بزم اردو

بزم اردو کی محبت اور خلوص بھری دنیا میں دل کی اتھاہ گہرائیوں سے خوش آمدید

[bazmeurdu]

تجھ کو کتنوں کا لہو چاہیے اے ارضِ وطن​

​تجھ کو کتنوں کا لہو چاہیے اے ارضِ وطن ​جو ترے عارضِ بے رنگ کو گلنار کرے ​

کتنی آہوں سے کلیجہ ترا ٹھنڈا ہو گا​ کتنے آنسو ترے صحراؤں کو گلزار کریں ​

تیرے ایوانوں میں پرزے ہوے پیماں کتنے​ کتنے وعدے جو نہ آسودۂ اقرار ہوے ​

کتنی آنکھوں کو نظر کھا گئی بدخواہوں کی​ خواب کتنے تری شاہراہوں میں سنگسار ہوے​

"بلاکشانِ محبت پہ جو ہوا سو ہوا​ جو مجھ پہ گزری مت اس سے کہو، ہوا سو ہوا​

مبادا ہو کوئی ظالم ترا گریباں گیر​ لہو کے داغ تو دامن سے دھو، ہوا سو ہوا"

ہم تو مجبورِ وفا ہیں مگر اے جانِ جہاں​ اپنے عشّاق سے ایسے بھی کوئی کرتا ہے​

تیری محفل کو خدا رکھے ابد تک قائم​ ہم تو مہماں ہیں گھڑی بھر کے، ہمارا کیا ہے

فیض احمد فیض

[bazmeurdu]

کچھ دل سے کسی نے کہہ دیا پھر

کچھ دل سے کسی نے کہہ دیا پھر وحشت کا چلے گا سِلسلہ پھر

پھولوں پہ دھنک کی بارشیں ہیں خوشبو سے ہُوا ہے رابطہ پھر

بے نام رفاقتوں کا موسم زخموں کے چمن کھِلا گیا پھر

خوابوں سے ڈری ہوئی تھیں آنکھیں ڈرڈر کے کیا ہے حوصلہ پھر

آنکھیں تھیں اُداس مُسکرا دیں پیاسا تھا بدن چھلک پڑا پھر

پتھراؤ سے کب تلک بچیں گے پھر ٹوٹ گیا جو آئینہ پھر

پھر شہر کے سارے داستاں گو دُہرائیں گے ایک واقعہ پھر

افتخارعارف

[bazmeurdu]

سر راہ کچھ بھی کہا نہیں کبھی اس کے گھر میں گیا نہیں

سر راہ کچھ بھی کہا نہیں کبھی اس کے گھر میں گیا نہیں میں جنم جنم سے اسی کا ہوں اسے آج تک یہ پتا نہیں

اسے پاک نظروں سے چومنا بھی عبادتوں میں شمار ہے کوئی پھول لاکھ قریب ہو کبھی میں نے اس کو چھوا نہیں

یہ خدا کی دین عجیب ہے کہ اسی کا نام نصیب ہے جسے تو نے چاہا وہ مل گیا جسے میں نے چاہا ملا نہیں

اسی شہر میں کئی سال سے مرے کچھ قریبی عزیز ہیں انہیں میری کوئی خبر نہیں مجھے ان کا کوئی پتا نہیں

بشیر بدر

[bazmeurdu]

کٹ تو گیا ھے، کیسے کٹا یہ نہ پوچھیے

کٹ تو گیا ھے ، کیسے کٹا یہ نہ پوچھیے یارو !! سفر حیات کا آسان تو نہ تھا

تھیں جن کے دَم سے رونقیں شہروں میں جا بسے ورنہ ہمارا گاؤں یوں ویران تو نہ تھا

رسماً ہی آ کے پوچھتا فاروق حالِ دل کچھ اِس میں اُس کی ذات کا نقصان تو نہ تھا

فاروق روکھڑی

[bazmeurdu]

عزیز تر مجھے رکھتا ہے وہ رگ جاں

عزیز تر مجھے رکھتا ہے وہ رگ جاں سے یہ بات سچ ہے مرا باپ کم نہیں ماں سے

وہ ماں کے کہنے پہ کچھ رعب مجھ پہ رکھتا ہے یہی ہے وجہ مجھے چومتے جھجھکتا ہے

وہ آشنا مرے ہر کرب سے رہے ہر دم جو کھل کے رو نہیں پاتا مگر سسکتا ہے

جڑی ہے اس کی ہر اک ہاں فقط مری ہاں سے یہ بات سچ ہے مرا باپ کم نہیں ماں سے

ہر ایک درد وہ چپ چاپ خود پہ سہتا ہے تمام عمر وہ اپنوں سے کٹ کے رہتا ہے

وہ لوٹتا ہے کہیں رات دیر کو دن بھر وجود اس کا پسینے میں ڈھل کے بہتا ہے

گلے ہیں پھر بھی مجھے ایسے چاک داماں سے یہ بات سچ ہے مرا باپ کم نہیں ماں سے

پرانا سوٹ پہنتا ہے کم وہ کھاتا ہے مگر کھلونے مرے سب خرید لاتا ہے

وہ مجھ کو سوئے ہوئے دیکھتا ہے جی بھر کے نہ جانے سوچ کے کیا کیا وہ مسکراتا ہے

مرے بغیر ہیں سب خواب اس کے ویراں سے یہ بات سچ ہے مرا باپ کم نہیں ماں سے

طاہر شہیر

[bazmeurdu]

سمجھ رہے ہیں اور بولنے کا یارا نہیں

سمجھ رہے ہیں اور بولنے کا یارا نہیں جو ہم سے مل کے بچھڑ جائے وہ ہمارا نہیں ابھی سے برف اُلجھنے لگی ہے بالوں سے ابھی تو قرضِ ماہ و سال بھی اُتارا نہیں سمندروں کو بھی حیرت ہوئی کہ ڈوبتے وقت کسی کو ہم نے مدد کی لئے پکارا نہیں جو ہم نہیں تھے تو پھر کون تھا سرِ بازار جو کہہ رہا تھا کہ بکنا ہمیں گوارا نہیں ہم اہلِ دل ہیں محبت کی نِسبتوں کے امیں ہمارے پاس زمینوں کا گوشوارہ نہیں افتخار عارف

