Sampung bagay na itinuro sa’kin ng Pag-ibig
Una, magbigay…ang mga kamay ng umiibig ay hindi basta mga kamay kundi mga puno na nakatirik sa matabang lupa. Patuloy ang pamumunga para sakanya. At sa paghahandog at sakripisyo ay lalo itong lalago pa. Ang tunay na umiibig hindi basta nalalanta.
Pangalawa, magtiis…yakapin ang ligaya maging ang kakambal nitong hinagpis. Umiibig tayong kay lambot, pero sa pag nanais na wag gumuho ay nagiging bato. Hayaan mo dahil walang madali sa pag-ibig kundi ang mahulog, lahat ng kasunod paghihirapan mo.
Kaya’t pangatlo, makipaglaban…ang hamakin ang lahat makapiling ka lamang, sa laro ng pag-ibig hindi na bago ang masaktan, pero ang nagtatagumpay ay ang nagtiwalang kaya itong lampasan.
Pang-apat ikaw ay may karapatan na magdamdam, maghinanakit, maghangad naman ng kahit kaunting pagtugon at kapalit.
Pero panglima, ang tunay na umiibig ay hindi takot magpakumbaba…handa ang mga palad nitong hawakan ang sintas sa kanyang mukha, aminin ang kanyang mga kahinaan at pagkakamali, at kung ang nagmamahal ay nagmamahal parin…
Ang pang-anim ay magagawa hindi man ito maging madali…magpatawad, patawarin mo sya, iluklok ang pag-ibig ng higit sa mga pagkukulang ninyong dalawa at kung lahat ng mabanggit ay hindi na magawa pa…
Gawin ang pangpito, magparaya…isuko ang langit na minsang nilipad mo, hindi ka mahina, hindi ka duwag, ang mapagpalayang pag-ibig ay kuntentong makita sya sa alapaap.
Hanggang sa Pang-walo, maghintay…maghintay ka, may bago mang dumating o magbalik man sya sayo…
Dahil pangsiyam, magbabalik sya sayo…dahil ang nagmamahal ay parating magbabalik sayo, at pagsapit ng tagpong ito….gawin araw-araw ang ang Pang-sampu, manindigan ka…at hanggat iniibig mo sya at iniibig ka nya, umibig parati ng higit sa anumang dumating na sakit at hagupit.
Walang dahilan para bumitiw ka.
Maligayang pagdating sa iyong tahanan. Liparin ang langit ng magkasama, alam kong kay layo ng iyong nilakbay
pero ngayong nagmahal at minahal ka, sawakas nakauwi na.
— Juan Miguel Severo (OTWOL finale)
baratheonpilled
origamiaround
kianamaiart