Yahoo有數計

[yahoostylenumbers]

點解有人從來唔會暈車浪？原來係基因決定

大家可能每逢坐長途車、船、甚至飛機，都會見到有人暈浪，會出現噁心、嘔吐、天旋地轉等症狀，實在非常辛苦。不過每次見到他人有暈浪情況，雖然會可憐對方，不過同時都會有種「好彩自己唔會暈浪」嘅諗法。究竟暈浪與否係咩原因呢？

根據美國疾病預防及控制中心（CDC）嘅報告，導致暈浪嘅原因係腦入面處理唔到水平或上下移動嘅訊息，內耳系統平衡感被打擊搞亂，造成「知覺混亂」狀態，呢種大腦嘅小缺撼，係人嘅基因已經決定，即係話暈浪與否由一出世已經決定，而且有遺傳傾向，而又以女性患容易得到。醫生話最有效方法解決暈浪，就係平躺、閑上眼休息，令大腦少啲接收外來訊息。CDC又表示，現今無任何藥物專治暈浪，坊間嘅止暈丸其實係令你腦內神經傳遞訊息速度減低，等你唔會同時處理大量訊息，而得到嘅後遺症就係口乾同有睡意。

暈浪可以話無藥可醫，而且由基因決定，真係不幸有暈浪問題困擾嘅朋友，記住盡量閉起雙目，等大腦唔會接收太多視覺；至於坊間有偏方話睇多啲3D電影可以訓練，CDC話全無根㯫而且仲有機會觸發暈浪症狀，切勿自己擺苦嚟辛啦。

參考資料：美國疾病預防及控制中心

[yahoostylenumbers]

美國藥管局證實 部分防曬會經皮膚入血液？

宣傳到2019年，大家都知道太陽曬係會引致皮膚癌，所以相信大部分知道自己會去戶外活動之前，都應該會用防曬。不過市面上有一堆防曬，支支都話自己有幾厲害，問題係效果係點？又有無實際檢測過當中成分？美國食品及藥物監督總局（FDA）啱啱5月就公布一項研究，發現部分防曬乳液竟然會經皮膚進入血液，或會導致其他癌症！

FDA呢項研究搵咗24位測試者，每日用4次防曬乳液，持續4日，之後抽血檢查。當中發現佢哋血液中出現咗4種化學物質，而呢啲物質以前有研究過同不育、癌症等有直接關係。當然，FDA並非叫大家唔好用防曬，斬腳趾避沙蟲，其實防曬乳液有各種各樣，其中只要挑選得宜就唔需要擔心。咁至於點揀好呢？首先大家要識得分別各種防曬，主要分為3種，1種係純物理防護，1種係化學防護，另1種係混合防護。大家只要睇下產品介紹之中，有無出現（TiO2)及（ZnO）呢兩種成分，如果只有兩種，就係物理防護，係屬於安全使用之列，唔會殘留人體；但如果有其他不知名化學物質，即係屬於化學或混合防護，係有機會經皮膚入血液，少用為秒。一般嚟講，物理防護就係市面比較油膩、厚身，一搽上身好難推開，用後會「立痴痴」嘅嗰種。

FDA最後都有講，防曬始終係最直接預防皮膚癌嘅方法，萬一真係搵唔到物理防護式防曬，都要用化學防曬；只要唔係長時間日日用幾次，相信都唔需要太擔心。

參考資料：FDA

[yahoostylenumbers]

飲酒會致肥？只有一種酒可以減肥兼降血糖！

飲酒會令人肥，尤其係啤酒，相信好多人都知，就算紅酒、白酒都因為有高糖份要致肥，一直以嚟飲酒就代表肥；不過近日有研究指出，龍舌蘭酒（Tequila）就與別不同，甚至可以降血糖及消脂！

美國UCLA就作出研究，發現龍舌蘭酒之中有天然醣「龍舌蘭蜜」（Agavins），呢種係一種膳食纖維，唔單止唔會製造高血糖，反而幫助消化，刺激身體消脂。研究指出龍舌蘭蜜可以令胃部產生GLP-1激素，令胃部更持續地生產胰島素，即係話對患有二型糖尿病人士算係有莫大益處。龍舌蘭蜜又有別於一般果糖，唔會被人體吸收，所以唔會刺激血糖。嗱，不過同時大家要考慮一點，唔少龍舌蘭酒本身混有其他糖份產品，甚至坊間唔少龍舌蘭酒加入人工糖漿，咁樣就一定會致肥啦！

