شفت وحده تكتب مذكراتها بطريقه شاعريه وحلوه وفهمت اختلاف اسلوبها وحبيته وتمنيت ان مذكراتي مثلها ولكن اتوقع هذي مميزات مذكرات كل أحد مننا، صح؟
المهم كيف حالكم آل تمبلر من زمان عنكم؟
المهم مذكراتي وخواطري قررت تكتب اليوم والآن …
جالسه اشوف هالفتره الزمنيه من حياتي ويارب لك الحمد ماتخلى من المواقف واللحظات والذكريات السعيده ولكن فيه أمور بعيدة المدى مو جالسه تتجه للإتجاه الصحيح .. وأحد هذي الأمور علاقاتي
ولعل الموضوع أثّر علي وأعياني تفكير خصوصاً لمّا سمعت عن دراسه سوتها جامعة هارفرد إن أحد أسباب السعاده في الحياة هي علاقات الواحد ومجتمعه …
فحسيت بعدم الرضى عن وضعي جداً وضرورة تغييرة، ولكن كيف؟ خصوصا إن معروف تكوين العلاقات والصداقات يزيد صعوبة مع العمر واضيف عليها في مجتمع اصلاً غير اجتماعي مثل أهل الرياض
مثلاً أحد الاقتراحات لتكوين العلاقات هو في الأندية الرياضية … وفعلاً فيه بنت كتكوتة معي في النادي يصادف كل مره أروح لنادي اشوفها ولعل لمّا التفت ألقاها تطالع فيني … استألفتها جداً وبغيت أسوي حركات البنات الصغار وأقول لها:" تصيرين صديقتي؟"
وطبعاً ماسويت كذا لأن الصفعات اللي استلمتها من أهل الرياض من ناحية المبادرات والتواصل المجتمعي كانت كافية تماماً.
اذكر من عاداتنا في مدرسة لما كنت ادرس في محافظة صغيره وهي الخرج … واهي اذا انا مثلاً قابلت بنت أعرفها كصلة قرابة في المدرسة ويصادف معها صديقاتها وأنا صديقاتي … لاهي تعرف صديقاتي ولا أنا اعرف صديقاتها ولكن كلنا نسلم على صديقات بعض من باب الإحترام لكل الأطراف
فمره في الرياض طبعاً … كنت طالعه ما اختي وقابلنا صديقتها (نون) اللي معها بنت خالتها
فأنا سلمت على صديقة إختي (نون) ومن باب الأدب وكطبع بنت القرى والمحافظات سلمت على بنت خالتها. لدهشتي مامدت يدها ولكن اصلاً انا كنت بسلّم عليها خد فسلمت عليها ولكن كانت مثل الخشبة ولما بعدت جلست متأففه وماتطالع فيني.
الموقف أخذ دقيقه او اقل ومر عليه فوق الخمس سنوات أو اكثر ولكن للآن اتذكر تفاصيله كأنه امس… وقفتها وعبايتها وكل شيء
أي أذى أنا سببته لها عشان تقابلني بأذيه مماثلة؟ أعرفها اصلا؟ ايش مقدار الشر اللي يكون داخل إنسان يخليه يرفض السلام ويقدّم الأذى بدلاً عنه؟
وبعد لصداقه قريبه نوهت على البنت من الاشياء اللي تخليني أسحب نفسي من أي علاقه وخلتني أخسر علاقه استمرت سنوااااات إني ما أحب أحد يوعدني بطلعه ويكنسل قبل الموعد بساعه أو اقل
ولعل هذا الموضوع جداً تكرر منها أكثر من مره متتالية وكل مره هي تطلب اللقاء أقول لنفسي عن ضرورية الرفض ولكن في النهاية أوافق من باب الإحترام لدعوتها عشان في النهاية تكنسل على آخر لحظة!
عشان كذا بردت من ناحية العلاقات …
يمكن الوضع اللي وصلت له سببه هو الخوف من الرفض، ولكن إكتفيت تماماً … لأني دائماً أقول العائله ثم العائله ثم العائلة
وهذا الي وعّاني لمّا اختي الله يتمم عليها الشفاء شُخّصت بسرطان الغده الدرقية
فبعد عملية ازالة الغدّة شفت المحبّة من الناس اللي هم اصلاً اقارب وعائلة
ولمّا امتلى بيتنا ورد … عرفت ان يمكن دراسة هارفاد مفادها ان العلاقات مو الناس اللي تطلع معهم مقاهي او مطاعم او تسافر معهم
ولكن فكرة انك تكبر وتدري أن لو -لا سمح الله- يوم في الأيام تجرّده من كل شيء تملكه سوى الملابس اللي عليك تدري أن في وراك ناس ياخذونك في الأحضان
وعموماً في خاطري إن يمكن انا في مرحلة جالسه أتخفف من الناس لأن في مرحلة إنتقالية أحتاج ناس جديدة تكون فيها …
ولكن بيجون هذولي الناس ويلقون لهم مكان شاغر
stormborns
tangentwithtanner
blakekathryn
yousharknotpass
discoholicmusic
