kabilang pagkatao

[bunsotil]

Ang Layo..

Paang nangangalay

Sa pilapil nakadantay

Ginto ang kuko

Wala namang presyo..

Hapdi ng init

Tagos sa damit;

Pag ula`y katal

Walang silbi ang balabal..

Ang layo...

Layo ng isip,

Habang nakayuko

Pagod ngunit di sumusuko..

Papahinga sandali

Isip nama'y atubili

Dami tanong

Sagot di mawari..

Ang layo...

Layo ng sagot,

Sa mga tanong na nabuo..

Kaya pa o suko na?

Damdamin di magkaintindahan

Nakamasid sa di kalayuan

Humihiling kay bathala

Para sa kinabukasan...

Ang layo...

Layo sa pangarap,

Binagsakan ay lupa,

Kapos ang sakripisyong mga ginawa.

Titigilan ba

O magaadhika

Gagapangin palapit,

Panghahawakan ang nasa isip...

Ang layo..

Layo ng ngiting

Balatkayo sa paningin

Wag lang mapansin mga kinimkim..

Masayang malungkot

Halo ang damdamin..

Hahakbang na muli't

Tatawid sa pilapil...

[bunsotil]

PILIPINAS KONG MAHAL

Lupang sinilangan

Sa gitna ng karagatan..

Ngayon halimuyak moy

Inaamoy ng mga tampalasan..

Ginagasaha ka na't

Niyurak yurakan..

Pilit pinag aagawan

Ng mga lapastangan..

Batuhan ng sila putik

Ngunit di nila alam

Sa imahe mo nagmantsa

Ang kanilang kasakiman..

Pinagmamalaking akoy pinoy

Ngunit nakikita ko

Hindi na ito ang pinoy

Na kilala sa mundo..

Pati simbihan ay nakisalo

Kaya ngayon dalawang isip ako

Aral ba ni kristo ang turo nyo

O isa sa mga pekeng santo..

Hahagalpak ang demonyo

Dahil ang aral binali nyo

Ibat ibang kulay

Pinagbukod bukod lalo..

Darating ang panahon

Yayanigin tayo

Paghahaluhaluin kulay mo at kulay ko

Magiging itim yan ang sakripisyo..

[bunsotil]

CORNBITS..

Para sa mga batang 80's and 90's

Naalala ko pa ang una nating pag tatagpo

Simpleng simple ka lang

Kasing simple ng mga pangarap ko.

Lagi mo akong pinapasaya,

Sa mga araw na kasama ka..

Oo nga pala..

May mga araw din na nasasaktan

At nagseselos ako..

Kasi minsan ang tigas mo

Kaaing tigas ng puso mo

Nakakselos yong mga araw

Na may kasama kang iba

Tapos ang saya-saya nya sa piling mo

Samantalang ako

Andon sa isang sulok

Pinagmamasdan kayo(WALANG BAON)

Lumipas ang panahon

Hindi na tayo nagkita..

Halos nakalimutan ko na nga ang itsura mo

Pero hindi ang mga ala-ala nating dalawa

Ang haba ba naman ng ating pinagsahan

Nasaksihan mo nga ang mga kabiguan

At kasiyahang pinagdaanan

Sa linayo layo ng aking narating

Di ko akalaing dito pa tayo magkakatagpo

Hay!!! Lahat talaga nagbabago

Tingnan mo ngayon ang laki laki mo na

Dati ang liit mo pa

Marahil kung noong una tayong nagkita

Ganyan kana agad kalaki

Baka di kita na afford(PISO LANG BAON)

Kung nangyari yon di ko naranasan

Maging masaya sa piling mo.

Alam mo bang hinahanap hanap kita..

Mula noon hanggang ngayon

Hindi pa rin nagbago

Yong pakiramdamn pag kasama ka

Iba pa rin yong dulot mong saya

Hindi ko mapigilan ang ngiti

Sa bawat nguya ko

Sa mga butil ng ating ala-ala..

Hanggang sa muli nating pagkikita(UBOS NA)

Regards nga pala sa mga tropa natin

Kay sunshine na laging sosyalera

Kay donald duck na tinatatto ko pa

At kapag ngumingiti na

Nakikita ko si putosiko nakasingit sa ngipin mo

Nga pala si kending hubad

May damit na ba?

