Ang Babae sa Likod ng Maskara
TW: Rape, Sexual Harassment, Murder
Genre: Realistic Dark Fiction
Isang gabi, habang naglalakad si Teri pauwi galing sa trabaho, napadaan siya sa isang madilim na eskinita. Doon ay nakarinig siya ng sigaw ng babaeng nagmamakaawa at nanghihingi ng tulong.
“Tulong! Tulong!” malakas na sigaw ng babae.
Binalewala ito ni Teri dahil akala niya ay guni-guni at pagod lamang siya sa trabaho. Ngunit, sa pangalawang pagkakataon ay umulit pa ito.
“Tulong!” mas mahinang pagsigaw ng babae.
Agad itong pinuntahan ni Teri at laking gulat niya nang makita niya ang mga dugong nagkalat sa may gawing ibabang damit ng babae.
“Tama ba itong mga nakikita ko? Hindi, Teri. Guni-guni mo lang ito,” bulong at nanginginig na sambit ni Teri sa kanyang sarili.
“Ate! T-tulungan mo a-ak…,” hinang-hina at nauutal na pagtawag ng babae kay Teri hanggang sa ito’y nawalan na ng malay.
Mangiyak-ngiyak si Teri nang matauhan siyang hindi lamang pala siya nananaginip. Bagamat siya’y natatakot at tila nawala sa kanyang sarili, nilapitan niya ang babae upang bantayan ito at agad-agad din siyang tumawag ng tulong.
Habang si Teri ay naghihintay sa pagdating ng ambulansya, doon na nagpatuloy ang kanyang pagluha at binalot muli ng takot ang kanyang pagkatao. Nakita niyang sugatan ang pribadong parte ng katawan ng babae. Natagpuan din nito ang cellphone na nasa tabi ng babae. Ito ay nakabukas sa isang bidyo at doon ay nakita niya ang aktwal na mga nangyari sa babae.
Makikita sa bidyo ang isang grupo ng mga taong nakasuot ng takip sa mukha. Ang dalawa rito ay kalalakihan at ang isa naman ay batang babae na tila anak ng biktima. Sa bidyo, natunghayan ni Teri ang kalupitan at panggagahasang ginawa ng mga kalalakihan sa babae habang dinig na dinig din niyang pinapapanood ng mga ito sa anak ang lahat ng kahalayang kanilang ginagawa.
“Ano, bata? Walang magawa ‘yung nanay mo. Hindi niya kami kayang palagan,” natatawang sabi ng isang lalaki sa batang babae.
“Tama na! Tama na po! Layuan niyo ‘yung mama ko!” pumipiglas at nagmamakaawang sabi ng batang babae.
Tinigil na ni Teri ang panonood dahil hindi na niya nakayanan pa ang mga susunod na pangyayari. Nakilala niya na ang boses ay mula sa isang kapitbahay na maituturing na kagalang-galang, mapagbigay, at matulungin sa kapwa. Hindi siya makapaniwala na ang mga taong inaakala niyang tunay na mabuti ay kaya palang gumawa ng karahasan ng walang malalim na dahilan. Natulala na lamang siya at nagmadaling umalis nang marinig niyang paparating na ang ambulansya.
Sa katunayan, si Teri ay isang manager sa bangko at kilala bilang isa sa mga pinakamabait, masipag, at magaling sa kanilang trabaho. Kilala rin siya sa kanyang naging paaralan bilang isa sa pinakamatatalinong estudyanteng tinitingala ng halos lahat ng mga mag-aaral at guro. Siya rin ay kilala sa kanilang lugar bilang isang respetado, masiyahin, at mapagpatawad na tao.
