Georgia for Liberty

[georgiaforliberty]

„დაიცავი თავისუფლებამ“ სავჩენკოს მხარდამჭერი აქცია კიდევ ერთხელ გამართა

პლატფორმა "დაიცავი თავისუფლების" ორგანიზებით, 21 მარტს, რუსეთის ხელისუფლების მიერ უკანონოდ დაპატიმრებული უკრაინელი მფრინავის, ნადეჟდა სავჩენკოს მხარდასაჭერი აქცია კიდევ ერთხელ გაიმართა. სწორედ ამ დღეს გახდა ცნობილი, რომ რუსულმა სასამართლომ სავჩენკო დამნაშავედ ცნო.

რუსეთის ყოფილი საელჩოს წინ შეკრებილ აქციის მონაწილეებს პლაკატები ეჭირათ წარწერით #FREESAVCHENKO. შენობასთან ანსამბლმა სუხიშვილებმა ხორუმი იცეკვა.

პლატფორმის მონაწილეებმა შენობას ასევე მიანათეს გამოსახულებები: თავისუფლება სავჩენკოს(Free Savchenko), შეაჩერე ყასაბი(Stop the Butcher) და ინდიფერენტულობა კლავს(Indifference Kills).

[georgiaforliberty]

"დაიცავი თავისუფლებამ" ნადეჟდა სავჩენკოს მხადასაჭერი აქცია გამართა

პლატფორმა "დაიცავი თავისუფლების" ორგანიზებით, 9 მარტს, რუსეთის ხელისუფლების მიერ უკანონოდ დაპატიმრებული უკრაინელი მფრინავის, ნადეჟდა სავჩენკოს მხარდასაჭერი აქცია გაიმართა. პლატფორმის მონაწილეებმა რუსეთის ყოფილი საელჩოს შენობაზე, სადაც ახლა შვეიცარიის საელჩოსთან არსებული რუსეთის ფედერაციის ინტერესების სექციაა განთავსებული, ღამით მიანათეს გამოსახულებები: თავისუფლება სავჩენკოს(Free Savchenko), შეაჩერე ყასაბი (Stop the Butcher) და ინდიფერენტულობა კლავს(Indifference Kills). "დაიცავი თავისუფლების" წარმომადგენლებმა აქციაზე შეკრებილებთან ერთად ფრანებიც გაუშვეს, რომლებზეც ნადეჟდა სავჩენკო იყო აღბეჭდილი. ამ გზით პლატფორმა შეუერთდა სავჩენკოს მხარდაჭერის გლობალურ ინიციატივას.

პლატფორმის წარმომადგენლის, თამარ ჩერგოლიშვილის თქმით, სავჩენკოს თავისუფლების დაცვა თავისუფალი სამყაროს ღირსების საქმეა.

"ნადია სავჩენკოს თავისუფლების დაცვა არის თავისუფალი სამყაროს ღირსების საქმე, ჩვენ თავისუფალი ადამიანები მოვედით თავისუფლების დასაცავად, ნადია სავჩენკოს - თანამედროვე გმირის თავისუფლების დასაცავად, აქ მთავარი პრობლემა, რაც ნადია სავჩენკოს შემთხვევაში, ისევე როგორც ზოგადად, უკრაინა-საქართველოს შემთხვევაში, გამოიკვეთა, არის ის, რომ დასავლეთი არ იღებს საკმარის ზომებს პუტინის შესაჩერებლად. დღემდე დასავლურ პრესაში საკმარისი სტატიებიც კი არ დაბეჭდილა სავჩენკოს შესახებ, ჩვენ იმედი გვაქვს, რომ გლობალური აქცია გამოაფხიზლებს საერთაშორისო საზოგადოებას და უფრო გადამწყვეტ ზომებს მიიღებენ. ვაპირებთ იმ წმინდა ასეულის პოატივსაცემად, რომელმაც მაიდანზე გაწირა თავი და სადაც ნადია სავჩენკოც იბრძოდა, ცაში გავუშვათ ასი ფრანი ნადია სავჩენკოს გამოსახულებით და ასე მოვითხოვოთ მისი თავისუფლება. მე მიმაჩნია, რომ სავჩენკო ბევრად თავისუფალია, მიუხედავად იმ ხელოვნური ბარიერებისა, რასაც პუტინი უქმნის. პუტინს შერჩა ანწუხელიძე, შერჩა ჯერჯერობით, ნახევარი მილიონი დევნილი, რომელიც ჩვენ გვყავს. პუტინს არ უნდა შერჩეს სავჩენკო იმიტომ, რომ ეს იქნება დასაწყისი ყველა იმ ადამიანის სახლში დაბრუნების, რომელიც პუტინის ძალისხმევით ვერ ბრუნდება საკუთარ სახლში", - აღნიშნა თამარ ჩერგოლეიშვილმა.