Kung wala pa bibigyan ko sya

Ng singkong kulot para makabili na...

[bunsotil]

PAREHO LANG

-bunsotil-

Ilang kusot na ang ginawa sa mata,

Bagamat malabo kitang-kita kita.

Ilang dotdot na ang ginawa sa tainga

Tikom ang bibig pero rinig kita.

Ni wala nga sa hinuha,

Ng manhid kong pandama.

Makailang sampal man,

Ang gawin sa mukha.

Para patunayan talaga,

Talagag nangyari ang lahat ng ito.

Hindi ka isang panaginip,

Gising na gising ako.

Gising na gising,

At kitang kita ang pagdaan mo.

Napadaan ka sa lugar,

Kung saan nakalugmok ako.

Pinipilit na hilumin,

Ang sugat na natamo.

Ng masulyapan ka'y,

Napansin ko.

Lamlam sa mga mata,

Ay hindi maitago.

At sa mga ngiting mapaglinlang,

Na pinakita mo.

Ramdam ko,

Ang ramdam mo.

Nasasakatan ka,

At nasasaktan ako.

Pareho nating gusto,

Gustong bitawan ang mga bagay.

Na bumubuo ng ating pagkatao,

Hirap bitawan diba?

Sa mga panahong,

Naghahanap pareho.

Ng sasandalan at pupulot,

Sa mga piraso ng puso.

Makinig sa litanya,

Ng pinanggalingang mundo.

Pinagbangga tayo!

Parehas tayong sakim!

Sakim sa pagmamahal,

Dahil kahit sobrang sakit na.

Sobrang sakit na'y,

Sige parin tayo.

Ramdam ko'y nahuhulog na sayo,

Ganun ka din sakin.

Pero di dapat,

Pagkat baka isipin.

Baka isiping panakip butas lang,

At di nanaising madagdag pa ako.

Sa mga pasakit na dala mo,

Mapangiti ka yan ang ibig ko.

Pagkat sa aki'y sapat na,

Ang mga ngiti mo.

Hawakan ang kamay ko't,

Sabay tayong tutungo.

Sa kapanatagan ng ating mga puso..

(Baw... ^_^🤪😁😀)

[bunsotil]

TALANDING PANAHON

Nagkukubli sa ilalim sa mga ulap ng kalangitan.

Pilit na umiiwas sa sinag ng pag-iisa't

Madarang muli sa sakit ng init dulot ng salang nagawa.

O hangin umihip ka!

Makulimlim na landas ng buhay koy baguhing bahagya.

Pagkat ngayoy puno ng pangamba,

Dahil wala kana

Kasing lakas ng kulog

Ang kabog sa dibdib

Sa tuwing maalala ka

Kasing liwanag at bilis ng kidlat sa kadilimam

Kapag dumaan ka sa panaginip sinta

Nagdidilim ang kalangitan

Tulad ng isipan..

Nagbabadyang bumuhos ang ulan.

Bumuhos ka ulan!

Bumuhos ka!

Gawing kasing lakas ng bagyo,

Ang mga patak mo.

At isasabay ko ang mga luha

Na dulot ng pangungulila sayo

Diligan ang mga bitak ng mapawi ang sakit,

Sa init ng tagtuyot na nagpalanta sa puso't

Uhaw na uhaw sa pagkalinga mo

Sanay tulad ng panahon!

Dumaan man ang tag-ulan

Hanggang sa tagsibol at taglagas.

Maramdaman pa rin ang saya,

At ganda ng bahagharing lumilitaw.

Na dala ay pag-asa sa tuwing makikita ka

Dahil sa kabila ng unos ng talanding panahon

Sisikat at sisikat din ang bukang liwayway

Aaliwalas ang paligid at mawawala ang pangamba

Babangong dala ang munting buto ng pag-asa nating dalawa

Itatanim at palalaguin sa karimlan ng ala-ala..

[bunsotil]

LIMOS...

Magarang pitaka,

Kahit barya'y wala.

Limos sa dukha,

Mukha lang sagana..

Pusong nagmamahal,

Tibok ay bumabagal.

Limos sa pag-ibig,

Hindi na tatagal..

