بما إني نفسي راحت لحاجة جديدة النهارده وكل شوية يجي على بالي الماك أرابيا والمشكلة بقى إن ده صعب تحقيقه علشان اتشال من على المنيو أصلاً الله يسامحهم 🥲
قررت هوثق بقى مغامرات العته اللي كان بيحصلي الفترة اللي فاتت وعدم اتساق شهيتي مع إستيعاب معدتي وحقيقي دي مآساة :')
أول موقف كان لما شميت المخلل في السوبرماركت وأنا أصلاً مباكلش المخلل، بس ريقي جري وحسيت إن ريحته جميلة اوي وبقى نفسي فيه.
بعدين لما روحت البيت يومها نفسي راحت اوي لشيبسي بطعم الكباب، اللي في العادي مبحبش ريحته حتى وكان نفسي فيه جداً.
تاني يوم كان نفسي اوي في سلطة تونة الساعة 2 بالليل (برده مبحبهاش)
بعدها حرفياً في يوم بالليل دخلت المطبخ فتحت علبة المخلل وطلعت حتة أكلتها كده بدون أي مقدمات، ودي كانت ردة فعلي وقتها وانا بقول مممم sooo goood 😆
بعدها جه على بالي بقى في يوم كده برده بالليل بيتزا وبلح الشام وساندوتش كبدة وكنت بتحف صحابي كل مرة بإبداعاتي دي وهما ماسكيلني انتي مش طبيعية احنا شاكين فيكي 😂
المهم إني قبل كده مكنش عندي مشكلة علشان مكنتش بجوع، لكن دلوقتي بقى كل شوية نفسي تروح لأكل شكل وبجد ببقي جعانة جداً ولو جربت آكل أي حاجة مهما كانت بسيطة بطني بتوجعني اوي وتفضل تعباني يومين تلاتة :/
أنا عايزة آكل 😭