[bazmeurdu]

کسی بشر میں ہزار خامی اگر جو دیکھو تو چپ ہی رہنا

کسی بشر میں‏

کسی بشر میں ہزار خامی اگر جو دیکھو تو چپ ہی رہنا کسی بشر کا جو راز پاؤ یا عیب دیکھو تو چپ ہی رہنا اگر منادی کو لوگ آئیں تمہیں کُریدیں تمہیں منائیں تمہاری ہستی کے گیت گائیں تمہیں کہیں کہ بشر میں دیکھی برائیوں کو بیان کر دو تو چپ ہی رہنا جواز یہ ہے دلیل یہ ہے ضعیف لمحوں کی لغزشوں کو حرام ناطے کی قربتوں کو ہماری ساری حماقتوں کو ہماری ساری خباثتوں کو وہ جانتا ہے وہ دیکھتا ہے مگر وہ چپ ہے اگر وہ چپ ہے تو میری مانو وہ کہہ رہا ہے کہ چُپ ہی رہنا_!!!  افتخار افی

[bazmeurdu]

خدا ہم کو ایسی خدائی نہ دے

خدا ہم کو ایسی خدائی نہ دے کہ اپنے سوا کچھ دکھائی نہ دے خطاوار سمجھے گی دنیا تجھے اب اتنی زیادہ صفائی نہ دے ہنسو آج اتنا کہ اس شور میں سدا سسکیاں کی سنائی نا دے غلامی کو برکت سمجھنے لگیں اسیروں کو ایسی رہائی نہ دے خدا ایسے احساس کا نام ہے رہے سامنے اور دکھائی نہ دے بشیر بدر‎‎

[bazmeurdu]

شاعر مزدور، احسان دانش

احسان دانش لاہور سے کراچی تشریف لائے ہوئے تھے اور ہم اپنے دوست سراج منیر (مرحوم) کے ساتھ ایم اے جناح روڈ پر واقع ریڈیو پاکستان کی پرانی عمارت کے ایک کمرے میں ان کی آمد کے منتظر تھے۔ دراصل ہمیں ہندوستانی سامعین کے لیے نشر ہونے والے ایک پروگرام کے لیے ان کا خصوصی انٹرویو ریکارڈ کرنا تھا۔ ویسے بھی دانش صاحب سے ملاقات کا شرف ہمارے لیے سرمایہ حیات سے کم نہ تھا، جس کا ہمیں عرصہ دراز سے بڑی شدت کے ساتھ انتظار تھا، وہ ان بڑے لوگوں میں سے تھے جو منہ میں سونے کا چمچہ لیے پیدا نہیں ہوئے تھے بلکہ جنھوں نے اپنا جہان اپنی محنت و مشقت کے بل پر خود آباد کیا تھا۔ حسب وعدہ صبح وقت مقررہ پر ٹھیک دس بجے احسان دانش نے ہمارے کمرے میں قدم رکھا تو ہمارے احساسات اور جذبات بیان سے باہر تھے۔ جی چاہتا تھا کہ وقت کا کیمرہ اس تاریخ ساز منظر کو اپنے اندر ہمیشہ کے لیے محفوظ کر کے رکھ لے کیوں کہ ایسے مواقعے زندگی میں بار بار میسر نہیں آتے۔ 

وہ سادگی اور عظمت کا ایک دل نشین پیکر تھے۔ ہم نے انھیں بچپن سے پڑھا بھی تھا اور ان کے بارے میں بہت کچھ سنا بھی تھا، سب سے بڑھ کر یہ کہ وہ ایک سیلف میڈ انسان تھے، جن کی زندگی جہد مسلسل سے عبارت تھی۔ ان کی زندگی کے ابتدائی ایام بے حد سخت اور کٹھن تھے، جب انھیں جسم و جان کے رشتے کو برقرار رکھنے کے لیے بڑے پاپڑ بیلنے پڑے۔ کبھی مزدوری کی تو کبھی کسی چھاپے خانے میں بطور انک مین کام کیا۔ کبھی باورچی گیری کی تو کبھی چپڑاسی گیری، کبھی راج مزدور کی حیثیت سے کام کیا تو کبھی چوکیداری کی۔ وہ مالی بھی رہے اور قالین بننے والے بھی۔ ایک زمانے میں انھوں نے کتابوں کی ایک دکان پر بطور مددگاربھی خدمات انجام دیں اور زندگی کے آخری حصے میں کتب فروشی کو اپنا ذریعہ معاش بنایا۔ اس کج کلاہ نے سب کچھ کیا مگر ضمیر فروشی سے تادم آخر گریز کیا۔

ان کا اصل نام قاضی احسان الحق تھا، مگر علمی دنیا میں ان کی شہرت احسان دانش کے نام سے ہوئی۔ وہ قاضی احسان علی دانش کے فرزند تھے جن کا کل سرمایہ حیات زرعی زمین کا ایک چھوٹا سا ٹکڑا تھا، جو خاندان کی گزر بسر کے لیے ناکافی تھا۔ ان کا آبائی وطن باغت، ضلع میرٹھ تھا لیکن جائے پیدائش قصبہ کاندھلہ ضلع مظفر نگر تھی۔ گفتگو کے دوران ان کی جنم بھومی کا تذکرہ چھیڑا تو احسان دانش یہ جان کر بہت خوش ہوئے کہ حسن اتفاق سے ہماری جائے پیدائش بھی ضلع مظفر نگر کا ہی ایک قصبہ ہے جس کا نام بگھرہ ہے۔ کاندھلہ اور تھانہ بھون ضلع مظفر نگر (یوپی) کے وہ مشہور تاریخی قصبے ہیں جو مولانا اشرف علی تھانوی اور مولانا محمد ادریس کاندھلوی جیسے علمائے کرام کی وجہ سے جانے پہچانے جاتے ہیں۔ احسان دانش کی ابتدائی پرورش تو قصبہ باغت ہی میں ان کے نانا جان کے زیر سایہ ہوئی لیکن نانا کی وفات کے بعد ان کے والد انھیں اپنے ساتھ لے کر کاندھلہ میں آکر مقیم ہو گئے۔ احسان دانش کو پڑھنے لکھنے کا شوق بچپن سے ہی جنون کی حد تک تھا لیکن خاندانی غربت کی وجہ سے وہ چوتھی جماعت سے آگے اپنی پڑھائی جاری نہ رکھ سکے۔