Lingid sa kaalaman ng lahat, nasaksihan ni Teri ang pagnanakaw, panggagahasa, at pagpatay sa kanyang ina, na siyang nag-iisang kapamilya na lamang niya, noong siya ay 10 taong gulang pa lamang. Nakaligtas sa trahedyang iyon si Teri nang siya ay nakatakbo palabas ng kanilang bahay. Magmula noon, kinupkop na si Teri ng isang mayaman at mapagmahal na pamilyang inalagaan, binihisan, at pinag-aral siya. Bagamat labis siyang nalungkot at natakot sa nasaksihan nito, pinili pa rin nitong intindihin at patawarin ang mga taong pumaslang sa kanyang ina lalo na nang malaman nito na sila ay nagmula sa isang mahirap na komunidad at mga hindi nakapag-aral.
Dahil doon, sinubukan ni Teri na tumulong sa mga mahihirap at nangakong pag-iigihan niya ang lahat ng kanyang gagawin upang matiyak na hindi siya maloloko at maaabuso ng sinuman.
“Anong nangyari? Bakit? Bakit?!” sabi ni Teri sa kanyang sarili habang tumatakbo at hinahampas-hampas nito ang kanyang ulo pauwi sa kanilang dormitoryo.
Pagkauwi niya, nandoon ang kanyang kababatang si Vince na mukhang naparami nang pag-inom ng alak. Napansin niyang balisa si Teri at tila hindi mapakali.
“Anong nangyayari sa’yo? Okay ka lang ba?” tanong ni Vince. “Teri? Teri?!” paulit-ulit na pagtawag ni Vince, ngunit wala itong naririnig na sagot pabalik.
Tulala lamang si Teri at nakaupo ito sa kanyang kama na parang wala sa sarili. Ilang sandali pa ay lumapit na si Vince kay Teri at siya ay hinimas-himas nito. “Teresa, nagpapanggap ka lang bang walang naririnig? ‘Yan talaga ‘yung gusto ko eh, ‘yung hindi maingay,” ika ni Vince na parang nagtatangka ng masama sa kababata.
“Matagal ko na ‘tong gustong gawin sa’yo. Mga bata pa lamang tayo, gustong-gusto na kita. Dahil ‘di ka rin naman papalag, gawin na natin. Gusto mo rin naman ata,” sabi ni Vince kay Teri habang dahan-dahang itong lumalapit at sinisimulang tanggalin ang kanyang saplot.
“Palag? Anong hindi papalag? Tingin niyo ba hindi naman kayang pumalag?! Nagkakamali kayo! Isa ka rin palang huwad! Wala kayong karapatang pagsamantalahan kami!” sigaw ni Teri sabay abot sa boteng nasa ilalim ng kanyang kama.
Hinampas niya sa ulo si Vince at tumatawa habang pinagsasaksak ng mga bubog nito. Pinatay niya si Vince na kanyang naging mabuting kaibigan nang higit pa sa 13 taon, at hindi siya nakaramdam ng kahit anong pagsisisi.
Simula noon ay nagbago na ang pananaw ni Teri sa kanyang paligid. Ang mundong sinasabi niyang punong-puno ng pag-asa at kulay ay napalitan ng kadiliman at kasamaan. Nakita niya ang totoong budhi ng mga taong inakala niyang mabubuti.
Para saan pang siya’y nagpatawad, inayos ang sarili, at piniling magtiwala sa pagbabago? Maaari naman palang gawin ang mga ipinagbabawal ng mundong kinalakihan niya - ito man ay dala ng kahirapan, tanging kagustuhan o para sa kasiyahan lamang. Para sa kanya, wala naman palang pinipili ang kasamaan, mapa-kababata man o kaibigan.
Kinabukasan, pumasok na muli ito sa kanyang opisina dala-dala ang mga sandatang para sa mga taong hanggang tago na lamang sa kanilang mga maskarang mapagkunwari. “Ahhh, ganito pala ang pakiramdam maging isang doble-kara. Ako naman ang magsusuot ng maskara,” nakangiting sinambit ni Teri sa kanyang sarili habang pinupunasan ang mga kamay nitong nababahiran ng dugo’t poot.
vaporwave
kaledo-art
pixelskylines
yousharknotpass
blakekathryn
snowghoul
janainaart
germansingergirl
