tolosa, carcassona, castras, albi, tolosa
bien ceo empobinamos viaxe destín carcassona, la ciutat de carcassona d'esta tierra en continua tensión énte tres reinos, ducaos y condaos soberanos, na que la ilesia católica de roma teoloxizó que'l fueu decidiría énte la xente bono y la xente malo. carcassona representa munches cuestiones, la so relevancia hestórica sobrepasa les dos muralles de la ciutat, y énte elles dalgunes que nesti llau de los pirineos s'oculta como ye la relevancia y influencia de la corona d'aragón en tou'l territoriu de llingua ocitana, el país d'oc.
en carcasona decidióse'l futuru del oeste mediterraneu, en carcasona se frenó la espansión continental de la corona d'aragón y con ello frustóse la creación d'una realidá estatal que sirviría de contrapesu a les corones francesa y castellana. la hestoria nel estáu español escaez estes, y munches otres cuestiones, faise centrípeta alredor de la corona castiella y lo mesmo que los 700 años d'al-andalus la corona d'aragón, como l'asturiana o la de nafarroa, pasa a ser un simple apéndiz tendente a la unidá de la península ibérica. la realidá ye otra y lo mesmo que francia se consolidó mediante conquistes el reinu d'españa fizo esáctamente lo mesmo, anque depués se niegue baxo un discursu imperialista de corte constitucional.
retornando a la ciutat de carcassona, anguaño'l castiellu-ciudá ye una especie de parque temáticu, mercáu medieval, tiendas de souvenirs, camisetes, chapes, imanes, pines, espades, pistoles, escopetes, restauranes, museos de la tortura... lo que pel norte peninsular conocemos como una santillana del mar. sicasí la visita a esti sitiu históricu ye inescusable y a pesar del ruidu entovía resuenen los ecos de les batalles medievales.
saldríemos yá tarde de carcassona poniendo camín de castras ciudá de nacencia de joan jaurés, sindicalista y políticu socialista asesináu al enfrentase a la primer guerra mundial, el partíu socialista francés taba a favor y mesmo jaurés como otros militantes entamaben la construcción d'otru proyectu acorde col marxismu revolucionariu. jaurés ye tamién el fundador de l'humanité nos sos entamos venceyáu al psf y anguaño al pcf. la plaza mayor de castras lleva'l nome precisamente de joan jaurés. castras amás ye una ciudá perguapa, armoniosa y na que los horarios de la comida franceses se cumplen dafechu, atravesada pol rio agoût llamen l'atención los portones embarcaderos de les cases de la ribera. tamién el muséu de la ciudá denomáu goya que cuenta con obres del propiu goya o picasso asina como unos imponentes xardinos recreación de los del palaciu real de versalles. xusto al llau ta'l tetaru de la comedia, edificiu austeru pero de gran porte.
y de castras a albí, otra ciudá famosa y d'importancia histórica que daría nome a unes cruzaes que baxo un mantu relixosu tapecíen el políticu d'evitar la espansión de la corona d'aragón pel territoriu de langue d'oc o ocitania. asina la ilesia católica romana afitaba'l so poder y política d'atemorización sobre la población y sobre la nobleza mediante la pena d'excomunión que significaba dafechu la desposesión de cualesquier territoriu y la espulsión del xardín de la vida eterna y demás cuestiones vinculaes a los asuntos mundanos y espirituales.
albí tien una imponente catedral, productu non de la casualidá si non de la conquista, representativa del poder de la ilesia, de la dominación eclesiástica, enllena de frescos representando visiones del cielu católicu, del infiernu o gárgoles fantástiques feches cola sola intención d'atemorizar. sicasí el conxuntu, amás de lo didáutico, ye más qu'aprovechable. una pena nun poder ver bona parte de los frescos por mor de la cellebración de la misa (datu: los franceses católicos al rezar el pa nuesu llevanten los brazos n'aspa como esperando la llegada del espíritu santu)
vuelta pela ciudá d'albí onde naciera toulouse lautrec, edificios de lladrieyu colos pontones a la vista y la clásica estructura de ciudá medieval que contrasta col bulevar que da la bienllegada a la ciudá que parez valga como frontera ente dos mundos, posiblemente diferenciaos físicamente cola llegada de la industrialización.
yá tarde na nueche pondríemos camín de tolosa, una nueche mala como poques, lluna nueva, tormentes, cayendo agua ensin parar.