واحد كتب 40 قاعده عن الرجاله قال فيهم :-
1- الرجالة ما بتتكلمش بعد الأكل
2- الرجالة ....... ما بتتكلمش بعد الأكل
3- الرجالة ....... ما بتتكلمش ........ بعد الأكل
4- الراجل ما بيتسئلش تاكل إيه و لا كمية قد إيه ، الأكل بيتحط قدامه أيا كان نوعه و كميته و بياكل في سلام
5- الرجالة ما بتحبش الأسئلة قولا واحدا و بإجماع الفقهاء الراجل مستعد يحفر نفق في جبل جرانيت باستخدام أدوات المائدة و لا إنه يتسأل هنعمل إيه دلوقتي
6- الرجل بطبعه فاقد الإحساس بالزمن و التخطيط الإستراتيجي طويل الأجل بالنسبة له التفكير في الوجبة القادمة ... و ساعات بيكسل يعمل كده كمان
7- الرجالة بتظبط المنبه من باب إعمل إللي عليك و سيب الباقي علي ربنا إنما الحقيقة إن 99,9% من الرجالة بيناموا و همه عندهم إعتقاد إنهم مش هيصحوا تاني
8- زي ما الست بتبقي "عايزة ورد يا إبراهيم" الراجل بيبقي عايز " A little personal space يا زينب" .
9- كل الرجالة في الدنيا عندهم "طقم" واحد صيفي و "طقم" واحد شتوي بيتلبسوا أول الموسم و يتقلعوا آخر الموسم ... أي محاولة لتغييرهم أو حتي غسلهم بدون إنذار مسبق قبلها بأسبوعين و تمهيد نفسي قبل الغسلة بيومين و إحتواء وجداني و همه علي الحبل ممكن تهدم البنيان النفسي للراجل و ترجعه عيل عنده سنتين مش عارف يروح الحمام لوحده .
10- الشاي بتاع الصحيان من نوم العصرية بيتقدم معاه كيك
11- الرجالة ما بتعرفش من شكل العين و نبرة الصوت و الحاجات دي الحالة النفسية للستات إن ما كنش يسمع صويت و يشوف لطم بيبقي المشهد بالنسبة له عادي تماما
12- الراجل إللي بياخد باله من تغيير نوع البرفان ده معدل وراثيا مش أصلي ... الأصلي مش بيشم أصلا .
13- المثل الإنجليزي بيقول "الرجل الجوعان هو رجل غضبان" .... أدينا حذرنا
14- البوست المنتشر بتاع "كل الرجالة بتبص بس في راجل بياخد فكرة و راجل بياخد مقاسات" ده كلام فارغ ... كلنا بناخد مقاسات بس في مننا محترمين و في يدب في عينهم رصاصة
15- نص القواعد إللي إتكتبت فوق عن الأكل و ده له سبب ... الراجل بيحب الأكل أكتر من أي حاجة في الدنيا أكتر من الستات و العربيات و المنصب ... المنافس الوحيد للأكل النوم
16- أكاد أجزم إن كل الشرور و الآثام إللي في الدنيا سببها الأصلي راجل إتسأل و هوه داخل ينام هتصحي إمتي؟
17- الرجالة و همه في الـ personal space يا زينب بيبقوا طرش .. بالمعني الحرفي للكلمة ... لو عايزة حاجة تروحي بالراحة جدا و تتسللي من ورا العبيد إللي واقفين يهووا بمراوح ريش نعام جنبه و تفتحي كانزاية البيبسي المشبرة و تصبي بالراحة في كوبايته المفضلة من غير ما تتكلمي و تخرفشي بكيس اللب السوبر في نعومة و تفضي نصه في طبق صيني عشان يعمل صوت و تجيبي طبق كبير فشخ يرمي فيه القشر عشان ما يتعبش و هوه بيتف و بعدين بعدها بساعة تسأليه علي الحاجة إللي إنتي عايزاها هيرد من أول مرة
18- الستات بتعرف تفوق بنسبة 100% بعد الصحيان بعشر دقايق الراجل في جميع مراحل نموه من ساعة ما يصحي من النوم و لحد ما يوصل الحضانة أو المدرسة أو الجامعة أو الشغل و لمدة ساعتين تلاتة بيبقي مرشوش عليه بيروسول بس بكمية لا تكفي لقتله ... بصوا علي أي راجل ماشي علي رجله أو راكب مواصلات أو سايق عربية الصبح ... ذبابة تتعافي جزئيا من رشة مبيد حشري .
19- عايزة تخسري راجل إسأليه و هو لسه خارج من الشغل هتنزل بكرة الساعة كام ... و عايزاه يكرهك من قلبه و يأجر حد يقتلك إسأليه يوم الخميس هتزل الشغل يوم الحد الساعة كام
20- الرجل يذهب إلي التلاجة بحثا عن الحكمة .... لما تلاقي راجل فاتح التلاجة و واقف قدامها في خشوع إتركيه يخوض غمار التجربة الصوفية ... بعد شوية هتفهمي لوحدك ليه في أزايز مياه و علب عصير و أطباق فاضية في التلاجة .
21- الرجالة ما بتتكلمش في التليفون ... لا أوردر و لا دليفري و لا كلم خالتك و لا كلم صاحبك إللي رنلك أول إمبارح و لا خدمة العملاء و لا أي حاجة من دي ... لاحظي كده الراجل و هوه بيتكلم في التليفون هتلاقي عموده الفقري بيتقسم نصين و بيطلع من ضهره كائن أسطوري مجنح ... ده الكائن إللي بيتكلم و الراجل ساعتها بيكون في حالة ثبات .