ნადეჟდა სავჩენკოს განაჩენს რუსული სასამართლო 21 მარტს გამოაცხადებს.

[georgiaforliberty]

აქცია ენერგეტიკის სამინისტროსთან — 13 ფაქტი გაზპრომის შესახებ

პლატფორმა "დაიცავი თავისუფლების" წევრებმა და სტუდენტებმა 4 მარტს ენერგეტიკის სამინისტროსთან (იუსტიციის სახლის შენობა) გაზპრომის საწინააღმდეგო აქცია გამართეს. მათ დაარიგეს ლიფლეტები - 13 ფაქტი გაზპრომის შესახებ.

გაზპრომის საწინააღმდეგო აქცია სახელმწიფო კანცელარიასთან კვირას, 6 მარტს, 14:00 საათზეც იმართება, რომელსაც "დაიცავი თავისუფლება" უერთდება.

[georgiaforliberty]

დაიცავი თავისუფლების წევრები სოფელ წეროვანში მცხოვრებ დევნილებს შეხვდნენ

პლატფორმა დაიცავი თავისუფლების წევრები 17 თებერვალს სოფელ წეროვანში იმყოფებოდნენ და ადგილობრივ მოსახლეობას მათ პრობლემებზე გაესაუბრნენ. დევნილები აქ 2008 წლის რუსეთ-საქართველოს ომის შემდეგ ცხოვრობენ.

წეროვნის მცხოვრებლები მძიმე საცხოვრებელ პირობებზე საუბრობენ და ამბობენ, რომ მათი ძირითადი პრობლემა დასაქმება და, შესაბამისად, მწირი ფინანსებია.

წეროვანში მცხოვრები დევნილები ჩივიან, რომ მათ მიმართ არც ადგილობრივი და არც ცენტრალური ხელისუფლების წარმომადგენლები ყურადღებას არ იჩენენ.

წეროვანის დევნილების დასახლებაში მოსახლეობის ნაწილს წლების განმავლობაში დაგროვებული კომუნალური გადასახადის გამო გაზი და ელექტროენერგია ჩაჭრილი აქვთ.

პლატფორმა დაიცავი თავისუფლება სოფელ წეროვნის მცხოვრებლების პრობლემების მოსაგვარებლად კამპანიის დაწყებას გეგმავს.

[georgiaforliberty]

გაზპრომთან მოლაპარაკებები მთავრობის კანცელარიასთან კიდევ ერთხელ გააპროტესტეს

16 იანვარს მთავრობის კანცელარიასთან პლატფორმა “დაიცავი თავისუფლების” და რამდენიმე არასამთავრობო ორგანიზაციის ორგანიზებით, აქცია-კონცერტი გაიმართა. აქციის მონაწილეებმა საქართველოს ხელისუფლების რუსულ სახელმწიფო კომპანია გაზპრომთან მოლაპარაკებები კიდევ ერთხელ გააპროტესტეს.

აქცია-კონცერტში მონაწილეობდნენ მუსიკოსები - ერეკლე დეისაძე, სანდრო სულაქველიძე, ქეთათო, ბორის დენისი და ჯგუფი ეპილონი, გამოუვალი მდგომარეობა და სხვები.

“მაშინ, როდესაც აზერბაიჯანი მზად არის, ნებისმიერი რაოდენობის ბუნებრივი აირი მოგვაწოდოს, ჩვენი ხელისუფლება აწარმოებს გასაიდუმლოებულ მოლაპარაკებებს ქვეყანასთან, რომელსაც ოკუპირებული აქვს ჩვენი ტერიტორიები და დღემდე აგრძელებს აგრესიულ პოლიტიკას საქართველოს მიმართ.

გაზპრომთან მოლაპარაკებები და რუსული გაზის საქართველოში შესაძლო იმპორტი საფრთხეს უქმნის საქართველოს ენერგოუსაფრთხოებას, ჩვენს ევროატლანტიკურ კურსს და, შესაბამისად, ჩვენი ქვეყნის დამოუკიდებლობას.

