കാര്ബണ് 2 ഒക്കെ കളിക്കാന് വെല്ലുവിളിക്കാമെന്ന്. മുജീബ് ഉറങ്ങിയെന്ന് തോന്നുന്നു. ഞാന് തല ഉയര്ത്തി നോക്കിയപ്പോള് ഹൈദ്രു ഫോണിലുണ്ട്. ചാറ്റിംഗ് ആയിരിക്കണം. ഹൈദ്രു അയാളുടെ പേരല്ല , ഹൈദരാബാദ് സ്വദേശി ആയതു കൊണ്ടാണ് അയാളെ ആ പേരില് വിളിച്ചു തുടങ്ങിയത്. ഞാന് ഹൈദ്രുവിനു ഒരു ഗുഡ് നൈറ്റ് പറഞ്ഞു. അയാള് കേട്ട ഭാവം നടിക്കുന്നില്ല. കുറച്ച് നേരം കാത് കൂര്പ്പിച്ച് നിന്നു, ഇല്ല , അയാള് ഏതെങ്കിലും പെണ്ണുമായി ചാറ്റ് ചെയ്യുകയായിരിക്കും.
തലേ ദിവസത്തെ പൊടിക്കാറ്റ് കൊണ്ട് ജാലകത്തിന്റെ ഗ്ലാസുകള്ക്കൊക്കെ ചുവന്ന നിറമാണ്. പൌര്ണമി ആയിട്ടും വെളിച്ചം ഒട്ടും റൂമിനുള്ളിലേക്ക് വരുന്നില്ല. ഞാന് മെല്ലെ റൂമില് നിന്നും പുറത്തിറങ്ങി. വെളിയിലിപ്പോള് തണുത്ത കാറ്റ് വീശുന്നുണ്ട്. എങ്കിലും എല്ലാം പൊടിയില് കുളിച്ചിരിക്കയാണ്. ചന്ദ്രന്റെ വെളിച്ചം കാരണം ആയിരിക്കും , നക്ഷത്രങ്ങളെ ഒന്നും ആകാശത്ത് കാണാത്തത്. അപ്പുറത്തെ കടയില് ഇപ്പോഴും വെളിച്ചം കാണുന്നുണ്ട്. പാതിരാത്രിയിലെ തണുത്ത കാറ്റില് ഒരു സുലൈമാനി കുടിക്കുന്ന സുഖം ഒന്ന് വേറെ തന്നെയാണ്. എങ്കില് അങ്ങനെ തന്നെ യാവട്ടെന്നു കരുതി കടയിലേക്കെത്തി. “ഇക്കാ , ഇവിടെയൊരു കട്ടന് , മധുരം അധികം വേണ്ടാട്ടോ “ ചായയും എടുത്ത് പുറത്തെ തിണ്ണയില് ഇരിക്കുമ്പോ ഒരു ബംഗാളി ഇരുന്നു സിഗരറ്റ് വലിക്കുന്നു. ആത്മാവിനു ശാന്തി കൊടുക്കാന് കണ്ട നേരം. എന്തായാലും സുലൈമാനി കുടിക്കുമ്പോള് കൂട്ടിനു ഒരാള് കൂടി വേണം, ഞാന് അയാളുടെ അടുത്ത് പോയി സലാം പറഞ്ഞു. അറിയാവുന്ന ഹിന്ദിയും കൂടെ മറ്റെതോക്കെയോ ഭാഷയും ചേര്ത്ത് ഉറക്കമൊന്നുമില്ലേ ഭായ് എന്നൊരു ചോദ്യം വിട്ടു. ഓരോ പുകയും അയാളുടെ മൂക്കിലൂടെയും വായിലൂടെയും പുറത്ത് വരുമ്പോള് അയാളുടെ കണ്ണില് നിറയുന്ന കണ്ണുനീര് ഞാന് കണ്ടു. ഒരു വര്ഷമായി ശമ്പളം കിട്ടാതെ ജോലി ചെയ്യുകയാണത്രേ. അവര്ക്കും കാണില്ലേ ഒരുപാട് ആഗ്രഹങ്ങള്, നാട് കാണാന്, ഭാര്യയെ കാണാന് , മക്കളേ കാണാന് ...