Pangarap kay laki,

Tiwala'y kukonti..

Limos sa sarili,

Puro pighati...

Humakbang palayo,

Paa'y napako.

Limos sa pagtakas,

Hirap ng kumalas...

Ang liwanag ng gabi,

Ngunit bumbilya'y pundi.

Limos sa kinabukasan,

Lumalabo ng dahan-dahan...

Tahimik sa tabi,

Lihim ang hikbi.

Limos sa saya,

Lumaos ng bahagya..

Humalakhak at ngumiti,

Lahat nama'y peke.

Limos sa pag-intindi,

Nawala sa sarili...

[bunsotil]

DIGMAAN

(Unang yugto)

Masaya nga ba talaga ako?

O pilit paring dinadaya ang sarili!

Sinasabi ko madalas kalilimutan kita,

Sa paraang alam ko..

Pero naubusan na ako ng mga paraan,

Ilang beses ko man diktahan ang puso.

Na kalimutan ka!

Napupunta lang sa wala.

Nabinging pansamantala ng marinig

Nang marinig na may mahal ka ng iba..

Hanggang sa maramdaman,

Ang init ng pagdaloy ng luha.

Na parang batis na nag mumula,

Sa kailaliman ng damdaming di maintindihan.

Ito na ba talaga ang hudyat ng pagsuko?

Pagsuko?

Anu nga ba ang tamang kahulugan?

Bakit kay hirap mong hanapan?

Dapat ba sa lahat ng digmaan,

Kailangan may isang susuko sa laban?

O manatili nalang sa makipaglaban?

Dahil sa kabila ng sakit

Ng mga sugat na nakamtan.

Meron pa ring saya,

Sa tuwing ikay mamasdan.

Paano ba isusuko?

Ang isang taong nakaagapay

Sa lahat ng laban.

At nag turo ng mga taktikang gagabay

Para ipagpatuloy ang buhay!

Dati'y nabuhay akong mag-isa.

Sa kapatagan at mga bulubundukin,

Ng damdaming puno ng digmaan.

Takot na takot at nanginginig!

Dulot ng pangamba na bka wala na?

Wala na kahit isa sa paligid ang mag aahon,

Sa kinasadlakang mundo ng digamaan.

Hanggang sa mapadaan ka't akoy natagpuan

Sugatan, madungis, ang mukhay kaylamlam.

Di nagdalawang isip na iabot iyong kamay,

At akoy inakay palayo sa digmaang nararanasan.

Itinuro ang daan patungo sa lugar

Sa lugar ng katahimikan at kapayapaan..

Mula noo'y naging panatag ang buhay

Mga sugat ay unti-unting naghihilom,

At sa mga sakit ay nasanay..

Pagkat ako'y iyong tinanggap, niyakap,

At pinatuloy sa'yong buhay..

Paglipas ng panahon

Muling nasadlak sa digmaan

Nasaan ka na?

Kakampi pa ba kita?

O isa na ako sayong kalaban?

Ang mundo koy tila gumuho

Ng ikay masulyapang nakaataas ang kamay,

At isinusuko ang laban..

Siguro nga'y napagod ka na..

Sa pagprotekta't pag gabay..

Kung saan ang puso at isip ko ang magkalaban.

Ngayon ako'y tinamaan ng palaso

Ramdam ang dahan dahang pagbaon sa puso,

Na tila ba salamin nabasag,

Ng masentrong tamaan..

Luha'y muling dumaloy

Kasabay ang init ng dugong gumuguhit

Sa katawang pagal..

Paligid ay unti-unting lumalabo

At nabubuo ang katanungan..

Sa pagkakataong ito'y nagkasundo

Ang puso't isipan..

Mas nanisin ko pang masawi.

Masawi nalang sa pakikidigma,

Kesa mabuhay sa pagsuko..

At kasinugalinga'y nakalatay

Na kayang kitang kalimutan...

[bunsotil]

[bunsotil]

Gusto kitang kalimutan sandali..

Sa bawat minutong dumaraan

Halos nagkakandarapa,

At hangos ang sarili sa pag iisip sayo.

Yong tipong kahit san mapatingin,

Yong mukha mo ang nakikita ko..

Sa mga bagay sa paligid,

Mga ginuhit nating saya ang naalala..