ჩვენ, მუსიკოსები და რამდენიმე არასამთავრობო ორგანიზაცია, ვატარებთ გამაფრთხილებელ აქცია-კონცერტს და იმედს ვიტოვებთ, რომ საქართველოს ხელისუფლება შეწყვეტს ოკუპანტთან მავნებლურ მოლაპარაკებებს, წინააღმდეგ შემთხვევაში, ჩვენი პროტესტი უფრო მტკიცე და მკაცრი გახდება.

დროა, დავანახოთ ჩვენი ქვეყნის მმართველებს, რომ ჩვენ ბევრნი ვართ და ჩვენი ნებართვის გარეშე ისინი ვერ მიიღებენ მსგავს გადაწყვეტილებას, ჩვენგან კი მათ ეს ნებართვა არ ექნებათ! ვფიქრობთ, რომ არ გვაქვს პასიურობის უფლება, შემოგვიერთდით, დაიცავით თავისუფლება!”, - აცხადებდნენ აქცია-კონცერტის ორგანიზატორები და მონაწილე მუსიკოსები.

აქცია-კონცერტის დაწყებამდე სახელმწიფო კანცელარიის შენობასთან შეკრებილებს პლატფორმა “დაიცავი თავისუფლების” მონაწილე ნინო დანელიამ მიმართა. მან კიდევ ერთხელ აღნიშნა, რომ გაზპრომთან მოლაპარაკებებს ქვეყნისთვის ძალიან მაღალი პოლიტიკური რისკი აქვს.

“ჩვენ ყველამ ვიცით, აქ რატომ შევიკრიბეთ - რომ დავიცვათ ჩვენი ქვეყანა, სამწუხაროდ, არა მტრისგან, არამედ ჩვენი კოლაბორაციონისტი ხელისუფლებისგან. ძალიან ხმამაღლა უნდა ვუთხრათ ჩვენს ხელისუფლებას, რომ არ გვინდა გაზპრომის გაზი. რატომ?! იმიტომ, რომ გაზპრომი არის კრემლის და პუტინის პოლიტიკური იარაღი; იმიტომ, რომ ამ გაზს ჩვენთვის აქვს ძალიან მაღალი პოლიტიკური რისკი, ჩვენ ვერ გავრისკავთ ჩვენი ქვეყნის თავისუფლებით. რუსეთი არის არასაიმედო პარტნიორი, ეს მან ძალიან კარგად გვაჩვენა და თან არაერთხელ. ჩვენ გავიყინეთ 2006 წელს. გაზპრომმა გაგვყინა 2006 წელს, გამოგვიყარა ჩვენი მოქალაქეები სატვირთო თვითმფრინავებით, გადაკეტა ბაზარი; თქვა, რომ თურმე ჩვენი პროდუქტი მავნებელია. სწორედ ამიტომ, ჩვენ არ გვინდა დავუშვათ ის, რომ რამენაირი მანიპულირების საგანი გახდეს ჩვენი ქვეყანა რუსეთისთვის და ზუსტად ვიცით, რომ გაზს რუსეთი იყენებს მანიპულაციისთვის”, - მიმართა დანელიამ კანცელარიასთან შეკრებილებს.

პლატფორმა “დაიცავი თავისუფლების” გარდა, აქციის ორგანიზატორები იყვნენ: ჩვენი თავისუფლება, საზოგადოებრივი ინიციატივა, ახალგაზრდა ინიციატორთა კლუბი, უსაფრთხოების საკითხების კვლევის ინსტიტუტი, სამოქალაქო ალტერნატივა და ევროპული კვლევების ინსტიტუტი.

აქციამდე, 14-15 იანვარს ორგანიზატორებმა თბილისის ქუჩებში გაზპრომის საწინააღმდეგო საინფორმაციო კამპანიაც გამართეს.

საქართველოს ხელისუფლება კვლავ ამბობს, რომ აზერბაიჯანიდან შემოტანილი გაზი არსებულ მოთხოვნას ვერ აკმაყოფილებს და საჭიროა დეფიციტის გაზპრომის გაზით შევსება.

[georgiaforliberty]

გაზპრომის საწინააღმდეგო პოსტერების გაკვრისთვის პლატფორმის მონაწილეები დააკავეს

16 ოქტომბერს პლატფორმამ „დაიცავი თავისუფლება“ თბილისის სხვადასხვა უბანში რამდენიმე აქცია გამართა.

მთავრობის კანცელარიასთან გამართულ აქციაზე პლატფორმაში ჩართულმა სტუდენტებმა სიმბოლურად გაზის ბალონები მიიტანეს. ისინი ამბობდნენ, რომ რუსულ სახელმწიფო კომპანია გაზპრომთან საქართველოს ხელისუფლების მოლაპარაკებები ქვეყნისთვის საფრთხის შემცველია.