അധികമാളുകള്ക്കൊന്നും കാണാത്ത കൊച്ചുകൊച്ചു വലിയ സ്വപ്നങ്ങള് ആയിരുന്നു എന്റെത്. മൊറോക്കൊയിലെത്തി സഹാറാ മരുഭൂമിക്ക് നടുവിലെ, മരുഭൂമിയിലെ കോച്ചിവിറയ്ക്കുന്ന തണുപ്പില് ഒറ്റയ്ക്കിരുന്ന് ഒരു ഗാവ കുടിക്കാന്, സമീപത്ത് കൂടി പോകുന്ന ഒട്ടകനിരകളെ കണ്കുളിര്ക്കെ കാണുവാന്..ടാന്സാനിയയിലെ കാടുകളില് ചെന്ന് സിംഹങ്ങളുടെയും പുലികളുടെയും ജീവിതം കണ്ടു അവയുടെ ഫോട്ടോകള് കാമറയില് പകര്ത്താന്.. സിമ്പാവേയുടെ അതിര്ത്തി പങ്കിടുന്ന വിക്ടോറിയ വെള്ളച്ചാട്ടത്തിനു സമീപം ഒരു പാട് നേരം ഇരിക്കാന്...ഉമ്മയോട് പറയുമായിരുന്നു ഇടയ്ക്കിടയ്ക്ക് , എനിക്ക് ടാന്സാനിയ പോകണം. കല്യാണം ഒന്നും വേണ്ടെന്ന്.ഉമ്മ പിന്നെ ഇടയ്ക്കിടയ്ക്ക് കളിയാക്കി ചോദിക്കും , നീ എപ്പോഴാണ് ആഫ്രിക്കയില് പോകുന്നതെന്ന്. മൊറോക്കോ യാത്ര ഈ വര്ഷം സപ്തംബറിലേക്ക് പ്ലാന് ചെയ്തത് കഴിഞ്ഞ വര്ഷമായിരുന്നു. ദോഹയില് ഒരു ആയിരം റിയാലിന്റെ ജോലി എങ്കിലും കിട്ടാന് തെണ്ടി നടക്കുന്ന സമയം ആഗ്രഹങ്ങള് ഒന്നും തന്നെ മനസ്സില് ഉണ്ടായിരുന്നില്ല. ആദ്യമായി ജോലിയില് കയറിയപ്പോഴും സാധിക്കാനായി ആഗ്രഹങ്ങള് ഒന്നും തന്നെ ഇല്ലായിരുന്നു. പിന്നീടെപ്പോഴോ ഒരു ഐ ഫോണ് വാങ്ങിച്ചതും കാമറ വാങ്ങിച്ചതുമോന്നും ആഗ്രഹം കൊണ്ടായിരുന്നില്ല. ഫോട്ടോഗ്രാഫിയെ ഒരു കാമുകിയെ പോലെ സ്നേഹിക്കാന് കുറെയേറെ സമയം എടുത്തിരുന്നു. എന്റെ മനസ്സിനെ അലട്ടുന്ന പല പ്രശ്നങ്ങള്ക്കും പരിഹാരം ആയിരുന്നു പിന്നീട് ഫോട്ടോഗ്രാഫി.