اسی غربت نے انھیں لڑکپن میں ہی محنت مزدوری کرنے پر مجبور کر دیا تاآنکہ انھوں نے لاہور کا رخ کیا اور پھر یہیں کے ہو کر رہ گئے۔ یہاں بھی انھیں جان توڑ محنت کرنا پڑی مگر انھوں نے ہمت نہیں ہاری۔ مطالعے کا شوق اور شاعری کا چسکا انھیں بچپن ہی سے تھا جس میں ہر گزرنے والے دن کے ساتھ اضافہ ہوتا چلا گیا، اس زمانے میں بعض شاعر اپنا کلام پمفلٹ کی صورت میں خود ہی چھپوا کر گلیوں اور بازاروں میں گھوم پھر کر پڑھتے ہوئے فروخت کیا کرتے تھے۔ حضرت بوم میرٹھی جیسے بے مثل شاعر کو بھی اپنا پیٹ پالنے کے لیے مجبوراً یہی طریقہ اختیار کرنا پڑا تھا۔ پھر جب احسان دانش کو پنجاب یونیورسٹی کے ایک ٹھیکیدار کے یہاں کام کرنے والے ایک راج مستری کے مددگار کی جاب مل گئی تو انھوں نے یہ سلسلہ ترک کر دیا۔ دن بھر کی محنت و مشقت کے بعد جو وقت انھیں میسر آتا اسے وہ لائبریری میں صرف کر دیا کرتے تھے۔ بے شک اللہ تعالیٰ کسی کی محنت کو رائیگاں نہیں جانے دیتا۔

آخرکار وہ دن بھی آیا جب وہ پنجاب یونیورسٹی میں ایم اے اردو کے پیپرز کے ممتحن بنے اور جب وہ چیف ایگزامنر کی حیثیت سے اپنے معاوضے کا چیک لینے کے لیے یونیورسٹی پہنچے تو ان کے پرانے ساتھی مزدور انھیں پہچان گئے اور ان کی اس عظیم الشان کامیابی پر خوشی سے پھولے نہ سمائے۔ احسان دانش نے ثابت کر دیا کہ ’’ہمت مرداں مدد خدا‘‘ یہ کہاوت بڑی مشہور ہے کہ ’’خوش نصیبی انسان کے دروازے پر کبھی نہ کبھی دستک ضرور دیتی ہے۔‘‘ احسان دانش کے ساتھ یہ واقعہ اس وقت پیش آیا جب انھیں لاہور کی مشہور شملہ پہاڑی کی چوکیداری کی ملازمت میسر آئی۔ اس ملازمت نے انھیں آرام سے پڑھنے لکھنے کی فراغت مہیا کر دی جس کے نتیجے میں ان کی شاعری ادبی وسائل و جرائد میں شایع ہو کر عوام و خواص میں مقبول ہونا شروع ہو گئی اور پھر وہ مشاعروں میں بھی شرکت کرنے لگے جس نے ان کی شہرت میں روز بہ روز اضافہ کر دیا۔

ایک نعتیہ مشاعرے میں ان کی ملاقات گورنر ہاؤس کے ہیڈ مالی سے ہو گئی جس نے ان کی شاعری سے متاثر ہو کر انھیں گورنر ہاؤس میں مالی کی ملازمت دلوائی جہاں کچھ عرصے کام کرنے کے بعد احسان دانش نے یہ ملازمت چھوڑ دی اور محکمہ ریلوے میں چپراسی لگ گئے پھر انھوں نے اس نوکری کو بھی خیرباد کہہ دیا اور ایک بک اسٹال پر کام کرنے لگے۔ روزی روٹی کے چکر نے شاعر مزدور احسان دانش کو سرمایہ داروں اور ان کی ذہنیت سے بدظن کر دیا۔ یہ ان کی زندگی کا انتہائی نازک موڑ تھا جس کے نتیجے میں وہ بعض دوسرے لوگوں کی طرح سرمایہ دارانہ نظام سے متنفر ہو کر مارکسزم کا رخ بھی اختیار کر سکتے تھے مگر ان کے دل و دماغ پر لگی ہوئی مذہب کی چھاپ اتنی گہری تھی کہ انھوں نے یہ راستہ اختیار نہیں کیا۔ تاہم وہ مزدور اور اس کی عظمت کے ترانے لکھتے رہے، گاتے رہے اور ’’شاعر مزدور‘‘ کے نام سے مشہور ہو گئے، اس میں کوئی شک نہیں کہ وہ نام نہاد شاعر مزدور نہیں بلکہ حقیقی شاعر مزدور کہلانے کے مستحق ہیں، کیوں کہ ان کی زندگی کا بڑا حصہ مزدوری پر ہی محیط ہے۔

وہ محض شاعر ہی نہیں بلکہ ایک وسیع المطالعہ دانشور اور اسکالر بھی تھے، جنھوں نے اردو لسانیات اور لغات کے میدان میں بھی گراں قدر خدمات انجام دی ہیں جو ’’حضرِ عروض‘‘، تذکیر و تانیث، لغت الاصلاح، اردو مترادفات اور دستور اردو جیسی لافانی کتابوں کی شکل میں ہمیشہ یاد رکھی جائیںگی۔ انھوں نے بے شمار نئے لکھنے والوں کی حوصلہ افزائی اور رہنمائی بھی کی جسے کبھی فراموش نہیں کیا جاسکتا، ان کی خودنوشت ’’جہان دانش‘‘ بھی ان کا بہت بڑا ادبی کارنامہ ہے۔ اس کے علاوہ ان کی اور بہت سی کتابیں بھی ہیں جن کی تعداد پچاس سے بھی زیادہ ہے، ان کی غیر مطبوعہ تحریریں اس کے علاوہ ہیں۔ اردو زبان اور ادب کے لیے ان کی گراں قدر خدمات کے اعتراف میں انھیں نشان امتیازاور ستارہ امتیاز کے ایوارڈز بھی دیے گئے۔