სტუდენტებმა ბიძინა ივანიშვილის ბიზნესცენტრთანაც გამართეს აქცია. მათ ადგილზე ბანერი მიიტანეს წარწერით „გაზპრომი - საქართველოს ფილიალი“.

ამასთან, სტუდენტები გაზპრომის საწინააღმდეგო პოსტერების გაკვრას თბილისის სხვადასხვა უბანში გეგმავდნენ. ოპერის შენობასთან მდებარე სამშენებლო ღობეზე პოსტერის გაკვრისთვის პოლიციამ სტუდენტი სალომე ხვადაგიანი, ტელეკომპანია ტაბულას დირექტორი თამარ ჩერგოლეიშვილი და ამავე არხის გენერალური პროდუსერი ლექსო მაჭავარიანი დააკავა, რომლებიც პლატფორმა „დაიცავი თავისუფლების“ მონაწილეები არიან. მათ თვითმმართველი ერთეულის დამახინჯებას ედავებოდნენ. დაკავებულები ხელწერილით გაათავისუფლეს.

აქციის მონაწილეების დაკავებასთან დაკავშირებით განცხადებები გაავრცელეს არასამთავრობო ორგანიზაციებმა და სახალხო დამცველმა.

სახალხო დამცველის მოსაზრებით, პოლიციის ქმედება გაუმართლებლად ზღუდავდა სიტყვის თავისუფლებას.

საქართველოს ახალგაზრდა იურისტთა ასოციაციის განცხადებით, პლატფორმის მონაწილეების დაკავება მიანიშნებდა იმაზე, რომ ხელისუფლება შერჩევითად იყენებს კანონს.

საერთაშორისო გამჭვირვალობა საქართველო კი თვლიდა, რომ ერთ-ერთი ყველაზე კრიტიკული ტელეკომპანიის წარმომადგენლების დაკავებისას, შინაგან საქმეთა სამინისტრო ვალდებულია, დაასაბუთოს, რატომ იყო ადმინისტრაციული დაკავების გამოყენება ერთადერთი აუცილებელი და პროპორციული ზომა.

სასამართლომ თამარ ჩერგოლეიშვილი და ლექსო მაჭავარიანი სამართალდამრღვევებად ცნო, თუმცა, მათ პასუხისმგებლობა არ დააკისრა. სტუდენტ სალომე ხვადაგიანის სასამართლო პროცესი კი გადაიდო და 25 დეკემბერსაა ჩანიშნული.

[georgiaforliberty]

პლატფორმამ "დაიცავი თავისუფლება" აქცია "არა გაზპრომს!" გამართა

18 ნოემბერს სოლოლაკში, ბიძინა ივანიშვილის ბიზნესცენტრის მიმდებარე ტერიტორიაზე პლატფორმამ "დაიცავი თავისუფლება" გაზპრომთან მოლაპარაკებების საწინააღმდეგო აქცია გამართა. პლატფორმის მონაწილეების განცხადებით, წლის ბოლომდე ხელისუფლება რუსულ სახელმწიფო კომპანია გაზპრომთან ხელშეკრულებას გააფორმებს, რაც ქვეყნის სახელმწიფო ინტერესებისა და ენერგოუსაფრთხოების ვიწრო პოლიტიკურ ინტერესებზე გაცვლას ნიშნავს.

"საქართველოს ხელისუფლება დეკემბრამდე აპირებს გაზპრომთან ხელშეკრულების გაფორმებას. ეს მაშინ, როდესაც აზერბაიჯანის პირველი პირი მზადაა, ნებისმიერი მოცულობის ბუნებრივი აირი მოგვაწოდოს. რუსული გაზი ძვირია და არასტაბილური. ის შანტაჟის იარაღია. აზერბაიჯანული გაზი იაფია და სტაბილური. რუსეთსა და აზერბაიჯანს შორის არჩევანის რუსეთზე შეჩერება აშკარად მიუთითებს იმაზე, რომ გადაწყვეტილება პოლიტიკურია და არა ეკონომიკური. ამ გადაწყვეტილების პოლიტიკურ ხასიათზე მიუთითებს მოვლენების დინამიკაც - რუსთავი 2-ის NTV-ს სცენარით წართმევის მცდელობა, პროდასავლური პოლიტიკური ძალების დევნა, პროდასავლური არასამთავრობო ორგანიზაციების დემონიზების მცდელობა, თავდასხმები დასავლელ პარტნიორებზე - ხელისუფლების წევრები ღიად საუბრობენ "სუვერენულ დემოკრატიაზე" და დასავლეთის "ჩარევის" დაუშვებლობაზე. არ მივცეთ რუსეთს საქართველოს შანტაჟის დამატებითი იარაღი! ნუ დავისუსტებთ თავს!", - ამბობდნენ პლატფორმის მონაწილეები.