研究人員指出，雖然龍舌蘭酒可以消脂降血糖，但大家唔好因為減肥而飲，因為依然含有酒精，而酒精對人體傷害相信唔使多講啦。所以大家記得，下次如果一定要飲，又唔想咁肥就可以揀龍舌蘭，唔係叫佢平時有事無事都搵龍舌蘭當水飲，唔好搞錯呀！

參考資料：《Medical Discovery News》

[yahoostylenumbers]

學生學習最大障礙原來並非玩電話 而係電視！

現今世代人人都有一部電話，哪怕係小學生都已經有電話，甚至機不離手睇片玩遊戲。唔少家長都好易就將茅頭直指電話，令子女學習唔專注，影響學業成績，有啲家長仲要求子女溫書時必須交出電話，但實際上又係點呢？最近有研究就指出，子女成績原來同玩電話係無直接關係。

刊登於兒童學習期刊《JAMA Pediatrics》，一項新發佈嘅研究，向23個國家一共48萬年齡介乎4至18歲嘅學生作觀察，研究電子熒幕與學習成績嘅關聯。結果發現學生使用電子熒幕時間同學業成績無關，而關係到成績嘅係使用嘅目的。研究話對比起用電話，睇電視先係最打擊學業嘅最大問題，幾乎觀賞任何電視都會令成績下降，尤其對年幼小朋友影響更大。另外一項活動就係打機，每日打40分鐘遊戲機嘅學童，學業成績明顯比唔打嘅差好多。反觀玩電話時間長短與否，似乎都唔會影響學業。研究人員指出好多人玩電話係上社交網站或者同朋友聯繫，呢啲行為未必好影響小朋友成長發育及學習能力；相反，睇電視及打機都會令學童減少時間投入學習，甚至影響大腦休息、睡眠、運動等，阻礙其他身體機能及心智發展，可以話萬惡嘅根源！

各位家長，下次見到小朋友玩電話，或者唔應該即時阻止，覺得係十惡不赦，因為總比佢睇電視有益得多，切記切記！

參考資料：JAMA Pediatrics

[yahoostylenumbers]

因為無糖所以多飲？世衛：飲無糖汽水更早死

近十年八年社會都好關注健康，好多甜嘅食物、飲品都被人嫌棄，因此代糖類食用品興起，無糖、少糖就代表健康，仿似係大家嘅「擋箭牌」，唔再內疚食咗甜嘢。但事實上又係點呢？所謂無糖係咪就代表無害？

世衛最近就公佈一項研究，可以話係極為恐怖；研究觀察10個歐洲國家多達45萬人，分析佢哋飲汽水習慣。發現好多人覺得無糖汽水係對身體無害，而飲多咗，而結果係每日飲兩罐無糖汽水嘅人，比每月飲一罐正常汽水嘅人，死亡率高出26%！而患上心血管疾病而死嘅人更高52%。而每日飲兩罐正常汽水，死亡率只係高8%。即係話一日飲兩罐無糖汽水，死亡率比一日飲兩罐正常汽水仲要高！其實一直有唔少醫學報告指出代糖其實有好多問題，有科學人員就發現無糖汽水為咗有甜味，用咗6種化學甜味劑，而都係被認為對身體有害，包括破壞胃部天然益生菌等。

仲有間接傷害，有美國研究就發現，好多小朋友、青少年會因為覺得自己飲無糖汽水，多咗配額去食多件蛋糕、甜品，變相食多咗其他甜食。下次大家拎起無糖汽水之前，思考一下啦。

參考資料：世界衛生組織

[yahoostylenumbers]

空氣污染不單止傷肺 原來仲會傷眼？

空氣污染係世界各地唔少發展地區遭遇嘅問題，就以香港為例，每年空氣污染嚴重嘅日子，漫天都瀰漫著霧霾，唔單止呼吸困難，仲令人出現失眠等問題。不過一直以大家都知污染空氣中嘅PM2.5係會傷害肺部及呼吸道，其實傷害比大家想像中更大！

台灣醫藥大學近視和眼睛疾病中心，就啱啱於《英國醫學期刊》發表新研究，原來空氣污染，係會對人嘅眼睛構成傷害！研究人員指出，污染空氣會散發兩種物質，分別為二氣化氮（NO2)及一氧化碳（CO）；研究人員觀察咗一共4萬位50歲以老人家，分別居住不同區域，亦有不同程度嘅空氣污染。及後發現，居住地區多CO及NO2物質的話，有較高機會患上黃斑部病變，即視網膜細胞受損造成視力模糊。根據數字，如果NO2較高，患病機會大增200%、CO高的話則增加84%，非常顯著！

