I TRII DÌ DE LA #MÈRLA Quanti stòri che hoo sentii su la mèrla e i sò trii dì, beh, fra i tanti quèsta chì ve la cunti pròppi mì. Ona vòlta, dis la stòria, (voo on poo a spann e on poo a memòria) el piumagg di nòster mèrla l’era bianch come ‘na pèrla de confondes coi colomb: ‘dèss hinn negher, negher piomb. Ècco che on bèll dì succed che ona mèrla se conced on girètt su la città e la tacca a sgorattà. In la soa passeggiada con Genar la s’è incontrada. Barba bianca, vègg, cadent, la ghe dis irriverent: “ Oh Genar, di tò trii Sant, de la nev i trii mercant, de paura ghe n’hoo nò i mè fioeu volen giamò” De la nev, i trii mercant, ‘dèss v’el disi su l’istant, hinn trii vègg cont el barbon, pòrten frègg pròppi a monton: Sant Antòni del porscèll ch’el dersètt riva bèll, bèll; San Gaudenzi al vintiduu èccol lì rivà ‘nca lù e San Giuli al trentun, dòpo lù gh’è pù nissun. E intrattant che la va via, senza tant diplomazia, a Genar ghe da ona sbèrla cont el digh: “ Cippen i mèrla!” El Genar el s’è inrabii ma el gh’aveva anmò trii dì: vintinoeuv, trenta e trentun. Senza dì nient a nissun l’ha cercaa la soa vendètta, l’ha traa insèma ona ricètta: frègg con nev e gel che crèss come mai l’era succèss. Pòra mèrla, coi merlòtt l’ha tòlt sù, l’ha faa fagòtt e l’è andada a cercà on camin sul tècc di cà. Per trìì dì l’è stada lì coi sò fioeu tutt’inranghii. Quand Genar l’ha vist sul tècc ‘sti usèi tucc pien de frègg ghe da cors a la vendètta el ghe dis con ‘na vosètta a la mèrla on po’ biraga: “ ‘Dèss te la doo mì la paga, t’el foo mì ciappà on bèll sgagg, el candor del tò piumagg el color el cambiarà: ‘me carisna lù ‘l sarà!” E de fatt, passaa trii dì, coi sò fioeu anmò inranghii, quand l’è foeura dal camin a l’è pù color albin, el color l’è tutt compatt color negher ‘me on scorbatt ! Carlètto Oblò #barni #gennaio #giornidellamerla (presso Barni)