ბიზნესცენტრის მახლობლად, თბილისის მონუმენტთან რამდენიმე ასეული ადამიანი შეიკრიბა. მათ გაზპრომისა და ბიძინა ივანიშვილის გამოსახულებიანი ფრანები გაუშვეს.ცნობისთვის, ენერგეტიკის სამინისტროს ინფორმაციით, გაზპრომთან კონტრაქტის ხელმოწერის თარიღი მალე გახდება ცნობილი.

[georgiaforliberty]

პლატფორმამ „დაიცავი თავისუფლება“ ხელისუფლების Gazprom-თან მოლაპარაკებები გააპროტესტა

7 ოქტომბერს პლატფორმამ „დაიცავი თავისუფლება“ მთავრობის კანცელარიასთან რუსულ სახელმწიფო კომპანია Gazprom-თან საქართველოს ხელისუფლების მოლაპარაკებები გააპროტესტა. აქციას რამდენიმე ათასი ადამიანი დაესწრო. აქციის ორგანიზატორების მოსაზრებით, Gazprom -თან მოლაპარაკებები ქვეყნის ენერგოდამოუკიდებლობას მნიშვნელოვან საფრთხეს შეუქმნის.

"საქართველოს თავისუფლება საფრთხეშია - ხელისუფლებას გაზპრომის ხაფანგში შევყავართ. რუსული გაზი პუტინის გეოპოლიტიკური იარაღია. GAZPROM-ზე დამოკიდებულება ნიშნავს დამორჩილებულ, ღარიბ, გაყინულ და ბნელ საქართველოს.

საქართველოს ენერგოდამოუკიდებლობა ჩვენი ხალხის მონაპოვარია. ჩვენ ის არ უნდა დავთმოთ", - ამბობდნენ ორგანიზატორები.

აქციაზე სიტყვით გამოვიდნენ როგორც პლატფორმა „დაიცავი თავისუფლების“ მონაწილეები, ასევე სამოქალაქო საზოგადოების წარმომადგენლები.

ფაქტები

ენერგეტიკის მინისტრი კახა კალაძე ამბობდა, რომ "თუკი GAZPROM-ისგან მეტ რუსულ გაზს წამოვიღებთ, ეს ძალიან კარგი იქნება". დივერსიფიკაციის აუცილებლობაზე საუბრობდნენ ეკონომიკის მინისტრი დიმიტრი ქუმსიშვილი, ენერგეტიკის მინისტრის მოადგილე ილია ელოშვილი. ელოშვილი საზოგადოებას პრაგმატულობისკენ მოუწოდებდა და ამბობდა, რომ "პოლიტიკა და ეკონომიკა უნდა გაემიჯნათ."

საპარლამენტო უმრავლესობის წევრი თამაზ მეჭიაური ამბობდა, რომ "მთელი ევროპა რუსულ გაზზეა და ის ამით არ დაქცეულა." ადამიანის უფლებების დაცვის კომიტეტის თავმჯდომარე ეკა ბესელია Gazprom-თან მოლაპარაკებებზე ამბობდა, რომ "მთავარია, მოსახლეობა უზრუნველყოფილი ყოფილიყო."

საპარლამენტო უმრავლესობის წევრი ზურაბ ტყემალაძე მოსახლეობას ამშვიდებდა, რომ "გაზის მილში ბომბი არ გამოცურდებოდა."

ენერგეტიკის მინისტრმა Gazprom-თან მოლაპარაკებებზე მოგვიანებით კიდევ ერთი განცხადება გააკეთა, დივერსიფიკაციის საჭიროებაზე ისაუბრა და აღნიშნა, რომ, მათ შორის, კომერციულ კომპანიებსაც შეეძლოთ რუსეთიდან ბუნებრივი აირის წამოღება. 12 ოქტომბერს კი მან განცხადება შეცვალა და თქვა, რომ საუბარი მხოლოდ კომერციულ გაზზე იყო.

ხელისუფლება Gazprom-ის წარმომადგენლებთან შეხვედრას კვლავ გეგმავს.