Mga Tulang Hindi Niya Mababasa

Tula, tula, gumagawa ng tula kapag ang mundo ko'y tila naantala ni Bathala.

[angpowet-blog]

Naku!

Kapag nagmamahal,

Sabi nila, 

Mas nasasaktan daw ang puso.

Naku!

Mas nababaliw ang utak.

Kapag sinimulan mong

Isipin na

Gusto ka rin niya.

Naku!

Ganyan din naman siya sa ibang tao.

Kapag nagsimula nang

Masaktan ka kapag

May iba siyang kasama.

Naku!

Itigil mo na.

Kapag dumadalas

Na lagi lang

Siyang nasa isip mo,

Naku!

Nagsisimula ka nang mahulog.

Kapag laging

Gusto mo siyang mahawakan,

Mahagkan,

Naku!

Nahulog ka na.

[angpowet-blog]

Nakaraan

Noon, gusto kong bumalik

Sa nakaraang wala pang sakit

Para maitama ang mga mali’t

Ang ngayon ay maging mas nakapananabik.

Wala ka pa noong dasal ko

Lumipad sa nakaraang pilit

Na pinamumukha sa aking ang aking mga sinapit

Maaari pang magbago at mahalin ko.

Sa paglipas ng panahon,

Unti-unti kong nalimutan

Nakaraang inaasam kong balikan;

Hindi na ako lumilingon sa kahapon.

Bawat sandaling nakakapiling ka,

Nauukit sa puso.

Bawat sandaling nakakausap ka,

Hiling ay sana marinig ang iyong boses tuwi-tuwina.

Bawat sandaling ika’y masaya,

Nasa isip ay sana ako ang nagpapaligaya.

Bawat sandaling ika’y tumitingin sa akin,

Nangangarap sana ako’y masdan rin nang may pagmamahal.

Hindi ko na nais pang bumalik sa nakaraan.

Ayaw kong mawala ang mga alaala--panahong ika’y nakasama.

Mga ngiti at kwentuhang ating pinagpalitan,

Ayaw kong mabura.

Ayaw kong bumalik sa nakaraang hindi mo pa ako nakikilala.

Ayaw kong bumalik sa nakaraang hindi pa tayo magkaibigan.

Ayaw kong bumalik sa nakaraang hindi pa kita nahahagkan.

Ayaw kong bumalik sa nakaraang hindi pa kita minamahal.

[extramadness]

[angpowet-blog]

Un-Like Na Lang

Ang hirap magka-crush.

Para kang pumindot ng ‘like’ button sa Facebook

Na walang option na “are you sure you’re going to continue?”

To follow na lahat ng notifications.

Updated ka sa lahat ng comments at mga reaksyon

Ng ibang mga tao na hindi mo naman kilala.

Kapag may ibang babae na feeling mo medyo ka-age mo,

Io-open mo account niya para i-check kung sino ba siya,

Gaano ba sila ka-close ni crush.

Para ka nang detective.

Nahalungkat mo na lahat 

Habang kinkumbinsi mo ang sarili mo na wala lang yung taong ‘yon kay crush,

Kaibigan niya lang ‘yon, nothing serious.

Forever na yung updates nung ni-like mo,

Kaya panay bukas ka rin ng account niya

Para makita kung ano na bang ganap niya sa buhay.

Ang hirap na lagi-lagi na lang may kaba

Kapag sino-stalk mo siya sa Facebook.

Lagi ka na lang tensed at nago-overthink.

Hindi ba kasi pwedeng tayo na lang para wala na kong kapraningan?

Hindi pa pwedeng mag-comment na lang ako lagi ng heart emoji

Nang hindi ako mag-aalala sa iisipin ng ibang tao?

Pwede bang tanggalin mo na ‘tong pag-iisip ko na

Pindutin na lang ulit yung ‘like’ button para ma-un-’like’ ko na

Nang hindi na ako ma-update pa nang tungkol sa ‘yo.

Nang hindi na ako mag-isip pa nang tungkol sa ‘yo.

