《白色強人》下周一首播 重溫無綫經典醫生角色
專業人員題材嘅劇集一向有收視保證，而以醫療題材作為背景嘅《白色強人》，即將於下星期一緊接《婚姻合伙人》播出。《白色強人》係今年無綫嘅重頭劇之一，仲搵埋視帝視后助陣，有郭晉安、唐詩詠、李佳芯、馬國明、何廣沛、蔣志光及馮盈盈等人主演。劇情除咗講醫生救急扶危之外，仲會探討埋醫療改革問題。其實無綫過往都有唔少以醫療為題嘅劇集，當中造就唔少經典嘅醫生角色，不如今日就一齊重溫吓啦！
程志美《妙手仁心》（吳啟華飾） 一件白袍配副金絲眼鏡嘅專業醫生樣，就係吳啟華喺劇集《妙手仁心》系列演程至美（Paul）醫生嘅造型。由吳啟華飾演嘅Paul係一名腦外科醫生，俾人感覺做事認真，又有責任感嘅人，加上佢仲對女朋友感情專一，形象極之討好。其實啟華以前好多劇集角色多數都係反派，佢參與《妙手仁心》後一洗過往形象，成為師奶殺手。
唐姿禮《妙手仁心》（蔡少芬飾） 蔡少芬（Ada）喺《妙手仁心》飾演嘅急症室醫生唐姿禮，唔少網民都話佢係無綫劇集嘅女醫生形象最好嘅一個，顏值仲要超高。喺劇中佢係程至美嘅女朋友，不過患有動静脈血管畸型，需要做手術，昏迷好甦醒。不過可惜喺《妙手仁心II》被濃煙嗆傷而死亡。Ada成功憑擺脫以往扮演舞女及撈女等角色形象，而且更令佢係無綫奠定花旦地位。
黎國柱《妙手仁心》（林保怡飾） 林保怡喺劇中飾演急症室高級主診醫生黎國柱（Henry），深受女護士歡迎，喺劇中同陳慧珊飾演嘅大律師Annie係情侶關係，可惜最後分手。劇中充滿自信、做事專業、處事低調不誇張，不過就對好多事從來都不愛解釋。保怡更因為劇集《妙手仁心》反應唔錯，成為唔少觀眾心目中「最帥嘅醫生」。
萬安生《妙手仁心 II》（邵美琪） 邵美琪飾演婦產科醫生萬安生（Anson），喺劇集入面成功營造一個女強人感覺，而且好有正義，好肯幫朋友，劇中更同曹永廉係一對情侶後成為夫婦。劇中嘅邵美琪係女強人，而現實中好多人都知道佢同鄭伊健有過一段7年情，最巧合嘅係佢竟然同現任「伊健嫂」蒙嘉慧有五次一齊同場合作，分別係《妙手仁心III》、《通天幹探》、《廉政行動2004》及《廉政行動2009》。二人相當大方，而且唔係敵人仲要係朋友。
葉淘《妙手仁心 III》（吳美珩飾） 一直充滿仙氣，深受好多觀眾愛戴嘅吳美衍，係1996年國際華裔小姐競選亞軍，參選後加入TVB。本身佢有種古典氣質，喺《妙手仁心 III》飾演骨科高級醫生葉淘Sarah，一穿上雪白嘅醫生袍，即刻令人好想尖叫，而且俾人感覺仲好專業。劇中佢更與Henry拍拖，雖然仍然喜歡對方，不過最後因為了解而分手。
高立仁《仁心解碼》（方中信飾） 方中信喺劇中飾演精神科醫生高立仁，形象好深入民心。劇中同蔣志光及黃浩然更係「沙煲兄弟」。佢俾狂徒用介刀介親，迫逼拎拐杖嘅形象深入民心，而且佢每次親自查難雜證都會寫好多資料寫白板上。劇中更與患有家族遺傳精神分裂症嘅重案組探員莫敏兒（徐子珊）拍拖，其後更結為夫婦，不過可惜最後都係陰陽相隔。
范子妤《On Call 36小時》（楊怡飾） 楊怡喺劇中飾演一位好出色嘅醫生范子妤「魚仔」，更因為一次放工時發現有途人昏迷，經過檢查原來病人係心包出血，佢更決定為病人做心包穿刺後病人康復，後期正式成為心胸肺外科。不過「魚仔」後期患上脊髓內腫瘤，更要丈夫「一件頭」（馬國明飾）親自為佢開刀做手術。劇中楊怡演得出色，而拍劇集時更同羅仲謙撻上，二人更於2016年成為真正夫婦。
張一健《On Call 36小時》（馬國明飾） 第一輯中飾演一個實習醫生「一件頭」嘅馬國明，劇中同楊怡有一段情後成為夫婦，而第2輯佢更成為精神科醫生。有觀眾好細心睇得出馬國明由第一輯係一位實習醫生，去到第二輯成為正式醫生嘅演技進步。有集講到一件頭嘅太太魚仔（楊怡飾）患脊髓內腫瘤，佢更為太太親自開刀。呢一幕都令唔少觀眾對馬國明加分，覺得佢既靚仔、演技又出眾。
王甫芬《天涯俠醫》（張家輝飾） 張家輝係劇中一名性格幽默又開朗嘅婦產科醫生王甫芬，人稱草龍醫生。會天生樂於助人、醫術精湛，自細就被爸爸嚴師出高徒。劇中有同梁詠琪及郭羨妮（Sonia）有感情戲。喺劇中佢為咗完成夏曉彤（梁詠琪飾）嘅遺願，於是加入生命動力成為無國界醫生。當中以汽車電壓做心臟電擊器，及用草藥當麻醉劑嘅一幕，令電視機旁嘅觀眾嘆為觀止。
齊百恒《天涯俠醫》（林峯飾） 心內科醫生齊百恆（林峯飾）天資既聰明，出身於有錢家庭，不過最後父母因為性格不合導致分開。喺生命動力中認識婦產科醫生王甫芬。兩人更因為種種事情，更認識到生命嘅意義。已經離巢嘅林峯喺今年3月返「娘家」無綫，今年年中就會為《使徒行者3》進行拍攝，相信好快就可以喺電視機睇到佢嘅新作啦！