النهاردة بعد شهور من عدم الرضا ومشاعر كتير من الغضب جوايا ناحية العالم والناس والنصيب و القدر ومحاولات مستميتة مني إني أغير أي وضع مش عاجبني سلمت أمري لربنا وسيبت كل حاجة تحصل زي ما ربنا عايز وسلمت إنه ليس لنا من الأمر من شيء بكل رضا وقناعة ومن كل قلبي ..
الشهور اللي فاتت مكانتش سهلة عليا، غالبًا كان فيها أقسى وأصعب تجارب في حياتي، بدأت رحلتي الحقيقة في إني أعرف نفسي، أعرفها بجد، بدأت آرائي وحدودي وتفكيري يتحددوا أكتر، الرسمة اللي كنت رسمها لنفسي فيه حتت منها مكانتش لايقة عليا واتمسحت وحتت تانية اتلونت وبانت أكتر وخدت مساحتها.
بقيت بعرف استمتع بوحدتي وأعرف أتكلم ساعة عن قد إيه فيلم عجبني أو كتاب أثر فيا، بقيت بعرف أتمشى لوحدي من غير ما أحس إن يا خسارة بس لو كان حد ماشي جنبي ومونسني مش كان برضه أحسن؟
بدأت أحس بالونس مع نفسي، لما فهمتها، لما فهمت ايه يناسبني وايه لأ، لما اتعلمت إن الدنيا مش حلوة ومش لطيفة ونادرًا ما هتكون متصالحة بالقدر الكافي اللي يخليها تدينا حاجة احنا عايزينها
عرفت إن تقريبًا كل الحاجات اللي بنعوزها بيعدي وقت ومابنعوزهاش، إن مفيش حاجة ثابتة ولا حتى أنا ومبادئي، الانسان اللي كنت فاكر إنك هتكونه طول حياتك هتبص عليه من بعيد بعد فترة وتقول لأ عمره ما كان هينفع دلوقتي.
جه عليا وقت وعرفت إن جلدي اللي اتغير ماكنش حاجة وحشة وإنه اتغير عشان يبقى حاجة بتساعدني أحافظ على نفسي، عرفت أعمل بداله جلد جديد بيدخلي بس الحاجات اللي تناسبني "حاليًا" ويعرف كويس يصد أي حاجة ممكن تشوه ولو جزء بسيط من نفسيتي اللي تعبت سنين عشان توصل النهاردة للمرونة دي.
اتعلمت ازاي اقول لأ واعمل اللي عايزه وماهتمش مين يقول ايه، طالما ده شيء لازم يتقاله لأ ماينفعش اصلًا اهتم مين بيقول ايه.
عرفت أطلب طلبي ويتنفذ والأهم عرفت أرفض طلبات صحابها كانوا فاكرين انها لازم تتنفذ.
عرفت ان مهما كنت كويس وبلمع ومفيش زيي، ممكن بسهولة أبقى بره الدايرة، ومهما كانوا كويسين، ممكن بسهولة أحطهم بره دايرتي، وعرفت أتقبل ده واستوعبه واتعامل معاه زي أي حاجة عادية مابتاخدش من طاقتي كتير، وأه صحيح عرفت احط طاقتي فين وإمتى واحط منها قد ايه، عرفت ده كويس عشان طاقتي فرطت مني ساعات وسوحتني و بخلت بيها ساعات وسوحتني اكتر.
عرفت إن اي مجهود بتبذله عشان تكون انسان احسن هيخليك انسان احسن مهما طال الوقت، بس اعرف بتبذله فين وازاي.
عرفت ان فيه حاجات ماتنفعش لمجرد انها متنفعش، ماتعافرش فيها، سيبها، مش نصيبي، مش هتيجي ولو تعبت عشانها سنين، هي كده، ماتخلقتش ليا ويتهنى اللي اتخلقت ليه، وعرفت إمتى امشي وقت ما يكون لازم أمشي، إمتى ابطل معافرة في الحاجات حتى لو حلوة وكويسة، إمتى اعرف ان مفيش اكتر من كده. "صعب تعرف ان مفيش اكتر من كده"
عرفت اتقبل مشاعري، عرفت ان مفيش حاجة اسمها شعور وحش وشعور كويس، عرفت ان مشاعري جزء مني ولازم اتعامل معاها واتقبلها اي ان كان اتجاهها، عرفت إمتى اخليها تحركني وامتى اشوفها بتعدي بسلام من غير ما اتحرك في نفس اتجاهها، عرفت ان حقي ازعل واخاف واحزن واعيط وافرح وارجع اخاف وازعل وان ده عادي وبيحصل.