شکیل فاروقی  

بشکریہ روزنامہ جنگ

[bazmeurdu]

تمہارے خط میں نیا اک سلام کس کا تھا

تمہارے خط میں نیا اک سلام کس کا تھا نہ تھا رقیب تو آخر وہ نام کس کا تھا

وہ قتل کر کے مجھے ہر کسی سے پوچھتے ہیں یہ کام کس نے کیا ہے یہ کام کس کا تھا

وفا کریں گے نباہیں گے بات مانیں گے تمہیں بھی یاد ہے کچھ یہ کلام کس کا تھا

رہا نہ دل میں وہ بے درد اور درد رہا مقیم کون ہوا ہے مقام کس کا تھا

نہ پوچھ گچھ تھی کسی کی وہاں نہ آؤ بھگت تمہاری بزم میں کل اہتمام کس کا تھا

تمام بزم جسے سن کے رہ گئی مشتاق کہو وہ تذکرۂ ناتمام کس کا تھا

ہمارے خط کے تو پرزے کئے پڑھا بھی نہیں سنا جو تو نے بہ دل وہ پیام کس کا تھا

اٹھائی کیوں نہ قیامت عدو کے کوچے میں لحاظ آپ کو وقت خرام کس کا تھا

گزر گیا وہ زمانہ کہوں تو کس سے کہوں خیال دل کو مرے صبح و شام کس کا تھا

انہیں صفات سے ہوتا ہے آدمی مشہور جو لطف عام وہ کرتے یہ نام کس کا تھا

ہر اک سے کہتے ہیں کیا داغؔ بے وفا نکلا یہ پوچھے ان سے کوئی وہ غلام کس کا تھ

داغ دہلوی

[bazmeurdu]

ہم تم ہوں گے بادل ہو گا، رقص میں سارا جنگل ہو گا

ہم تم ہوں گے بادل ہو گا رقص میں سارا جنگل ہو گا

وصل کی شب اور اتنی کالی ان آنکھوں میں کاجل ہو گا

کس نے کیا مہمیز ہوا کو شاید ان کا آنچل ہو گا

پیار کی راہ پہ چلنے والو رستہ سارا دلدل ہو گا

کیا ملنا فاروق سے لوگو ہو گا کوئی پاگل ہو گا

فاروق روکھڑی

[bazmeurdu]

بلقیس ایدھی ………اُنہوں نے عمر بھر کی خدمتِ خلق

اُنہوں نے عمر بھر کی خدمتِ خلق رہی دنیا میں اُن کی راہ سیدھی

نہ ہو گی ماند جس کی جگمگاہٹ وہ روشن شمع تھیں بلقیس ایدھی

انور شعور

[bazmeurdu]

راحت اندوری کا آخری کلام - نٸے سفر کا جو اعلان بھی نہیں ہوتا

راحت اندوری کے بڑے صاحبزادے ستلج نے ان کا آخری کلام شیٸر کیا ہے۔ احساس ہے کہ موت قریب ہے لیکن غزل میں خوف تک نہیں

آخری غزل نٸے سفر کا جو اعلان بھی نہیں ہوتا تو زندہ رہنے کا ارمان بھی نہیں ہوتا

تمام پھول وہی لوگ توڑ لیتے ہیں وہ جن کے کمروں میں گلدان بھی نہیں ہوتا

خموشی اوڑھ کے سوٸی ہیں مسجدیں ساری کسی کی موت کا اعلان بھی نہیں ہوتا

وبا نے کاش ہمیں بھی بلا لیا ہوتا تو ہم پر موت کا احسان بھی نہیں ہوتا

راحت اندوری

[bazmeurdu]

احساسِ کمتری سے نکلیں

اس حقیقت سے کوئی باشعورانسان انکار نہیں کر سکتا کہ عزت نقالی سے نہیں ملتی۔ انگریزی زبان اور لباس کے استعمال کو پاکستان کا سوفٹ امیج ابھارنے کی تدبیر سمجھنے کو وزیر اعظم پاکستان جناب عمران خان صاحب نے درست طور پر بے بنیاد مفروضہ قرار دیا ہے۔ اصل بات یہ ہے کہ ہر ”زبان“ اپنے ساتھ اپنی تہذیب و ثقافت لے کر آتی ہے۔ آج آپ انگریزی سیکھنے کا ارادہ کر لیں۔ انگلش سیکھنے کے لئے لینگویج سینٹر جانے لگیں۔ ایک ماہ تک روزانہ جاتے رہیں۔ ٹھیک ایک مہینے بعد اپنا جائزہ لیں۔ آپ کے رویے، طرزِ گفتگو اور وضع قطع میں غیرمحسوس طریقے سے تبدیلی آچکی ہو گی۔ آپ کے لباس میں تبدیلی آنے لگے گی، اگر آپ شدید احساس کمتری میں مبتلا ہو گئے ہیں تو آپ کے رویوں تبدیلی آجائے گی، آپ اپنے قومی لباس کو غیر ملکی لباس سے حقیر سمجھنے لگیں گے بلکہ بعض افراد تو اپنے ہموطنوں حتیٰ کے قریبی عزیزوں تک کو کمتر سمجھنے لگتے ہیں۔

اسی طرح اگر آپ ”عربی زبان“ سیکھنے کے لئے دو ماہ کسی سینٹر چلے جائیں۔ دو مہینے تک مسلسل عربی سیکھتے رہیں۔ ٹھیک دو مہینے بعد اپنا جائزہ لیں۔ آپ قرآن پاک کی تلاوت کرنے لگیں گے۔ ہر ایک کو ”السلام علیکم“ کہنے لگیں گے۔ آپ صلی اللہ علیہ وسلم پر درود شریف پڑھنے لگیں گے۔ مسجد جا کر نماز پڑھنے لگیں گے۔ دورانِ گفتگو موقع بہ موقع سبحان اللہ، ماشاءاللہ، الحمدللہ کہنے لگیں گے۔ غیر محسوس طریقے سے مذہب اسلام کے طور طریقوں، رہن سہن اور بودوباش کو اپنانے لگیں گے۔ بحراللہ ہزاروی نے لکھا ہے کہ جب سعودی عرب میں تیل کی تلاش کیلئے امریکی ماہرین آئے۔ آنے سے پہلے ان کو عربی زبان سکھائی گئی تھی، چنانچہ ان میں سے کئی امریکی مسلمان ہو گئے تھے۔ بعض قومیں بہت ہوشیار ہوتی ہیں۔ اس تجربے کے بعد انہوں نے کبھی اپنے ماہرین کو عربی نہیں سکھائی بلکہ اس نے اپنی زبان عربوں کو سکھائی۔ انگریز کا یہ طریقہ کار ہے کہ وہ جہاں بھی جاتا ہے، اپنی زبان وہاں کے مقامی لوگوں کو سکھاتا ہے۔ 