負責研究嘅醫生卓夙航就指出，黃斑部由於血液充足，為眼睛中最脆弱嘅地方，而事實證明CO及NO2係會直接破壞當中細胞，而一旦受損係無法再生，問題非常嚴重。睇嚟世界各國注重環保關心空氣質素導致嘅肺部及呼呼疾病之外，以後都要將眼部疾病納入關注之列呢！

參考資料：《英國醫學期刊》 

[yahoostylenumbers]

經常頭痛問題可大可小 或會傷腦？！

現代人工作壓力大，生活又忙碌，好多時都會有頭痛情況出現；不過大家都唔會特別注意，最多痛到頂唔順就食幾粒止痛藥，更好少會去睇醫生。其實經常頭痛原來唔可以睇少，因為台灣最新一項醫學研究就指出，長期頭痛有可能會傷及腦部小血管，引至腦病變。

台灣頭痛學會日前舉辦講座，提出長期頭痛尤如腦部健康警示，可能提醒你有機會出現顱內腫瘤、有腦膿；當然未必咁嚴重，但都係代表你身心過勞。當警告頻繁出現，就會導致慢性頭痛，影響日常生活。萬一我哋長期有頭痛而唔去理，頭痛有機會傷及腦部，尤其對小血管傷害尤其深，所以一直以嚟頭痛都被視為失智症嘅先兆，兩者有好大關聯。學會指出，如果突然出現重大頭痛，例如一生從未試過如此頭痛嘅情況，或者由頭痛引發發燒、體重銳減、嘔吐嘅情況，唔好諗要即刻睇醫生！

參考資料：台灣頭痛學會

[yahoostylenumbers]

素食者未必較健康？素食者中風機率較高

食素可以話係熱潮，全球愈嚟愈多素食人士，除咗為宗教嘅原因，更多嘅素食人士都係因為健康因素。唔少研究都話素食者可以更健康；但原來研究顯示，半素食人士身體更為健康！

英國牛津大學搵咗近5萬人平均年齡為45歲，而且全部身體都無大病，根據呢班人飲食習慣分為3組人，一組係非素食者，一組為全素者，一組為半素食者（唔食紅、白肉，但食海鮮）。研究一直追蹤咗18年，期間發生約3千多宗心臟病及1千多宗中風。排除個人吸煙、飲酒等壞習慣因素之後，得出心臟病方面，半素食者比非素食者低13%、而素食者則比非素食者低22%。但再睇下中風機率，素食者中風機率高非素食者20%！原因方面研究人員表示未有確切臨床實證，但據推斷素食者膽固醇水平低，醫學證明低膽固醇與出血性中風有密切關係，尤其患有高血壓嘅患者，而素食者普遍係唔會服用降血壓藥，可能就係導致中風病發嘅原因之一。研究人員表示再健康食法應該係紅肉、白肉不可多食，配合適量魚、蛋、奶，多食蔬菜水果，就為之均衡飲食！

[yahoostylenumbers]

午飯後小睡片刻 減少心血管病機會

「午後睡一睡，好過做元帥」呢句說話好老土？係！不過事實上係午飯之後眠一眠的確人都精神好多！唔係亂講，因為已經有科學證明，英國醫學期刊《心臟》就公佈一項研究，發現午睡的確可以有效減少心血管疾病風險！

研究於瑞士進行，搵咗3,500位之前無任何心血管疾病病史嘅成年人，並進行調查，並研究佢哋午睡習慣與身體健康狀況關係。長達5年嘅研究，其中有155位患有心血管病，之後睇返數字，每星期午睡1至2次嘅人，患中風、心臟病、心力衰竭、心梗等疾病風險，為無午睡人士嘅48%，足足少一半！不過僅限於65歲以下人士，而且仲要只限每周午睡1至2次；因為午睡次數多於2次的話，風險就完全無降低。我知我知，大家會話香港人有幾難得可以午睡呀？呢個研究就發現，原來午睡時間唔一定要好長，短至5分鐘一樣可以。大家記住每星期抽兩日，食完中午飯眠一眠，短短5分鐘就可以對身體大有益處呢！

參考資料：《心臟》

[yahoostylenumbers]

隔日斷食減肥最有效？一個月瘦3公斤

要減肥，控制飲食可以話至關重要，縱使大量運動都好，如果唔節制飲食，要瘦都可以話難過登天！大家或者有聽過斷食減肥，要大家食少一餐半餐，或者連續幾日食好少嘢，但面對嘅問題係容易反彈，而且難忍肚餓，一唔小心隨時仲肥過之前！