Kaya ko ba?

Parang hindi yata.

[angpowet-blog]

Sa Kwadradong Kwarto

Sa kwadradong kwartong ito,

Hindi lamang katahimikan ang pumupuno,

Kundi pati ang sigaw ng puso,

Hindi mo naririnig, pero nandidito. 

Sa kwadradong kwartong ito, 

Tanaw ka ng mga mata ko.

O, bakit ngayon ko lang napagtanto?

Gusto ko palang palagi na lamang ganito.

Sa kwadradong kwartong ito, 

Kinulong ang ligayang kay lago.

Tila ba puno ang sahig ng mga bulaklak na kay bango.

Ako’y nakahiga, at tila ba ika’y yakap ko. 

 Sa kwadradong kwartong ito,

Ang oras ay tila ba nakahinto. 

Dulot nito’y managinip ako, 

Kasama ka sa bawat minuto. 

 Sa kwadradong kwartong ito,

Humiling ako na sana’y huwag akong lisanin mo.

Ngunit ang oras pala ay hindi talaga huminto,

Kinailangan mo nang lumabas ng pinto. 

 Sa kwadradong kwartong ito, 

Bakas mo’y tanaw ko, 

Ngiti mo’y hanap ko, 

Tanging ikaw lang ang nasa isip ko.

[angpowet-blog]

Akala

Ang sabi ko, Hindi masamang umasa Kaso mukhang ako’y liliko Sa sabi ng masang “masakit umasa.”

Bigat sa dibdib ang una kong naramdaman Bigkis ng pagkakaibigan ako’y nalabuan Tiwalang aking tangan Tinangay ng pagaalinlangan.

Hindi ko inisip na nais mo akong saktan Pero masakit palang pilitin, Isipin na ako ang may kasalanan. Pero, oo, ako nga ang may kasalanan.

Umasa akong malalim ang pinagsamahan Na walang bagay na hindi ko malalaman Na lahat ay pawang katotohanan Na sa pagkakaibigang ito, ako’y hindi masasaktan.

Umasa akong sa dami ng tiwalang inilaan Ganuon din ang babalik sa akin, Pero ako’y mali Ngayo’y hindi mapakali.

Hindi ko batid ang sinasapit ng aking isip. Nagulo ang aking paniniwala sa isang ihip. Aking utak ngayo’y gusto kong masilip, Ako baga’y naiinip at hindi makaidlip.

Kung anong laki ng tiwala, anong higpit ng pagkakatali Lubid sa leeg kong nananatili. Isang pitik ay maaring aking mapili Putulin nang hindi ako magkakamali, o kay dali.

Sa dami na nang aking naranasan, Sana maisip mo na sa pagkadami-dami ng tao, Ikaw ay pinakapinagkakatiwalaan Dahil ikaw ang pinili ng puso.

Pag-intindi ang aking nais. Dating tiwala, sana’y bumalik Nang ang pagmamahal na umalis Sana ri’y makabalik.

[angpowet-blog]

Masama

Hindi masamang maghintay.

Hindi masamang magtiis.

Hindi masamang umasa.

Hindi masamang masaktan.

Hindi masamang magparaya.

Hindi masamang matalo.

Hindi masamang lumaban.

Hindi masamang maglabas ng nararamdaman.

Hindi masamang magsabi ng “mahal kita.”

Hindi masamang lapitan siya.

Hindi masamang ngumiti sa kanya.

Hindi masamang yakapin siya.

Hindi masamang maging masaya habang kasama siya.

Hindi masamang mapanaginipan siya sa gabi.

Hindi masamang isipin siya araw at gabi.

Hindi masamang gustuhin siya.

Hindi masamang mahalin siya.

[angpowet-blog]

Ipikit

Mata’y ikaw lang ang hanap.

Ipikit ko ‘ng mga mata’y kay hirap.

Nais kitang makita

pero, o kay sakit, sinta,

mga mata mo’y iba ang kinikita.

Dapat na ba ‘kong pumikit

Upang mabawasan ang sakit?