اس کا نتیجہ یہ نکلتا ہے کہ وہاں کے لوگوں میں انگریزوں سے محبت پیدا ہونے لگتی ہے یا کم از کم ان کے دلوں سے نفرت نکل جاتی ہے۔ انگریز جب برصغیر آیا تو اس نے یہاں بھی یہی کام کیا۔ مقامی زبان کو تبدیل کر کے اس کی جگہ جبراً انگریزی زبان رائج کروائی۔ نتیجے کے طور پر 99 فیصد پڑھے لکھے جاہل قرار پائے اور انگریزی جاننے والا ایک فیصد طبقہ اعلیٰ تعلیم یافتہ کہلایا۔ آج بھی یہی ہو رہا ہے۔ امریکہ نے پوری دنیا میں اپنی زبان انگریزی پھیلانے کا وسیع نیٹ ورک قائم کیا ہوا ہے۔ اور تو اور دینی مدارس جہاں ساری دینی تعلیم ہی عربی زبان میں ہوتی ہے، قرآن سے حدیث تک، درجہ اوّل سے درجہ تخصص تک ساری کتابیں اور ساری تعلیم عربی میں ہی ہے، وہاں پر بھی انگریزی زبان مسلط کی جارہی ہے۔ ان کی مدد سے مدارس میں سینٹر کھل رہے ہیں۔ آپ مسلمانوں کی تاریخ کا مطالعہ کریں تو معلوم ہو گا یہی کام مسلمان کیا کرتے تھے۔ 

مسلمان جہاں بھی جاتے وہاں کے لوگوں کو عربی زبان سکھاتے۔ اس کا نتیجہ یہ نکلتا کہ وہاں کے لوگ غیر محسوس طریقے سے مسلمانوں کی تہذیب و ثقافت کو پسند کرنے لگتے۔ پھر کچھ ہی عرصے بعد وہ مسلمان ہو جاتے۔ مسلم فاتحین نے کبھی دوسروں کی زبانیں نہیں سیکھیں بلکہ ہمیشہ یہی کوشش کی کہ اپنی زبان دوسروں کو سکھائیں۔ دوسری زبانوں میں موجود علم و فن، علوم و معارف حاصل کرنے کے لئے ”دارالتراجم“ قائم کئے۔ ان علوم و فنون کو اپنی زبان عربی میں منتقل کر کے ان سے استفادہ کیا۔ صحیح طریقہ ہے بھی یہی کہ اپنی زبان اور تہذیب و ثقافت کو نہ چھوڑا جائے۔ ہمارے ملک پاکستان کی قومی زبان ”اُردو“ ہے۔ ”اردو“ رواداری، اپنائیت، محبت، ایثار، ہمدردی اور خلوص سے بھرپور ہے۔ اردو زبان نے کم وقت میں زیادہ ترقی کی ہے۔۔ زندہ دل قومیں اور ملک اپنی زبان اور تہذیب و ثقافت پر فخر کیا کرتے ہیں۔ 

اس کی بقا اور سلامتی کیلئے کوششیں کی جاتی ہیں۔ اپنی قومی زبان کی ترویج اور اس کی بہتری کے لیے ٹھوس اقدامات کئے جاتے ہیں۔ یہ کس قدر ناانصافی بلکہ ستم ظریفی کی بات ہے کہ ہماری قومی زبان تو ہے اردو، لیکن دفتری زبان انگریزی کو بنایا ہوا ہے۔ جب تک قومی زبان کو دفتری زبان قرار دیکر رائج نہ کیا جائے گا اس وقت تک اس کی بقا کی ضمانت نہیں دی جاسکتی۔ ہم نے مرعوب ہوکر انگریزی کو دفتری زبان بنایا ہوا ہے۔ ہم خوامخواہ احساسِ کمتری کا شکار ہیں۔

انور غازی

بشکریہ روزنامہ جنگ

[bazmeurdu]

میں اور میرا کمرہ

جس طرح کا ماحول ہے اس میں اگر کوئی گوشہِ عافیت اب تک باقی ہے تو میرا کمرہ ہے۔ شہر میں کس کی خبر رکھیے کدھر کو چلیے اتنی تنہائی تو گھر میں بھی ہے گھر کو چلیے (نصیر ترابی) میں اور میرا کمرہ پرامن بقائے باہمی کی بنیاد پر ایک دوسرے کو برداشت کرنا سیکھ گئے ہیں۔ وہ میرے شب و روز کا نظام الاوقات اب پہلے سے بہتر جانتا ہے۔شروع شروع میں کچھ ایڈجسٹمنٹ پرابلمز آئے۔ مثلاً میری یہ شکایت کہ وہ مجھ سے بات کیوں نہیں کرتا۔ بس سنتا ہی کیوں رہتا ہے۔ پھر مجھ پر آہستہ آہستہ کھلنے لگا کہ مجھے اس کی زبان سیکھنا پڑے گی اور اس کے احساسات کو اسی کے اشاروں کی مدد سے سمجھنا پڑے گا۔

