Kari kan 'kje koka - ein matblogg?

[karikankjekoka]

Grønnsakssuppa 1) spis ein Skyr, sidan du er skrubbsvolten og risikerar å skjera deg i fingrane om du ikkje et noko.

2) Kok opp mellom ein halv og ein heil liter vatn og hiv oppi ein buljongterning (grønnsak) som gjekk ut for lenge sidan for å sjekka at den ikkje er harsk. Sats på at den er grei.

3) Vurder Toro Tomatsuppe.

4) Skrell og skjer i terningar ynskja mengd grønnsaker. I dag: Gulrøter (4), kålrot (ein del), potet (2), purrelauk (ca ein halv), persillerot (ei lita). Hiv alt i kjelen.

5) Hiv oppi 5 fårepølseskiver i bitar som er i ferd med å gå ut på dato. Lat som om det er for å få betre smak. 

6) Kok til mørt og hiv oppi masse peppar, smak til med salt.

[karikankjekoka]

Spagetti av svarte bønner

Eg har fått bønnespagetti til jul av Mia Julie (smart dame, bakar gode brød). Hurra! Hjelp! Kva? Godt? Spanande i alle fall :D Saman med spagettien var det med ei superenkel oppskrift som eg ikkje klarte følga. Skulle mellom anna hatt parmesan (brukte ei skive vellagra Norvegia, ikkje med på biletet), cherrytomater (brukte plommetomater), kvitlauk (låg att i kjøleskåpet) og olivenolje (hadde berre rapsolje). Av ting som ikkje stod i oppskrifta så la eg til brokkoli, og eg krydra tomatene med pepar.

Ganske godt vart det likevel, men ser i ettertid at det hadde vore lurast å legga dei steikte tomatene oppå spagettien.  Coop premium eplejuice som drikke

[karikankjekoka]

Spagetti og tomatsaus. Alle klagar alltid over at det er vanskeleg å finna ut kor mykje spagetti ein treng. Det er enkelt. Bruk les på pakken og bruk ei vekt. Eg... eg lagar ca 3 gonger meir saus enn eg treng :P Brun kjøttdeig og lauk. Ha oppi tomater (ferske eller på boks). Eplejuice døyvar det sure (Triks frå pappa, smart fyr, likar reinsdyrsgryte). Hiv oppi det du måtte ynskje av krydder og andre ting (i denne er det kvitlauk, sopp, gulrøtter, rosiner, cashewnøtter, provance-krydder, laurbærblad og salt). La det koka så lenge som du orkar å venta (eller til spagettien er ferdig). For tjukkare saus: tomatpuré. Ha oppi paprika eit par minutt før servering (Triks frå mamma, smart dame, likar kompott). 

[karikankjekoka]

Bananpanneker er kjempegodt! (og om du ikkje klarar å snu dei i lufta, slik at dei endar i ei rukke som aldri går frå kvarandre, kan du trykke dei inn i eit Mikke Mus-vaffeljern :D )

[karikankjekoka]

Kyllingsalat med sjølvkomponert sennep/honning/balsamico/liksomrømmefråvita-dressing. Ganske bra, dressingen får trekk for farge. 

[karikankjekoka]

Karbonadar Eg har ikkje lagt ut noko på ei stund, sidan mobilen tok kvelden i påska, men to dagar før den gjorde det så laga eg karbonadar! Det er ikkje fyrste gong eg har prøvd det, men denne gongen vart det hakket meir vellukka enn forige gong (Trur eg. Eg fekk smaka ein kvart karbonade). Fordi eg har eit ynskje om å ha lauk i nesten alt, så vart det med lauk.  Blanda ein pakke karbonadedeig med lauk, salt, pepar og litt vatn og steikte dei i steikepanne på gasskomfyr til dei var gjennomsteikte. Fekk smaka på ein kvart karbonade, for det var berre 12 karbonadar og 26 mennesker som skulle ha mat :P Smakte ganska bra, så eg skal prøva på ny seinare :) Pappa hadde laga laksepakkar og det var heftig pølsegrilling på bålpanna, så alle fekk mat.

[karikankjekoka]

Pasta Carbonara

Det ser mykje betre ut på ein talerken, ikkje sant?

Her var det himla mange oppskrifter. I følge MatPrat skulle eg ha bladpersille oppå, eg skulle berre bruka eggekvita og eg skulle ha lauk i. Melk.no sa at eg skulle bruka heile egget og ikkje ha lauk i. Ei anna nettside sa at eg skulle ha erter i. Frå bollar til burritos sa at eg skulle bruka eggeplomma, og at eg kunne bruka mjølk i staden for fløyte. Ikkje lauk. Eg skulle brukt tagliatelle eller spagetti, men eg hadde berre sløyfer. Hadde ikkje meir kvitlauk på glas :(

Enda opp med: Heilt egg, mjølk, bacon, lauk og parmesan. 1) Kok pasta 2) Steik hakka lauk og bacon 3) Bland egg, mjølk og ost 4) Hell dette over lauken og baconet 5) Bland i pastaen 6) Hugs pepar til slutt. Hadde moglegens ikkje nok ost, det smakte ikkje så mykje. Heilt ok. Balsamicoeddik i salaten overdøyvde nok ein del (men det er så godt!).

Salat med pikantblanding (ny favoritt), cherrytomater, agurk, paprika, vårlauk. Dessert: Eit glas skumma kulturmjølk med bringebærsyltetøy.

[karikankjekoka]

Hamburger i pitabrød Caroline (Smart dame. Likar ikkje rå paprika.) tipsa meg om å ha hamburger i pitabrød i staden for hamburgerbrød. Funka veldig bra, men det var ikkje plass til så mykje salat sidan eg brukte ein karbonade, så eg laga ein (salat) ved sida av. Hamburger: Pitabrød varma i steikomn Karbonade, varma i steikepanne (go’og mager frå Gilde) Salat (pikantblanding frå Coop) Mais (fordi det er eit pitabrød) Agurk Paprika Ketchup Salat: Cherrytomater Vårlauk Salat (pikantblanding frå Coop. Denne var god!) Kvitlauksfedd i olje  Balsamicoeddik Drikke: Vatn

Var så svolten at eg tok ein bit før eg hugsa at eg kanskje burde ta eit bilete...

[karikankjekoka]

Hurra! Eg fekk pappa til å ta med ei eska med bøker for meg då han drog til fjells, sidan eg og skulle opp, så no er kokebøkene mine i hus :D

[karikankjekoka]

Middag hos syster mi førre fredag. Steikte brokkoli, gulrøter og purrelauk, kokte nudlar med eit egg blanda inn og ein liten pose teriyaki-saus.  Blanda alt i steikepanna.