22- الرجالة مش بيتفقوا مع بعض علي مواعيد للخروج و لا أماكن المقابلات الحاجات دي بتحصل رباني
23- دور البرد بيسحب الحياة من الرجالة زي الكريبتونايت بتاع سوبرمان بالظبط ... مفيش شد حيلك و قوم أتفرج علي التليفزيون و تعالي نخرج نقعد في الشمس و الكلام الفارغ ده ... برد يعني برد
24- الغالبية العظمي من الرجالة خرس ... و إللي بيتكلم مش بيتكلم في البيت ... أي محاولة لتغيير مجري الطبيعة هتؤدي إلي كوارث
25- أي محاولة لتغيير معلقتين السكر إلي معلقة واحدة أو الجبنة البراميلي إلي جبنة ملح خفيف أو البقسماط بالسمسم إلي بقسماط سن هتفشل .... و الكلام ده ينطبق علي أي حاجة تانية في حياة الراجل.
26- الرجالة بيفرفتوا و همه بياكلوا
27- في أي زمان و مكان و مهما كانت درجة تعقيد المشاكل مفيش حاجة ممكن تمنع الراجل إنه يبتسم قدام طبق بطاطس محمرة بتشر زيت .
28- حققي له الحاجة إللي كان محروم منها في بيت أهله ..... لأ مش القاذورات إللي في دماغك .... حمري كفتة بكميات كبيرة و إعملي صلصة قال يعني هتسقطيها فيها (بتعبير الأمهات) و خليه يعدي كل شوية يخطف كام صباع قال يعني مش واخدة بالك لحد ما يشبع منها و هيه ناشفة من غير صلصة .... و الله العظيم الراجل ده كائن أهبل :D :D
29- كل رجالة الجيل ده بيفكروا في المعاش المبكر و دي فكرة غير قابلة التحقيق لإننا يا إما هنموت من الجوع يا إما هنموت من الأمراض عشان مش هنلاقي فلوس الدوا ... و مع ذلك لما الراجل يقولك عايز أطلع معاش خديه علي قد عقله و قولي له إن شاء الله يا حبيبي زي اليومين دول السنة الجاية هتكون قاعد معزز مكرم في البيت .... و بعدين أدخلي الحمام "يلا يا عبيط يا ابن العبيطة هو احنا لاقيين ناكل أصلا جتها نيلة إللي عايزة خلف"
30- الراجل إللي بيسلك بلاعة مسدودة أو بيغير لمبة محروقة ده إنسان بكل ما تحمله الكلمة من معني
31- السوشي حلو ... حقيقي و الله حلو ... مشكلته الوحيدة إن الراجل بياكل بعيش أو بأرز فيا إما تاخدي معاكي رغيفين بلدي و تلاغي الجرسون بعشرين جنيه عشان ينزلهم مع الأكل يا إما تلاغيه برضه عشان يزود الأرز علي قد ما يقدر في السوشي فيبقي أقرب لمحشي الكرنب أو الفلفل الرومي
32- الرجالة ما بتتكلمش بعد الأكل
33- الراجل ممكن ينام في أي مكان في العربية في المكتب في المواصلات في الحمام ... فلما تلاقي الراجل نايم علي الكنبة أو علي كرسي سيبيه نايم ... "قوم نام في سريرك" بتاعة الأمهات و الزوجات سبب أساسي في عقوق الوالدين و الطلاق
34- لما راجل مصري يكلمك الساعة ستة و نص مساء و يقولك أنا علي الكوبري أو الدائري بقالي ساعة و نص الرد النموذجي بيكون "ملعون أبو دي بلد يا شيخ ده حاجة تقرف هنلاقيها من السواقة و لا من الشغل و لا من الأسعار و لا إيه و لا إيه إمتي بقي ربنا يتوب علينا و نسيب البلد دي" .... أي إجابة تانية غلط .... غلااااااط
35- تغيير مكان المحفظة أو الدبلة أو النضارة بالنسبة للراجل ده مشروع قومي بيتم بالتعاون مع اليونسكو فما بالك بتغيير مكان دولاب أو كرسي أو كنبة .... عايزة الراجل يقعدلك في البيت ما تشيليش حاجة من مطرحها
36- الكوليسترول و الدهون جزء أساسي من مكونات خلايا الراجل فبلاش الكلام الجارح بتاع الكالوريز و براد بيت و السيكس باكس عشان مش ناقصة سم بدن.
37- عايزة تعرفي الراجل بيحبك قد إيه خليه جاي من بره و مش شايف قدامه و حطيله الأكل و مع أول لقمة في بوقه قولي له عملت إيه في موضوع كذا إللي كلمتك فيه من كام يوم .... لو فضلتي عايشة يبقي بيموت فيكي و ده غالبا إللي بيحصل ... لو لا قدر الله السؤال طلع إنه القشة إللي قصمت ظهر البعير يبقي يا ريت الموضوع يقف علي قد طلاق بس
38- كيم كارداشيان خط أحمر
39- بالنسبة للراجل المصري في فجوة زمنية غير محسوبة من ساعات الخليقة إسمها الجمعة قبل الصلاة .... إقتراحات الفطار بره و التمشية و الشوبينج و الكلام ده تعمليه مع صاحباتك ... الفترة من ليل الخميس حتي ظهر الجمعة إعتبري الراجل فيها في رحلة صوفية لإكتشاف الذات زي الوقوف قدام التلاجة بالظبط
40- رجالة الجيل ده بالذات مش هيعمروا كتير إلحقي أقعدي معاه و كفاية هري و طلبات عشان تطولي عمره الإفتراضي شوية هوه أصلا كده كده بره الضمان
vaporwave
andulkaphoto
dededos
germansingergirl
jbbartram-illu
jacobvanloon
pixelskylines
ellievsbear
dailybridgerton
theartofmadeline