ഞാന് അവളുടെ വാട്സ്അപ് സ്റ്റാറ്റസ് നോക്കി. ലാസ്റ്റ് സീന് മണിക്കൂറുകള്ക്ക് മുമ്പാണ്. നല്ല ഉറക്കത്തിലാവും. ദൈവം വല്ല കഴിവും തന്ന് ഒരു സ്വപ്നത്തിലെന്നോണം അവളുടെ മനസ്സിനുള്ളിലെക്ക് ഇപ്പോള് പോകാന് കഴിഞ്ഞെങ്കില്.. പാതിരാത്രിയിലെ ഓരോരോ തോന്നലുകള് , പോയി കിടന്നുറങ്ങാന് നോക്ക് തസ്ലീം.. ഞാന് എന്നോട് തന്നെ പറഞ്ഞു . ഇത് പോലെ പലപ്പോഴും സംസാരിക്കാറുണ്ട്. ചിലപ്പോള് ശബ്ദത്തില് തന്നെ. എന്നാലും ഞാന് പറയുന്നത് “ഞാന് “ കേള്ക്കൂല ... “നിക്കിപ്പോ ഒറങ്ങണ്ട , അല്ലേല് വേണ്ട... ഒറങ്ങാല്ലേ “
കുറച്ച് പെണ്കുട്ടികള് ജീവിതത്തെ മാനസികമായി സ്വാധീനിച്ചിട്ടുണ്ടെന്ന് പറയാതിരിക്കാന് വയ്യ.സഹോദരിമാര് ഇല്ലാതിരുന്ന വിഷമം കൊണ്ടാവും പലപ്പോഴും പലരെയും അനിയത്തിമാരായി കാണാന് ആയിരുന്നു ഇഷ്ട്ടം. . ദിവസവും മധുരപലഹാരങ്ങള് കൊണ്ട് വന്ന് എനിക്ക് വേണ്ടി എന്നും അതില് നിന്നും മാറ്റിവച്ചിരുന്ന ഒരു അദൃശ്യ പ്രണയം ഉണ്ടായിരുന്ന ഒരു പെണ്കുട്ടി ഉണ്ടായിരുന്നു . ഒരിക്കലും അവള് എന്നോട് ഇഷ്ടം തുറന്നു പറഞ്ഞിരുന്നില്ല. എനിക്കൊരിക്കലും അങ്ങോട്ട് അങ്ങനെ ഒരു വികാരം ഉണ്ടായിരുന്നില്ല. അല്ലെങ്കില് അങ്ങനെ ഒരു വികാരം ഉണ്ടാവേണ്ട മാനസികാവസ്ഥ ആയിരുന്നില്ല അന്ന്. പെട്ടെന്നൊരു ദിവസം ക്ലാസ്സില് നിന്നും അപ്രത്യക്ഷമായപ്പോള് മാത്രമാണ് ഞാന് അവളെ ഫോണ് വിളിച്ചു ചോദിക്കുന്നത്, എന്ത് പറ്റിയെന്ന്. പിന്നെ പറയാമെന്നു പറഞ്ഞ അവളെ പിന്നീടാരും കണ്ടിട്ടില്ല. ആരും അന്വേഷിച്ചു പോയതുമില്ല.ഞാന് ജീവിതത്തോട് പൊരുതുന്ന സമയം ആയിരുന്നു അത് . മുഖത്ത് വരുന്ന ഒരു ചിരി പോലും എന്റെ അഭിനയം ആയിരുന്നു. ഒരു പാട് പ്രശ്നങ്ങള് എല്ലാവരില് നിന്നും മറച്ചു പിടിച്ചു നടന്ന കാലം..ചിരിക്കുന്ന ആള്ക്കാരോട് അസൂയ ആയിരുന്നു അന്ന് എനിക്ക്..നൂറു രൂപയ്ക്ക് ഫോണ് റീചാര്ജ് ചെയ്ത് കോഴിക്കോട് മര്ക്കസ് കൊമ്പ്ലക്സിനടുത്തെ ആളൊഴിഞ്ഞ ഒരു ഗ്രൗണ്ടില് പോയി അവസാനമായി അവളെ വിളിച്ചത് ഓര്മ്മയുണ്ട്. അവസാനമായി കരഞ്ഞത് അന്നാണ്. അന്ന് ആളുകള് കാണാതിരിക്കാന് കര്ച്ചീഫ് എടുത്ത് ഇടയ്ക്കിടയ്ക്ക് മുഖം തുടക്കുന്നുണ്ടായിരുന്നു . അവളെ സ്ഥിരമായി വിളിക്കുന്ന പേരിലല്ല അന്ന് അവളെ അഭിസംഭോധന ചെയ്തത്. മുഴുവന് പേരും വിളിച്ച് കൊണ്ട് . അവളെന്നില് നിന്നും എത്രയോ അകലെത്തെത്തി എന്നെനിക്ക് അറിയാമായിരുന്നു .. അവള് എന്നില് നിന്നും വേര്പ്പെടും വരെ എന്തൊക്കെ പ്രശ്നങ്ങള് എവിടെയൊക്കെ ഉണ്ടായിട്ടുണ്ടെങ്കിലും എനിക്കൊരു വിശ്വാസം ഉണ്ടായിരുന്നു അവള് തിരിച്ചു വരുമെന്ന്, കാരണം ഒന്നുമില്ല , വെറുതെ ഒരു വിശ്വാസം.