عرفت أحب اللي بيحبوني طول ما هما بيحبوني وماكرهمش لما يبطلوا يحبوني، انا نفسي ببطل احبني اوقات.
بقيت أطمن علي نفسي كل ما اتعاطف مع حيوان ملوش مأوي او حد بيعذبه او الاقيني بدون ترتيب بطلع صدقة او بطعم مسكين.
انا مش اكتر واحد ملتزم، فيه ناس ملتزمين اكتر مني بكتير أو هكذا يبدو عليهم، ولكن انا بقيت بحس بونس ربنا معايا، بقيت بحس بقربه مني، بقيت بسلم أمري لله وانا مش جوايا قلق فعلا من غير فرك وتفكير زي زمان، وده مفرحني، جدًا.
عرفت اني ماحكمش على حد ابدا، مين بيقول ايه ليه وحصل ايه وعملوه ليه، مايخصنيش، معرفش، اكيد فيه سبب، كل حاجة ليها سبب حتى الأذي والقتل والنفاق، فيه سبب ؛ انت بس ماتعرفوش، عرفت أكتر اني مش بس ماحكمش، وان عدم حكمي يخليني متسامح مع غلطات الناس، بقيت لما اشوف حد بيعمل حاجة بكل مقاييس الكون والمجتمع والعرف غلط بقول ربنا يهديه، متسامح ان العالم فيه ناس بتغلط وبتغلط فينا كمان وعارف ان عندهم سبب.
واخيرًا، "عرفت كيف انام وفي قلبي ما يكفي من الألم"
بس ماعرفش لسه الطريق فيه كام يوم
ماعرفش هعيش لزي النهاردة ولا لأ
بس متأكد ان ممكن بعد وقت حتى الكلام ده مايناسبنيش ومبقاش راضي عنه، ومتصالح مع فكرة إني النهاردة مش زي امبارح، لأن دي أحلى فكرة ولأن امبارح كان وحش اوي، ولأن طول ما انا ببذل مجهود في اني اطور نفسي انسانيًا بكون متطمن ان الوقت بيعدي بيا في المدار الصح.
يمكن مش عارف انا عايز ايه، بس عارف انا مش عايز ايه؛ وده مكفيني.
واخيرا احنا بنكبر بمرور التجارب والاوغاد معا.
- ماحدش بيحس اطلاقاً بالزعل عليك و على حالتك.. بيتعاطف احياناً و كتير بيبقى شمتان.
- الناس اللي بتلاقيها ساعات و ساعات مابتلاقيهمش.. ماتدورش عليهم تاني اصلاً !
- الدنيا ساعات لازم تتعامل معاها بوش تاني خالص.. عشان تلم نفسها شوية.
- الزعل اللي ماتتعلمش منه و يخليك اقوى و احسن يبقى مالوش لازمة.
- ماتثقش في حد بيثق في حد انت مش بتثق فيه.
- عامل الناس باللي يستحقوه.. الجدع بجدعنة و الندل بندالة و اللي بيستعبط عليك استعبط عليه.
- كان فيه و خلص.. مفيش حاجة بتفضل على حالها ابداً.
- ماما كانت الفترة اللي فاتت كلها تقولي " كُتر البُكا يعلم القسية " عندك حق اقسم بالله.
- قيمتك لو انت نفسك مش عارفها ماتستناش من حد يعرفها.
- ربنا عدل و الدنيا بتلف بطريقة مخيفة و مبهرة.. كل حاجة عملتها في حد هاتتعمل فيك سواء خير او شرّ.
اللي توقعه تسع مرات و يقوم العاشرة.. خاف منه.. عشان عمرك ما هاتعرف توقعه تاني.
gracieabrams
pixelskylines
gamechangershow
origamiaround
tangentwithtanner
discoholicmusic
yousharknotpass