شروع شروع میں یہ بہت مشکل سا لگا۔ لیکن اب مجھے معلوم ہے کہ اس کے کس اشارے کا کیا مفہوم ہے۔ مثلاً جب میں کھڑکی اور دروازہ بند کر کے بھی باہر جاتا ہوں تو دو دن بعد کمرے کے فرش اور آزو بازو پڑی اشیا پر گرد کی ایک ہلکی سی تہہ جم جاتی ہے۔ اس کا مطلب ہے کہ کمرہ صفائی پسند ہے اور میرے برعکس روزانہ کی ڈسٹنگ اور ڈریسنگ کا طالب ہے۔ مجھے اپنے روزمرہ کے کپڑے الماری کے پٹ سے لٹکانے کی عادت ہے، لیکن کمرے کے لیے جب یہ پھوہڑ پن برداشت سے باہر ہوجاتا ہے تو وہ الماری کے پٹ کو اشارہ کرتا ہے اور میری قمیضیں اور جینز جانے کیسے پٹ پر سے پھسل کر فرش پر پھیل جاتی ہیں۔ اور پھر میں ان سب کو کمرے کی خوشنودی کی خاطر الماری کے اندر ٹانگ دیتا ہوں۔ اگلے دن پھر کوئی قمیض جانے کیسے پٹ سے لٹک جاتی ہے۔ اس کمرے کی دیوار پر کب سے ایک ٹی وی سیٹ نصب ہے۔ مجھے یاد نہیں کہ آخری بار اس ٹی وی سیٹ پر میں نے کیا دیکھا۔ بیرونی دنیا سے رابطے کا مرغوب ذریعہ لیپ ٹاپ اور موبائل فون ہے۔ کیونکہ ٹی وی آپ کو اپنی تحویل میں لے لیتا ہے۔

آپ کو اندازہ بھی نہیں ہوتا کہ اس ایڈیٹ باکس کو تکتے تکتے کتنا وقت بیت گیا اور جب آف کیا تو کچھ یاد نہیں رہتا کہ کیا سنا، کیا دیکھا ، کیوں سنا اور دیکھا۔ جب کہ لیپ ٹاپ اور موبائل پر آپ کا نسبتاً کنٹرول رہتا ہے۔ کون سا مباحثہ یا ریلیٹی شو کب دیکھنا ہے، کتنا دیکھنا ہے۔ کس کال کا فوری اور کس کا ٹھہر کے جواب دینا ہے۔ یہ سب آپ کی دسترس میں ہے، مگر یہ دسترس خود بخود پیدا نہیں ہوتی۔ اسے اپنے آپ پر نافذ کرنا پڑتا ہے۔ ذرا سی ڈھیل ملی نہیں اور یہ آلات سر پر چڑھے نہیں۔ کمرے میں میرا بستر ہی میرا دفتر بھی ہے۔ اس کے نصف حصے پر میں سوتا ہوں اور باقی نصف پر چند خالی کاغذات، کچھ کچے پکے مسودے اور دو تین ادھ پڑہی کتابیں نیم وا آنکھوں کے ساتھ سوتی جاگتی ہیں۔ کچھ عرصہ پہلے تک آدھے سے زیادہ کمرے پر کتابوں کا تسلط تھا۔ مگر میں نے ایک روز انھیں زبردستی ڈرائنگ روم میں ان کی الماری رہائش گاہیں بنا کر منتقل ہونے پر آمادہ کر لیا۔ شاید وہ اس ہجرت سے خوش نہیں۔

جب تک یہ کتابیں میرے کمرے میں تھیں تو آسانی سے دکھائی دے جاتی تھیں۔ اب ڈرائنگ روم میں جا کے تلاش کرتا ہوں تو ایک دوسرے کے پیچھے چھپ جاتی ہیں اور دکھائی دے بھی جائیں تو انھیں پکڑتے ہی انگلیوں پر گرد اپنے نشانات چھوڑ دیتی ہے۔ مگر میں ان کتابوں کی فطرت سے واقف ہوں۔ ان کی جذباتی بلیک میلنگ میں آ کر پھر سے اپنے کمرے میں منتقل نہیں کروں گا۔ جب سے کتابیں منتقل ہوئی ہیں۔ کمرے کی دیواروں پر بھی بشاشت کی ہلکی سی لہر محسوس ہوتی ہے۔ دو ماہ پہلے جانے کیا دماغ میں آیا کہ میں نے اپنے اس دوست کی دیواروں اور چھت پر تازہ پینٹ کروا دیا۔ مگر پھولوں والی دیواری پینٹنگ کو نہیں چھیڑا تاکہ ماضی کا حال سے کچھ تو رشتہ برقرار رہے۔ کمرہ پہلے سے زیادہ بڑا لگنے لگا۔ شاید دیواروں کو نیا پہناوا اچھا لگا تب ہی ان سے فراخی چھلک رہی ہے۔ ایسا نہیں کہ میں دوسرے کمرے یا لاؤنج کا خیال نہیں رکھتا۔ ان کی بھی ویسے ہی دیکھ بھال کی کوشش کرتا ہوں جتنی اپنے کمرے کی۔ مگر کبھی کبھی جب میں دوسرے کمرے یا لاؤنج کی تشفی کے لیے ان کے درمیان جا کے بیٹھتا ہوں تو وہاں کی دیواریں طنزیہ مسکراہٹ سے استقبال کرتی ہیں ’’کہیے کیسے زحمت کی۔ آج ہماری یاد کیونکر آ گئی۔ سب خیریت تو ہے‘‘۔ ایک بار میں نے جھنجلا کر ان سے کہا کہ شکر کرو میں تمہارے ساتھ رہتا ہوں۔ تصور کرو جون ایلیا کے ساتھ تمہیں رہنا پڑ جاتا تو کیا ہوتا۔

فرش پے کاغذ اڑتے پھرتے ہیں میز پر گرد جمتی جاتی ہے

کون اس گھر کی دیکھ بھال کرے روز اک چیز ٹوٹ جاتی ہے

میری اس طرح کی جھنجلاہٹ دیکھ کر کبھی کبھی دیواریں سہم جاتی ہیں۔ پھر ان کا موڈ درست کرنے کے لیے مجھے اپنے دوست فاضل جمیلی کی ایک اکتائی ہوئی نظم سنانا پڑتی ہے اور یقین دلانا پڑتا ہے کہ میں تمہیں تنہا نہیں چھوڑوں گا نہ اکتاؤں گا۔ تم جیسے بھی ہو بہت اچھے ہو۔ میں ایسی نظمیں نہیں کہوں گا کہ ،