奧地利Graz大學分子生物學研究所，就斷食減肥做咗一項研究，先將一群人分成兩組，兩組人嘅年齡、體重都差唔多；一組人由早上7點至晚上7點時可以任意食嘢，不理卡路里，但餘下當日及第二日，都唔可以再進食，即係「食12個鐘，停36個鐘」；而另一組人則如常進食一日三餐。結果公佈，第一組食12停36唔單止一個月平均減咗3公斤，連身體入面低密度脂蛋白都下降，係會導致心血管疾病嘅壞脂肪。唔單止咁，呢種隔日斷食方法，唔會令身體嘅肌肉大量流失，可以真正達到健康減肥之效。不過營養師就提醒，呢個方法好考驗減肥者嘅決心，因為36小時完全斷食係非常咁困難，一唔小心偷食零食就大件事喇！如此背城借一嘅減肥方法，對自己有絕對信心嘅朋友，可以考慮！

參考資料：Graz University Studies

[yahoostylenumbers]

肥胖人士養狗 狗隻過重機會大增兩倍

現代人著重健康，不過同時有唔少人開始追求真善美，肥並不代表唔靚，一樣可健康及生活如常，無需刻意減肥去合乎世俗眼光。不過客觀現實係體重如果超標，對人嘅健康會構成一定嘅影響。近日有研究就話，身材肥胖嘅人養狗，連狗狗都會超重！

丹麥哥本哈根大學一項最新研究就刊登於期刊《預防獸醫學》之中，研究搵嚟268隻狗狗，發現2成有過重問題。再睇睇主人養飼嘅習慣及主人本身體重，發現主人有過重問題的話，狗隻過重嘅機會為35%，比正常高出1倍！研究人員發現，普遍飼主唔會經常餵飼狗狗零食，只會於訓練或獎勵時出動零食；但體重過胖嘅人士，通常會隨自己開心去餵食，甚至將自己食唔晒嘅食物例如薯條、三文治餵畀狗狗，造成狗狗都有過肥機會！

研究又指出，結紮咗嘅狗狗，因為運動量減少以及食慾增加，同樣會增加過重機會；不過記得呀，結紮有其他眾多好處，所以唔好為咗怕狗狗變肥就唔帶佢去結紮喇。

資料來源：《預防獸醫學》

[yahoostylenumbers]

食蘑菇可減患前列腺癌風險達17%

癌症係人類殺手嘅首位，而眾多癌症之中，男性第二死亡率高就係前列腺癌，可以話令男士聞風喪膽。疾病最好當然係預防勝於治療，坊間都有唔少資訊教人防癌，但好多都無醫學根據。不過對於前列腺癌，日本最近一項研究就發現有效預防嘅方法！

日本東北大學公共衛生學院向37,000位年齡介於40至79歲嘅日本男性作對象，平均追蹤13年時間，研究佢哋飲食習慣同患前列腺癌嘅關係。呢段時間期間，共有3.3%人確定患上前列腺癌。根據研究數字所知，每星期食至少1至2次蘑菇食品嘅男士，患癌機會會下降8%；而每星期進食3次嘅，更會下降至17%！負責研究嘅人員就話，雖然知道食蘑菇對預防前列腺癌有幫助，但由於研究未有寫低各人食嘅蘑菇種類，因此並唔知邊種蘑菇較有效，可能要再等十數年做另一個專門嘅研究先知。不過最重要係，原來蘑菇唔單單有預防癌症作用，醫學報告指出，患有前列腺癌嘅病患者食用蘑菇食品，都可以有效咁減少癌細胞擴散，同時提高身體對抗癌細胞嘅抗體呢！蘑菇原來咁有益，係時候研究一下食譜，食多幾次無壞！

參考資料：Science Daily

[yahoostylenumbers]

夫妻之間不需要幽默 反而更有助感情？

好多文章都話，情侶同夫妻之間，都應該有幽默感，為生活調劑一下，仲話幽默嘅男人好受歡迎，夫妻生活可以如魚得水。實際上又係點呢？台灣有個研究為大家提供咗答案，可以畀大家參考一下。

台灣中央研究院就向390對台灣夫婦作研究，分成4類。第一類為「丈夫幽默型」，第二為「妻子幽默型」，第三為「雙方幽默型」，第四則為「雙方少幽默型」。大家可能會覺得第三類，即係兩邊都識得搞笑搞氣氛，夫妻關係一定好好？錯錯錯！根據數字，第四類雙方都少用幽默嘅夫婦對婚姻有最更高嘅充實感同幸福感。研究人員話夫妻相處之間，幽默未必係好事，好多時用幽默反而令事情火上加油，或者完全解決唔到任何事，反而畀對方覺得你唔認真、嬉皮笑臉。可惜實際上，最少見嘅類型就係「雙方少幽默型」，只有14.4%；最多類型係「妻子幽默型」有35.1%。唔知成日以為自己好好笑嘅你，睇完呢篇研究 ，會唔會考慮下減少一下你嘅幽默感，正經返少少呢？