Gusto kitang kalimutan sandali!

Pero paano ko gagawin?

Di parang inalis ko na din ang ngiti,

Ngiti na ikaw ang tamis!

Aalisin ko din ba ang sigla?

Kung kakalimutan kita sandali..

Baliktarin ko kaya?

Sandali kitang kakalimutan kung?

Kung sa pag iisip ay hangos

At halos nagkakandarapa ang sarili,

Sa paghabol sa'yo sa mga dumaang minuto.

Sandali kitang kakalimutan kung?

Nakikita ko ang mukha mo dati

Kahit saan mapatingina't

Hindi ko na maalala ang sayang

Ginuhit nating dalawa..

At sa paligid ko ang mga bagay ay ordinaryo na..

Gusto kitang kalimutan sandali

Kung wala ng ikaw na tamis ng aking ngiti...

[bunsotil]

Kopikong Nescafe

(Dala ng kulang sa tulog)

Una kitang natikman

Noong single ka pa at single din ako..

Ikaw ang pinakamasarap

Na pampaiinit ng umaga ko

Tamang tamis at konteng pait..

Iba yong saya pag hawak na kita

Sa aroma mo palang

Araw koy kompleto na..

Araw araw ikaw at ikaw

Hanggang sa.....

Hanggang sa ako sayo'y

Nagtampo sinubukan ko naman

Ang ibang flavor mo..

Pag timpla ko minsay

Nakatitig lang sayo..

Dami kasi nating pinagsamahan

Saya, lungkot,iyak at tawanan...

Teka parang iisa yon ah..

Pero ang di ko makakalimutan

Nang akoy pinaluha mo

Alam ko naman yon ay di mo sadya

At ako ang may sala

Napabilis lang ang higop ko

At dila koy napaso..

Ang sakit pero di mapait...hahaha

Dumaan ang mga araw

Kapeng aking tinitimpla

Lagi nalang lumalamig

Di ko malaman kung kulang sa tamis

Pero 3 in 1 naman...

May isang bagay akong hinanap

At inaalala sa tuwing iinumin ka

Ngayong umaga

Nagkalakas na ako ng loob

Ikaw ang napili ko

Handa na akong tikman

Ang sarap ng tapang mo

At bumalik sa nakaraan nating dalawa

Sa paglanghap sa aroma mong kakaiba..

Masaya ako nakita kitang muli..

Magkahalo ngayon ang damdamin ko

Parang ikaw,,

May tamang tamis,

Medyo maputi pero di maitim

Strong pero di mapait..

Kopiko nasa nescafe..

Magkahalo talaga..

Ang gulo....

[bunsotil]

HABANG PWEDE PA...

-bunsotil-

Habang pwede pa..

Pwede pang marinig,

Na mahal mo ako

Ngayon sabihin mo na.

Habang pwede pa...

Humingi ng tawad at

Magpatawad ngayoy oras na.

Oras ay darating....

Ang puso'y lantat

Sarado na ang tenga..

Habang pwede pa..

Akoy iyong yakapin

Halikan at pangitiin

Oras ay darating

Pakiramdam sa kataway,

Lamig lang ang titigil..

Init ng yong halik

Di na madadama..

Habang pwede pa

Alayan mo ako

Ng rosas na kay bango

Kulay pula ang ibig ko

Pagkat yan ang paborito.

Oras ay darating...

Mata ay pipikit,

Pang amoy koy maglalaho..

Habang pwede pa

Ipakita't iparamdam

Ako'y may halaga..

Baka oras ay dumating

Lahat ay huli na...

Nakakulong sa kahon

At pantay na ang paa...

[bunsotil]

LUMBAY..

Maghahati na ang gabi

Mga mata'y pikit

Ngunit diwa'y mulat

Kalmado ang lahat

Habang isip ay pinapagat

Takbong mabilis

Di alam kong lilihis

Lumbay na pakiramdam

Andito ka na naman

Pusong napabayaan

Ramdam ko ang pintig

Sumasalaksak ang sakit ng ilan

Luluhang bahagya

At magpapaubaya

Lumbay na pakiramdam

Susubukang humapa

Isang beses lang nadapa

Ngunit kamay mo'y di makapa..