مجھے کمرہ بدلنا ہے یہ سیلنگ فین بوڑھا ہو چکا ہے، کھانستا رہتا ہے راتوں کو مجھے گھڑیال کی یہ بے تکی ٹک ٹک بھی اب اچھی نہیں لگتی

یہ دیواریں ادھڑتی جا رہی ہیں، جس طرح بنیان ادھڑتی ہے یہ دروازے یہ روشن دان اک دوجے سے لڑتے ہیں

چٹائی اور تکیے کی بھی آپس میں نہیں بنتی ہواؤں سے لرزتی کھڑکیوں کو اور کتنے دن تسلی دوں

سجی ہیں شیلف میں یا جا بجا بکھری ہوئی ہیں اب نہیں ہے ان کتابوں سے کوئی بھی گفتگو میری

یہ آئینہ کمینا مجھ سے کہتا ہے تمہارا عکس دھندلا ہے

وجودِ نامکمل ہو تمہاری ذات اب ٹوٹے ہوئے اس فرش جیسی ہے یہ استرکاریاں کر کے جو تم گھر سے نکلتے ہو

اداکاری تو کرتے ہو کہوں کیا اس کمینے سے کہ میں ایسا نہیں تھا، ہو گیا ہوں مجھے اس بے یقینی سے نکلنا ہے

مجھے کمرہ بدلنے دو مجھے کمرہ بدلنا ہے

وسعت اللہ خان 

بشکریہ ایکسپریس نیوز

[bazmeurdu]

ابنِ صفی: ایک ’’غیرادبی‘‘ ناول نگار

سوشل میڈیا سے پہلے کا زمانہ بھی خوب تھا، چھوٹے بچے اور لڑکے بالے اسکول سے آنے کے بعد کھیل کود کے لیے گھر سے نکل جاتے تھے اور سورج ڈوبنے سے پہلے والدین بچوں کو پکڑ پکڑ کر گھر لایا کرتے تھے۔ آج بچے اور لڑکے بالے موبائل اور لیپ ٹاپ لے کر گھر کے ہی کسی کمرے میں پڑے رہتے ہیں۔ والدین انہیں زبردستی باہر بھیجتے ہیں کہ جائو کہیں کھیلو کودو۔ پچھلے زمانے میں جنہیں پڑھنے لکھنے کا شوق ہوتا تھا وہ محلے کی لائبریری سے کرائے پر کوئی کتاب لے آیا کرتے تھے اور کسی کونے کھدرے میں چھپ کر پڑھتے رہتے تھے۔ کرائے پر لائی گئی کتاب میں کچھ ایسا ہوتا تھا کہ پڑھنے والا دنیا و مافیہا سے بےخبر ہو جاتا تھا۔ اُس نسل کو مطالعے کی لت لگانے والے شخص کا نام ابنِ صفی ہے۔ ابنِ صفی کے جاسوسی ناول مہینے کے مہینے چھپا کرتے تھے اور ہاتھوں ہاتھ بک جایا کرتے تھے۔ 

جو خرید نہیں سکتے تھے وہ لائبریری سے کرائے پر لے کر پڑھا کرتے تھے۔ اس زمانے میں والدین کو مطالعے کی یہ عادت بری لگتی تھی، آج کے والدین کہتے ہیں کہ ان کے بچے مطالعہ نہیں کرتے۔ اس بات کا حاصل یہ ہے کہ بڑوں کو نئی نسل کی سرگرمیوں پر ہمیشہ سے اعتراض رہا ہے۔ جب یہ نئی نسل صاحبِ اولاد ہو جاتی ہے تو اسے اپنی اولاد سے گلے شکوے پیدا ہو جاتے ہیں اور نئی نسل کہتی ہے۔ 

اگلے وقتوں کے ہیں یہ لوگ انہیں کچھ نہ ہو ابنِ صفی کے جاسوسی ناولوں کی عجیب کہانی ہے۔ اُس زمانے کے بڑے بڑے ادیب اور شاعر بھی ان کے ناول وقت گزارنے کے لیے پڑھا کرتے تھے لیکن برسر عام وہ اپنے اس ’’جرم‘‘ کا اقرار کبھی نہیں کرتے تھے۔ جس زمانے میں ابنِ صفی کے ناول بہت مقبول تھے اُس زمانے کے اردو زبان و ادب کے اساتذہ نے ابنِ صفی کو کبھی کسی کالج یا یونیورسٹی میں گھسنے ہی نہیں دیا۔ 

ان کے کسی ناول کا تجزیہ ہوا نہ تحقیقی مطالعہ۔ اگر ایم اے اردو کا کوئی طالب علم ابنِ صفی کے ناولوں پر تحقیقی مقالہ لکھنے کی اجازت طلب کرتا تو اس کا ساری کلاس کے سامنے مذاق اڑایا جاتا اور کہا جاتا ’’دیکھو! یہ ابنِ صفی کو پڑھتا ہے‘‘۔ خود مجھے بھی یہ طعنہ ایم اے کے زمانے میں اپنے استاد سے سننا پڑا تھا، وہ اردو ناول نگاروں کے بارے میں لیکچر دے رہے تھے۔ جب وہ اپنا لیکچر مکمل کر چکے تو میں نے عرض کیا ’’سر! آپ نے ابنِ صفی کا تو ذکر کیا ہی نہیں‘‘ استاد گرامی نے چھوٹتے ہی کہا ’’ابنِ صفی کے ناول ادب کی ذیل میں نہیں رکھے جا سکتے‘‘، ان کی یہ بات سن کر میں ایک اچھے شاگرد کی طرح چپ سادھ کر اپنی کرسی پر بیٹھ گیا۔ 