അവള് പോയതിനു ശേഷം ആദ്യത്തെ ഒരു വര്ഷത്തോളം എനിക്കാരെയും വിശ്വാസം ഇല്ലായിരുന്നു. എല്ലാവരും ഫേക്ക് ഐ ഡി കളെ പ്പോലെ എന്റെ മുമ്പില് പാറി നടക്കുവാനെന്നാണ് എനിക്ക് തോന്നിയത്. നാല് വര്ഷത്തിനുള്ളില് പ്രണയം എന്ന വികാരം സ്വപ്നത്തില് പോലും എന്റെ മുമ്പില് ഉണ്ടായില്ല. ചില ആലോചനകളൊക്കെ ഓഫീസില് വരുമെങ്കിലും കല്യാണം എന്നത് മനസ്സില് ഉണ്ടായിരുന്നില്ല അന്നൊന്നും.
ആദ്യമൊക്കെ എന്റെ മനസ്സ് പറയുമായിരുന്നു, “നീ എന്നില് നിന്നും അകലാന് ഞാന് ആഗ്രഹിക്കുന്നു , പക്ഷെ നീ അകന്നെന്നു അറിയുന്ന നിമിഷം ഞാന് എന്റെ ഹൃദയം പൊട്ടി മരിക്കും”. പേടി ആയിരുന്നു ജീവിതത്തെ , പ്രണയത്തെ. ഫാസിയെ സ്നേഹിക്കാന് തുടങ്ങുമ്പോള് മനസ്സ് അലയുന്ന പാഴ്വെള്ളം പോലെ ആയിരുന്നു. നാട്ടിലേക്ക് വരുമ്പോ മനസ്സില് കുറെ പ്ലാനുകള് ഉണ്ടായിരുന്നു. രണ്ട് ദിവസം വയനാട് കാട്ടിനുള്ളില് താങ്ങാനുള്ള അനുവാദം മുമ്പേ വാങ്ങിച്ചിരുന്നു, ഷിംലയിലെയും മണാലിയിലെയും കാലാവസ്ഥകള് ഇപ്പോള് പോകാന് അനുകൂലം ആണെന്ന് ഉറപ്പ് വരുത്തിയിരുന്നു. കല്യാണമോ പെണ്ണു കാണാലോ ഒന്നും ഒരു പ്ലാന് ആയി മനസ്സില് ഉണ്ടായിരുന്നില്ല. വേ ടു നിക്കാഹ് എന്ന വെബ്സൈറ്റ് കല്യാണം കഴിക്കാന് വേണ്ടി ഉണ്ടാക്കിയതോന്നും അല്ലായിരുന്നു. അതില് നിന്നും ഒരിക്കലും ഒരു പെണ്ണിനേയും കെട്ടാന് പോകുന്നില്ലെന്നും മനസ്സ് പറയുമായിരുന്നു. എന്നാലും ഇടയ്ക്കിടയ്ക്ക് അത് തുറന്ന് എന്നെ ഒന്ന് കെട്ടിക്കൊണ്ടുപോകുമോ എന്ന രീതിയില് നില്ക്കുന്ന പെണ്കുട്ടികളുടെ പ്രൊഫൈല് തുറന്നു നോക്കും. കുറെ മെസ്സേജുകളും റിക്വസ്റ്റുകളും പലരില് നിന്നു വരുമ്പോഴും ഞാന് ചിലര്ക്ക് അയച്ച മെസ്സജുകള്ക്ക് മറുപടി തരാത്തതിന്റെ പ്രതികാരം ആദ്യം പറഞ്ഞ ആളുകളോട് കാണിക്കും. മധുര പ്രതികാരം.
