كتير قريت أشياء عن الأرت بلوك لأعرف شو سببها وكيف عالجها …
بس اكتشفت إنه البلوك أو الاحساس الي بخلينا نوقف قدام الورقة الفاضية كأنه واقفين قدام وحش كبير رح ياكلنا وإحساس العجز والخوف إنه الشي الي رح نرسمه ما حيكون مكافئ لقدراتنا أو انه ما في وقت وما في مكان كل هالأشياء الي بتمنعنا عن الرسم بحرية هي شي طبيعي جداً جداً وما بتصير بس مع الرسم ولا مع الكتابة ولا مع التصوير مثلا ولا مع أي شي اله علاقة بالفن ..
هي فترة زمنية لااازم نمر فيها بكل شي بحياتنا ..
ممكن بعد ما نقدم شي أخد منا مجهود كبير أو لما نعمل شي حلو..
بتصير ممكن مع الطبخ , إي في أيام بطبخ بمزاج وطول الأسبوع كل يوم اكلة شكل وشي مرتب وبيفتح النفس فجأة ببطل اعرف شو لازم اطبخ وشو الخضرا الي ممكن اني اشتريها من السوق وحتى بصير مالي نفس انزل عالسوق ,
, وبالتعامل مع الناس في شخص مثلا ممكن نقعد فترة طويلة متفاهمين ومبسوطين والدنيا عال العال فجأة بتكش نفسي منه وبصير بدي اقعد مع حالي وبطل حاكيه ,
مع بنتي ممكن نكون كتير متفاهمين وطول الوقت هاديين ومبسوطين ومنتفاهم بسلاسة فجأة بصير مو عرفانة اتعامل معها , وقيس على ذلك ..
هلأ وبعد هالحكي كله شو الخلاصة !!
شو سبب هالحالة !!
سبب هالحالة إنه إنت مخك وجسمك من حقهن يرتاحوا ومن حقك ما تكون مثالي ومن حقها الأمور تعك معك , وغير هيك إنت طول الوقت مخك عم يستقبل معلومات ويحلل , كيف بده يصير الإبداع إزا مخك ما اخد استراحة واخد وقته ليرتب هالمعلومات الجديدة بشكل بيناسب طريقة تفكيرك ونمط ابداعك , الفترة الي بتكون فيها عم تمر بارت بلوك بالحقيقة انت بتكون عم تتهيأ لقفزة جديدة بالشي الي عم تقدمه هاد إزا انت فهمت هالحالة صح وعرفت تتعامل معها بالطريقة الصحيحة ..
هلأ مبدأيا فهمنا شو هي الارت بلوك وشو سببها وممكن يكون الها اسباب كتير تانية , نفسية وفيزيولوجية وبالبيئة الي حوليك بس إزا كان كل شي تماما عندك ومريت بهالحالة اعرف انه في شي حلو عم ينطبخ بين اصابعك الي جمدوا وما عاد عرفوا يمسكوا القلم أو الفرشاية ..
بس شو بدنا نعمل معها ؟
, في كتير خطوات عملية ومالية الانترنت بس الحل باختصار انك تاخد وقت استراحة وترجع بعدها للمارسة بس بذهن متفتح ومتقبل لإنه ممكن لما ترجع ترسم ايديك وابداعك رح يخذلوك خصوصاً ازا طولت معك هالحالة فلازم ما تستنى من العمل الي رح تنتجه إنه يكون مثالي أو يخلص بجلسة وحدة أو تكون مستمتع وغارق فيه وانت عم تعمل ..
الحل إنك ترسم , ترسم كتير , ترسم أي شي بأي شي ووين ما كان , بس ارسم ..
وجسمك من حقهن يرتاحوا ومن حقك ما تكون مثالي ومن حقها الأمور تعك معك