資料內源：台灣中央研究院

圖片：擷取自電影《分手100次》

[yahoostylenumbers]

生得矮 患糖尿病風險較高

俗語話「矮仔多計」，不過有得揀，邊個唔想高啲先？生得高，普遍人眼中都較有安全感，睇上去亦比較英偉，細個阿媽都係咁用唔到方法，希望刺激小朋友增高；但高矮好大部分都係先天決定，公平咩？但原來仲唔公平都有呀！有報告指出，愈矮嘅人愈易患上糖尿病！

根據醫學期刊《糖尿病學》最新研究顯示，人嘅身高同患糖尿病有密切關係。生得愈高嘅人，患病風險明顯較低。研究就睇咗16,600位女性及10,000位男性進行詳細分析，將遺傳、飲食習慣等因素排除之後，發現高矮係患糖尿病嘅原因之一。研究講明，男人身高每高10cm，患病風險可降低41%；女性則降低33%。至於原因，雖然未有確實證明，不過推斷係因為矮嘅人通常擁有過多肝臟脂肪，係導致糖尿病、心臟病、中風嘅因素之一。所以話，矮仲有可能患多啲病，呢個世界公平咩？

資料來源：《糖尿病學》

[yahoostylenumbers]

休息期間玩電話 休息效果大大減低

香港人工作好繁忙，好多人喺公司休息一下嘅時候，都難免係拎個電話出嚟玩；更莫講話放工後嘅休息時間，更加係機不離手。不過大家未必會注意到，用電話其實唔係真正嘅休息，反而令自己變得更攰！

醫學期刊《成癮行為》（Journal Of Behavioural Addictions）就公布咗一項新研究，搵咗414位成年人做測試，畀咗一系列難題佢哋去解決，而期間安排休息時間，有一組人可以玩電話，一組人玩電腦，一組人就純休息。結果發現休息過後再答問題，玩電話一組人解答嘅速度大大減慢，反而純休息一組人答題速度極快。研究人員指出，休息期間玩電話，其實都係同時處理大量訊息，例如Check電郵；覆個人短訊等，腦內同時出現唔同活動，大大影響集中力。下次老細叫你放工之後要睇Email及覆訊息，記住拒絕話自己放工唔會玩電話呀，不過佢信唔信當然又係另一回事啦！

[yahoostylenumbers]

肥可傳染？同事肥胖 你全家都會肥！

都去到2019年，大家都話要睇人內在美，唔可以用外表去批評其他人。之但係，肥胖似乎係最受大家注目，因為佢係有關健康。於是關於肥胖嘅研究無日無之，但近呢個就非常恐怖，可能會令你同肥嘅同事割蓆！

美國南加州大學一項研究，搵咗1,000位家長及其小朋友做研究，發現有過度肥胖嘅家長，都有一個共通點，就係佢哋都有啲肥胖嘅朋友及同事！根據研究所顯示，如果你同事或朋友開始變肥，50%嘅人都會一齊肥；主要原因係飲食習慣嘅改變，可能會同佢哋一齊進食不健康易肥嘅食物，甚至幫手食叫咗多嘅食物。而最恐佈嘅係，一旦作為父母嘅變肥，子女同樣會變肥。變相即係話，假如你有同事或朋友開始變肥，你同你啲家人都會一齊變肥，肥，原來真係會傳染！

[yahoostylenumbers]

日本有一半工作人口 可被電腦取代

電腦日潮發達，全世界都研究緊AI人工智能，呢方面嘅技術一日千里；大家都應該有聽過，一旦AI成熟，係可以做到好多唔同工種，唔少人將會失業，但有幾多呢？日本最近有研究就指出，單單係日本，就有49%人會失業！

日本野村總合研究所聯同牛津大學一項共同研究，指出未來10至20年間，日本將有49%人嘅工作，會被機械人取代！好多人可能以為被取代嘅都係體力勞動嘅工作，錯喇！研究指出好多屬於白領、甚至係管理層嘅工作都會被取代，對於白領管理層，野村表示如果工作係屬於創作、鎖售等工作，咁AI就難以取代；相反如果只係負責簽名核實、跟進度，就好大機會會被機械人取代。不過都唔好太灰，事關AI嘅出現，對於個人嘅工作發展或者都係好事，因為AI會做埋所有極嘥時間嘅工作，反而令人可以多出時間進行自己嘅工作，或者可以更有效率甚至發展出新嘅技能。所有大家要好好裝備自己，面對AI嘅來襲！