നാട്ടില് വന്നതിനു ശേഷം കുറെ കല്യാണാലോചനകള് വന്നിരുന്നു. പലതും മെഡിക്കല് ഫീല്ഡ് ആയതിനാല് ഉപ്പ തന്നെ അതില് കുറെ ഒഴിവാക്കി. വലിയ പ്രൊഫഷനല് ടീംസ് ഒന്നും വേണ്ട എന്നായിരുന്നു ഉപ്പ പറഞ്ഞിരുന്നത്. എന്റെ ഉപ്പയും ഉമ്മയും എന്നെ എത്ര മാത്രം സ്നേഹിക്കുന്നുണ്ടെന്ന് അറിഞ്ഞത് എക്സ് പോയതിനു ശേഷം മാത്രം ആയിരുന്നു. എന്റെ സന്തോഷങ്ങള്ക്ക് അവര് ഒരിക്കല് പോലും എതിര് നിന്നിരുന്നില്ല. അത് കൊണ്ട് തന്നെ ഞാന് അവര്ക്ക് വേണ്ടി അവരുടെ ആഗ്രഹങ്ങള്ക്ക് വേണ്ടി അവരുടെ സന്തോഷങ്ങള്ക്ക് വേണ്ടി ജീവിക്കുകയായിരുന്നു ഇത്രയും കാലം. ഓരോ നിസ്കാരം കഴിയുമ്പോഴും അവര്ക്ക് വേണ്ടി മാത്രം പ്രാര്ത്ഥിച്ചു. എന്നെ ഞാന് പ്രാര്ത്ഥനകളില് പലപ്പോഴും മറന്നു.
ഖാലിദ് എന്റെ വാലാണെന്ന് പണ്ടേ എല്ലാവരും കളിയാക്കാറുണ്ടായിരുന്നു. അവനെവിടെ പ്പോയി എന്നറിയാന് തസ്ലീം എവിടെ എന്ന് അന്വേഷിച്ചാല് മതിയെന്ന് പറയും. അങ്ങനെ നാട്ടില് വച്ച് കീര്ത്തിയില് നിന്നും പ്രേമം സിനിമ കാണുമ്പോഴാണ് എഫ് ബിയില് അവളുടെ മെസ്സേജ് വരുന്നത്. സാധാരണ എഫ് ബി മെസ്സജുകള്ക്ക് ഞാന് ചെവി കൊടുക്കാറില്ല.. മറുപടി നല്കാത്ത ഒരു പാട് സന്ദേശങ്ങള് അതില് ഉണ്ട്. വേ റ്റു വില് പ്രീമിയം അക്കൌണ്ടുകള് ഇല്ലാത്ത പലരും നേരത്തെയും എഫ് ബിയില് വന്ന് മുട്ടിയിരുന്നു. അന്നൊന്നും ഞാന് അതൊക്കെ മൈന്ഡ് ചെയ്യാതെ വിട്ടതാണ്. പക്ഷെ ഇന്നവള്ക്ക് മറുപടി കൊടുത്തു. എനിക്കവളുടെ പ്രൊഫൈലോ അവള്ക് റിക്വസ്റ്റ് വിട്ട കാര്യമോ ഒന്നും ഓര്മ്മയില്ലായിരുന്നു. വീട്ടിലെത്തി ആദ്യം ചെയ്തത് വേ റ്റു തുറന്നു പ്രൊഫൈല് നോക്കുകയായിരുന്നു .
romaincrisis
areudirty
ellievsbear
dailybridgerton