اتفاق سے ایم اے اردو کے سالانہ پرچوں میں اردو ناول نگاری کے ارتقا پر ایک سوال پوچھ لیا گیا۔ میں نےاپنی ساری بھڑاس اس پرچے میں نکالی۔ مشہور ادبی ناول نگاروں کے ساتھ ساتھ میں نے ابن صفی جیسے ’’غیر ادبی‘‘ ناول نگاری کا بھی مفصل ذکر کیا اس پرچے میں میرے نمبر دوسرے پرچوں سے زیادہ آئے ممتحن بھی شاید میری طرح ابن صفی کا عاشق تھا۔ میں لاہور کے ایک مشہور فکشن رائٹر کا انٹرویو کرنے کے لیے ان کے گھر گیا۔ ان سے ابنِ صفی کی ناول نگاری کے بارے میں استفسار کیا تو بولے ’’میں ایسی کتابیں نہیں پڑھتا‘‘، میں نے ایک اور سوال داغا ’’سر! آپ نے ان کی دو چار کتابیں تو پڑھی ہی ہوں گی؟ تبھی تو آپ نے ان کے بارے میں ایک رائے قائم کی ہے‘‘۔ بولے ’’نہیں۔ کچھ کتابیں میں سونگھ کر رکھ دیتا ہوں‘‘۔ میں آج واشگاف انداز میں اعلان کرتا ہوں کہ مجھے مطالعے کی لت ابنِ صفی کے جاسوسی ناولوں سے لگی۔ میری طرح ہزاروں لاکھوں لوگ ہیں جو ابنِ صفی کے ’’غیرادبی‘‘ ناول پڑھ کر ’’خراب‘‘ ہوئے۔ 

میرا کہنا تو یہ ہے کہ ابنِ صفی نے ادب عالیہ لکھنے والوں کو اچھے پڑھنے والے دیے ہیں۔ ابنِ صفی کے ناول آپ آج بھی اٹھا کر دیکھ لیجیے۔ ان میں آپ کو نہایت شستہ اور شائستہ زبان ملے گی۔ شگفتگی، ظرافت، بذلہ سنجی اور مزاح کی چاشنی ملے گی۔ چونکہ ابنِ صفی شاعر بھی تھے اس لیے ان کی نثر کہیں کہیں مقفیٰ اور مسجع ہو جاتی ہے۔ منتخب شعروں کی پیوندکاری کا ہنر بھی ہمارے ابنِ صفی کو آتا تھا۔ چونکہ وہ بذاتِ خود ایک نفیس آدمی تھے اس لیے ان کا شعروں کا انتخاب اُنہیں رسوا نہیں ہونے دیتا تھا۔ وہ تحریف نگاری کے فن سے بھی آشنا تھے۔ کسی کے شعر میں دو تین لفظ بدل کر وہ مفہوم کو کہیں سے کہیں پہنچا دیتے تھے۔ تحریف کرتے ہوئے وہ اس بات کا پورا خیال رکھتے تھے کہ شعر کا وزن قائم رہے۔ میں آج کے زمانے کے کئی مشہور مزاح نگاروں کو جانتا ہوں جو تحریف کرتے ہوئے شعر کو بےوزن کر ڈالتے ہیں۔ جب ان سے اس ’’غیر پارلیمانی‘‘ حرکت کے بارے میں دریافت کیا جاتا ہے تو کہتے ہیں کہ مزاح میں سب چلتا ہے۔ 

سوال یہ ہے کہ اگر مزاح میں سب چلتا ہے تو پھر مشتاق احمد یوسفی تحریف کرتے ہوئے شعر کا وزن کیوں قائم رکھتے تھے؟ مجھے تو یوں لگتا ہے کہ آج سے چالیس سال پہلے کا سوشل میڈیا یہی ابنِ صفی کے ناول تھے۔ جس طرح آج کے والدین سوشل میڈیا کو کوستے نظر آتے ہیں، ماضی میں وہ ابنِ صفی کو مورد الزام ٹھہرایا کرتے تھے۔ ابنِ صفی کا زمانہ چلا گیا وہ 1980 میں صرف 52 برس کی عمر میں دنیا سے رخصت ہو گئے تھے لیکن ان کے عاشقوں کی تعداد آج بھی کم نہیں۔ بہت سے ادیب اور شاعر صرف اس ظلم کی تلافی کے لیے آج ابنِ صفی کی شخصیت اور ناول نگاری پر تنقیدی و تحقیقی مقالے لکھ رہے ہیں جو انہوں نے ماضی میں اس مرد درویش پر روا رکھا۔ آج ابنِ صفی پر پاکستان ہی نہیں انڈیا کی یونیورسٹیوں میں بھی ایم فل اور پی ایچ ڈی کی سطح کے تحقیقی مقالے لکھے جا رہے ہیں۔ 

ابنِ صفی کو مسلسل پڑھنے والے جانتے ہیں کہ ابن صفی شاعری بھی کرتے تھے وہ غزل کے نہایت پختہ شاعر تھے، کیوں نہ ہوتے، استاد نوح ناروی کے خانوادے سے جو تھے، ابنِ صفی شاعری کی دنیا میں اسرار ناروی کے نام سے جانے جاتے تھے۔ ان کی یہ غزل کلاسیکل گائیک حبیب ولی محمد نے گا کر امر کر دی ہے:

راہِ طلب میں کون کسی کا اپنے بھی بیگانے ہیں چاند سے مکھڑے رشک غزالاں سب جانے پہچانے ہیں

بالآخر تھک ہار کے یارو ہم نے بھی تسلیم کیا اپنی ذات سے عشق ہے سچا باقی سب افسانے ہیں

ناصر بشیر 

بشکریہ روزنامہ جنگ

[bazmeurdu]

اپنی ذات سے عشق ہے سچا باقی سب افسانے ہیں : ابن صفی

راہ طلب میں کون کسی کا اپنے بھی بیگانے ہیں چاند سے مکھڑے رشک غزالاں سب جانے پہچانے ہیں

تنہائی سی تنہائی ہے کیسے کہیں کیسے سمجھائیں چشم و لب و رخسار کی تہ میں روحوں کے ویرانے ہیں

اف یہ تلاش حسن و حقیقت کس جا ٹھہریں جائیں کہاں صحن چمن میں پھول کھلے ہیں صحرا میں دیوانے ہیں

ہم کو سہارے کیا راس آئیں اپنا سہارا ہیں ہم آپ خود ہی صحرا خود ہی دوانے شمع نفس پروانے ہیں

بالآخر تھک ہار کے یارو ہم نے بھی تسلیم کیا اپنی ذات سے عشق ہے سچا باقی سب افسانے ہیں

ابن صفی